ਜਲੰਧਰ-'ਰੱਬਾ ਕਾਹਨੂੰ ਇਹ ਘੜੀਆਂ ਆਈਆਂ', ਕਿਉਂ ਸਾਡੇ ਆਪਣਿਆਂ ਨੂੰ 2015 ਦਾ ਸਾਲ ਦੇਖਣਾ ਨਸੀਬ ਨਹੀਂ ਹੋਇਆ, ਇਹ ਵਿਰਲਾਪ ਹੈ ਉਨ੍ਹਾਂ ਪਰਿਵਾਰਾਂ ਦਾ, ਜਿਨ੍ਹਾਂ ਦੇ ਆਪਣਿਆਂ ਨੂੰ 2014 ਦਾ ਸਾਲ ਖਾ ਗਿਆ। ਸਾਲ 2014 ਖੁਸ਼ੀਆਂ ਅਤੇ ਗਮਾਂ ਦਾ ਰਲਿਆ-ਮਿਲਿਆ ਸਾਲ ਰਿਹਾ, ਜਿੱਥੇ ਕੁਝ ਲੋਕਾਂ ਲਈ ਇਹ ਸਾਲ ਬਹੁਤ ਖੁਸ਼ੀ ਭਰਿਆ ਹੈ, ਉੱਥੇ ਹੀ ਕਈ ਲੋਕਾਂ ਨੂੰ ਇਹ ਸਾਲ ਗਮ ਦੇ ਹੰਝੂ ਦੇ ਗਿਆ, ਜੋ ਕਦੇ ਨਹੀਂ ਰੁਕਣ ਵਾਲੇ। ਸਾਲ 2014 'ਚ ਪੰਜਾਬ ਦੇ ਦੋਆਬਾ ਇਲਾਕੇ ਦੇ ਵਿਚ ਹੋਏ ਕੁਝ ਕਤਲਾਂ ਦੀ ਦਾਸਤਾਨ ਪੜ੍ਹ ਹਰ ਕੋਈ ਰੋ ਪਵੇਗਾ।
ਹਵੇਲੀ ਕਤਲਕਾਂਡ : ਸਥਾਨਕ ਫਗਵਾੜਾ ਰੋਡ 'ਤੇ ਨੌਜਵਾਨ ਰੋਹਿਤ ਸੱਭਰਵਾਲ 22 ਅਗਸਤ, 2014 ਦਿਨ ਸ਼ੁੱਕਰਵਾਰ ਨੂੰ ਬੜੀ ਬੇਰਹਿਮੀ ਨਾਲ ਕਤਲ ਕਰ ਦਿੱਤਾ ਗਿਆ। ਰੋਹਿਤ ਆਪਣੇ ਦੋਸਤ ਦੀ ਬਰਥ-ਡੇ ਪਾਰਟੀ 'ਚ ਗਿਆ ਸੀ। ਪੁਲਸ ਨੇ ਦੋਸ਼ੀਆਂ ਨੂੰ ਗ੍ਰਿਫਤਾਰ ਕਰਨ ਦੀ ਬਜਾਏ ਉਲਟਾ ਰੋਹਿਤ ਦੇ ਦੋਸਤਾਂ 'ਤੇ ਹੀ ਪਰਚਾ ਦਰਜ ਕਰ ਦਿੱਤਾ ਅਤੇ ਉਸ ਦੇ ਪਰਿਵਾਰ 'ਤੇ ਰਾਜ਼ੀਨਾਮੇ ਦਾ ਦਬਾਅ ਪਾਇਆ ਜਾਣ ਲੱਗਿਆ।
ਜੌਨ ਮੱਲੀ ਕਤਲਕਾਂਡ : ਵੱਡੇ ਭਰਾ ਜਸਕਰਨ ਉਰਫ ਕਰਨ ਮੱਲੀ ਤੋਂ ਬਦਲਾ ਲੈਣ ਲਈ ਰੌਕੀ, ਵਿੱਕੀ ਸਈਪੁਰੀਆ ਅਤੇ ਹੋਰਾਂ ਨੇ ਜਸਕਰਨ ਦੇ ਛੋਟੇ ਭਰਾ ਜੌਨ ਮੱਲੀ ਦਾ 26 ਨਵੰਬਰ, 2014 ਨੂੰ ਅਰਬਨ ਅਸਟੇਟ 'ਚ ਬੇਰਹਿਮੀ ਨਾਲ ਕਤਲ ਕਰ ਦਿੱਤਾ। ਜਸਕਰਨ ਨਾਲ ਰੌਕੀ ਦੀ ਪੁਰਾਣੀ ਰਜਿੰਸ਼ ਸੀ, ਇਸੇ ਸਾਜਿਸ਼ ਅਧੀਨ ਉਸ ਨੇ ਜੌਨ ਦਾ ਕਤਲ ਕਰ ਦਿੱਤਾ। ਫਿਲਹਾਲ ਪੁਲਸ ਨੇ ਰੌਕੀ ਅਤੇ ਵਿੱਕੀ ਸਈਪੁਰੀਆ ਨੂੰ ਹਿਰਾਸਤ 'ਚ ਲਿਆ ਅਤੇ ਉਸ ਦੇ ਬਾਕੀ ਸਾਥੀਆਂ ਤੋਂ ਵੀ ਇਸ ਮਾਮਲੇ 'ਚ ਪੁੱਛਗਿੱਛ ਕਰ ਰਹੀ ਹੈ।
ਅਰਜੁਨ ਕਤਲਕਾਂਡ : ਸ਼ਹਿਰ ਦੇ ਅਲੀ ਮੁਹੱਲੇ 'ਚ ਅਰਜੁਨ ਨਾਂ ਦੇ ਨੌਜਵਾਨ ਦਾ 16 ਜੂਨ, 2014 ਨੂੰ ਕਤਲ ਕਰ ਦਿੱਤਾ ਗਿਆ ਅਤੇ ਉਸ ਦੇ ਦੋਸਤ ਨੂੰ ਬੁਰੀ ਤਰ੍ਹਾਂ ਜ਼ਖਮੀ ਕਰ ਦਿੱਤਾ। ਪੁਲਸ ਨੇ ਅਰਜੁਨ ਦੇ ਕਤਲ ਦੇ ਦੋਸ਼ੀ ਅਕਾਲੀ ਨੇਤਾ ਸੁਖਦੇਵ ਕਲਿਆਣ ਉਰਫ ਚਿੜੀ ਦੇ ਬੇਟੇ ਅਤੇ ਭਤੀਜੇ ਨੂੰ ਪੁਲਸ ਨੇ ਸਿਟੀ ਰੇਲਵੇ ਸਟੇਸ਼ਨ ਤੋਂ ਕਾਬੂ ਕਰ ਲਿਆ।
ਇਨ੍ਹਾਂ ਮ੍ਰਿਤਕਾਂ ਦੇ ਪਰਿਵਾਰ ਸਾਰੀ ਉਮਰ 2014 ਦਾ ਇਹ ਸਾਲ ਨਹੀਂ ਭੁੱਲ ਸਕਣਗੇ, ਜੋ ਉਨ੍ਹਾਂ ਨੂੰ ਉਮਰਾਂ ਦੇ ਰੋਣੇ ਪਾ ਗਿਆ। ਹਰ ਖੁਸ਼ੀ ਦੇ ਸਮੇਂ 2014 ਦਾ ਸਾਲ ਉਨ੍ਹਾਂ ਦੀਆਂ ਅੱਖਾਂ ਰੜਕੇਗਾ, ਜੋ ਉਨ੍ਹਾਂ ਦੀ ਝੋਲੀ ਸਾਰੀ ਉਮਰ ਦਾ ਰੋਣਾ ਪਾ ਗਿਆ।
ਸੌਂ ਰਹੇ ਪਤੀ ਤੋਂ ਰਜਾਈ ਖਿੱਚੀ, ਕੁਝ ਅਜਿਹਾ ਬੋਲੀ ਕਿ ਖੌਲ ਗਿਆ ਪਤੀ ਦਾ ਸੀਨਾ (ਵੀਡੀਓ)
NEXT STORY 
