ਅੰਮ੍ਰਿਤਸਰ - ਕੇਂਦਰ ਸਰਕਾਰ ਵਲੋਂ ਜਲ੍ਹਿਆਂਵਾਲਾ ਬਾਗ ਕਾਂਡ ਦੀ ਸ਼ਤਾਬਦੀ ਮਨਾਉਣ ਦੀ ਯੋਜਨਾ ਹੈ। ਇਸ ਤਹਿਤ ਜਲ੍ਹਿਆਂਵਾਲਾ ਬਾਗ 'ਚ ਸਥਿਤ ਸ਼ਹੀਦੀ ਖੂਹ ਦੀ ਸੰਭਾਲ ਲਈ ਇਸ ਦੇ ਉਪਰ ਤੇ ਆਲੇ-ਦੁਆਲੇ ਪਾਰਦਰਸ਼ੀ ਸ਼ੀਸ਼ਾ ਲਾਉਣ ਦੀ ਯੋਜਨਾ ਹੈ। ਸਾਂਭ ਸੰਭਾਲ ਸਬੰਧੀ ਉਲੀਕੀ ਗਈ ਯੋਜਨਾ ਦੇ ਇਸ ਹਿੱਸੇ ਬਾਰੇ ਰਾਜ ਸਭਾ ਮੈਂਬਰ ਤੇ ਪੰਜਾਬ ਭਾਜਪਾ ਦੇ ਪ੍ਰਧਾਨ ਸ਼ਵੇਤ ਮਲਿਕ ਨੇ ਦੱਸਿਆ ਕਿ ਇਸ ਸ਼ਹੀਦੀ ਖੂਹ ਨੂੰ ਸਫਾਈ ਪੱਖੋ ਬਚਾਉਣ ਲਈ ਇਸ ਦੇ ਆਲੇ-ਦੁਆਲੇ ਤੇ ਉਪਰ ਪਾਰਦਰਸ਼ੀ ਸ਼ੀਸ਼ਾ ਲਾਇਆ ਜਾਵੇਗਾ। ਸ਼ੀਸ਼ਾ ਲਾਉਣ ਨਾਲ ਲੋਕ ਇਸ ਨੂੰ ਦੇਖ ਸਕਣਗੇ ਪਰ ਕੋਈ ਚੀਜ਼ ਇਸ ਦੇ ਅੰਦਰ ਨਹੀਂ ਸੁੱਟ ਸਕਣਗੇ। ਉਨ੍ਹਾਂ ਦੱਸਿਆ ਕਿ ਹਾਲ ਹੀ 'ਚ ਕੇਂਦਰ ਦੇ ਸੱਭਿਆਚਾਰਕ ਮਾਮਲਿਆਂ ਤੇ ਸੈਰ ਸਪਾਟੇ ਬਾਰੇ ਮੰਤਰੀ ਮਹੇਸ਼ ਸ਼ਰਮਾ ਨੇ ਇਥੋਂ ਦਾ ਦੌਰਾ ਕੀਤਾ ਸੀ ਕੇ ਜਲ੍ਹਿਆਂਵਾਲਾ ਬਾਗ ਯਾਦਗਾਰ ਦੀ ਸਮੁੱਚੀ ਸਥਿਤੀ ਨੂੰ ਦੇਖਿਆ ਸੀ। ਉਸ ਵੇਲੇ ਹੀ ਇਸ ਸ਼ਹੀਦੀ ਖੂਹ ਦੀ ਸਫਾਈ ਤੇ ਸੰਭਾਲ ਸਬੰਧੀ ਇਸ ਯੋਜਨਾ ਬਾਰੇ ਵਿਚਾਰ ਕੀਤਾ ਗਿਆ ਸੀ।
ਮਲਿਕ ਨੇ ਦੱਸਿਆ ਕਿ ਮੰਤਰਾਲੇ ਵਲੋਂ ਇਸ ਸਬੰਘੀ ਆਰਕੀਟੈਕਟ ਵੰਦਨਾ ਰਾਜ ਨੂੰ ਜ਼ਿੰਮੇਵਾਰੀ ਸੌਂਪੀ ਗਈ ਹੈ, ਜੋ ਇਸ ਇਤਿਹਾਸਕ ਯਾਦਗਾਰ ਦੀ ਸਾਂਭ ਸੰਭਾਲ ਤੇ ਨਵ ਨਿਰਮਾਣ ਬਾਰੇ ਬਲਿਊ ਪ੍ਰਿੰਟ ਤਿਆਰ ਕਰ ਰਹੇ ਹਨ। ਉਨ੍ਹਾਂ ਦੱਸਿਆ ਕਿ ਗਰਿੱਲ 'ਚ ਲੱਗੀ ਇਕ ਖਿੜਕੀ ਟੁੱਟ ਚੁੱਕੀ ਹੈ। ਇਸ ਲਈ ਮਹਿਸੂਸ ਕੀਤਾ ਕਿ ਇਥੇ ਲੋਹੀ ਦੀ ਗਰਿੱਲ ਦੀ ਥਾਂ ਪਾਰਦਰਸ਼ੀ ਸ਼ੀਸ਼ਾ ਲਾਇਆ ਜਾਵੇ ਤੇ ਲੋਕ ਇਸ 'ਚ ਸਿੱਕੇ ਤੇ ਕੋਈ ਹੋਰ ਚੀਜ਼ ਨਾ ਸੁੱਟ ਸਕਣ।
ਦੱਸ ਦੇਈਏ ਕਿ 13 ਅਪ੍ਰੈਲ 1919 ਨੂੰ ਵਾਪਰੇ ਖੂਨੀ ਕਾਂਡ 'ਚ ਜਲ੍ਹਿਆਂਵਾਲਾ ਬਾਗ 'ਚ ਵੱਡੀ ਗਿਣਤੀ ਲੋਕ ਅੰਗਰੇਜ਼ੀ ਫੌਜ ਦੀਆਂ ਗੋਲੀਆਂ ਨਾਲ ਮਾਰੇ ਗਏ ਸਨ। ਕੁਝ ਲੋਕਾਂ ਨੇ ਬਚਣ ਲਈ ਖੂਹ 'ਚ ਛਾਲਾਂ ਮਾਰ ਦਿੱਤੀਆਂ ਸਨ। ਇਸ ਸ਼ਹੀਦੀ ਖੂਹ 'ਤੇ ਲਿਖੇ ਇਤਿਹਾਸ ਮੁਤਾਬਕ 120 ਵਿਅਕਤੀਆਂ ਦਆਂ ਲਾਸ਼ਾਂ ਖੂਹ 'ਚੋਂ ਮਿਲੀਆਂ ਸਨ। ਦੇਸ਼ ਅਜ਼ਾਦੀ ਤੋਂ ਪਹਿਲਾਂ ਵਾਪਰੇ ਇਸ ਖੂਨੀ ਕਾਂਡ ਨੇ ਆਜ਼ਾਦੀ ਦੇ ਸੰਘਰਸ਼ ਨੂੰ ਨਵੀਂ ਦਿਸ਼ਾ ਦੇ ਦਿੱਤੀ ਸੀ। ਇਸ ਸ਼ਹੀਦੀ ਖੂਹ ਨੂੰ ਹੁਣ ਤੱਕ ਸੰਭਾਲ ਕੇ ਰੱਖਿਆ ਗਿਆ ਹੈ। ਇਸ ਦੇ ਉਪਰ ਲੋਹੇ ਦੀ ਜਾਲੀ ਨੁਮਾ ਗਰਿੱਲ ਲੱਗੀ ਹੋਈ ਹੈ, ਜਿਸ ਰਾਹੀ ਲੋਕ ਇਸ ਇਤਿਹਾਸਕ ਖੂਹ ਨੂੰ ਦੇਖਦੇ ਹਨ। ਸ੍ਰੀ ਹਰਿਮੰਦਰ ਸਾਹਿਬ ਆਉਣ ਵਾਲੇ ਵਧੇਰੇ ਸ਼ਰਧਾਲੂ ਜਲ੍ਹਿਆਂਵਾਲਾ ਬਾਗ ਵੀ ਹੋ ਕੇ ਜਾਂਦੇ ਹਨ ਤੇ ਸ਼ਹੀਦੀ ਸਮਾਰਕ ਤੇ ਸ਼ਹੀਦੀ ਖੂਹ ਨੂੰ ਦੇਖਦੇ ਹਨ।
'ਸ਼੍ਰੋਮਣੀ ਕਮੇਟੀ' ਦੀਆਂ ਚੋਣਾਂ ਹੋਣ ਦੇ ਆਸਾਰ ਨਹੀਂ, ਜਾਣੋ ਕਾਰਨ
NEXT STORY 
