ਇਕ ਆਦਮੀ ਹਮੇਸ਼ਾ ਵਾਂਗ ਨਾਈ ਦੀ ਦੁਕਾਨ 'ਤੇ ਵਾਲ ਕਟਵਾਉਣ ਗਿਆ। ਵਾਲ ਕਟਵਾਉਣ ਵੇਲੇ ਅਕਸਰ ਦੇਸ਼-ਦੁਨੀਆ ਦੀਆਂ ਗੱਲਾਂ ਹੋਇਆ ਕਰਦੀਆਂ ਸਨ। ਅੱਜ ਵੀ ਉਹ ਸਿਨੇਮਾ, ਰਾਜਨੀਤੀ ਤੇ ਖੇਡ ਜਗਤ ਬਾਰੇ ਗੱਲਾਂ ਕਰ ਰਹੇ ਸਨ ਕਿ ਅਚਾਨਕ ਰੱਬ ਦੀ ਹੋਂਦ ਨੂੰ ਲੈ ਕੇ ਗੱਲ ਹੋਣ ਲੱਗੀ।
ਨਾਈ ਬੋਲਿਆ,''ਦੇਖ ਬਈ, ਤੇਰੇ ਵਾਂਗ ਮੈਂ ਵੀ ਰੱਬ ਵਿਚ ਯਕੀਨ ਨਹੀਂ ਰੱਖਦਾ।''
ਆਦਮੀ ਨੇ ਪੁੱਛਿਆ,''ਤੂੰ ਅਜਿਹਾ ਕਿਉਂ ਕਹਿੰਦਾ ਏਂ?''
ਨਾਈ ਕਹਿਣ ਲੱਗਾ,''ਇਹ ਸਮਝਣਾ ਬਹੁਤ ਸੌਖਾ ਹੈ, ਬਸ ਗਲੀ ਵਿਚ ਜਾ। ਤੂੰ ਸਮਝ ਜਾਵੇਂਗਾ ਕਿ ਰੱਬ ਨਹੀਂ ਹੈ। ਤੂੰ ਹੀ ਦੱਸ ਜੇ ਰੱਬ ਹੁੰਦਾ ਤਾਂ ਕੀ ਇੰਨੇ ਸਾਰੇ ਲੋਕ ਬੀਮਾਰ ਪੈਂਦੇ? ਇੰਨੇ ਸਾਰੇ ਬੱਚੇ ਅਨਾਥ ਹੁੰਦੇ? ਜੇ ਰੱਬ ਹੁੰਦਾ ਤਾਂ ਕਿਸੇ ਨੂੰ ਕੋਈ ਦੁੱਖ, ਕੋਈ ਤਕਲੀਫ ਨਾ ਹੁੰਦੀ।''
ਨਾਈ ਨੇ ਬੋਲਣਾ ਜਾਰੀ ਰੱਖਿਆ,''ਮੈਂ ਅਜਿਹੇ ਰੱਬ ਬਾਰੇ ਸੋਚ ਨਹੀਂ ਸਕਦਾ ਜੋ ਇਨ੍ਹਾਂ ਸਾਰੀਆਂ ਚੀਜ਼ਾਂ ਨੂੰ ਹੋਣ ਦੇਵੇ। ਤੂੰ ਹੀ ਦੱਸ ਕਿਥੇ ਹੈ ਰੱਬ?''
ਆਦਮੀ ਨੇ ਇਕ ਪਲ ਲਈ ਸੋਚਿਆ ਪਰ ਬਹਿਸ ਨਾ ਵਧੇ, ਇਸ ਲਈ ਚੁੱਪ ਰਿਹਾ।
ਨਾਈ ਨੇ ਆਪਣਾ ਕੰਮ ਖਤਮ ਕੀਤਾ ਅਤੇ ਆਦਮੀ ਕੁਝ ਸੋਚਦਾ ਹੋਇਆ ਦੁਕਾਨ 'ਚੋਂ ਬਾਹਰ ਨਿਕਲਿਆ। ਉਹ ਕੁਝ ਦੂਰ ਜਾ ਕੇ ਖੜ੍ਹਾ ਹੋ ਗਿਆ। ਕੁਝ ਦੇਰ ਉਡੀਕ ਕਰਨ ਤੋਂ ਬਾਅਦ ਉਸ ਨੂੰ ਲੰਮੀ ਦਾੜ੍ਹੀ-ਮੁੱਛ ਵਾਲਾ ਅੱਧਖੜ੍ਹ ਵਿਅਕਤੀ ਉਸ ਵੱਲ ਆਉਂਦਾ ਦਿਸਿਆ। ਉਸ ਨੂੰ ਦੇਖ ਕੇ ਲਗਦਾ ਸੀ ਜਿਵੇਂ ਉਹ ਕਿੰਨੇ ਹੀ ਦਿਨਾਂ ਤੋਂ ਨਹਾਤਾ-ਧੋਤਾ ਨਾ ਹੋਵੇ।
ਆਦਮੀ ਤੁਰੰਤ ਨਾਈ ਦੀ ਦੁਕਾਨ ਵਿਚ ਵਾਪਸ ਵੜ ਗਿਆ ਅਤੇ ਬੋਲਿਆ,''ਪਤਾ ਹੈ ਇਸ ਦੁਨੀਆ ਵਿਚ ਨਾਈ ਨਹੀਂ ਹੁੰਦੇ।''
ਨਾਈ ਨੇ ਸਵਾਲ ਕੀਤਾ,''ਭਲਾ ਕਿਵੇਂ ਨਹੀਂ ਹੁੰਦੇ? ਮੈਂ ਤੇਰੇ ਸਾਹਮਣੇ ਖੜ੍ਹਾ ਹਾਂ।''
ਆਦਮੀ ਬੋਲਿਆ,''ਨਹੀਂ, ਉਹ ਨਹੀਂ ਹੁੰਦੇ ਨਹੀਂ ਤਾਂ ਕਿਸੇ ਦੀ ਵੀ ਇੰਨੀ ਲੰਮੀ ਦਾੜ੍ਹੀ-ਮੁੱਛ ਨਾ ਹੁੰਦੀ ਪਰ ਉਹ ਦੇਖ, ਸਾਹਮਣੇ ਉਸ ਆਦਮੀ ਦੀ ਕਿੰਨੀ ਲੰਮੀ ਦਾੜ੍ਹੀ-ਮੁੱਛ ਹੈ।''
ਨਾਈ ਬੋਲਿਆ,''ਓ ਨਹੀਂ ਭਰਾ, ਨਾਈ ਹੁੰਦੇ ਹਨ ਪਰ ਬਹੁਤ ਸਾਰੇ ਲੋਕ ਸਾਡੇ ਕੋਲ ਨਹੀਂ ਆਉਂਦੇ।''
ਆਦਮੀ ਨੇ ਨਾਈ ਨੂੰ ਰੋਕਦਿਆਂ ਕਿਹਾ,''ਬਿਲਕੁਲ ਸਹੀ, ਇਹੀ ਤਾਂ ਗੱਲ ਹੈ, ਰੱਬ ਵੀ ਹੁੰਦਾ ਹੈ ਪਰ ਲੋਕ ਉਸ ਦੇ ਕੋਲ ਨਹੀਂ ਜਾਂਦੇ ਅਤੇ ਨਾ ਹੀ ਉਸ ਨੂੰ ਲੱਭਣ ਦੀ ਕੋਸ਼ਿਸ਼ ਕਰਦੇ ਹਨ। ਇਸੇ ਲਈ ਦੁਨੀਆ ਵਿਚ ਇੰਨਾ ਦੁੱਖ ਤੇ ਤਕਲੀਫ ਹੈ।''
ਅੰਧਵਿਸ਼ਵਾਸ ਪੈਦਾ ਨਾ ਹੋਣ ਦਿਓ
NEXT STORY 
