ਜਲੰਧਰ (ਵਰੁਣ)– ਲੱਖ ਕੋਸ਼ਿਸ਼ਾਂ ਦੇ ਬਾਵਜੂਦ ਪੰਜਾਬ ਦੀਆਂ ਜੇਲਾਂ ’ਚ ਹੈਰੋਇਨ ਦੀ ਸਪਲਾਈ ਬੰਦ ਨਹੀਂ ਹੋ ਰਹੀ ਹੈ। ਜੇਲ ਅੰਦਰ ਮਿਲੀਭੁਗਤ ਨਾਲ ਹੈਰੋਇਨ ਵੇਚਣ ਵਾਲੇ ਕਰਮਚਾਰੀਆਂ ਨੇ ਸਪਲਾਈ ਕਰਨ ਦਾ ਨਵਾਂ ਤਰੀਕਾ ਲੱਭਿਆ ਹੈ। ਇਸ ਸਮੇਂ ਜੇਲਾਂ ਅੰਦਰ ਟੁੱਥਪੇਸਟ ਅਤੇ ਕੋਲਡ ਡਰਿੰਕ ਦੇ ਢੱਕਣਾਂ ’ਚ ਹੈਰੋਇਨ ਸਪਲਾਈ ਕੀਤੀ ਜਾ ਰਹੀ ਹੈ। ਹਾਲਾਂਕਿ ਜੇਲ ਦੇ ਉੱਚ ਅਧਿਕਾਰੀਆਂ ਨੂੰ ਇਸ ਗੱਲ ਦੀ ਭਿਣਕ ਤੱਕ ਨਹੀਂ ਹੈ ਪਰ ਹੇਠਲੇ ਪੱਧਰ ਦੇ ਕਰਮਚਾਰੀ ਜੇਲਾਂ ’ਚ ਹੈਰੋਇਨ ਸਪਲਾਈ ਕਰਕੇ ਹਰ ਰੋਜ਼ ਹਜ਼ਾਰਾਂ ਰੁਪਏ ਕਮਾ ਰਹੇ ਹਨ।
ਹਾਲ ’ਚ ਹੀ ਜੇਲ ਦੇ ਅੰਦਰੋਂ ਖਿੱਚੀ ਗਈ ਇਕ ਫੋਟੋ ਵਾਇਰਲ ਹੋਈ। ਇਹ ਤਸਵੀਰ ਟੁੱਥਪੇਸਟ ਦੇ ਢੱਕਣ ਦੀ ਹੈ, ਜਿਸ ’ਚ ਹੈਰੋਇਨ ਭਰੀ ਹੋਈ ਸੀ। ‘ਜਗ ਬਾਣੀ’ ਦੀ ਟੀਮ ਨੇ ਇਸ ਫੋਟੋ ਨੂੰ ਲੈ ਕੇ ਜਾਂਚ ਸ਼ੁਰੂ ਕੀਤੀ ਤਾਂ ਵਾਇਰਲ ਹੋਈ ਗੱਲ ਸੱਚ ਸਾਬਿਤ ਹੋਈ। ਜਾਂਚ ਕਰਨ ’ਤੇ ਪਤਾ ਲੱਗਾ ਕਿ ਜੇਲਾਂ ਅੰਦਰ ਟੁੱਥਪੇਸਟ ਹੀ ਨਹੀਂ ਸਗੋਂ ਕੋਲਡ ਡਰਿੰਕ ਦੇ ਢੱਕਣਾਂ ’ਚ ਵੀ ਹੈਰੋਇਨ ਵੇਚੀ ਜਾ ਰਹੀ ਹੈ। ਟੁੱਥਪੇਸਟ ਦੇ ਢੱਕਣ ’ਚ 1 ਗ੍ਰਾਮ ਦੇ ਕਰੀਬ ਹੈਰੋਇਨ ਪੈਕ ਹੁੰਦੀ ਹੈ, ਜਿਸ ਦੀ ਕੀਮਤ 3 ਹਜ਼ਾਰ ਰੁਪਏ ਹੈ ਜਦਕਿ ਕੋਲਡ ਡਰਿੰਕ ਦੇ ਢੱਕਣ ’ਚ ਵਿਕ ਰਹੀ ਹੈਰੋਇਨ ਦੀ ਕੀਮਤ 30 ਹਜ਼ਾਰ ਰੁਪਏ ਹੈ। ਜਾਂਚ ’ਚ ਇਹ ਗੱਲ ਵੀ ਸਾਹਮਣੇ ਆਈ ਕਿ ਕੁਝ ਜੇਲਾਂ ਦੇ ਉੱਚ ਅਧਿਕਾਰੀ ਕਾਫ਼ੀ ਸਖਤੀ ਨਾਲ ਚਿੱਟੇ ਦੇ ਕੰਮ-ਕਾਜ ਨੂੰ ਜੇਲ ’ਚੋਂ ਉਖਾੜਨ ਲਈ ਨਵੇਂ-ਨਵੇਂ ਪ੍ਰਬੰਧ ਕਰ ਰਹੇ ਹਨ ਪਰ ਹੇਠਲੇ ਪੱਧਰ ਦੇ ਕਰਮਚਾਰੀ ਆਪਣੇ ਅਧਿਕਾਰੀਆਂ ਦੀਆਂ ਅੱਖਾਂ ’ਚ ਧੂੜ ਪਾ ਕੇ ਨਸ਼ਾ ਸਪਲਾਈ ਕਰ ਰਹੇ ਹਨ। ਇਹੋ ਕਰਮਚਾਰੀ ਹੈਰੋਇਨ ਪੀਣ ਲਈ ਪੇਪਰ, ਮਾਚਿਸ ਅਤੇ ਇੰਜੈਕਸ਼ਨ ਮੁਹੱਈਆ ਕਰਵਾ ਦਿੰਦੇ ਹਨ।
1 ਇੰਜੈਕਸ਼ਨ ਨੂੰ 40 ਨੌਜਵਾਨ ਕਰਦੇ ਹਨ ਇਸਤੇਮਾਲ, ਏਡਸ ਦਾ ਖ਼ਤਰਾ ਵਧਿਆ
ਜੇਲ ’ਚ ਜ਼ਿਆਦਾਤਰ ਨੌਜਵਾਨ ਹੈਰੋਇਨ ਦੇ ਧੂੰਏਂ ਨੂੰ ਬਰਬਾਦ ਨਾ ਕਰਨ ਲਈ ਇੰਜੈਕਸ਼ਨ ਦਾ ਇਸਤੇਮਾਲ ਕਰਦੇ ਹਨ। ਪੇਪਰ ਇਸਤੇਮਾਲ ਕਰਨ ਨਾਲ ਜ਼ਿਆਦਾਤਰ ਧੂੰਆਂ ਬਰਬਾਦ ਹੋ ਜਾਂਦਾ ਹੈ, ਜਿਸ ਕਾਰਨ ਇੰਜੈਕਸ਼ਨਾਂ ਦੀ ਡਿਮਾਂਡ ਵਧ ਰਹੀ ਹੈ। ਜੇਲ ਦੇ ਸੂਤਰਾਂ ਦੀ ਮੰਨੀਏ ਤਾਂ 1 ਇੰਜੈਕਸ਼ਨ ਨੂੰ 40 ਨੌਜਵਾਨ ਇਸਤੇਮਾਲ ਕਰਦੇ ਹਨ ਅਤੇ ਇਸ ਤਰ੍ਹਾਂ ਜੇਲ ’ਚ ਏਡਸ ਦਾ ਖ਼ਤਰਾ ਵੀ ਵਧ ਰਿਹਾ ਹੈ।
5 ਹਜ਼ਾਰ ਰੁਪਏ ’ਚ ਮਿਲਦਾ ਹੈ ਬੀੜੀਆਂ ਦਾ ਬੰਡਲ
ਕੈਦੀ ਭਾਵੇਂ ਪੈਸਿਆਂ ਦਾ ਲਾਲਚ ਦੇ ਕੇ ਜੇਲ ਅੰਦਰ ਕੁਝ ਵੀ ਮੰਗਵਾ ਸਕਦੇ ਹਨ। ਜੇਲ ਅੰਦਰ ਸਿੰਗਲ ਬੀੜੀ ਦੀ ਕੀਮਤ 300 ਰੁਪਏ ਅਤੇ ਬੰਡਲ ਖਰੀਦਣਾ ਹੋਵੇ ਤਾਂ ਉਸ ਲਈ 5 ਹਜ਼ਾਰ ਰੁਪਏ ਕਰਮਚਾਰੀ ਦੀ ਜੇਬ ’ਚ ਪਾਉਣੇ ਪੈਂਦੇ ਹਨ। ਉਥੇ ਹੀ ਤੰਬਾਕੂ ਦਾ ਪੈਕੇਟ ਇਕ ਹਜ਼ਾਰ ਤੋਂ 1500 ਰੁਪਏ ’ਚ ਵਿਕ ਰਿਹਾ ਹੈ।
ਜਿਮ ਦਾ ਸਾਮਾਨ ਮੌਜੂਦ ਨਹੀਂ, ਨਸ਼ੇ ਵੱਲ ਵਧ ਰਹੇ ਹਨ ਕੈਦੀ : ਹਵਾਲਾਤੀ
ਪੰਜਾਬ ਦੀਆਂ ਜੇਲਾਂ ’ਚ ਕਸਰਤ ਕਰਨ ਦਾ ਕੋਈ ਵੀ ਸਾਮਾਨ ਨਹੀਂ ਹੈ। ਖੇਡਣ ਦਾ ਵੀ ਕੋਈ ਇੰਤਜ਼ਾਮ ਨਹੀਂ ਹੈ, ਜਿਸ ਕਾਰਨ ਕੈਦੀ ਅਤੇ ਹਵਾਲਾਤੀ ਨਸ਼ੇ ਵੱਲ ਵਧ ਰਹੇ ਹਨ, ਹਾਲਾਂਕਿ ਕੁਝ ਕੈਦੀ-ਹਵਾਲਾਤੀ ਅਜਿਹੇ ਵੀ ਹਨ ਜੋ ਡੰਡੇ ਦੇ ਦੋਵੇਂ ਪਾਸੇ ਪਲਾਸਟਿਕ ਦੀਆਂ ਬਾਲਟੀਆਂ ’ਚ ਮਿੱਟੀ ਪਾ ਕੇ ਕਸਰਤ ਕਰਦੇ ਹਨ ਪਰ ਜੇਲਾਂ ਦੇ ਪ੍ਰਬੰਧਕਾਂ ਦਾ ਇਸ ਵੱਲ ਕੋਈ ਵੀ ਧਿਆਨ ਨਹੀਂ ਹੈ।
ਪਹਿਲੇ ਦਿਨ ਪੰਜਾਬ ’ਚ ਲਾਗੂ ਨਹੀਂ ਹੋ ਸਕੇ ਟ੍ਰੈਫਿਕ ਦੇ ਨਵੇਂ ਨਿਯਮ
NEXT STORY