ਜਲੰਧਰ (ਸੁਮਿਤ) : ਅਧਿਆਪਕ ਦਿਵਸ 'ਤੇ ਅਧਿਆਪਕਾਂ ਨੂੰ ਸਨਮਾਨ ਦੇਣ ਦੇ ਮਕਸਦ ਨਾਲ ਸਰਕਾਰ ਵਲੋਂ ਸਮਾਗਮ ਕਰਾਏ ਜਾਂਦੇ ਹਨ। ਨਾਲ ਹੀ ਅਧਿਆਪਕਾਂ ਨੂੰ ਸਟੇਟ ਐਵਾਰਡ ਵੀ ਦਿੱਤੇ ਜਾਂਦੇ ਹਨ ਪਰ ਇਹ ਐਵਾਰਡ ਸਿਰਫ ਨਾਂ ਦੇ ਹੀ ਰਹਿ ਜਾਂਦੇ ਹਨ। ਦੇਖਿਆ ਜਾਵੇ ਤਾਂ 2016 ਵਿਚ ਸਟੇਟ ਐਵਾਰਡ ਪ੍ਰਾਪਤ ਕਰਨ ਵਾਲੇ ਐਵਾਰਡੀ ਅਧਿਆਪਕ 3 ਸਾਲ ਬਾਅਦ ਵੀ ਆਪਣੀ ਇਨਾਮੀ ਰਾਸ਼ੀ ਦੇ ਇੰਤਜ਼ਾਰ ਵਿਚ ਹਨ। ਸਰਕਾਰ ਵਲੋਂ ਜਦੋਂ ਇਨ੍ਹਾਂ ਅਧਿਆਪਕਾਂ ਨੂੰ ਸਟੇਟ ਐਵਾਰਡ ਦਿੱਤੇ ਗਏ ਤਾਂ ਕਿਹਾ ਗਿਆ ਕਿ ਇਨਾਮੀ ਰਾਸ਼ੀ ਦੇ ਰੂਪ ਵਿਚ ਦਿੱਤੇ ਜਾਣ ਵਾਲੇ ਪੈਸੇ ਉਨ੍ਹਾਂ ਦੇ ਬੈਂਕ ਖਾਤਿਆਂ ਵਿਚ ਭੇਜ ਦਿੱਤੇ ਜਾਣਗੇ। 3 ਸਾਲ ਬਾਅਦ ਵੀ ਉਨ੍ਹਾਂ ਦੇ ਖਾਤਿਆਂ ਵਿਚ ਕੋਈ ਪੈਸਾ ਨਹੀਂ ਆਇਆ। ਇਥੇ ਹੀ ਬੱਸ ਨਹੀਂ 2016 ਤੋਂ ਬਾਅਦ ਜੋ 2017 ਵਿਚ ਅਧਿਆਪਕ ਦਿਵਸ ਸਮਾਰੋਹ ਕਰਵਾਇਆ ਗਿਆ, ਉਸ ਵਿਚ ਵੀ ਜਿਨ੍ਹਾਂ ਅਧਿਆਪਕਾਂ ਨੂੰ ਸਟੇਟ ਐਵਾਰਡ ਲਈ ਚੁਣਿਆ ਗਿਆ, ਉਨ੍ਹਾਂ ਨੂੰ ਵੀ ਐਵਾਰਡ ਦਿੰਦੇ ਸਮੇਂ ਕਿਹਾ ਗਿਆ ਕਿ ਇਨਾਮੀ ਰਾਸ਼ੀ ਤੁਹਾਡੇ ਬੈਂਕ ਖਾਤਿਆਂ ਵਿਚ ਪਾ ਦਿੱਤੀ ਜਾਵੇਗੀ ਪਰ ਦੋ ਸਾਲ ਬੀਤ ਜਾਣ ਤੋਂ ਬਾਅਦ ਵੀ ਇਹ ਅਧਿਆਪਕ ਵਾਰ-ਵਾਰ ਆਪਣਾ ਖਾਤਾ ਚੈੱਕ ਕਰ ਰਹੇ ਹਨ ਕਿ ਸ਼ਾਇਦ ਸਿੱਖਿਆ ਵਿਭਾਗ ਉਨ੍ਹਾਂ ਦੀ ਇਨਾਮੀ ਰਾਸ਼ੀ ਖਾਤੇ ਵਿਚ ਪਾ ਦੇਵੇਗਾ।
ਇਸ ਤੋਂ ਬਾਅਦ ਜੇਕਰ 2018 ਦੀ ਗੱਲ ਕਰੀਏ ਤਾਂ ਸਰਕਾਰ ਵਲੋਂ ਪਿਛਲੇ ਸਟੇਟ ਐਵਾਰਡੀਆਂ ਨੂੰ ਤਾਂ ਇਨਾਮੀ ਰਾਸ਼ੀ ਨਹੀਂ ਦਿੱਤੀ ਗਈ ਸਗੋਂ ਸਟੇਟ ਐਵਾਰਡ ਪ੍ਰਾਪਤ ਕਰਨ ਵਾਲਿਆਂ ਨੇ 2018 ਤੋਂ ਇਨਾਮੀ ਰਾਸ਼ੀ ਹੀ ਬੰਦ ਕਰਨ ਦਾ ਐਲਾਨ ਕਰ ਦਿੱਤਾ ਗਿਆ। ਇਸ ਵਾਰ 2019 ਵਿਚ ਵੀ ਸਟੇਟ ਐਵਾਰਡ ਪ੍ਰਾਪਤ ਕਰਨ ਵਾਲਿਆਂ ਨੂੰ ਕੋਈ ਇਨਾਮੀ ਰਾਸ਼ੀ ਨਹੀਂ ਦਿੱਤੀ ਜਾਵੇਗੀ। ਸਰਕਾਰ ਤੇ ਸਿੱਖਿਆ ਵਿਭਾਗ ਦੇ ਅਜਿਹੇ ਰਵੱਈਏ ਨਾਲ 2016-17 ਦੇ ਸਟੇਟ ਐਵਾਰਡੀ ਅਧਿਆਪਕ ਅੱਜ ਵੀ ਆਪਣੀ ਇਨਾਮੀ ਰਾਸ਼ੀ ਦੀ ਉਡੀਕ ਵਿਚ ਬੈਠੇ ਹਨ ਕਿ ਸਾਨੂੰ ਐਲਾਨੀ ਗਈ ਰਾਸ਼ੀ ਕਦੋਂ ਮਿਲੇਗੀ।
'ਅਧਿਆਪਕ ਦਿਵਸ' ਦੀ ਸਿੱਖਿਆ ਮੰਤਰੀ ਵਲੋਂ ਵਧਾਈ, ਹੋਵੇਗਾ ਸਨਮਾਨ ਸਮਾਰੋਹ
NEXT STORY 
