ਸਮਾਜ ਦੀ ਤਰੱਕੀ, ਖੁਸ਼ਹਾਲੀ ਅਤੇ ਮਨੁੱਖੀ ਜੀਵਨ ਦੇ ਕਲਿਆਣ ਲਈ ਮਹਾਰਾਜ ਭੂਰੀਵਾਲੇ ਗਰੀਬਦਾਸੀ ਸੰਪਰਦਾਇ ਦੀ ਗੁਰਗੱਦੀ ਨੇ ਜੋ ਯੋਗਦਾਨ ਪਾਇਆ ਹੈ, ਉਸ ਦਾ ਸ਼ਬਦਾਂ ਵਿਚ ਬਿਆਨ ਕਰਨਾ ਔਖਾ ਹੈ। ਇਸ ਸੰਪਰਦਾਇ ਨੇ ਜੀਵਾਂ ਦੇ ਕਲਿਆਣ ਦੇ ਨਾਲ-ਨਾਲ ਉਨ੍ਹਾਂ ਨੂੰ ਸਿੱਖਿਆ, ਚੰਗੀ ਸੋਚ, ਸਾਦਗੀ, ਪਰਉਪਕਾਰਤਾ ਆਦਿ ਅਜਿਹੇ ਗੁਣਾਂ ਦੇ ਧਾਰਨੀ ਬਣਾਇਆ ਹੈ। ਮਹਾਰਾਜ ਭੂਰੀਵਾਲੇ ਗਰੀਬਦਾਸੀ ਸੰਪਰਦਾਇ ਦੇ ਮੋਢੀ ਮਹਾਪੁਰਸ਼ ਮਹਾਰਾਜ ਬ੍ਰਹਮ ਸਾਗਰ ਜੀ ਸਨ ਜਿਨ੍ਹਾਂ ਨੂੰ ਭੂਰੀਵਾਲੇ ਤਖੱਲਸ ਨਾਲ ਲੋਕ ਪੁਕਾਰਦੇ ਸਨ। ਮਹਾਰਾਜ ਬ੍ਰਹਮ ਸਾਗਰ ਜੀ ਭੂਰੀਵਾਲਿਆਂ ਦਾ ਜਨਮ ਖਾਲਸੇ ਦੀ ਪਵਿੱਤਰ ਧਰਤੀ ਸ੍ਰੀ ਅਨੰਦਪੁਰ ਸਾਹਿਬ ਤਹਿਸੀਲ ਦੇ ਪਿੰਡ ਰਾਮਪੁਰ (ਦੂਣੀ) ਵਿਖੇ ਹੋਇਆ। ਮਹਾਰਾਜ ਬ੍ਰਹਮ ਸਾਗਰ ਜੀ ਭੂਰੀਵਾਲਿਆਂ ਨੇ ਮਹਾਰਾਜ ਸਤਿਗੁਰੂ ਕਬੀਰ ਸਾਹਿਬ ਜੀ, ਮਹਾਰਾਜ ਜਗਤ ਗੁਰੂ ਅਚਾਰੀਆ ਗਰੀਬਦਾਸ ਜੀ ਦੁਆਰਾ ਰਚਿਤ ਗੁਰਬਾਣੀ ਦਾ ਉਪਦੇਸ਼ ਘਰ-ਘਰ ਪਹੁੰਚਾਇਆ, ਜਿਸ ਨਾਲ ਸਮਾਜ ਵਿਚ ਇਕ ਖੁਸ਼ਹਾਲੀ ਦਾ ਮੁੱਢ ਬੱਝ ਗਿਆ ਸੀ। ਮਹਾਰਾਜ ਭੂਰੀਵਾਲਿਆਂ ਨੇ ਮਹਾਰਾਜ ਲਾਲ ਦਾਸ ਜੀ ਭੂਰੀਵਾਲਿਆਂ ਨੂੰ ਇਸ ਗੁਰਗੱਦੀ ਪ੍ਰੰਪਰਾ ਦੇ ਦੂਸਰੇ ਗੱਦੀਨਸ਼ੀਨ ਦੀ ਵਾਗਡੋਰ ਸੰਭਾਲੀ।
ਮਹਾਰਾਜ ਲਾਲ ਦਾਸ ਜੀ ਭੂਰੀਵਾਲਿਆਂ ਦਾ ਅਵਤਾਰ ਜ਼ਿਲਾ ਲੁਧਿਆਣੇ ਦੇ ਇਤਿਹਾਸਕ ਪਿੰਡ ਰਕਬਾ ਧਾਮ (ਨੇੜੇ ਮੁੱਲਾਂਪੁਰ ਦਾਖਾ) ਵਿਖੇ ਜੱਟ ਘਰਾਣੇ ਦੇ ਬੱਲ ਪਰਿਵਾਰ ਵਿਚ ਮਾਤਾ ਸ਼੍ਰੀਮਤੀ ਪ੍ਰਤਾਪ ਕੌਰ ਦੀ ਕੁੱਖੋਂ ਸ. ਕਾਹਨ ਸਿੰਘ ਬੱਲ ਦੇ ਘਰ ਬਿਕ੍ਰਮੀ ਸੰਮਤ 1946 ਨੂੰ ਪੋਹ ਸੁਦੀ ਦੀ ਦੂਜ ਵਾਲੇ ਦਿਨ ਹੋਇਆ।
ਆਪ ਜੀ ਮਹਾਰਾਜ ਬ੍ਰਹਮ ਸਾਗਰ ਜੀ ਭੂਰੀਵਾਲਿਆਂ ਦੇ ਸੰਪਰਕ ਵਿਚ ਆਉਣ ਤੋਂ ਬਾਅਦ ਗ੍ਰਹਿਸਥੀ ਜੀਵਨ ਤਿਆਗ ਕੇ ਦੁਨਿਆਵੀ ਕਲਿਆਣ ਲਈ ਨਾਮ-ਬਾਣੀ ਸਿਮਰਨ ਨਾਲ ਲੋਕਾਂ ਨੂੰ ਜੋੜਦੇ ਗਏ। ਇਸ ਦੌਰਾਨ ਆਪ ਨੇ ਉੱਤਰੀ ਭਾਰਤ ਦੇ ਵੱਖ-ਵੱਖ ਸੂਬਿਆਂ ਯੂ. ਪੀ., ਰਾਜਸਥਾਨ, ਹਿਮਾਚਲ ਪ੍ਰਦੇਸ਼, ਜੰਮੂ-ਕਸ਼ਮੀਰ, ਹਰਿਆਣਾ ਆਦਿ ਦੇ ਨਾਲ-ਨਾਲ ਪੰਜਾਬ ਦੇ ਵੀ ਕੰਢੀ, ਦੂਣੀ, ਦੁਆਬਾ, ਬੀਤ ਆਦਿ ਖੇਤਰਾਂ ਵਿਚ ਲੋਕਾਂ ਨੂੰ ਸਾਦਗੀ, ਸਲੀਕਾ, ਸਿਮਰਨ ਦੇ ਨਾਲ ਜੋੜਿਆ ਤੇ ਵਹਿਮਾਂ-ਭਰਮਾਂ ਤੋਂ ਮੁਕਤੀ ਦਿਵਾਈ। ਆਪ ਜੀ ਬਹੁਤ ਹੀ ਸਰਲ ਸ਼ਬਦਾਂ ਵਿਚ ਥੋੜ੍ਹਾ ਬੋਲ ਕੇ ਲੋਕਾਂ ਨੂੰ ਜੀਵਨ ਜਿਊਣ ਦੀ ਜਾਚ ਸਿਖਾ ਗਏ। 14 ਅਗਸਤ 1975 ਨੂੰ ਆਪ ਜੀ ਜੋਤੀ-ਜੋਤ ਸਮਾ ਗਏ।
ਆਪ ਜੀ ਨੇ ਆਪਣੀ ਗੁਰਗੱਦੀ ਪ੍ਰੰਪਰਾ ਅਨੁਸਾਰ ਮਹਾਰਾਜ ਭੂਰੀਵਾਲੇ ਗਰੀਬਦਾਸੀ ਸੰਪਰਦਾਇ ਦੇ ਉੱਚਕੋਟੀ ਦੇ ਸੰਤ ਮਹਾਪੁਰਸ਼ ਮਹਾਰਾਜ ਬ੍ਰਹਮਾ ਨੰਦ ਜੀ ਭੂਰੀਵਾਲਿਆਂ (ਗਊਆਂ ਵਾਲਿਆਂ) ਨੂੰ ਆਪਣਾ ਉੱਤਰਾਧਿਕਾਰੀ ਨਿਯੁਕਤ ਕੀਤਾ। ਮਹਾਰਾਜ ਬ੍ਰਹਮਲੀਨ ਬ੍ਰਹਮਾ ਨੰਦ ਜੀ ਭੂਰੀਵਾਲਿਆਂ (ਤੀਸਰੇ ਮੁਖੀ ਸੰਪਰਦਾਇ) ਨੇ ਦੇਸ਼ ਦੇ ਵੱਖ-ਵੱਖ ਇਲਾਕਿਆਂ ਵਿਚ ਸਿੱਖਿਆ, ਅਧਿਆਤਮਿਕਤਾ, ਸਮਾਜ ਸੇਵਾ ਆਦਿ ਦਾ ਅਜਿਹਾ ਬੀਜ ਬੀਜਿਆ ਤੇ ਪੰਜਾਬ ਦੇ ਅਣਗਿਣਤ ਲੋਕਾਂ ਦਾ ਕਲਿਆਣ ਕੀਤਾ ਤੇ ਪੰਜ ਡਿਗਰੀ ਕਾਲਜਾਂ, ਕਈ ਸਕੂਲਾਂ, ਗਊਸ਼ਾਲਾਵਾਂ, ਅੰਨ ਖੇਤਰਾਂ, ਸਮਾਜ ਸੇਵੀ ਕਾਰਜਾਂ, ਵਾਤਾਵਰਣ ਸੰਭਾਲ ਆਦਿ ਕਾਰਜਾਂ ਨਾਲ ਲਹਿਰਾਂ-ਬਹਿਰਾਂ ਲਾ ਦਿੱਤੀਆਂ।
ਇਸ ਗੁਰਗੱਦੀ ਪ੍ਰੰਪਰਾ ਅਨੁਸਾਰ ਮਹਾਰਾਜ ਗਊਆਂ ਵਾਲਿਆਂ ਨੇ ਮਹਾਰਾਜ ਵੇਦਾਂਤ ਅਚਾਰੀਆ ਸਵਾਮੀ ਚੇਤਨਾ ਨੰਦ ਜੀ ਭੂਰੀਵਾਲਿਆਂ ਨੂੰ ਗੁਰਗੱਦੀ ਸੰਪਰਦਾਇ ਦੇ ਚੌਥੇ ਮੁਖੀ ਦੀ ਚਾਦਰ ਸੰਭਾਲੀ ਸੀ। ਇਸ ਗੁਰੂ ਪ੍ਰੰਪਰਾ ਅਨੁਸਾਰ ਵੇਦਾਂਤ ਅਚਾਰੀਆ ਸਵਾਮੀ ਚੇਤਨਾ ਨੰਦ ਮਹਾਰਾਜ ਭੂਰੀਵਾਲਿਆਂ (ਵਰਤਮਾਨ ਮੁਖੀ ਸੰਪਰਦਾਇ) ਦੀ ਰਹਿਨੁਮਾਈ ਹੇਠ ਤਿੰਨ ਰੋਜ਼ਾ ਜੋੜ ਮੇਲਾ (ਜਨਮ ਉਤਸਵ ਮਹਾਰਾਜ ਲਾਲ ਦਾਸ ਜੀ ਭੂਰੀਵਾਲਿਆਂ) ਪਿਛਲੇ ਕਈ ਦਹਾਕਿਆਂ ਤੋਂ ਹੁਣ ਵੀ ਸ਼ਾਨੋ-ਸ਼ੌਕਤ ਨਾਲ ਮਨਾਇਆ ਜਾ ਰਿਹਾ ਹੈ। ਸਮਾਗਮ ਦੇ ਪਹਿਲੇ ਦੋ ਦਿਨ ਰਾਤੀਂ ਸਤਿਸੰਗ ਤੇ ਕੀਰਤਨ ਹੋਵੇਗਾ। 23 ਦਸੰਬਰ ਨੂੰ ਜਗਤ ਗੁਰੂ ਅਚਾਰੀਆ ਗਰੀਬਦਾਸ ਮਹਾਰਾਜ ਜੀ ਦੀ ਅਮ੍ਰਿਤਮਈ ਗੁਰਬਾਣੀ ਦੇ ਭੋਗ ਸੰਪਰਦਾਇ ਦੇ ਵਰਤਮਾਨ ਮੁਖੀ ਵੇਦਾਂਤ ਅਚਾਰੀਆ ਸਵਾਮੀ ਚੇਤਨਾ ਨੰਦ ਜੀ ਭੂਰੀਵਾਲੇ ਪਾਉਣਗੇ। ਇਸ ਮੌਕੇ 'ਤੇ ਸਤਿਸੰਗ ਤੇ ਪ੍ਰਵਚਨ ਵੀ ਕਰਨਗੇ।
—ਪਰਮ ਹਰੀ ਸੌਦਾਗਰ ਬ੍ਰਹਮਪੁਰੀ
ਭਲਾ ਆਪਣੇ ਧਰਮ ਦੀ ਪਾਲਣਾ ਵਿਚ ਹੈ
NEXT STORY 
