ਲੁਧਿਆਣਾ (ਤਰੁਣ) : ਮਹਾਨਗਰ ਦੇ ਇਕ ਪਾਈਨਰ ਹੋਂਡਾ ਦੇ ਮਾਲਕ ਗੌਤਮ ਗਰਗ ’ਤੇ ਉਸ ਦੀ ਪਤਨੀ ਪੰਖੁੜੀ ਗਰਗ ਨੇ ਦਾਜ ਮੰਗਣ ਅਤੇ ਤੰਗ-ਪ੍ਰੇਸ਼ਾਨ ਕਰਨ ਅਤੇ ਉਸ ਨਾਲ ਬੁਰੀ ਤਰ੍ਹਾਂ ਕੁੱਟਮਾਰ ਕਰਨ ਦੇ ਗੰਭੀਰ ਦੋਸ਼ ਲਾਏ ਹਨ। 15 ਸਾਲਾ ਬੇਟੇ ਕਾਰਨ ਕਈ ਸਾਲ ਤੱਕ ਉਸ ਨੇ ਚੁੱਪ ਵੱਟੀ ਰੱਖੀ ਪਰ ਉਸ ਦਾ ਪਤੀ ਆਪਣੀਆਂ ਹਰਕਤਾਂ ਤੋਂ ਬਾਜ਼ ਨਹੀਂ ਆ ਰਿਹਾ। ਇੰਨਾ ਹੀ ਨਹੀਂ, ਪੀੜਤਾ ਨੇ ਆਪਣੇ ਦਿਓਰ ਅਤੇ ਸਹੁਰੇ ’ਤੇ ਵੀ ਛੇੜ-ਛਾੜ ਦੇ ਦੋਸ਼ ਲਾਏ ਹਨ। ਲੁਧਿਆਣਾ ਪੁਲਸ ਨੇ ਪਤੀ, ਦਿਓਰ ਅਤੇ ਸਹੁਰੇ ਖ਼ਿਲਾਫ਼ ਦਾਜ ਲਈ ਪ੍ਰੇਸ਼ਾਨ ਕਰਨ ਅਤੇ ਛੇੜ-ਛਾੜ ਕਰਨ ਦੇ ਦੋਸ਼ ’ਚ ਕੇਸ ਦਰਜ ਕੀਤਾ ਹੈ। ਪੀੜਤ ਔਰਤ ਪੰਖੁੜੀ ਗਰਗ ਦਾ ਕਹਿਣਾ ਹੈ ਕਿ ਉਸ ਦਾ ਵਿਆਹ 2006 ’ਚ ਗੌਤਮ ਗਰਗ ਨਾਲ ਹੋਇਆ ਸੀ। ਵਿਆਹ ਤੋਂ ਕੁਝ ਸਮੇਂ ਬਾਅਦ ਤੱਕ ਸਭ ਠੀਕ ਰਿਹਾ ਪਰ ਉਸ ਤੋਂ ਬਾਅਦ ਉਸ ਨੂੰ ਦਾਜ ਲਈ ਤੰਗ-ਪ੍ਰੇਸ਼ਾਨ ਕੀਤਾ ਜਾਣ ਲੱਗਾ। ਪਤੀ ਗੌਤਮ ਦੇ ਕਈ ਔਰਤਾਂ ਨਾਲ ਨਾਜਾਇਜ਼ ਸਬੰਧ ਹਨ। ਆਟੋ ਪ੍ਰਾ. ਲਿਮ. ਕੰਪਨੀ ਹੋਣ ਕਾਰਨ ਉਸ ਦੀ ਕੰਪਨੀ ’ਚ ਕਈ ਲੜਕੀਆਂ ਕੰਮ ਕਰਦੀਆਂ ਹਨ, ਜਿਨ੍ਹਾਂ ਨੂੰ ਉਹ ਲਾਲਚ ਦੇ ਕੇ ਵੱਖ-ਵੱਖ ਹੋਟਲਾਂ ’ਚ ਲਿਜਾਂਦਾ ਹੈ। ਇਕ ਵਾਰ ਉਸ ਨੇ ਰੰਗ ਹੱਥੀਂ ਪਤੀ ਨੂੰ ਫੜ ਲਿਆ, ਜਿਸ ਤੋਂ ਬਾਅਦ ਪਤੀ ਉਸ ’ਤੇ ਰੋਅਬ ਪਾਉਂਦੇ ਹੋਏ ਜ਼ਿਆਦਾ ਕੁੱਟਮਾਰ ਕਰਨ ਲੱਗਾ।
ਇਹ ਵੀ ਪੜ੍ਹੋ : ਬਕਾਇਆ ਪ੍ਰਾਪਰਟੀ ਟੈਕਸ ਜਮ੍ਹਾ ਕਰਵਾਉਣ ’ਤੇ ਦੇਣੀ ਹੋਵੇਗੀ 20 ਫੀਸਦੀ ਪੈਨਲਟੀ, 18 ਫੀਸਦੀ ਵਿਆਜ਼ ਵੀ ਲੱਗੇਗਾ
ਪਤੀ ਦੇ ਨਾਜਾਇਜ਼ ਸਬੰਧਾਂ ਬਾਰੇ ਜਦੋਂ ਉਸ ਨੇ ਸਹੁਰਾ ਇਸ਼ਵਰ ਦਾਸ ਗਰਗ ਅਤੇ ਦਿਓਰ ਅਮਨ ਗਰਗ ਨਾਲ ਗੱਲ ਕੀਤੀ ਤਾਂ ਉਨ੍ਹਾਂ ਕਿਹਾ ਕਿ ਵੱਡੇ ਘਰਾਂ ਦੇ ਲੜਕਿਆਂ ਲਈ ਇਹ ਆਮ ਗੱਲ ਹੈ। ਉਹ ਕਾਫੀ ਲੰਬੇ ਸਮੇਂ ਤੱਕ ਪਤੀ ਦੇ ਸੁਧਰ ਜਾਣ ਦੀ ਅਰਦਾਸ ਕਰਦੀ ਰਹੀ ਪਰ ਉਸ ਦੇ ਪਤੀ ਦੇ ਦਿਨ-ਬ-ਦਿਨ ਤੇਵਰ ਹੋਰ ਵਿਗੜਦੇ ਰਹੇ। ਪਤੀ ਰੋਜ਼ਾਨਾ ਉਸ ਨਾਲ ਬੁਰੀ ਤਰ੍ਹਾਂ ਕੁੱਟਮਾਰ ਕਰਦਾ ਰਿਹਾ। ਕਈ ਵਾਰ ਉਸ ’ਤੇ ਇੰਨੀ ਬੁਰੀ ਤਰ੍ਹਾਂ ਹਮਲਾ ਕੀਤਾ ਗਿਆ ਕਿ ਉਸ ਦਾ ਬੋਲਣਾ ਵੀ ਮੁਸ਼ਕਿਲ ਹੋ ਗਿਆ। ਉਸ ਦਾ ਜਬਾੜਾ ਤੋੜ ਦਿੱਤਾ ਗਿਆ। ਵਿਆਹ ਤੋਂ ਬਾਅਦ ਉਸ ਦੇ ਪਿਤਾ ਨੇ ਬੇਟੀ ਦੀ ਖੁਸ਼ੀ ਖਾਤਰ ਸੋਨੇ ਦੇ ਗਹਿਣਿਆਂ ਸਮੇਤ ਕਾਫੀ ਸਾਮਾਨ ਦਿੱਤਾ ਪਰ ਸਹੁਰੇ ਦੇ ਦੂਜੇ ਵਿਆਹ ਸਮੇਂ ਸਾਰਾ ਸੋਨੇ ਦਾ ਸਾਮਾਨ ਪਤੀ ਗੌਤਮ ਦੇ ਕਹਿਣ ’ਤੇ ਨਵੀਂ ਸੱਸ ਨੂੰ ਸੌਂਪ ਦਿੱਤਾ ਗਿਆ।
ਇਹ ਵੀ ਪੜ੍ਹੋ : ਅਹਿਮ ਬਦਲਾਅ : ਬਿਜਲੀ ਦਰਾਂ ਵਧਣਗੀਆਂ, 15 ਸਾਲ ਪੁਰਾਣੇ ਸਰਕਾਰੀ ਵਾਹਨ ਹੋਣਗੇ ਬੰਦ
ਪਤੀ ਦੀਆਂ ਰੋਜ਼ਾਨਾ ਦੀਆਂ ਹਰਕਤਾਂ ਤੋਂ ਤੰਗ ਆ ਕੇ ਉਸ ਨੇ ਕੰਮ-ਕਾਜ ਕੀਤਾ। ਇਕ ਕੈਫੇ ਖੋਲ੍ਹਿਆ ਪਰ ਉਕਤ ਕੈਫੇ ਨੂੰ ਵੀ ਪਤੀ, ਦਿਓਰ, ਸਹੁਰੇ ਨੇ ਮਿਲ ਕੇ ਕਿਸੇ ਵਿਅਕਤੀ ਨੂੰ 1.40 ਕਰੋੜ ’ਚ ਵੇਚ ਦਿੱਤਾ। ਉਹ ਕਾਫੀ ਸਮੇਂ ਤੋਂ ਸਿਰਫ ਇਹੀ ਇੰਤਜ਼ਾਰ ਕਰ ਰਹੀ ਸੀ ਕਿ ਇਕ ਦਿਨ ਉਸ ਦਾ ਪਤੀ ਸੁਧਰ ਜਾਵੇਗਾ। ਉਸ ਦਾ 15 ਸਾਲ ਦਾ ਬੇਟਾ ਬੈਂਗਲੁਰੂ ’ਚ ਪੜ੍ਹਦਾ ਹੈ। ਇਸ ਸਭ ਦੇ ਬਾਵਜੂਦ ਉਸ ਦੇ ਪਤੀ ਦੇ ਰਵੱਈਏ ’ਚ ਕੋਈ ਸੁਧਾਰ ਨਹੀਂ ਆਇਆ ਤਾਂ ਉਸ ਨੇ ਸਹੁਰਾ ਅਤੇ ਦਿਓਰ ਨੂੰ ਪਤੀ ਦੀਆਂ ਹਰਕਤਾਂ ਬਾਰੇ ਮੁੜ ਦੱਸਿਆ। ਉਲਟਾ ਸਹੁਰਾ ਅਤੇ ਦਿਓਰ ਨੇ ਉਸ ਨਾਲ ਛੇੜ-ਛਾੜ ਕੀਤੀ। ਉਸ ਨਾਲ ਬੁਰਾ ਵਰਤਾਓ ਕੀਤਾ, ਜਿਸ ਕਾਰਨ ਉਹ ਕਾਫੀ ਦੁਖੀ ਹੈ। ਸਹੁਰੇ ਦਾ ਮੰਡੀ ਗੋਬਿੰਦਗੜ੍ਹ ’ਚ ਗੰਨ ਹਾਊਸ ਹੈ, ਜਿਸ ਦੀ ਵੀ ਉਹ ਧੌਂਸ ਜਮਾਉਂਦਾ ਹੈ ਕਿ ਉਸ ਦੇ ਕਈ ਗੈਂਗਸਟਰਾਂ ਨਾਲ ਸਬੰਧ ਹਨ। ਉਸ ਨੇ ਪੁਲਸ ਪ੍ਰਸ਼ਾਸਨ ਤੋਂ ਇਨਸਾਫ ਦੀ ਮੰਗ ਕਰਦੇ ਹੋਏ ਪਤੀ, ਸਹੁਰਾ ਅਤੇ ਦਿਓਰ ਖ਼ਿਲਾਫ਼ ਸਖ਼ਤ ਤੋਂ ਸਖ਼ਤ ਕਾਰਵਾਈ ਦੀ ਮੰਗ ਕੀਤੀ ਹੈ।
ਇਹ ਵੀ ਪੜ੍ਹੋ : 32 ਸਾਲ ਪੁਰਾਣੇ ਕੇਸ ’ਚ CBI ਕੋਰਟ ’ਚ ਸੁਣਵਾਈ, ਤੱਤਕਾਲੀਨ ਇੰਸਪੈਕਟਰ ਦੋਸ਼ੀ ਕਰਾਰ
ਨੋਟ - ਇਸ ਖ਼ਬਰ ਸੰਬੰਧੀ ਕੀ ਹੈ ਤੁਹਾਡੀ ਰਾਏ, ਕੁਮੈਂਟ ਕਰਕੇ ਦੱਸੋ
ਪੰਜਾਬ ਵਿਚ ਭਾਰੀ ਮੀਂਹ ਦੀ ਚਿਤਾਵਨੀ, ਮੌਸਮ ਵਿਭਾਗ ਨੇ ਜਾਰੀ ਕੀਤਾ ਅਲਰਟ
NEXT STORY 
