ਸਮਾਣਾ (ਦਰਦ, ਅਸ਼ੋਕ) : ਸਿਟੀ ਪੁਲਸ ਨੇ ਵਿਦੇਸ਼ ਭੇਜਣ ਦੇ ਨਾਮ ’ਤੇ ਲੱਖਾਂ ਰੁਪਏ ਦੀ ਠੱਗੀ ਮਾਰੇ ਜਾਣ ਦੇ ਦੋਸ਼ ’ਚ 2 ਲੋਕਾਂ ਖ਼ਿਲਾਫ ਮਾਮਲਾ ਦਰਜ ਕਰਕੇ ਅਗਲੇਰੀ ਕਾਰਵਾਈ ਸ਼ੁਰੂ ਕਰ ਦਿੱਤੀ ਹੈ। ਥਾਣਾ ਸਿਟੀ ਮੁਖੀ ਗੁਰਵਿੰਦਰ ਸਿੰਘ ਨੇ ਦੱਸਿਆ ਕਿ ਸੱਤਪਾਲ ਸਿੰਘ ਵਾਸੀ ਖਾਲਸਾ ਕਾਲੋਨੀ, ਸਮਾਣਾ ਵੱਲੋਂ ਦਰਜ ਕਰਵਾਈ ਸ਼ਿਕਾਇਤ ਅਨੁਸਾਰ ਸੰਦੀਪ ਗੋਇਲ ਵਾਸੀ ਇੰਦਰਾਪੁਰੀ ਸਮਾਣਾ, ਰਾਹੁਲ ਸੂਦ ਵਾਸੀ ਦਿੱਲੀ, ਜੋ ਕਿ ਇਮੀਗ੍ਰੇਸ਼ਨ ਦਾ ਕੰਮ ਕਰਦੇ ਹਨ, ਜਿਨ੍ਹਾਂ ਨੇ ਉਸ ਦੇ ਲੜਕੇ ਏਕਨੂਰ ਨੂੰ ਪੁਰਤਗਾਲ ਭੇਜਣ ਲਈ 16.50 ਲੱਖ ਰੁਪਏ ਵਿਚ ਸੋਦਾ ਤੈਅ ਕੀਤਾ ਸੀ, ਜਿਸ ਵਿਚ ਉਨ੍ਹਾਂ ਨੇ 6 ਲੱਖ ਰੁਪਏ ਐਡਵਾਂਸ, 6 ਲੱਖ ਸਰਬੀਆ ਪਹੁੰਚਣ ’ਤੇ ਅਤੇ ਸਾਢੇ 4 ਲੱਖ ਪੁਰਤਗਾਲ ਪਹੁੰਚਣ ਤੋਂ ਬਾਅਦ ਦੇਣੇ ਸਨ। ਉਸ ਨੇ ਦੱਸਿਆ ਕਿ 28 ਜੂਨ ਨੂੰ ਸਤਪਾਲ ਸਿੰਘ ਨੇ ਵੱਖ-ਵੱਖ ਬੈਂਕਾਂ ’ਚੋਂ 6 ਲੱਖ ਰੁਪਏ ਕਢਵਾ ਕੇ, ਪਾਸਪੋਰਟ, ਆਧਾਰ ਕਾਰਡ ਅਤੇ ਪੈੱਨ ਕਾਰਡ ਦੀ ਕਾਪੀ ਸੰਦੀਪ ਗੋਇਲ ਨੂੰ ਦੇ ਦਿੱਤੇ।
4 ਜੁਲਾਈ ਨੂੰ ਸੰਦੀਪ ਗੋਇਲ ਉਸ ਦੇ ਲੜਕੇ ਏਕਨੂਰ ਨੂੰ ਦਿੱਲੀ ਲੈ ਗਿਆ ਤੇ 6 ਜੁਲਾਈ ਨੂੰ ਸਰਬੀਆ ਭੇਜ ਦਿੱਤਾ, ਜਿਸ ’ਤੇ 2 ਲੱਖ ਰੁਪਏ ਉਸ ਨੇ ਆਪਣੇ ਦੋਸਤ ਕਮਲ ਗੋਇਲ ਰਾਹੀ ਦੁਕਾਨ ’ਤੇ ਭੇਜੇ। 8 ਜੁਲਾਈ ਨੂੰ ਏਕਨੂਰ ਨਾਲ ਸਰਬੀਆ ਤੋਂ ਗੱਲ ਕਰਵਾ ਦਿੱਤੀ, ਜਿਸ ਮੁਤਾਬਕ ਉਸ ਨੇ 6 ਲੱਖ ਰੁਪਏ ਹੋਰ ਬੈਂਕ ਖਾਤਿਆਂ ’ਚੋਂ ਕੱਢਵਾ ਕੇ ਸੰਦੀਪ ਦੇ ਪਿਤਾ ਮਹਿੰਦਰਪਾਲ ਤੇ ਭਰਾ ਰਨਦੀਪ ਗੋਇਲ ਨੂੰ ਦਿੱਤੇ। ਅਧਿਕਾਰੀ ਅਨੁਸਾਰ ਉਕਤ ਮੁਲਜ਼ਮਾਂ ਨੇ ਏਕਨੂਰ ਨੂੰ ਸਰਬੀਆ ਤੋਂ ਅਰਮਾਨੀਆਂ ਜੰਗਲਾਂ ਰਾਹੀਂ ਪੈਦਲ ਗਲਤ ਤਰੀਕੇ ਨਾਲ ਇਟਲੀ ਭੇਜ ਕੇ ਉਸ ਕੋਲੋਂ ਪਾਸਪੋਰਟ ਤੇ ਕੱਪੜਿਆਂ ਵਾਲੇ ਬੈਗ ਖੋਹ ਲਏ ਅਤੇ ਢਾਈ ਲੱਖ ਰੁਪਏ ਇਕਰਾਰ ਮੁਤਾਬਕ ਹੋਰ ਮੰਗਣ ਲੱਗ ਪਏ। ਜਦੋਂ ਸਤਪਾਲ ਸਿੰਘ ਨੇ ਉਨ੍ਹਾਂ ਨੂੰ ਇਸ ਤਰ੍ਹਾਂ ਨਾਜਾਇਜ਼ ਤਰੀਕੇ ਨਾਲ ਭੇਜਣ ਦਾ ਇਤਰਾਜ਼ ਕੀਤਾ ਤਾਂ ਉਹ ਅਗੋਂ ਧਮਕੀਆਂ ਦੇਣ ਲੱਗੇ ਕਿ ਅਸੀਂ ਤੇਰੇ ਲੜਕੇ ਨੂੰ ਨਾ ਤਾਂ ਅੱਗੇ ਭੇਜਾਂਗੇ ਤੇ ਨਾਂ ਹੀ ਪਾਸਪੋਰਟ ਦੇਵਾਂਗੇ, ਜਿਸ ਕਾਰਨ ਸਤਪਾਲ ਸਿੰਘ ਨੇ ਉਚ ਪੁਲਸ ਅਧਿਕਾਰੀਆਂ ਨੂੰ ਉਕਤ ਵਿਅਕਤੀਆਂ ਖ਼ਿਲਾਫ ਕਬੂਤਰ ਬਾਜ਼ੀ, ਮਾਨਵ ਸਮੱਗਲਿੰਗ ਅਤੇ ਧੋਖਾਦੇਹੀ ਕਰਨ ਦੇ ਦੋਸ਼ ਹੇਠ ਸ਼ਿਕਾਇਤ ਦੇ ਕੇ ਇਨਸ਼ਾਫ ਦੀ ਮੰਗ ਕੀਤੀ ਸੀ। ਥਾਣਾ ਮੁਖੀ ਨੇ ਦੱਸਿਆ ਕਿ ਉਚ ਅਧਿਕਾਰੀਆਂ ਦੇ ਹੁਕਮਾਂ ਅਨੁਸਾਰ ਮਾਮਲਾ ਦਰਜ ਕਰ ਕੇ ਮੁਲਜ਼ਮਾਂ ਦੀ ਭਾਲ ਕੀਤੀ ਜਾ ਰਹੀ ਹੈ।
ਜਲੰਧਰ ਵਿਖੇ PAP ਚੌਂਕ 'ਚ ਲੱਗਾ ਧਰਨਾ, ਰੂਟ ਡਾਇਵਰਜ਼ਨ ਦੇ ਬਾਵਜੂਦ ਲੱਗਿਆ ਲੰਬਾ ਜਾਮ
NEXT STORY 
