ਸਿਵਲ ਸਰਜਨ ਦਫ਼ਤਰ 'ਚ ਫ਼ੂਡ ਸੇਫ਼ਟੀ ਵਿੰਗ ਦੇ 2 ਮੁਲਾਜ਼ਮਾਂ ਦਾ ਤਬਾਦਲਾ

Edited By Babita,
Updated: 30 Sep, 2019 03:24 PM

ਮੋਹਾਲੀ (ਕੁਲਦੀਪ) : ਸਿਵਲ ਸਰਜਨ ਮੋਹਾਲੀ ਦਫ਼ਤਰ ਦੇ 'ਮਲਾਈਦਾਰ' ਫ਼ੂਡ ਸੇਫ਼ਟੀ ਵਿੰਗ ਦੇ ਡਰਾਈਵਰ ਅਤੇ ਦਰਜਾ ਚਾਰ ਮੁਲਾਜ਼ਮ ਦਾ ਆਖ਼ਰਕਾਰ ਤਬਾਦਲਾ ਕਰ ਹੀ ਦਿੱਤਾ ਗਿਆ ਹੈ। ਜਗ ਬਾਣੀ ਨੇ ਲਗਭਗ ਦੋ ਮਹੀਨੇ ਪਹਿਲਾਂ ਇਸ ਵਿੰਗ ਵਿਚ 10-10 ਸਾਲਾਂ ਤੋਂ ਡਟੇ ਹੋਏ ਇਨ੍ਹਾਂ ਮੁਲਾਜ਼ਮਾਂ ਬਾਰੇ ਖ਼ਬਰ ਛਾਪੀ ਸੀ, ਜਿਸ ਦਾ ਹੁਣ ਅਸਰ ਹੋ ਗਿਆ ਹੈ। ਕੁਲ ਤਿੰਨ ਵਿਚੋਂ ਦੋ ਮੁਲਾਜ਼ਮ ਬਦਲੇ ਜਾ ਚੁੱਕੇ ਹਨ, ਜਦੋਂ ਕਿ ਕਲਰਕੀ ਦਾ ਕੰਮ ਕਰ ਰਹੇ ਹੈਲਥ ਇੰਸਪੈਕਟਰ ਦੀ ਬਦਲੀ ਅਜੇ ਵੀ ਬਾਕੀ ਹੈ। ਦੱਸਣਯੋਗ ਹੈ ਕਿ 8 ਜੁਲਾਈ 2019 ਨੂੰ ਅਦਾਰਾ ਜਗ ਬਾਣੀ ਵਲੋਂ ਮੋਹਾਲੀ ਸਿਵਲ ਸਰਜਨ ਦਫ਼ਤਰ ਦੀ 'ਫੂਡ ਸੇਫ਼ਟੀ ਬਰਾਂਚ ਵਿਚ ਕਈ-ਕਈ ਸਾਲਾਂ ਤੋਂ ਡਟੇ ਹੋਏ ਹਨ ਮੁਲਾਜ਼ਮ' ਸਿਰਲੇਖ ਤਹਿਤ ਖ਼ਬਰ ਛਾਪੀ ਗਈ ਸੀ।
ਬੜਾ ਮੁਸ਼ਕਲ ਕੰਮ ਸੀ ਬਦਲੀਆਂ ਕਰਨਾ
ਇਨ੍ਹਾਂ 'ਰਸੂਖਦਾਰ' ਮੁਲਾਜ਼ਮਾਂ ਨੂੰ ਹਾਲੇ ਤਕ ਕੋਈ ਵੀ ਅਧਿਕਾਰੀ ਬਦਲ ਨਹੀਂ ਸੀ ਸਕਿਆ। ਪਿਛਲੀ ਸਿਵਲ ਸਰਜਨ ਬੀਬੀ ਨੇ ਇਨ੍ਹਾਂ ਦੀ ਬਦਲੀ ਦੇ ਹੁਕਮ ਤਾਂ ਕਰ ਦਿੱਤੇ ਸਨ ਪਰ ਉਹ ਕਿਸੇ ਤਣ-ਪੱਤਣ ਨਾ ਲੱਗੇ। ਮੁਲਾਜ਼ਮਾਂ ਦੀਆਂ ਸਿਫ਼ਾਰਸ਼ਾਂ ਕਾਰਨ ਹੁਕਮਾਂ ਵਾਲੇ ਕਾਗ਼ਜ਼ ਮਿੱਟੀ-ਘੱਟੇ ਵਿਚ ਹੀ ਰੁਲ ਗਏ। ਇਸੇ ਦਰਮਿਆਨ ਸਿਵਲ ਸਰਜਨ ਦੀ ਤਰੱਕੀ ਹੋ ਗਈ ਤੇ ਪਰਨਾਲਾ ਉਥੇ ਦਾ ਉਥੇ।
ਆਈ. ਏ. ਐੱਸ. ਅਫ਼ਸਰ ਦੇ ਹੁਕਮਾਂ ਨੂੰ ਟਿੱਚ ਜਾਣਦੇ ਸਨ ਪਹਿਲੇ ਸਿਵਲ ਸਰਜਨ
ਜ਼ਿਕਰਯੋਗ ਹੈ ਕਿ ਫ਼ੂਡ ਐਂਡ ਡਰੱਗ ਐਡਮਨਿਸਟਰੇਸ਼ਨ ਪੰਜਾਬ ਦੇ ਕਮਿਸ਼ਨਰ ਕਾਹਨ ਸਿੰਘ ਪੰਨੂ ਨੇ 26 ਸਤੰਬਰ, 2018 ਨੂੰ ਤਮਾਮ ਸਿਵਲ ਸਰਜਨਾਂ ਨੂੰ ਹੁਕਮ ਜਾਰੀ ਕਰ ਕੇ ਫ਼ੂਡ ਸੇਫ਼ਟੀ ਵਿੰਗ ਵਿਚ ਕੰਮ ਕਰਦੇ ਕਲਰਕਾਂ ਅਤੇ ਡਰਾਈਵਰਾਂ ਨੂੰ ਬਦਲਣ ਦੇ ਹੁਕਮ ਜਾਰੀ ਕੀਤੇ ਸਨ। ਕਿਹਾ ਗਿਆ ਸੀ ਕਿ ਜਿਨ੍ਹਾਂ ਕਲਰਕਾਂ ਅਤੇ ਡਰਾਈਵਰਾਂ ਨੂੰ ਇਸ ਵਿੰਗ ਵਿਚ ਕੰਮ ਕਰਦਿਆਂ ਸਾਲ ਤੋਂ ਵੱਧ ਸਮਾਂ ਹੋ ਗਿਆ ਹੈ, ਉਨ੍ਹਾਂ ਨੂੰ ਤੁਰੰਤ ਬਦਲ ਦਿੱਤਾ ਜਾਵੇ ਪਰ ਆਈ. ਏ. ਐੱਸ. ਅਧਿਕਾਰੀ ਦੇ ਹੁਕਮਾਂ ਨੂੰ ਉਦੋਂ ਦੇ ਸਿਵਲ ਸਰਜਨ ਟਿੱਚ ਜਾਣਦੇ ਰਹੇ। ਇਕ ਦੋ ਜ਼ਿਲਿਆਂ ਵਿਚ ਹੁਕਮ ਲਾਗੂ ਹੋਏ ਪਰ ਬਾਕੀ ਜ਼ਿਲਿਆਂ ਵਿਚ ਪਹਿਲਾਂ ਵਾਲੇ ਮੁਲਾਜ਼ਮ ਹੀ ਕਈ-ਕਈ ਵਰ੍ਹਿਆਂ ਤੋਂ ਕੰਮ ਕਰ ਰਹੇ ਹਨ।
ਸਿਹਤ ਮੰਤਰੀ ਦੀ ਸਖ਼ਤੀ ਸਾਹਮਣੇ ਸਭ ਸਿਫਾਰਿਸ਼ਾਂ ਹੋਈਆਂ ਫੇਲ
ਵਿਭਾਗੀ ਸੂਤਰ ਦੱਸਦੇ ਹਨ ਕਿ ਦੀਵਾਲੀ ਤੋਂ ਪਹਿਲਾਂ ਹੋਈ ਅਪਣੀ ਬਦਲੀ ਤੋਂ ਔਖੇ ਮੁਲਾਜ਼ਮਾਂ ਨੇ ਅਪਣੀ ਬਦਲੀ ਰੁਕਵਾਉਣ ਲਈ ਸਿਹਤ ਮੰਤਰੀ ਬਲਬੀਰ ਸਿੰਘ ਸਿੱਧੂ ਤੱਕ ਵੀ ਪਹੁੰਚ ਕੀਤੀ ਪਰ ਉਨ੍ਹਾਂ ਇਕ ਨਾ ਸੁਣੀ। ਸਿਹਤ ਮੰਤਰੀ ਦਾ ਕਹਿਣਾ ਸੀ ਕਿ 'ਨਾਪਾਕ ਗੱਠਜੋੜ' ਤੋੜਨ ਲਈ ਇਹ ਬਦਲੀਆਂ ਜ਼ਰੂਰੀ ਹਨ ਅਤੇ ਬਦਲੀ ਦੇ ਹੁਕਮ ਰੱਦ ਨਹੀਂ ਹੋ ਸਕਦੇ। ਦੱਸਣਯੋਗ ਹੈ ਪਹਿਲਾਂ ਕੋਈ ਵੀ ਸਿਹਤ ਮੰਤਰੀ ਜ਼ਿਲਾ ਮੋਹਾਲੀ ਦੇ ਫ਼ੂਡ ਸੇਫ਼ਟੀ ਵਿੰਗ ਵਿਚ ਡਟੇ ਬੈਠੇ ਮੁਲਾਜ਼ਮਾਂ ਦੀ ਬਦਲੀ ਕਰਨ ਦੀ ਹਿੰਮਤ ਨਹੀਂ ਕਰ ਸਕਿਆ ਪਰ ਮੌਜੂਦਾ ਸਿਹਤ ਮੰਤਰੀ ਨੇ ਕਿਸੇ ਦੀ ਸਿਫ਼ਾਰਸ਼ ਨਾ ਮੰਨੀ। ਖ਼ੈਰ ਹੁਣ ਇਹ ਵੇਖਣਾ ਬਾਕੀ ਹੈ ਕਿ ਇਹ ਹੁਕਮ ਕਦੋਂ ਤਕ ਅਸਰਦਾਰ ਰਹਿੰਦੇ ਹਨ?
ਨਵੇਂ ਸਿਵਲ ਸਰਜਨ ਨੇ ਵੀ ਲਿਆ ਸਟੈਂਡ
ਸੂਤਰਾਂ ਮੁਤਾਬਕ ਆਪਣੇ ਈਮਾਨਦਾਰ ਅਤੇ ਮਿਹਨਤੀ ਅਕਸ ਲਈ ਜਾਣੇ ਜਾਂਦੇ ਸਿਵਲ ਸਰਜਨ ਡਾ. ਮਨਜੀਤ ਸਿੰਘ ਵੀ ਅਪਣੇ ਫ਼ੈਸਲੇ 'ਤੇ ਅਡਿੱਗ ਰਹੇ। ਉਹ ਪਹਿਲੇ ਸਿਵਲ ਸਰਜਨ ਹਨ ਜਿਨ੍ਹਾਂ ਫ਼ੂਡ ਸੇਫ਼ਟੀ ਵਿੰਗ ਵਿਚ 10-10 ਸਾਲਾਂ ਤੋਂ ਡਟੇ ਹੋਏ ਮੁਲਾਜ਼ਮਾਂ ਦੀ ਬਦਲੀ ਦੇ ਹੁਕਮ ਕੀਤੇ ਅਤੇ ਆਪਣੇ ਹੁਕਮਾਂ ਦੀ ਅਸਰਦਾਰ ਢੰਗ ਨਾਲ ਪਾਲਣਾ ਵੀ ਕਰਵਾਈ, ਜਦਕਿ ਪਹਿਲਾਂ ਕੋਈ ਵੀ ਸਿਵਲ ਸਰਜਨ ਅਜਿਹਾ ਨਹੀਂ ਕਰ ਸਕਿਆ। ਜੇ ਕਦੇ ਇਕ ਵਾਰ ਬਦਲੀਆਂ ਦੇ ਹੁਕਮ ਹੋਏ ਵੀ ਸਨ ਤਾਂ ਉਹ ਵੀ ਫ਼ਾਈਲਾਂ ਵਿਚ ਹੀ ਦੱਬੇ ਰਹਿ ਗਏ ਸਨ।
ਕਲਰਕੀ ਦਾ ਕੰਮ ਕਰ ਰਹੇ ਇੰਸਪੈਕਟਰ ਦਾ ਤਬਾਦਲਾ ਅਜੇ ਵੀ ਬਾਕੀ
ਵਿਭਾਗ ਵਿਚ ਹੁਣ ਇਸ ਗੱਲ ਦੀ ਚਰਚਾ ਹੈ ਕਿ ਭਾਵੇਂ ਉਕਤ ਬਦਲੀਆਂ ਕੀਤੀਆਂ ਜਾ ਚੁੱਕੀਆਂ ਹਨ ਪ੍ਰੰਤੂ ਫ਼ੂਡ ਸੇਫ਼ਟੀ ਵਿੰਗ ਵਿਚ ਕਈ ਵਰ੍ਹਿਆਂ ਤੋਂ ਕਲਰਕੀ ਦਾ ਕੰਮ ਕਰ ਰਹੇ ਹੈਲਥ ਇੰਸਪੈਕਟਰ ਦਾ ਤਬਾਦਲਾ ਅਜੇ ਵੀ ਬਾਕੀ ਹੈ। ਇਸ ਬਾਰੇ ਕਿਆਸ ਅਰਾਈਆਂ ਲਗਾਈਆਂ ਜਾ ਰਹੀਆਂ ਹਨ ਕਿ ਉਸਦਾ ਦਾ ਤਬਾਦਲਾ ਕਦੋਂ ਹੋਵੇਗਾ। ਇਸ ਮੁਲਾਜ਼ਮ ਕੋਲ ਫ਼ੂਡ ਸੇਫ਼ਟੀ ਦੇ ਕੰਮ ਤੋਂ ਇਲਾਵਾ ਹੋਰ ਵੀ ਕਈ ਕੰਮ ਹਨ, ਜਦਕਿ ਨਿਯਮਾਂ ਮੁਤਾਬਕ ਉਸ ਕੋਲ ਮਲੇਰੀਆ ਰੋਕਥਾਮ ਦਾ ਕੰਮ ਹੋਣਾ ਚਾਹੀਦਾ ਹੈ ਪਰ 'ਮਲਾਈਦਾਰ' ਸੀਟ ਛੱਡਣ ਨੂੰ ਕੌਣ ਰਾਜ਼ੀ ਹੁੰਦਾ ਹੈ?