ਤਰਨਤਾਰਨ (ਰਮਨ) : ਸਰਹੱਦੀ ਜ਼ਿਲਾ ਤਰਨਤਾਰਨ ਵਿਚ ਲੋਕਾਂ ਦੇ ਵੱਖ-ਵੱਖ ਕੰਮਾਂ ਨਾਲ ਸਬੰਧਤ ਪੁਲਸ ਸਾਂਝ ਕੇਂਦਰ ਜ਼ਿਲੇ ਦੇ ਵੱਖ-ਵੱਖ ਸਬ ਡਵੀਜ਼ਨਾਂ ਅੰਦਰ ਸਥਾਪਤ ਕੀਤੇ ਗਏ ਸਨ ਤਾਂ ਜੋ ਆਮ ਲੋਕਾਂ ਦੇ ਨਾਲ ਨਾਲ ਅਪਰਾਧੀ ਕਿਸਮ ਦੇ ਵਿਅਕਤੀਆਂ ਦੀ ਪਾਸਪੋਰਟ ਵੈਰੀਫਿਕੇਸ਼ਨ ਅਤੇ ਹੋਰ ਆਚਰਣ ਸਬੰਧੀ ਕੰਮਾਂ ਨੂੰ ਬਰੀਕੀ ਨਾਲ ਵੇਖਿਆ ਜਾ ਸਕੇ ਪ੍ਰੰਤੂ ਅੰਤਰਰਾਸ਼ਟਰੀ ਸਮਗਲਰ ਸ਼ਹਿਨਾਜ਼ ਭਿੰਡਰ ਦੇ ਪਾਸਪੋਰਟ ਰਿਲੀਜ਼ ਮਾਮਲੇ ਵਿਚ ਪੁਲਸ ਸਾਂਝ ਕੇਂਦਰਾਂ ਵਿਚ ਤੈਨਾਤ ਕਰਮਚਾਰੀਆਂ ਦੀ ਦਖਲ ਅੰਦਾਜੀ ਅਤੇ ਭੂਮਿਕਾ ਸ਼ੱਕ ਦੇ ਘੇਰੇ ਵਿਚ ਆਉਣ ਤੋਂ ਇਨਕਾਰ ਨਹੀਂ ਕੀਤਾ ਜਾ ਸਕਦਾ ਹੈ। ਹੈਰਾਨੀ ਦੀ ਗੱਲ ਹੈ ਕਿ ਜ਼ਿਲੇ ਅੰਦਰ ਮੌਜੂਦ ਇਨ੍ਹਾਂ ਪੁਲਸ ਸਾਂਝ ਕੇਂਦਰਾਂ ਵਿਚ ਬੀਤੇ ਕਈ ਸਾਲਾਂ ਤੋਂ ਤੈਨਾਤ ਪੁਲਸ ਕਰਮਚਾਰੀਆਂ ਦੇ ਤਬਾਦਲੇ ਹੋਰ ਦਫਤਰਾਂ ’ਚ ਆਮ ਕਰਮਚਾਰੀਆਂ ਦੀ ਤਰ੍ਹਾਂ ਕਿਉਂ ਨਹੀਂ ਕੀਤੇ ਜਾ ਰਹੇ ਹਨ। ਜ਼ਿਕਰਯੋਗ ਹੈ ਕਿ ਜ਼ਿਲੇ ਵਿਚ ਮੌਜੂਦ ਕਈ ਵੱਡੇ ਅਪਰਾਧੀ ਅਤੇ ਗੈਂਗਸਟਰਾਂ ਦੀ ਕੁਝ ਕਥਿਤ ਪੁਲਸ ਕਰਮਚਾਰੀਆਂ ਵੱਲੋਂ ਕੀਤੀ ਮਦਦ ਨਾਲ ਉਹ ਵਿਦੇਸ਼ ਫਰਾਰ ਹੋਣ ’ਚ ਕਾਮਯਾਬ ਹੋਏ ਹੋ ਸਕਦੇ ਹਨ, ਜੋ ਇਕ ਵੱਡੀ ਜਾਂਚ ਦਾ ਵਿਸ਼ਾ ਬਣਿਆ ਹੋਇਆ ਹੈ।
ਇਹ ਵੀ ਪੜ੍ਹੋ : ਲੁਧਿਆਣਾ : ਤੇਜ਼ਧਾਰ ਹਥਿਆਰਾਂ ਨਾਲ ਲੈਸ ਨਕਾਬਪੋਸ਼ਾਂ ਨੇ ਅੱਧੀ ਰਾਤ ਨੂੰ ਮਚਾਇਆ ਤਾਂਡਵ
ਸਰਹੱਦੀ ਜ਼ਿਲਾ ਤਰਨਤਾਰਨ ਵਿਚ ਪੁਲਸ ਪ੍ਰਸ਼ਾਸਨ ਵੱਲੋਂ ਲੋਕਾਂ ਦੇ ਆਚਰਣ, ਪੁਲਸ ਵੈਰੀਫਿਕੇਸ਼ਨ, ਗੁੰਮਸ਼ੁਦਗੀ ਦੀ ਰਿਪੋਰਟ ਦਰਜ ਕਰਵਾਉਣ ਤੋਂ ਇਲਾਵਾ ਹੋਰ ਕਈ ਵੱਖ-ਵੱਖ ਜ਼ਰੂਰੀ ਕੰਮਾਂ ਨਾਲ ਸਬੰਧਤ ਪੁਲਸ ਸਾਂਝ ਕੇਂਦਰ ਖੋਲ੍ਹੇ ਗਏ ਹਨ। ਜਿੱਥੇ ਪੁਲਸ ਪ੍ਰਸ਼ਾਸਨ ਵੱਲੋਂ ਦਾਅਵਾ ਕੀਤਾ ਜਾਂਦਾ ਹੈ ਕਿ ਇਥੇ ਮੌਜੂਦ ਸਟਾਫ ਵੱਲੋਂ ਬਿਨਾਂ ਕਿਸੇ ਖੱਜਲ-ਖੁਆਰੀ ਦੇ ਲੋਕਾਂ ਨੂੰ ਵਧੀਆ ਸਹੂਲਤਾਂ ਬਿਨਾਂ ਕਿਸੇ ਰਿਸ਼ਵਤ ਅਤੇ ਖੱਜਲ-ਖੁਆਰੀ ਤੋਂ ਦਿੱਤੀਆਂ ਜਾਣਗੀਆਂ ਪ੍ਰੰਤੂ ਇਨ੍ਹਾਂ ਪੁਲਸ ਸਾਂਝ ਕੇਂਦਰਾਂ ਵਿਚ ਬੀਤੇ ਪੰਜ ਤੋਂ ਸੱਤ ਸਾਲ ਦੇ ਲੰਮੇਂ ਕਾਰਜ ਕਾਲ ਤੋਂ ਤੈਨਾਤ ਪੁਲਸ ਕਰਮਚਾਰੀਆਂ ਦੇ ਤਬਾਦਲੇ ਦੂਸਰੇ ਦਫਤਰਾਂ ਵਿਚ ਨਾ ਹੋਣਾ ਇਕ ਵੱਡਾ ਸਵਾਲ ਖੜ੍ਹਾ ਕਰ ਰਿਹਾ ਹੈ। ਜੇ ਪੁਲਸ ਪ੍ਰਸ਼ਾਸਨ ਦੇ ਨਿਯਮਾਂ ਦੀ ਗੱਲ ਕਰੀਏ ਤਾਂ ਇਕ ਸਾਂਝ ਕੇਂਦਰ ਵਿਚ ਤੈਨਾਤ ਛੋਟੇ ਤੋਂ ਵੱਡਾ ਪੁਲਸ ਕਰਮਚਾਰੀ ਲਗਾਤਾਰ ਦੋ ਸਾਲ ਤੋਂ ਵੱਧ ਸਮੇਂ ਤੱਕ ਇਕੋ ਜਗ੍ਹਾ ਉਪਰ ਤੈਨਾਤ ਨਹੀਂ ਰਹਿ ਸਕਦਾ ਹੈ ਪ੍ਰੰਤੂ ਜ਼ਿਲੇ ਦੇ ਐੱਸ.ਐੱਸ.ਪੀ ਦਫਤਰ ਵਿਚ ਮੌਜੂਦ ਮੁੱਖ ਸਾਂਝ ਕੇਂਦਰ ਤੋਂ ਇਲਾਵਾ ਹੋਰ ਵੱਖ-ਵੱਖ ਸਬ ਡਵੀਜ਼ਨਾਂ ਵਿਚ ਮੌਜੂਦ ਸਾਂਝ ਕੇਂਦਰਾਂ ਅੰਦਰ ਪੰਜ ਤੋਂ ਸੱਤ ਸਾਲ ਤੱਕ ਦੇ ਕਾਰਜਕਾਲ ਵਿਚ ਉਹੀ ਕਰਮਚਾਰੀ ਤੈਨਾਤ ਨਜ਼ਰ ਆ ਰਹੇ ਹਨ। ਇਨ੍ਹਾਂ ਕਾਂਸਟੇਬਲ, ਹੈੱਡ ਕਾਂਸਟੇਬਲ ਅਤੇ ਹੋਰ ਰੈਂਕ ਦੇ ਕਰਮਚਾਰੀਆਂ ਦੇ ਤਬਾਦਲੇ ਦੂਸਰੇ ਦਫਤਰਾਂ ਵਿਚ ਨਾ ਕੀਤੇ ਜਾਣਾ ਜਿੱਥੇ ਪੁਲਸ ਪ੍ਰਸ਼ਾਸਨ ਵੱਲੋਂ ਬਣਾਏ ਗਏ ਨਿਯਮਾਂ ਦੀ ਉਲੰਘਣਾ ਕਰ ਰਿਹਾ ਹੈ, ਉਥੇ ਹੀ ਇਸ ਲੰਮੇਂ ਸਮੇਂ ਦੀ ਤੈਨਾਤੀ ਪਿੱਛੇ ਕਥਿਤ ਤੌਰ ਉਪਰ ਮੋਟੀ ਕਮਾਈ ਜਾਂ ਫਿਰ ਆਰਾਮਦਾਇਕ ਡਿਊਟੀ ਨੂੰ ਮੰਨਿਆ ਜਾ ਸਕਦਾ ਹੈ। ਇਨ੍ਹਾਂ ਪੁਲਸ ਸਾਂਝ ਕੇਂਦਰਾਂ ਵਿਚ ਤੈਨਾਤ ਜ਼ਿਆਦਾਤਰ ਕਰਮਚਾਰੀ ਬਿਨਾਂ ਵਰਦੀ ਤੋਂ ਹੀ ਆਪਣੀ ਡਿਊਟੀ ਉਪਰ ਹਾਜ਼ਰ ਵੇਖੇ ਜਾ ਸਕਦੇ ਹਨ ਜਦਕਿ ਇਨ੍ਹਾਂ ਲਈ ਪੰਜਾਬ ਪੁਲਸ ਵੱਲੋਂ ਵੱਖਰੀ ਯੂਨੀਫਾਰਮ ਬਣਾਈ ਗਈ ਹੈ।
ਅੰਤਰਰਾਸ਼ਟਰੀ ਸਮਗਲਰ ਸ਼ਹਿਨਾਜ਼ ਭਿੰਡਰ ਕਿਵੇਂ ਹੋਇਆ ਫ਼ਰਾਰ
ਆਮ ਤੌਰ ’ਤੇ ਵੇਖਣ ਨੂੰ ਮਿਲਦਾ ਹੈ ਕਿ ਜੇ ਕਿਸੇ ਮਮੂਲੀ ਅਪਰਾਧ ਵਿਚ ਦਰਜ ਐੱਫ.ਆਈ.ਆਰ ਦੇ ਚੱਲਦਿਆਂ ਸਬੰਧਤ ਵਿਅਕਤੀ ਵੱਲੋਂ ਅਪਲਾਈ ਕੀਤੇ ਗਏ ਪਾਸਪੋਰਟ ਦੀ ਵੈਰੀਫਿਕੇਸ਼ਨ ਨੂੰ ਸਾਂਝ ਕੇਂਦਰਾਂ ਵਿਚ ਤਾਇਨਾਤ ਕਰਮਚਾਰੀਆਂ ਵੱਲੋਂ ਪ੍ਰਵਾਨਗੀ ਨਹੀਂ ਦਿੱਤੀ ਜਾਂਦੀ ਹੈ ਪ੍ਰੰਤੂ ਅੰਤਰਰਾਸ਼ਟਰੀ ਪੱਧਰ ਉਪਰ ਕੰਮ ਕਰਨ ਵਾਲੇ ਬਟਾਲਾ ਦੇ ਨਿਵਾਸੀ ਸ਼ਹਿਨਾਜ਼ ਸਿੰਘ ਉਰਫ ਸ਼ੋਨ ਭਿੰਡਰ ਜੋ ਅਮਰੀਕਾ ਦੀ ਏਜੰਸੀ ਐੱਫ.ਬੀ.ਆਈ ਵੱਲੋਂ ਵੀ ਲੁੜੀਂਦਾ ਸੀ ਨੂੰ ਤਰਨਤਾਰਨ ਪੁਲਸ ਵੱਲੋਂ ਗ੍ਰਿਫਤਾਰ ਕਰਨ ਦੇ ਬਾਵਜੂਦ ਉਸ ਦਾ ਜਬਤ ਕੀਤਾ ਗਿਆ ਪਾਸਪੋਰਟ ਜ਼ਿਲੇ ਦੇ ਭ੍ਰਿਸ਼ਟ ਪੁਲਸ ਕਰਮਚਾਰੀਆਂ ਵੱਲੋਂ ਮਿਲੀ ਭੁਗਤ ਕਰਕੇ ਰਿਲੀਜ਼ ਕਰ ਦਿੱਤਾ ਗਿਆ। ਇਸ ਵਿਚ ਭਾਵੇਂ 5 ਪੁਲਸ ਕਰਮਚਾਰੀਆਂ ਦੇ ਖਿਲਾਫ ਪਰਚਾ ਦਰਜ ਕਰ ਲਿਆ ਗਿਆ ਹੈ ਪ੍ਰੰਤੂ ਬੜੀ ਮੁਸ਼ਕਿਲ ਨਾਲ ਕਾਬੂ ਕੀਤਾ ਗਿਆ ਅੰਤਰਰਾਸ਼ਟਰੀ ਸਮਗਲਰ ਸ਼ਹਿਨਾਜ਼ ਭਿੰਡਰ ਮੋਟੀ ਰਕਮ ਖਰਚ ਕਰਦੇ ਹੋਏ ਆਪਣੇ ਇਸ਼ਾਰਿਆਂ ’ਤੇ ਤਰਨਤਾਰਨ ਪੁਲਸ ਨੂੰ ਨਚਾਉਂਦਾ ਹੋਇਆ ਕੈਨੇਡਾ ਫਰਾਰ ਹੋਣ ’ਚ ਕਾਮਯਾਬ ਹੋ ਗਿਆ। ਅੰਤਰਰਾਸ਼ਟਰੀ ਪੱਧਰ ਉਪਰ ਲੋੜੀਂਦੇ ਮੁਲਜ਼ਮ ਨੂੰ ਫਰਾਰ ਕਰਵਾਉਣ ਵਿਚ ਪੁਲਸ ਸਾਂਝ ਕੇਂਦਰ ਵੀ ਤੈਨਾਤ ਕਰਮਚਾਰੀਆਂ ਦੀ ਮਿਲੀ ਭੁਗਤ ਸਾਹਮਣੇ ਆ ਰਹੀ ਹੈ ਕਿਉਂਕਿ ਪਾਸਪੋਰਟ ਦਫਤਰ ਵੱਲੋਂ ਇਸ ਮੁਲਜ਼ਮ ਵੱਲੋਂ ਆਪਣੇ ਪੁਲਸ ਕਬਜ਼ੇ ਵਿਚ ਮੌਜੂਦ ਪਾਸਪੋਰਟ ਨੂੰ ਰਿਲੀਜ਼ ਕਰਨ ਲਈ ਅਰਜੀ ਦਿੱਤੀ ਗਈ ਸੀ। ਜਿਸ ਦੇ ਸਬੰਧ ਵਿਚ ਪੁਲਸ ਪਾਸੋਂ ਪਾਸਪੋਰਟ ਦਫਤਰ ਵੱਲੋਂ ਐੱਨ.ਓ.ਸੀ ਮੰਗੀ ਗਈ ਸੀ। ਇਸ ਐੱਨ.ਓ.ਸੀ ਨੂੰ ਸਬੰਧਤ ਕਰਮਚਾਰੀਆਂ ਦੀ ਮਿਲੀ ਭੁਗਤ ਅਤੇ ਹੋਰ ਕਰਮਚਾਰੀਆਂ ਦੀ ਦਖਲ ਅੰਦਾਜੀ ਤੋਂ ਬਾਅਦ ਰਿਲੀਜ਼ ਕਰ ਦਿੱਤਾ ਗਿਆ।
ਇਹ ਵੀ ਪੜ੍ਹੋ : ਤੇਜ਼ ਰਫ਼ਤਾਰ ਦਾ ਕਹਿਰ! ਫਲਾਈਓਵਰ ਤੋਂ 150 ਫੁੱਟ ਹੇਠਾਂ ਡਿੱਗੀ ਕਾਰ, 3 ਦੋਸਤਾਂ ਦੀ ਦਰਦਨਾਕ ਮੌਤ
ਜੇ ਪੁਰਾਣੇ ਸਮੇਂ ਦੀ ਗੱਲ ਕਰੀਏ ਤਾਂ ਜ਼ਿਲਾ ਤਰਨਤਾਰਨ ਨਾਲ ਸਬੰਧਤ ਵੱਡੇ ਗੈਂਗਸਟਰ, ਜਿਨ੍ਹਾਂ ਵਿਚ ਲਖਬੀਰ ਸਿੰਘ ਲੰਡਾ, ਸਤਨਾਮ ਸਿੰਘ ਸੱਤਾ, ਯਾਦਵਿੰਦਰ ਸਿੰਘ ਯਾਦਾ, ਪ੍ਰਭਜੀਤ ਸਿੰਘ ਦਾਸੂਵਾਲ ਆਦਿ ਤੋਂ ਇਲਾਵਾ ਵੱਡੇ ਅਪਰਾਧਾਂ ਵਿਚ ਸ਼ਾਮਲ ਵੱਖ-ਵੱਖ ਅਪਰਾਧੀ ਜੋ ਵਿਦੇਸ਼ ਵਿਚ ਬੈਠੇ ਹੋਏ ਹਨ ਅਤੇ ਤਰਨਤਾਰਨ ਪੁਲਸ ਨੂੰ ਲੰਮੇਂ ਸਮੇਂ ਤੋਂ ਲੋੜੀਂਦੇ ਹਨ ਨੂੰ ਫਰਾਰ ਕਰਵਾਉਣ ਵਿਚ ਵੀ ਕਈ ਪੁਲਸ ਕਰਮਚਾਰੀਆਂ ਦੀ ਅਹਿਮ ਭੂਮਿਕਾ ਜ਼ਰੂਰ ਪੁਰਾਣੇ ਸਮੇਂ ਵਿਚ ਰਹੀ ਹੋਵੇਗੀ। ਕਿਸੇ ਵੀ ਵਿਅਕਤੀ ਨੂੰ ਵਿਦੇਸ਼ ਜਾਣ ਲਈ ਪਾਸਪੋਰਟ ਦੀ ਬਹੁਤ ਜ਼ਰੂਰਤ ਹੁੰਦੀ ਹੈ, ਜਿਸ ਦੇ ਲਈ ਸਬੰਧਤ ਪੁਲਸ ਸਾਂਝ ਕੇਂਦਰਾਂ ਵਿਚ ਤੈਨਾਤ ਕਰਮਚਾਰੀਆਂ ਵੱਲੋਂ ਇਨ੍ਹਾਂ ਅਪਰਾਧੀਆਂ ਦੀ ਕੀਤੀ ਗਈ ਵੈਰੀਫਿਕੇਸ਼ਨ ਨੂੰ ਠੀਕ ਕਰਾਰ ਦਿੰਦੇ ਹੋਏ ਫਰਾਰ ਕਰਨ ਵਿਚ ਅਹਿਮ ਭੂਮਿਕਾ ਜ਼ਰੂਰ ਨਿਭਾਈ ਗਈ ਹੋਵੇਗੀ। ਜਿਸ ਦੇ ਬਦਲੇ ਇਨ੍ਹਾਂ ਵੱਲੋਂ ਮੋਟੀਆਂ ਰਕਮਾਂ ਤੱਕ ਵਸੂਲੀਆਂ ਗਈਆਂ ਹੋਣਗੀਆਂ, ਜੋ ਵੱਡੇ ਪੱਧਰ ਦੀ ਜਾਂਚ ਦਾ ਵਿਸ਼ਾ ਬਣਿਆ ਹੋਇਆ ਹੈ। ਇਸ ਸਬੰਧੀ ਜਾਣਕਾਰੀ ਦਿੰਦੇ ਹੋਏ ਜ਼ਿਲੇ ਦੇ ਐੱਸ.ਐੱਸ.ਪੀ ਸੁਰਿੰਦਰ ਲਾਂਬਾ ਨੇ ਦੱਸਿਆ ਕਿ ਹਰ ਪੁਲਸ ਕਰਮਚਾਰੀ ਨੂੰ ਵੱਖੋ-ਵੱਖ ਵਿਭਾਗਾਂ ਵਿਚ ਡਿਊਟੀ ਕਰਨੀ ਲਾਜ਼ਮੀ ਹੈ ਅਤੇ ਸਾਂਝ ਕੇਂਦਰ ਵਿਚ ਤੈਨਾਤ ਲੰਮੇਂ ਸਮੇਂ ਤੋਂ ਕਰਮਚਾਰੀਆਂ ਬਾਰੇ ਉਹ ਜਲਦ ਰਿਪੋਰਟ ਲੈਣਗੇ।
ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ
For Android:- https://play.google.com/store/apps/details?id=com.jagbani&hl=en
For IOS:- https://itunes.apple.com/in/app/id538323711?mt=8
ਸਰਹੱਦ ’ਤੇ ਨਸ਼ਾ ਸਮੱਗਲਿੰਗ ਨੇ ਤੋੜੇ ਸਾਰੇ ਰਿਕਾਰਡ, ਪਿਛਲੇ 3 ਮਹੀਨਿਆਂ ’ਚ BSF ਨੇ ਫੜੀ 334 ਕਿਲੋ ਹੈਰੋਇਨ
NEXT STORY 
