ਬੇਗੋਵਾਲ (ਰਜਿੰਦਰ,ਬੱਬਲਾ)- ਬੇਗੋਵਾਲ ਸ਼ਹਿਰ ਦੇ ਵਾਰਡ ਨੰਬਰ 12 ਦੇ ਇਕ ਘਰ ਵਿਚ ਸਾਫ-ਸਫਾਈ ਦਾ ਕੰਮ ਕਰਨ ਵਾਲੀ ਔਰਤ ਨੇ ਇਕ ਬਜ਼ੁਰਗ ਔਰਤ ਦਾ ਕਤਲ ਕਰ ਦਿੱਤਾ ਅਤੇ ਸੋਨੇ ਦੇ ਗਹਿਣੇ ਅਤੇ ਨਕਦੀ ਲੁੱਟ ਕੇ ਫਰਾਰ ਹੋ ਗਈ। ਪੁਲਸ ਨੇ ਕਤਲ ਦੇ ਮਾਮਲੇ ਨੂੰ ਹੱਲ ਕਰਦਿਆਂ ਦੋਸ਼ੀ ਔਰਤ ਨੂੰ ਗ੍ਰਿਫਤਾਰ ਕਰ ਲਿਆ ਹੈ।
ਜਾਣਕਾਰੀ ਅਨੁਸਾਰ ਬੇਗੋਵਾਲ ਸ਼ਹਿਰ ਦੇ ਵਾਰਡ ਨੰਬਰ 12 ਦੇ ਇਕ ਘਰ ਵਿਚ ਮਹਿੰਦਰ ਸਿੰਘ ਤੇ ਉਸ ਦੀ ਪਤਨੀ ਅਮਰਜੀਤ ਕੌਰ ਇਕੱਲੇ ਰਹਿੰਦੇ ਹਨ। ਮਹਿੰਦਰ ਸਿੰਘ ਜਲੰਧਰ ਤੇ ਕਪੂਰਥਲਾ ਗਿਆ ਸੀ ਅਤੇ ਅਮਰਜੀਤ ਕੌਰ ਘਰ ਵਿਚ ਇਕੱਲੀ ਸੀ। ਇਸੇ ਦੌਰਾਨ ਗੁਆਂਢ ਵਿਚ ਸਾਫ-ਸਫਾਈ ਕਰਨ ਵਾਲੀ ਔਰਤ ਜਸਵਿੰਦਰ ਕੌਰ ਉਰਫ ਸੋਨੀਆ ਪਤਨੀ ਸਰਬਜੀਤ ਸਿੰਘ ਵਾਸੀ ਬੇਗੋਵਾਲ ਅਮਰਜੀਤ ਕੌਰ ਦੇ ਘਰ ਆਈ ਅਤੇ ਅਮਰਜੀਤ ਕੌਰ ਦਾ ਚੁੰਨੀ ਨਾਲ ਘੁੱਟ ਕੇ ਕਤਲ ਕਰ ਦਿੱਤਾ ਅਤੇ ਮ੍ਰਿਤਕਾ ਦੇ ਕੰਨਾਂ ਵਿਚੋਂ ਸੋਨੇ ਦੇ ਕਾਂਟੇ ਉਤਾਰ ਲਏ, ਅਲਮਾਰੀ ਵਿਚੋਂ ਨਕਦੀ ਤੇ ਲੁੱਟ ਲਈ ਤੇ ਫਰਾਰ ਹੋ ਗਈ। ਇਸ ਕਤਲ ਦਾ ਖੁਲਾਸਾ ਉਸ ਵੇਲੇ ਹੋਇਆ, ਜਦੋਂ ਅਮਰਜੀਤ ਕੌਰ ਦਾ ਪਤੀ ਮਹਿੰਦਰ ਸਿੰਘ ਕਰੀਬ 2 ਵਜੇ ਘਰ ਪੁੱਜਾ ਤਾਂ ਅਮਰਜੀਤ ਮ੍ਰਿਤਕ ਹਾਲਤ ਵਿਚ ਸੀ।
ਮਹਿੰਦਰ ਸਿੰਘ ਨੇ ਪੁਲਸ ਨੂੰ ਦੱਸਿਆ ਕਿ ਸੋਨੀਆਂ ਗੁਆਂਢ ਵਿਚ ਸਫਾਈ ਦਾ ਕੰਮ ਕਰਦੀ ਹੈ ਤੇ ਕੁਝ ਦਿਨਾਂ ਤੋਂ ਉਸ ਨੇ ਸਾਡੇ ਘਰ ਆਉਣਾ-ਜਾਣਾ ਸ਼ੁਰੂ ਕੀਤਾ ਸੀ। ਇਸੇ ਦੌਰਾਨ ਇਸਨੇ ਸਾਡੇ ਕੋਲੋਂ ਵਿਆਜ 'ਤੇ 10 ਹਜ਼ਾਰ ਰੁਪਏ ਦੀ ਮੰਗ ਕੀਤੀ ਸੀ, ਪਰ ਨਾਂਹ ਕਰ ਦਿੱਤੀ। ਮਹਿੰਦਰ ਨੇ ਦੱਸਿਆ ਕਿ ਗਹਿਣਿਆਂ ਦੇ ਨਾਲ-ਨਾਲ ਘਰ ਵਿਚ ਕੁਝ ਰੁਪਏ ਵੀ ਸਨ ਜੋ ਗਾਇਬ ਹਨ। ਘਟਨਾ ਦਾ ਪਤਾ ਲੱਗਣ 'ਤੇ ਜ਼ਿਲਾ ਕਪੂਰਥਲਾ ਦੇ ਐੱਸ.ਪੀ. (ਡੀ) ਜਗਜੀਤ ਸਿੰਘ ਸਰੋਆ ਤੇ ਐੱਸ.ਐੱਚ.ਓ. ਬੇਗੋਵਾਲ ਸੁਖਬੀਰ ਸਿੰਘ ਵੱਡੀ ਗਿਣਤੀ ਵਿਚ ਪੁਲਸ ਫੋਰਸ ਨਾਲ ਮੌਕੇ 'ਤੇ ਪੁੱਜੇ। ਇਸ ਮੌਕੇ ਗੱਲਬਾਤ ਕਰਦਿਆਂ ਐੱਸ.ਪੀ.(ਡੀ) ਜਗਜੀਤ ਸਿੰਘ ਸਰੋਆ ਨੇ ਦਸਿਆ ਕਿ ਜਸਵਿੰਦਰ ਕੌਰ ਉਰਫ ਸੋਨੀਆਂ ਨੂੰ ਗ੍ਰਿਫਤਾਰ ਕਰਕੇ ਮੁਢਲੀ ਪੁਛਗਿੱਛ ਕੀਤੀ ਗਈ ਹੈ ਤੇ ਇਹ ਕਤਲ ਸੋਨੀਆ ਨੇ ਹੀ ਕੀਤਾ ਹੈ। ਜਿਸ ਸੰਬੰਧੀ ਥਾਣਾ ਬੇਗੋਵਾਲ ਵਿਖੇ ਕਤਲ ਦਾ ਕੇਸ ਦਰਜ ਕੀਤਾ ਜਾ ਰਿਹਾ ਹੈ। ਐੱਸ.ਪੀ. ਸਰੋਆ ਨੇ ਦੱਸਿਆ ਕਿ ਹਾਲੇ ਤੱਕ ਦੀ ਜਾਂਚ ਵਿਚ ਇਹੀ ਸਾਹਮਣੇ ਆਇਆ ਹੈ ਕਿ ਕਤਲ ਸੋਨੀਆਂ ਨੇ ਹੀ ਕੀਤਾ ਹੈ।
ਬੈੱਡ ਹੇਠੋਂ ਮਿਲੇ 22 ਹਜ਼ਾਰ 500 ਰੁਪਏ- ਕਤਲ ਦੀ ਜਾਂਚ ਦੌਰਾਨ ਘਟਨਾ ਸਥਾਨ ਨੇੜੇ ਪਏ ਬੈੱਡ ਹੇਠੋਂ ਬੇਗੋਵਾਲ ਪੁਲਸ ਨੇ 22 ਹਜ਼ਾਰ 500 ਰੁਪਏ ਦੀ ਨਕਦੀ ਬਰਾਮਦ ਕੀਤੀ। ਜਿਸ ਸੰਬੰਧੀ ਦਸਿਆ ਗਿਆ ਹੈ ਕਿ ਕਤਲ ਦਾ ਪਤਾ ਲੱਗਣ ਦੌਰਾਨ ਜਦੋਂ ਨੇੜਲੇ ਘਰਾਂ ਦੀਆਂ ਇਕੱਠੀਆਂ ਹੋਈਆਂ ਔਰਤਾਂ ਵਲੋਂ ਸੋਨੀਆਂ ਨੂੰ ਬੁਲਾ ਕੇ ਮੌਕੇ 'ਤੇ ਲਿਆਂਦਾ ਗਿਆ ਤਾਂ ਉਸ ਨੇ ਇਹ ਨਕਦੀ ਬੈੱਡ ਹੇਠਾਂ ਸੁੱਟੀ, ਜਿਸ ਦਾ ਮੌਕੇ 'ਤੇ ਪਤਾ ਲੱਗ ਗਿਆ, ਜਿਸ ਦੌਰਾਨ ਬੇਗੋਵਾਲ ਪੁਲਸ ਵਲੋਂ ਮੌਕੇ 'ਤੇ ਸੋਨੀਆਂ ਨੂੰ ਹਿਰਾਸਤ ਵਿਚ ਲੈ ਕੇ ਪੁਛਗਿੱਛ ਕੀਤੀ ਗਈ, ਜਿਸ ਤੋਂ ਬਾਅਦ ਪੁਲਸ ਵਲੋਂ ਪੁਸ਼ਟੀ ਹੋਈ ਕਿ ਇਹ ਕਤਲ ਸੋਨੀਆ ਨੇ ਹੀ ਕੀਤਾ ਹੈ।
ਬਜ਼ੁਰਗ ਦੀ ਲਾਸ਼ ਖਨੌਰੀ ਨਹਿਰ ਵਿਚੋਂ ਮਿਲੀ
NEXT STORY 
