ਜਲੰਧਰ(ਪ੍ਰੀਤ)—ਟਾਂਡਾ ਰੋਡ ਵਿਖੇ ਸਥਿਤ ਸਟੇਟ ਬੈਂਕ ਆਫ ਇੰਡੀਆ ਦੇ ਇਕ ਏ. ਟੀ. ਐੱਮ. ਵਿਚੋਂ 2 ਨੌਸਰਬਾਜ਼ ਪੰਜਾਬ ਸਟੇਟ ਪਾਵਰ ਕਾਰਪੋਰੇਸ਼ਨ ਲਿਮਟਿਡ ਦੇ ਇਕ ਕੈਸ਼ੀਅਰ ਨੂੰ 18 ਹਜ਼ਾਰ ਰੁਪਏ ਦਾ ਚੂਨਾ ਲਾ ਗਏ। ਕੈਸ਼ੀਅਰ ਸ਼ਿਵ ਕੁਮਾਰ ਵਾਸੀ ਰੇਰੂ ਨੇ ਚਿੱਟੇ ਦਿਨ ਹੋਈ ਇਸ ਠੱਗੀ ਦੀ ਸ਼ਿਕਾਇਤ ਥਾਣਾ ਨੰਬਰ 3 ਵਿਚ ਕੀਤੀ ਹੈ। ਪੀ. ਐੱਸ. ਪੀ. ਸੀ. ਐੱਲ. ਦੇ ਪਠਾਨਕੋਟ ਚੌਕ ਵਿਚ ਸਥਿਤ ਦਫਤਰ ਵਿਚ ਬਤੌਰ ਕੈਸ਼ੀਅਰ ਨਿਯੁਕਤ ਸ਼ਿਵ ਕੁਮਾਰ ਵਾਸੀ ਰੇਰੂ ਨੇ ਦੱਸਿਆ ਕਿ ਉਹ ਬੁੱਧਵਾਰ ਸ਼ਾਮ 5 ਵਜੇ ਆਪਣੇ ਦਫਤਰ ਵਿਚੋਂ ਛੁੱਟੀ ਕਰਨ ਪਿੱਛੋਂ ਰੁਪਏ ਕਢਵਾਉਣ ਲਈ ਟਾਂਡਾ ਰੋਡ ਵਿਖੇ ਸਥਿਤ ਐੱਸ. ਬੀ. ਆਈ. ਦੀ ਬ੍ਰਾਂਚ ਦੇ ਬਾਹਰ ਲੱਗੇ ਏ. ਟੀ. ਐੱਮ. ਵਿਚ ਗਿਆ। ਅੰਦਰ ਇਕੋ ਕੈਬਿਨ ਵਿਚ ਦੋ ਮਸ਼ੀਨਾਂ ਲੱਗੀਆਂ ਹੋਈਆਂ ਹਨ। ਇਸ ਦੌਰਾਨ ਉਸਨੂੰ ਇਕ ਫੋਨ ਆ ਗਿਆ। ਉਹ ਫੋਨ ਸੁਣਦੇ ਸੁਣਦੇ ਮਸ਼ੀਨ ਵਿਚੋਂ ਪੈਸੇ ਕਢਵਾਉਣ ਦੀ ਕਾਰਵਾਈ ਕਰਨ ਲੱਗਾ। ਇਸ ਦੌਰਾਨ ਇਕ ਨੌਜਵਾਨ ਉਸਦੇ ਪਿੱਛੋਂ ਹੋ ਕੇ ਦੂਜੀ ਮਸ਼ੀਨ ਵੱਲ ਜਾ ਰਿਹਾ ਸੀ ਪਰ ਉਸਨੇ ਇਸ ਸਬੰਧੀ ਧਿਆਨ ਨਹੀਂ ਕੀਤਾ। ਉਸਨੇ ਆਪਣਾ ਕਾਰਡ ਮਸ਼ੀਨ ਵਿਚ ਪਾਇਆ ਅਤੇ ਪਾਸਵਰਡ ਲਾ ਦਿੱਤਾ, ਜਦੋਂ ਪਾਸਵਰਡ ਲਾਇਆ ਤਾਂ ਦੂਜੀ ਮਸ਼ੀਨ ਅੱਗੇ ਖੜ੍ਹੇ ਨੌਜਵਾਨ ਨੇ ਕਿਹਾ ਕਿ ਤੁਹਾਡੇ ਵਾਲੀ ਮਸ਼ੀਨ ਖਰਾਬ ਹੈ। ਤੁਸੀਂ ਇਸ ਮਸ਼ੀਨ ਵਿਚੋਂ ਪੈਸੇ ਕਢਵਾ ਲਓ।
ਸ਼ਿਵ ਕੁਮਾਰ ਨੇ ਕਿਹਾ ਕਿ ਉਸਨੇ ਕੈਂਸਲ ਦਾ ਬਟਨ ਦੱਬਿਆ ਅਤੇ ਕਾਰਡ ਲੈ ਕੇ ਦੂਜੀ ਏ. ਟੀ. ਐੱਮ. ਮਸ਼ੀਨ 'ਤੇ ਆ ਗਿਆ। ਉਸਨੇ ਉਸ ਮਸ਼ੀਨ ਵਿਚੋਂ 10 ਹਜ਼ਾਰ ਰੁਪਏ ਕਢਵਾਏ ਅਤੇ ਆਪਣੇ ਘਰ ਆ ਗਿਆ। ਕੁੱਝ ਦੇਰ ਬਾਅਦ ਹੀ ਉਸਦੇ ਮੋਬਾਇਲ ਫੋਨ 'ਤੇ ਇਕ ਹੋਰ ਮੈਸੇਜ ਆਇਆ ਕਿ ਤੁਹਾਡੇ ਖਾਤੇ ਵਿਚੋਂ 18 ਹਜ਼ਾਰ ਰੁਪਏ ਨਿਕਲੇ ਹਨ। ਸ਼ਿਵ ਕੁਮਾਰ ਨੇ ਕਿਹਾ ਕਿ ਉਹ ਤੁਰੰਤ ਬੈਂਕ ਪੁੱਜਾ ਅਤੇ ਸ਼ਿਕਾਇਤ ਕੀਤੀ ਪਰ ਬੈਂਕ ਦੇ ਅਧਿਕਾਰੀਆਂ ਨੇ ਉਸ ਦੀ ਇਕ ਨਾ ਸੁਣੀ। ਇਸ 'ਤੇ ਉਸਨੇ ਥਾਣਾ ਨੰਬਰ 3 ਵਿਚ ਸ਼ਿਕਾਇਤ ਦਰਜ ਕਰਵਾਈ।
ਦਿਨ ਦੇ ਸਮੇਂ ਗਾਰਡ ਲਈ ਲਿਖਾਂਗੇ ਅਧਿਕਾਰੀਆਂ ਨੂੰ : ਬੈਂਕ ਅਧਿਕਾਰੀ
ਬੈਂਕ ਦੇ ਅਧਿਕਾਰੀ ਸੰਜੇ ਕੁਮਾਰ ਨੇ ਕਿਹਾ ਕਿ ਉਨ੍ਹਾਂ ਨੂੰ ਇਸ ਘਟਨਾ ਸਬੰਧੀ ਜਾਣਕਾਰੀ ਮਿਲੀ ਹੈ। ਉਨ੍ਹਾਂ ਮੰਨਿਆ ਕਿ ਏ. ਟੀ. ਐੱਮ. ਕੈਬਿਨ ਵਿਚ ਦਿਨ ਦੇ ਸਮੇਂ ਕੋਈ ਵੀ ਸੁਰੱਖਿਆ ਮੁਲਾਜ਼ਮ ਨਹੀਂ ਹੁੰਦਾ। ਸੁਰੱਖਿਆ ਮੁਲਾਜ਼ਮ ਸਿਰਫ ਰਾਤ ਦੇ ਸਮੇਂ ਹੁੰਦਾ ਹੈ। ਇਸ ਘਟਨਾ ਪਿੱਛੋਂ ਚੋਟੀ ਦੇ ਅਧਿਕਾਰੀਆਂ ਨੂੰ ਦਿਨ ਦੇ ਸਮੇਂ ਵੀ ਸੁਰੱਖਿਆ ਮੁਲਾਜ਼ਮ ਨਿਯੁਕਤ ਕਰਨ ਲਈ ਲਿਖਿਆ ਜਾਏਗਾ।
ਏ. ਟੀ. ਐੱਮ. ਮਸ਼ੀਨ ਨਾਲ ਛੇੜਛਾੜ, ਕੈਂਸਲ ਬਟਨ 'ਤੇ ਲੱਗੀ ਸੀ ਕੁਇਕ ਫਿਕਸ
ਇਸ ਘਟਨਾ ਦੀ ਜਾਂਚ ਦੌਰਾਨ ਇਕ ਸਨਸਨੀਖੇਜ਼ ਖੁਲਾਸਾ ਹੋਇਆ ਹੈ, ਜਿਸ ਏ. ਟੀ. ਐੱਮ. ਮਸ਼ੀਨ ਵਿਚ ਪਹਿਲਾਂ ਸ਼ਿਵ ਕੁਮਾਰ ਨੇ ਕਾਰਡ ਪੰਚ ਕਰ ਕੇ ਪਾਸਵਰਡ ਲਾਇਆ ਸੀ ਅਤੇ ਫਿਰ ਖਰਾਬ ਸਮਝ ਕੇ ਕੈਂਸਲ ਦਾ ਬਟਨ ਦਬਾਇਆ ਸੀ, ਅਸਲ ਵਿਚ ਮਸ਼ੀਨ ਖਰਾਬ ਨਹੀਂ ਸੀ। ਕੈਂਸਲ ਬਟਨ 'ਤੇ ਕੁਇਕ ਫਿਕਸ ਲਾ ਕੇ ਉਸ ਨੂੰ ਜਾਮ ਕਰ ਦਿੱਤਾ ਗਿਆ ਸੀ। ਸ਼ਿਵ ਕੁਮਾਰ ਨੇ ਭਾਵੇਂ ਕੈਂਸਲ ਦਾ ਬਟਨ ਦੱਬਿਆ ਪਰ ਬਟਨ ਜਾਮ ਹੋਣ ਕਾਰਨ ਉਸ ਦਾ ਪ੍ਰੋਸੈੱਸ ਕੈਂਸਲ ਨਹੀਂ ਹੋਇਆ ਅਤੇ ਸ਼ਾਤਿਰ ਨੌਸਰਬਾਜ਼ 18 ਹਜ਼ਾਰ ਰੁਪਏ ਦਾ ਚੂਨਾ ਲਾ ਗਏ। ਇਸ ਸਬੰਧੀ ਥਾਣਾ ਨੰਬਰ 3 ਦੇ ਇੰਸ. ਵਿਜੇ ਕੁੰਵਰ ਪਾਲ ਨੇ ਕਿਹਾ ਕਿ ਮਾਮਲੇ ਦੀ ਜਾਂਚ ਕੀਤੀ ਜਾ ਰਹੀ ਹੈ। ਬੈਂਕ ਦੇ ਪ੍ਰਬੰਧਕਾਂ ਕੋਲੋਂ ਵੀ ਇਸ ਲਾਪ੍ਰਵਾਹੀ ਸਬੰਧੀ ਜਵਾਬ ਮੰਗਿਆ ਜਾਏਗਾ।
ਅਪਰਾਧੀਆਂ ਦੀ ਫੁਟੇਜ ਮਿਲੀ, ਜਲਦੀ ਫੜੇ ਜਾਣਗੇ : ਇੰਸ. ਕੁੰਵਰ ਵਿਜੇ
ਇੰਸ. ਕੁੰਵਰ ਵਿਜੇ ਨੇ ਦੱਸਿਆ ਕਿ ਸ਼ਿਕਾਇਤ ਮਿਲਣ ਪਿੱਛੋਂ ਸੀ. ਸੀ. ਟੀ. ਵੀ. ਫੁਟੇਜ ਕਢਵਾਈ ਗਈ ਹੈ। ਉਸ ਤੋਂ ਸਪੱਸ਼ਟ ਨਜ਼ਰ ਆਉਂਦਾ ਹੈ ਕਿ ਦੋ ਨੌਜਵਾਨਾਂ ਨੇ ਬੜੀ ਚਲਾਕੀ ਨਾਲ ਸ਼ਿਵ ਕੁਮਾਰ ਨੂੰ ਨਿਸ਼ਾਨਾ ਬਣਾਇਆ। ਦੋਵਾਂ ਨੌਸਰਬਾਜ਼ਾਂ ਦੀਆਂ ਤਸਵੀਰਾਂ ਕਢਵਾ ਲਈਆਂ ਗਈਆਂ ਹਨ। ਤਸਵੀਰਾਂ ਦੇ ਆਧਾਰ 'ਤੇ ਸ਼ਾਤਿਰ ਅਪਰਾਧੀਆਂ ਨੂੰ ਜਲਦੀ ਹੀ ਕਾਬੂ ਕਰ ਲਿਆ ਜਾਏਗਾ।
ਨਿਰਮਲ ਕੁਟੀਆ ਦੇ ਸੰਤ ਬਾਬਾ ਜਸਪਾਲ ਸਿੰਘ ਨੂੰ ਬਣਾਇਆ ਬੰਧਕ
NEXT STORY 
