ਸਾਲ 2014 ਮੈਡੀਕਲ ਖੇਤਰ 'ਚ ਬਹੁਤ ਹੀ ਕਲੰਕਿਤ ਵਰ੍ਹਾ ਸਿੱਧ ਹੋਇਆ ਹੈ। ਡਾਕਟਰੀ ਕਿੱਤੇ ਨੂੰ ਦਾਗ਼ਦਾਰ ਕਰਕੇ ਮਨੁੱਖਤਾ ਨੂੰ ਪਿਛਾਂਹ ਧੱਕਣ ਅਤੇ ਪੈਸਾ ਕਮਾਉਣ ਦੇ ਲਾਲਚੀ ਡਾਕਟਰਾਂ ਦਾ ਅਸਲ ਚਿਹਰਾ ਇਸ ਸਾਲ ਡਾਕਟਰ ਨੂੰ ਰੱਬ ਦਾ ਦੂਜਾ ਰੂਪ ਮੰਨਣ ਵਾਲੇ ਲੋਕਾਂ ਦਾ ਭਰੋਸਾ ਤੋੜ ਗਿਆ। ਇਸ ਤੋਂ ਵੱਧ ਦੁਖ ਵਾਲੀ ਗੱਲ ਹੋਰ ਕੀ ਹੋ ਸਕਦੀ ਹੈ ਕਿ ਪੈਸੇ ਲੈ ਕੇ ਭਵਿੱਖ ਦੇ ਡਾਕਟਰਾਂ ਨੂੰ ਨਕਲੀ ਡਿਗਰੀਆਂ ਫੜਾ ਦਿੱਤੀਆਂ ਜਾਂਦੀਆਂ ਹਨ ਅਤੇ ਉਹ ਲੋਕਾਂ ਦੀ ਜ਼ਿੰਦਗੀ ਨਾਲ ਇੰਝ ਖੇਡਦੇ ਹਨ, ਜਿਵੇਂ ਨਿੱਕੇ ਨਿਆਣਿਆਂ ਨੂੰ ਗੁੱਡੇ-ਗੁੱਡੀਆਂ ਫੜਾ ਦਿੱਤੇ ਜਾਣ। ਕਦੇ ਪੀ.ਐੱਮ.ਟੀ. ਪੇਪਰ ਲੀਕ ਹੋਣ ਦੀਆਂ ਖ਼ਬਰਾਂ ਸੁਣਨ ਨੂੰ ਮਿਲੀਆਂ ਤਾਂ ਕਦੇ ਡਾਕਟਰਾਂ ਵਲੋਂ ਵਰਤੀ ਅਣਗਹਿਲੀ ਦੇ ਸ਼ਿਕਾਰ ਮਾਸੂਮ ਲੋਕਾਂ ਦਾ ਦੁਖ। ਇਸ ਸਾਲ ਪੰਜਾਬ ਨੂੰ ਜੇਕਰ ਅਜਿਹੀਆਂ ਅਣਗਹਿਲੀਆਂ 'ਚ ਸਭ ਤੋਂ ਉੇੱਪਰ ਰੱਖਿਆ ਜਾਵੇ ਤਾਂ ਕੁਝ ਗਲਤ ਨਹੀਂ ਹੋਵੇਗਾ। ਝਾਤ ਮਾਰਦੇ ਹਾਂ ਪੰਜਾਬ 'ਚ ਸਾਲ 2014 ਦੇ ਵੱਡੇ ਮੈਡੀਕਲ ਕਾਂਡਾਂ ਦੀ।
ਲੁਧਿਆਣਾ : ਡਾਕਟਰਾਂ ਦੀ ਲਾਪਰਵਾਹੀ ਦੀ ਇਕ ਉਦਾਹਰਣ ਇਥੋਂ ਦੇ ਸਿਵਲ ਹਸਪਤਾਲ 'ਚ ਉਸ ਸਮੇਂ ਦੇਖਣ ਨੂੰ ਮਿਲੀ ਜਦੋਂ ਇਕ ਤੋਂ ਬਾਅਦ ਇਕ ਛੇ ਨਵਜੰਮੇ ਬੱਚਿਆਂ ਨੂੰ ਮੌਤ ਨੇ ਆਪਣੇ ਕਲਾਵੇ 'ਚ ਲੈ ਲਿਆ। ਇਨ੍ਹਾਂ ਬੱਚਿਆਂ ਦੇ ਮਾਪਿਆਂ ਦਾ ਕਸੂਰ ਸਿਰਫ ਇੰਨਾ ਸੀ ਕਿ ਉਹ ਮਹਿੰਗੇ ਜਾਂ ਪ੍ਰਾਈਵੇਟ ਹਸਪਤਾਲਾਂ 'ਚ ਜਾਣ ਦੀ ਹੈਸੀਅਤ ਨਹੀਂ ਰੱਖਦੇ ਸਨ, ਜਿਸ ਦਾ ਹਰਜ਼ਾਨਾ ਉਨ੍ਹਾਂ ਨੂੰ ਆਪਣੇ ਨਵਜੰਮੇ ਬੱਚਿਆਂ ਦੀ ਮੌਤ ਵਜੋਂ ਭੁਗਤਣਾ ਪਿਆ। ਗੁਰਦਾਸਪੁਰ ਤੋਂ 'ਆਪ' ਪਾਰਟੀ ਦੇ ਕਨਵੀਨਰ ਸੁੱਚਾ ਸਿੰਘ ਛੋਟੇਪੁਰ ਨੇ ਇਸ ਕਾਂਡ ਪਿੱਛੋਂ ਕਿਹਾ ਕਿ ਸਿਹਤ ਵਿਭਾਗ ਦੀ ਇਹ ਸਭ ਤੋਂ ਮੰਦਭਾਗੀ ਘਟਨਾ ਹੈ। ਆਪ ਪਾਰਟੀ ਨੇ ਇਸ ਪਿੱਛੋਂ ਪੰਜਾਬ ਦੇ ਸਿਹਤ ਮੰਤਰੀ ਸੁਰਜੀਤ ਕੁਮਾਰ ਜਿਆਨੀ ਅਤੇ ਮੁਖ ਸੰਸਦੀ ਸਕੱਤਰ ਨਵਜੋਤ ਕੌਰ ਦੇ ਅਸਤੀਫੇ ਦੀ ਮੰਗ ਕੀਤੀ ਸੀ। ਹਾਲਾਂਕਿ ਇਸ ਲਈ ਜ਼ਿੰਮੇਵਾਰ ਡਾਕਟਰ ਅਲਕਾ ਮਿੱਤਲ ਨੇ ਆਪਣਾ ਪੱਖ ਰੱਖਦਿਆਂ ਕਿਹਾ ਕਿ ਸਿਵਲ ਹਸਪਤਾਲ ਵਿਖੇ ਹਰ ਮਹੀਨੇ 5 ਸੌ ਤੋਂ ਵਧੇਰੇ ਜਣੇਪੇ ਹੁੰਦੇ ਹਨ ਅਤੇ ਇਸ ਲਈ ਸਿਰਫ ਤਿੰਨ ਗਾਇਨੀ ਡਾਕਟਰ ਹਨ, ਜਦਕਿ ਦੂਜੇ ਪਾਸੇ ਨਰਸਾਂ ਦਾ ਕਹਿਣੈ ਕਿ ਜਣੇਪਿਆਂ ਦਾ ਸਾਰਾ ਕੰਮ ਉਹੀ ਕਰਦੀਆਂ ਅਤੇ ਡਾਕਟਰ ਦੋਹਰੀਆਂ ਕਮਾਈਆਂ ਕਰਕੇ ਐਸ਼ ਕਰਦੇ ਹਨ।
ਚੰਡੀਗੜ੍ਹ : ਲਾਪਰਵਾਹੀ ਦੀ ਇਕ ਹੋਰ ਮਿਸਾਲ ਚੰਡੀਗੜ੍ਹ ਦੇ ਪੀ.ਜੀ.ਆਈ. 'ਚ ਉਸ ਸਮੇਂ ਦੇਖਣ ਨੂੰ ਮਿਲੀ ਜਦੋਂ ਇਥੋਂ ਦਾ ਸਟਾਫ ਸਰਦੀਆਂ ਦੀਆਂ ਛੁੱਟੀਆਂ 'ਤੇ ਚਲਾ ਗਿਆ ਜਿਸ ਕਾਰਨ ਮਰੀਜ਼ਾਂ ਦੀ ਪਰੇਸ਼ਾਨੀ ਵੱਧ ਗਈ। ਇਥੋਂ ਦੇ ਆਰਥੋਪੈਡਿਕ ਦੀ ਓ.ਪੀ.ਡੀ. 'ਚ ਇਹ ਪਰੇਸ਼ਾਨੀ ਸਾਫ ਨਜ਼ਰ ਆਈ। ਜ਼ਿਕਰਯੋਗ ਹੈ ਕਿ ਪੀ.ਜੀ.ਆਈ. ਦੇ ਆਰਥੋਪੈਡਿਕ ਦੀ ਓ.ਪੀ.ਡੀ. 'ਚ 4 ਸੌ ਤੋਂ ਵਧੇਰੇ ਮਰੀਜ਼ ਸਨ, ਜਦਕਿ ਸੀਨੀਅਰ ਡਾਕਟਰ ਸਿਰਫ ਇਕੋ ਸੀ। ਪੀ.ਜੀ.ਆਈ. ਵਲੋਂ ਪੂਰੇ ਡਾਕਟਰਾਂ ਦਾ ਪ੍ਰਬੰਧ ਨਾ ਹੋਣ ਕਾਰਨ ਮਰੀਜ਼ ਕਾਫੀ ਪਰੇਸ਼ਾਨ ਹੋਏ ਅਤੇ ਅਫਸੋਸ ਤਾਂ ਇਸ ਗੱਲ ਦਾ ਹੈ ਕਿ ਮਰੀਜ਼ਾਂ ਨੂੰ ਇਹ ਪਰੇਸ਼ਾਨੀ ਇਕ-ਦੋ ਦਿਨ ਨਹੀਂ, ਸਗੋਂ ਇਕ ਮਹੀਨੇ ਤੱਕ ਸਹਿਣੀ ਪਈ। ਇਸ ਦਾ ਕਾਰਨ ਇਹ ਸੀ ਕਿ ਅੱਧੇ ਡਾਕਟਰ ਪਹਿਲੇ 15 ਦਿਨ ਦੀ ਛੁੱਟੀ 'ਤੇ ਅਤੇ ਬਾਕੀ 15 ਦਿਨÎਾਂ ਬਾਅਦ ਛੁੱਟੀ 'ਤੇ ਗਏ। ਪਰੇਸ਼ਾਨ ਮਰੀਜ਼ਾਂ ਨੇ ਦੱੱਸਿਆ ਕਿ ਸਵੇਰੇ ਛੇਤੀ ਉੱਠ ਕੇ ਉਹ ਪਹਿਲੇ ਕਾਰਡ ਲਈ ਲਾਈਨ 'ਚ ਲੱਗਦੇ ਰਹੇ ਪਰ ਡਾਕਟਰਾਂ ਦਾ ਪੂਰਾ ਸਟਾਫ ਨਾ ਹੋਣ ਕਾਰਨ ਉਨ੍ਹਾਂ ਦੀ ਵਾਰੀ ਕਾਫੀ ਦੇਰ ਅਤੇ ਕਈ ਵਾਰ ਤਾਂ ਕਈ-ਕਈ ਦਿਨਾਂ ਬਾਅਦ ਆਈ। ਹਾਲਾਂਕਿ ਡਾਕਟਰਾਂ ਦੀ ਦਲੀਲ ਸੀ ਕਿ ਉਹ ਓ.ਪੀ.ਡੀ. 'ਚ ਆਉਣ ਤੋਂ ਪਹਿਲਾਂ ਵਾਰਡ 'ਚ ਦਾਖਲ ਮਰੀਜ਼ਾਂ ਨੂੰ ਦੇਖਣ ਜਾਂਦੇ ਹਨ। ਹੋਰ ਤਾਂ ਹੋਰ ਆਰਥੋਪੈਡਿਕ ਓ.ਪੀ.ਡੀ. ਦੇ ਬਾਹਰ ਸੂਚਨਾ ਬੋਰਡ 'ਤੇ ਵੀ ਗਲਤ ਸੂਚਨਾ ਦਿੱਤੀ ਜਾ ਰਹੀ ਹੈ। ਬੋਰਡ 'ਤੇ ਇਥੋਂ ਛੱਡ ਕੇ ਜਾ ਚੁੱਕੇ ਡਾਕਟਰਾਂ ਦੇ ਨਾਂ ਅਤੇ ਡਿਊਟੀ ਟਾਈਮ ਵੀ ਲਿਖਿਆ ਹੈ, ਜਿਸ ਕਾਰਨ ਅਕਸਰ ਮਰੀਜ਼ ਗਲਤਫਹਿਮੀ ਦਾ ਸ਼ਿਕਾਰ ਹੋਏ ਹਨ।
ਗੁਰਦਾਸਪੁਰ : ਇਥੇ ਇਕ ਐੱਨ.ਜੀ.ਓ. ਵਲੋਂ ਲਗਾਏ ਗਏ ਅੱਖਾਂ ਦੇ ਮੁਫਤ ਚੈਕਅੱਪ ਕੈਂਪ 'ਚ ਆਪਰੇਸ਼ਨ ਕਰਵਾਉਣ ਪਿੱਛੋਂ 60 ਵਿਅਕਤੀਆਂ ਦੀ ਅੱਖਾਂ ਦੀ ਰੌਸ਼ਨੀ ਹਮੇਸ਼ਾ ਲਈ ਚਲੀ ਗਈ, ਜਿਨ੍ਹਾਂ 'ਚੋਂ 16 ਵਿਅਕਤੀ ਅੰਮ੍ਰਿਤਸਰ ਤੋਂ ਸਨ ਅਤੇ ਬਾਕੀ ਸਾਰੇ ਗੁਰਦਾਸਪੁਰ ਤੋਂ। ਇਸ ਮਾਮਲੇ 'ਚ ਲਾਪਰਵਾਹੀ ਵਰਤਣ ਵਾਲੇ ਡਾਕਟਰ ਵਿਵੇਕ ਅਰੋੜਾ ਨੂੰ ਗ੍ਰਿਫਤਾਰ ਕਰ ਲਿਆ ਗਿਆ ਅਤੇ ਮਥੁਰਾ ਦੇ ਸ਼੍ਰੀ ਕ੍ਰਿਸ਼ਨਾ ਆਈ ਹਸਪਤਾਲ, ਜਿਥੇ ਡਾਕਟਰ ਵਿਵੇਕ ਅਰੋੜਾ ਕੰਮ ਕਰਦਾ ਸੀ, ਵਿਰੁੱਧ ਵੀ ਕੇਸ ਦਰਜ ਕੀਤਾ ਗਿਆ। ਇਸ ਪਿੱਛੋਂ ਪੰਜਾਬ ਸਰਕਾਰ ਨੇ ਵੀ ਬਿਨਾਂ ਕਿਸੇ ਸਿਵਲ ਸਰਜਨ ਦੀ ਮਨਜ਼ੂਰੀ ਤੋਂ ਅੱਖਾਂ ਦੇ ਮੁਫਤ ਕੈਂਪ ਲਗਾਉਣ 'ਤੇ ਪਾਬੰਦੀ ਲਗਾ ਦਿੱਤੀ ਸੀ।
ਜਲੰਧਰ : ਹੁਣੇ ਜਿਹੇ ਬਰਡ ਫਲੂ ਦੀ ਪੁਸ਼ਟੀ ਹੋਣ ਪਿੱਛੋਂ ਸੁਖਨਾ ਲੇਕ ਦੀਆਂ ਬੱਤਖਾਂ ਨੂੰ ਮਾਰਨ ਦੀ ਖ਼ਬਰ ਸਾਹਮਣੇ ਆਈ, ਜਿਸ ਪਿੱਛੋਂ ਚਿਕਨ ਖਾਣ ਦੇ ਸ਼ੌਕੀਨਾਂ ਨੇ ਇਸ ਤੋਂ ਤੌਬਾ ਕਰ ਲਈ। ਖੈਰ, ਮੁੱਦਾ ਇਹ ਹੈ ਕਿ ਬਰਡ ਫਲੂ ਦੀ ਪੁਸ਼ਟੀ ਹੋਣ ਤੋਂ ਪਹਿਲਾਂ ਇਸ ਝੀਲ ਦੇ ਜੋ ਨਮੂਨੇ ਜਲੰਧਰ ਦੀ ਰੀਜ਼ਨਲ ਡਿਜ਼ੀਜ਼ ਡਾਇਗਨਾਸਟਿਕ ਲੈਬ 'ਚ ਭੇਜੇ ਗਏ ਸਨ, ਉਸ ਦੇ ਨਤੀਜੇ ਤਾਂ ਕੁਝ ਹੋਰ ਹੀ ਕਹਿੰਦੇ ਸਨ। ਉਸ 'ਚ ਪੁਸ਼ਟੀ ਕੀਤੀ ਗਈ ਝੀਲ 'ਚ ਮਰਨ ਵਾਲੀਆਂ ਬੱਤਖਾਂ ਦੀ ਮੌਤ ਦਾ ਕਾਰਨ ਭੁੱਖ ਅਤੇ ਠੰਡ ਹੈ ਕਿਉਂਕਿ ਚੰਡੀਗੜ੍ਹ 'ਚ ਦਿਨ-ਰਾਤ ਦੇ ਤਾਪਮਾਨ 'ਚ ਬਹੁਤ ਫਰਕ ਹੈ। ਇਹ ਨਤੀਜੇ ਨਵੀਂ ਰਿਪੋਰਟ 'ਚ ਬਰਡ ਫਲੂ ਦੀ ਪੁਸ਼ਟੀ ਤੋਂ ਬਿਲਕੁਲ ਉਲਟ ਨਿਕਲੇ। ਇਸ ਗੱਲ ਤੋਂ ਅੰਦਾਜ਼ਾ ਲਗਾਇਆ ਜਾ ਸਕਦਾ ਹੈ ਕਿ ਅੱਜਕਲ ਦੇ ਡਾਕਟਰ ਜਾਂ ਲੈਬ ਤਕਨੀਸ਼ੀਅਨਾਂ ਦੀ ਪੜ੍ਹਾਈ ਸਹੀ ਹੋਵੇਗੀ ਜਾਂ ਫਿਰ ਇਹ ਪੈਸੇ ਦੇ ਕੇ ਲਈਆਂ ਡਿਗਰੀਆਂ ਦਾ ਨਮੂਨਾ ਹੈ।
ਨਸ਼ੇ ਦੇ ਮੁੱਦੇ ਨੂੰ ਲੈ ਕੇ 'ਭਾਜਪਾ' ਪੰਜਾਬ ਪੱਧਰ 'ਤੇ ਛੇੜੇਗੀ ਮੁਹਿੰਮ
NEXT STORY 
