ਜਲੰਧਰ (ਚੋਪੜਾ)- ਪੰਜਾਬ ਸਰਕਾਰ ਵੱਲੋਂ ਈਜ਼ੀ ਰਜਿਸਟ੍ਰੇਸ਼ਨ ਪ੍ਰਣਾਲੀ ਵਿਚ ਲਾਗੂ ਕੀਤੇ ਗਏ 'ਫਸਟ ਕਮ ਫਸਟ ਆਊਟ' (ਫੀਫੋ) ਸਿਸਟਮ ਨੇ ਆਮ ਜਨਤਾ ਦੀਆਂ ਮੁਸ਼ਕਿਲਾਂ ਵਧਾ ਦਿੱਤੀਆਂ ਹਨ। ਪ੍ਰਾਪਰਟੀ ਰਜਿਸਟ੍ਰੇਸ਼ਨ, ਪਾਵਰ ਆਫ਼ ਅਟਾਰਨੀ, ਤਬਦੀਲ ਮਲਕੀਅਤ ਸਮੇਤ ਹੋਰ ਦਸਤਾਵੇਜ਼ਾਂ ਦੀ ਆਨਲਾਈਨ ਅਪਰੂਵਲ ਪ੍ਰਕਿਰਿਆ ਹੁਣ ਇੰਨੀ ਸੁਸਤ ਹੋ ਗਈ ਹੈ ਕਿ ਸਹੀ ਕਾਗਜ਼ਾਤ ਹੋਣ ਦੇ ਬਾਵਜੂਦ ਬਿਨੈਕਾਰਾਂ ਨੂੰ ਲੰਬਾ ਇੰਤਜ਼ਾਰ ਕਰਨਾ ਪੈ ਰਿਹਾ ਹੈ। ਹਾਲਾਤ ਇਹ ਹਨ ਕਿ ਸਬ-ਰਜਿਸਟ੍ਰਾਰ ਦਫ਼ਤਰਾਂ ਵਿਚ ਦੁਪਹਿਰ ਤੋਂ ਬਾਅਦ ਤੱਕ ਬਿਨੈਕਾਰਾਂ ਦੀ ਭਾਰੀ ਭੀੜ ਜਮ੍ਹਾ ਰਹੀ।
ਜ਼ਿਕਰਯੋਗ ਹੈ ਕਿ ਫੀਫੋ ਸਿਸਟਮ ਤਹਿਤ ਨਵੀਂ ਵਿਵਸਥਾ ਇਹ ਹੈ ਕਿ ਜਦੋਂ ਤੱਕ ਪਹਿਲੀ ਅਪੁਆਇੰਟਮੈਂਟ ਨਾਲ ਸਬੰਧਤ ਫਾਈਲ ਦੀ ਸਾਰੀ ਪ੍ਰਕਿਰਿਆ ਮੁਕੰਮਲ ਕਰਕੇ ਆਨਲਾਈਨ ਅਪਰੂਵਲ ਪੂਰੀ ਨਹੀਂ ਹੋ ਜਾਂਦੀ, ਉਦੋਂ ਤੱਕ ਪੋਰਟਲ ’ਤੇ ਅਗਲੀ ਆਨਲਾਈਨ ਅਪੁਆਇੰਟਮੈਂਟ ਜੁਆਇੰਟ ਸਬ-ਰਜਿਸਟ੍ਰਾਰ ਦੀ ਆਈ. ਡੀ. ਵਿਚ ਖੁੱਲ੍ਹਦੀ ਹੀ ਨਹੀਂ ਹੈ। ਜੇਕਰ ਕਿਸੇ ਇਕ ਬਿਨੈਕਾਰ ਦੀ ਫਾਈਲ ਤਕਨੀਕੀ ਕਾਰਨਾਂ, ਦਸਤਾਵੇਜ਼ਾਂ ਦੀ ਜਾਂਚ ਜਾਂ ਕਿਸੇ ਇਤਰਾਜ਼, ਕਿਸੇ ਗਵਾਹ ਜਾਂ ਨੰਬਰਦਾਰ ਦੀ ਅਚਾਨਕ ਗੈਰ-ਮੌਜੂਦਗੀ ਕਾਰਨ ਅਟਕ ਜਾਂਦੀ ਹੈ ਤਾਂ ਉਸ ਤੋਂ ਬਾਅਦ ਆਉਣ ਵਾਲੀਆਂ ਸਾਰੀਆਂ ਅਪੁਆਇੰਟਮੈਂਟਾਂ ਆਪਣੇ ਆਪ ਹੀ ਰੁਕ ਜਾਂਦੀਆਂ ਹਨ। ਇਸ ਦਾ ਸਿੱਧਾ ਅਸਰ ਉਨ੍ਹਾਂ ਲੋਕਾਂ ’ਤੇ ਪੈ ਰਿਹਾ ਹੈ, ਜੋ ਆਪਣੀ ਵਾਰੀ ਦੀ ਉਡੀਕ ਕਰ ਰਹੇ ਹੁੰਦੇ ਹਨ।
ਇਹ ਵੀ ਪੜ੍ਹੋ: ਜਲੰਧਰ : ਹੈਵਾਨ ਬਣਿਆ ਪਿਓ ! ਭੁੱਖ ਨਾਲ ਤੜਫ਼ਦੀ ਧੀ ਨੂੰ ਬੇਰਹਿਮੀ ਨਾਲ ਉਤਾਰਿਆ ਮੌਤ ਦੇ ਘਾਟ
ਹਾਲਾਂਕਿ ਈਜ਼ੀ ਰਜਿਸਟ੍ਰੇਸ਼ਨ ਪੋਰਟਲ ’ਤੇ ਪਹਿਲਾਂ ਹੀ ਦਸਤਾਵੇਜ਼ ਅਪਲੋਡ ਕੀਤੇ ਜਾਂਦੇ ਹਨ ਅਤੇ ਜੁਆਇੰਟ ਸਬ-ਰਜਿਸਟ੍ਰਾਰ ਪੱਧਰ ’ਤੇ ਆਨਲਾਈਨ ਜਾਂਚ ਤੋਂ ਬਾਅਦ ਹੀ ਮੁੱਢਲੀ ਅਪਰੂਵਲ ਮਿਲਦੀ ਹੈ। ਇਸ ਤੋਂ ਬਾਅਦ ਹੀ ਬਿਨੈਕਾਰ ਆਨਲਾਈਨ ਅਪੁਆਇੰਟਮੈਂਟ ਲੈ ਪਾਉਂਦਾ ਹੈ। ਅਜਿਹੇ ਵਿਚ ਅਪੁਆਇੰਟਮੈਂਟ ਮਿਲਣ ਤੋਂ ਬਾਅਦ ਵੀ ਜੇਕਰ ਫਾਈਲ ਨੂੰ ਅਪਰੂਵਲ ਸੀਰੀਅਲ ਵਿਚ ਅਟਕਾ ਦਿੱਤਾ ਜਾਵੇ, ਤਾਂ ਇਹ ਵਿਵਸਥਾ 'ਈਜ਼ੀ' ਦੀ ਬਜਾਏ ਹੋਰ ਵੀ ਗੁੰਝਲਦਾਰ ਬਣ ਜਾਂਦੀ ਹੈ। ਨਵੇਂ ਫੀਫੋ ਸਿਸਟਮ ਕਾਰਨ ਆਮ ਲੋਕ ਹੀ ਨਹੀਂ, ਸਗੋਂ ਅਰਜ਼ੀਨਵੀਸ (ਡੀਡ ਰਾਈਟਰ), ਐਡਵੋਕੇਟ ਅਤੇ ਨੰਬਰਦਾਰ ਵੀ ਕਾਫੀ ਪ੍ਰੇਸ਼ਾਨ ਨਜ਼ਰ ਆ ਰਹੇ ਹਨ। ਕਈ ਬਿਨੈਕਾਰ ਵਾਰ-ਵਾਰ ਸਬ-ਰਜਿਸਟ੍ਰਾਰ ਦਫ਼ਤਰਾਂ ਦੇ ਚੱਕਰ ਕੱਟਣ ਲਈ ਮਜਬੂਰ ਹਨ। ਬਿਨੈਕਾਰਾਂ ਦਾ ਕਹਿਣਾ ਹੈ ਕਿ ਪਹਿਲਾਂ ਇਕ ਫਾਈਲ ਦੇ ਨਾਲ ਅਗਲੀ ਫਾਈਲ ’ਤੇ ਵੀ ਕੰਮ ਸ਼ੁਰੂ ਹੋ ਜਾਂਦਾ ਸੀ ਅਤੇ ਅਪਰੂਵਲ ਸਿਸਟਮ ਵਿਚ ਜਿਨ੍ਹਾਂ ਦੇ ਦਸਤਾਵੇਜ਼ ਪੂਰੇ ਹੁੰਦੇ ਸੀ, ਉਨ੍ਹਾਂ ਦਾ ਕੰਮ ਸਮੇਂ ਸਿਰ ਨਿੱਬੜ ਜਾਂਦਾ ਸੀ, ਪਰ ਹੁਣ ਇਕ ਫਾਈਲ ਦੀ ਦੇਰੀ ਪੂਰੇ ਸਿਸਟਮ ਨੂੰ ਰੋਕ ਦਿੰਦੀ ਹੈ। ਅਰਜ਼ੀਨਵੀਸਾਂ ਅਤੇ ਐਡਵੋਕੇਟਸ ਦਾ ਮੰਨਣਾ ਹੈ ਕਿ ਸੀਰੀਅਲ ਵਾਈਜ਼ ਕੰਮ ਕਰਨ ਨਾਲ ਨਾ ਸਿਰਫ਼ ਕੰਮ ਦੀ ਰਫ਼ਤਾਰ ਸੁਸਤ ਹੋਈ ਹੈ, ਸਗੋਂ ਦਫ਼ਤਰਾਂ ਵਿਚ ਬੇਲੋੜੀ ਭੀੜ ਵੀ ਵਧ ਰਹੀ ਹੈ।
ਦੂਜੇ ਪਾਸੇ ਜੁਆਇੰਟ ਸਬ-ਰਜਿਸਟ੍ਰਾਰ-1 ਦਮਨਵੀਰ ਸਿੰਘ ਤੇ ਮਨਮੋਹਨ ਸਿੰਘ ਅਤੇ ਸਬ-ਰਜਿਸਟ੍ਰਾਰ-2 ਜਗਤਾਰ ਸਿੰਘ ਅਤੇ ਰਵਨੀਤ ਕੌਰ ਦਾ ਕਹਿਣਾ ਹੈ ਕਿ ਫੀਫੋ ਸਿਸਟਮ ਪਾਰਦਰਸ਼ਤਾ ਵਧਾਉਣ ਅਤੇ ਭ੍ਰਿਸ਼ਟਾਚਾਰ ’ਤੇ ਰੋਕ ਲਗਾਉਣ ਦੇ ਉਦੇਸ਼ ਨਾਲ ਲਾਗੂ ਕੀਤਾ ਗਿਆ ਹੈ ਤਾਂ ਜੋ ਹਰ ਫਾਈਲ ਦੀ ਲੜੀਵਾਰ ਅਤੇ ਨਿਰਪੱਖ ਅਪਰੂਵਲ ਨਾਲ ਪਾਰਦਰਸ਼ੀ ਤੇ ਬਿਨਾਂ ਕਿਸੇ ਭੇਦਭਾਵ ਦੇ ਲੋਕਾਂ ਦੇ ਕੰਮ ਹੋ ਸਕਣ। ਅਧਿਕਾਰੀਆਂ ਅਨੁਸਾਰ ਫੀਫੋ ਸਿਸਟਮ ਨਾਲ ਕਿਸੇ ਨੂੰ ਵੀ ਗੈਰ-ਵਾਜਿਬ ਤਰਜੀਹ ਨਹੀਂ ਮਿਲ ਪਾ ਰਹੀ ਹੈ। ਹਾਲਾਂਕਿ ਜਨਤਾ ਦੀ ਰਾਏ ਇਸ ਤੋਂ ਵੱਖਰੀ ਹੈ। ਲੋਕਾਂ ਦਾ ਕਹਿਣਾ ਹੈ ਕਿ ਇਸ ਫੈਸਲੇ ਨੇ ਈਜ਼ੀ ਰਜਿਸਟਰੀ ਨੂੰ ਹੋਰ ਗੁੰਝਲਦਾਰ ਬਣਾ ਦਿੱਤਾ ਹੈ। ਆਮ ਲੋਕਾਂ ਨੇ ਸਰਕਾਰ ਤੋਂ ਮੰਗ ਕੀਤੀ ਹੈ ਕਿ ਜਾਂ ਤਾਂ ਫੀਫੋ ਸਿਸਟਮ ਵਿਚ ਢਿੱਲ ਦਿੱਤੀ ਜਾਵੇ ਜਾਂ ਇਸ ਫੈਸਲੇ ਨੂੰ ਵਾਪਸ ਲੈ ਕੇ ਅਜਿਹਾ ਹੱਲ ਕੱਢਿਆ ਜਾਵੇ, ਜਿਸ ਨਾਲ ਪਾਰਦਰਸ਼ਤਾ ਵੀ ਬਣੀ ਰਹੇ ਅਤੇ ਜਨਤਾ ਨੂੰ ਬੇਲੋੜੀਆਂ ਪ੍ਰੇਸ਼ਾਨੀਆਂ ਦਾ ਸਾਹਮਣਾ ਵੀ ਨਾ ਕਰਨਾ ਪਵੇ।
ਇਹ ਵੀ ਪੜ੍ਹੋ: ਪੰਜਾਬ 'ਚ ਚੱਲਣਗੀਆਂ ਤੇਜ਼ ਹਵਾਵਾਂ! 8 ਫਰਵਰੀ ਤੱਕ ਮੌਸਮ ਦੀ ਪੜ੍ਹੋ ਤਾਜ਼ਾ ਅਪਡੇਟ, ਇਨ੍ਹਾਂ ਜ਼ਿਲ੍ਹਿਆਂ 'ਚ Alert
ਆਨਲਾਈਨ ਅਪੁਆਇੰਟਮੈਂਟ ਦਾ ਟਾਈਮ-ਬਾਊਂਡ ਸਿਸਟਮ ਵੀ ਬਣਿਆ ਜੀਅ ਦਾ ਜੰਜਾਲ
ਈਜ਼ੀ ਰਜਿਸਟ੍ਰੇਸ਼ਨ ਪ੍ਰਣਾਲੀ ਵਿਚ ਲਾਗੂ ਕੀਤਾ ਗਿਆ ਟਾਈਮ-ਬਾਊਂਡ ਆਨਲਾਈਨ ਅਪੁਆਇੰਟਮੈਂਟ ਸਿਸਟਮ ਵੀ ਬਿਨੈਕਾਰਾਂ ਦੇ ਜੀਅ ਦਾ ਜੰਜਾਲ ਸਾਬਤ ਹੋ ਰਿਹਾ ਹੈ। ਨਵੇਂ ਨਿਯਮਾਂ ਤਹਿਤ ਜੇਕਰ ਕਿਸੇ ਬਿਨੈਕਾਰ ਦੀ ਅਪੁਆਇੰਟਮੈਂਟ ਦੁਪਹਿਰ 12 ਵਜੇ ਦੀ ਹੈ, ਤਾਂ ਉਸ ਨੂੰ ਹਰ ਹਾਲ ਵਿਚ ਸਮੇਂ ਸਿਰ ਪਹੁੰਚ ਕੇ ਆਪਣੀ ਦਸਤਾਵੇਜ਼ੀ ਪ੍ਰਕਿਰਿਆ ਸ਼ੁਰੂ ਕਰਵਾਉਣੀ ਪੈਂਦੀ ਹੈ ਅਤੇ ਉਸ ਨੂੰ 1 ਘੰਟਾ ਵੱਧ ਦਾ ਟਾਈਮ-ਬਾਊਂਡ ਕੀਤਾ ਗਿਆ ਹੈ। ਜੇਕਰ ਕੋਈ ਬਿਨੈਕਾਰ ਅਪੁਆਇੰਟਮੈਂਟ ਟਾਈਮ ਤੋਂ 1 ਘੰਟਾ ਦੇਰੀ ਨਾਲ ਯਾਨੀ ਕਿ 1.01 ਵਜੇ ਜੁਆਇੰਟ ਸਬ ਰਜਿਸਟ੍ਰਾਰ ਅੱਗੇ ਪੇਸ਼ ਹੁੰਦਾ ਹੈ, ਤਾਂ ਦੇਰੀ ਦੀ ਸਥਿਤੀ ਵਿਚ ਸਿਸਟਮ ਆਪਣੇ ਆਪ ਹੀ ਉਸ ਅਪੁਆਇੰਟਮੈਂਟ ਨੂੰ ਪੋਰਟਲ ਵਿਚ ਜੁਆਇੰਟ ਸਬ ਰਜਿਸਟ੍ਰਾਰ ਦੀ ਆਈ. ਡੀ. ਤੋਂ ਲਾਕ ਕਰ ਦਿੰਦਾ ਹੈ।
ਇਹ ਵੀ ਪੜ੍ਹੋ: ਡੇਰਾ ਬਿਆਸ ਮੁਖੀ 'ਤੇ ਟਿੱਪਣੀ ਕਰਨ ਦੀ ਬਜਾਏ ਸਟੇਟ ਸਾਂਭਣ CM ਮਾਨ: ਪ੍ਰਤਾਪ ਬਾਜਵਾ
ਬਿਨੈਕਾਰਾਂ ਦਾ ਕਹਿਣਾ ਹੈ ਕਿ ਕਈ ਵਾਰ ਟ੍ਰੈਫਿਕ ਜਾਮ, ਤਕਨੀਕੀ ਦਿੱਕਤ, ਦਸਤਾਵੇਜ਼ਾਂ ਵਿਚ ਮਾਮੂਲੀ ਸੋਧ ਜਾਂ ਸਟਾਫ਼ ਦੀ ਉਪਲਬਧਤਾ ਨਾ ਹੋਣ ਕਾਰਨ ਸਮੇਂ ਸਿਰ ਦਫ਼ਤਰ ਪਹੁੰਚਣਾ ਸੰਭਵ ਨਹੀਂ ਹੋ ਪਾਉਂਦਾ। ਅਜਿਹੇ ਵਿਚ ਉਨ੍ਹਾਂ ਦੀ ਅਪੁਆਇੰਟਮੈਂਟ ਆਪਣੇ ਆਪ ਰੱਦ ਹੋ ਜਾਂਦੀ ਹੈ ਅਤੇ ਉਨ੍ਹਾਂ ਨੂੰ ਦੁਬਾਰਾ ਪੂਰੀ ਪ੍ਰਕਿਰਿਆ ਵਿਚੋਂ ਲੰਘਦਿਆਂ ਅਪੁਆਇੰਟਮੈਂਟ ਰੀ-ਸ਼ੈਡਿਊਲ ਕਰਨੀ ਪੈਂਦੀ ਹੈ। ਇਸ ਨਾਲ ਨਾ ਸਿਰਫ਼ ਸਮੇਂ ਦੀ ਬਰਬਾਦੀ ਹੁੰਦੀ ਹੈ, ਸਗੋਂ ਮਾਨਸਿਕ ਅਤੇ ਆਰਥਿਕ ਪ੍ਰੇਸ਼ਾਨੀਆਂ ਵੀ ਵਧ ਜਾਂਦੀਆਂ ਹਨ। ਲੋਕਾਂ ਦੀ ਮੰਗ ਹੈ ਕਿ ਟਾਈਮ-ਬਾਊਂਡ ਸਿਸਟਮ ਵਿਚ ਲਚਕਤਾ ਲਿਆਂਦੀ ਜਾਵੇ, ਤਾਂ ਜੋ ਮਾਮੂਲੀ ਦੇਰੀ ’ਤੇ ਅਪੁਆਇੰਟਮੈਂਟ ਲਾਕ ਨਾ ਹੋਵੇ ਅਤੇ ਬਿਨੈਕਾਰਾਂ ਨੂੰ ਵਾਰ-ਵਾਰ ਰੀ-ਸ਼ੈਡਿਊਲਿੰਗ ਦੀ ਪ੍ਰੇਸ਼ਾਨੀ ਤੋਂ ਬਚਾਇਆ ਜਾ ਸਕੇ।
ਇਹ ਵੀ ਪੜ੍ਹੋ: ਅੰਮ੍ਰਿਤਸਰ 'ਚ ਪਤੰਗਬਾਜ਼ੀ ਕਾਰਨ ਛਿੜੇ ਵਿਵਾਦ ਨੇ ਧਾਰਿਆ ਖ਼ੂਨੀ ਰੂਪ! ਚੱਲੀਆਂ ਗੋਲ਼ੀਆਂ, ਕੰਬਿਆ ਇਹ ਇਲਾਕਾ
ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ
For Android:- https://play.google.com/store/apps/details?id=com.jagbani&hl=en
For IOS:- https://itunes.apple.com/in/app/id538323711?mt=8
For Whatsapp:- https://whatsapp.com/channel/0029Va94hsaHAdNVur4L170e
ਸਹਿਮਤੀ ਨਾਲ ਸਬੰਧ ਬਣਾਉਣ ਤੋਂ ਬਾਅਦ ਰਿਸ਼ਤਾ ਟੁੱਟਣਾ ਬਲਾਤਕਾਰ ਨਹੀਂ : ਹਾਈਕੋਰਟ
NEXT STORY 
