ਟੋਕੀਓ : ਟੋਕੀਓ ਓਲੰਪਿਕ 2020 ’ਚ ਭਾਰਤੀ ਪੁਰਸ਼ ਹਾਕੀ ਟੀਮ ਨੇ 41 ਸਾਲ ਬਾਅਦ ਜਰਮਨੀ ਖਿਲਾਫ਼ ਕਾਂਸੀ ਤਮਗਾ ਮੁਕਾਬਲੇ ’ਚ ਸ਼ਾਨਦਾਰ ਜਿੱਤ ਦਰਜ ਕਰ ਕੇ ਕਾਂਸੀ ਤਮਗਾ ਆਪਣੇ ਨਾਂ ਕੀਤਾ। ਭਾਰਤ ਨੇ ਜਰਮਨੀ ਨੂੰ 5-4 ਨਾਲ ਹਰਾ ਕੇ ਇਤਿਹਾਸਕ ਜਿੱਤ ਦਰਜ ਕੀਤੀ। ਇਸ ਸ਼ਾਨਦਾਰ ਜਿੱਤ ਦਾ ਸਿਹਰਾ ਟੀਮ ਦੇ 16 ਖਿਡਾਰੀਆਂ ਸਿਰ ਜਾਂਦਾ ਹੈ, ਜਿਨ੍ਹਾਂ ਨੇ ਓਲੰਪਿਕ ’ਚ ਆਪਣਾ ਸ਼ਾਨਦਾਰ ਪ੍ਰਦਰਸ਼ਨ ਕੀਤਾ। ਇਹ 16 ਖਿਡਾਰੀ ਦੇਸ਼ ਦੇ ਵੱਖ-ਵੱਖ ਸੂਬਿਆਂ ਨਾਲ ਸਬੰਧਿਤ ਹਨ ਤੇ ਇਨ੍ਹਾਂ ਨੇ ਆਪਣਾ ਸਰਵਸ੍ਰੇਸ਼ਠ ਪ੍ਰਦਰਸ਼ਨ ਕੀਤਾ।
ਇਹ ਵੀ ਪੜ੍ਹੋ : ਹਰਿਆਣਾ ਸਰਕਾਰ ਨੇ ਆਪਣੇ ਹਾਕੀ ਖਿਡਾਰੀਆਂ ਲਈ ਕੀਤਾ ਵੱਡਾ ਐਲਾਨ, ਦੇਵੇਗੀ ਢਾਈ-ਢਾਈ ਕਰੋੜ ਰੁਪਏ
ਆਓ ਜਾਣਦੇ ਹਾਂ ਇਨ੍ਹਾਂ 16 ਜਾਂਬਾਜ਼ਾਂ ਬਾਰੇ, ਜਿਨ੍ਹਾਂ ਭਾਰਤ ਦੀ ਝੋਲੀ 41 ਸਾਲ ਬਾਅਦ ਹਾਕੀ ਦਾ ਤਮਗਾ ਪਾਇਆ-
ਹਰਮਨਪ੍ਰੀਤ ਸਿੰਘ :- ਟੀਮ ਇੰਡੀਆ ਦੇ ਸ਼ਾਨਦਾਰ ਡਿਫੈਂਡਰ ਅਤੇ ਪੈਨਲਟੀ ਕਾਰਨਰ ਮਾਹਿਰ ਹਨ ਹਰਮਨਪ੍ਰੀਤ ਸਿੰਘ। ਉਨ੍ਹਾਂ ਨੇ ਟੋਕੀਓ ਤੋਂ ਪਹਿਲਾਂ ਰੀਓ ਓਲੰਪਿਕਸ ’ਚ ਵੀ ਹਿੱਸਾ ਲਿਆ ਸੀ। 25 ਸਾਲਾ ਖਿਡਾਰੀ ਟੀਮ ਲਈ ਬਹੁਤ ਮਹੱਤਵਪੂਰਨ ਸਾਬਤ ਹੋਇਆ। ਦੁਨੀਆ ਨੇ ਹਰਮਨਪ੍ਰੀਤ ਸਿੰਘ ਦੀ ਸ਼ਾਨਦਾਰ ਖੇਡ ਦੇਖੀ, ਜਿਨ੍ਹਾਂ ਨੇ ਪੈਨਲਟੀ ਸ਼ਾਟ ਨੂੰ ਗੋਲ ’ਚ ਬਦਲ ਦਿੱਤਾ। 10 ਸਾਲ ਦੀ ਉਮਰ ’ਚ ਉਹ ਬਹੁਤ ਕਮਜ਼ੋਰ ਸਨ ਪਰ ਉਨ੍ਹਾਂ ਨੇ ਫਿਰ ਵੀ ਕੋਸ਼ਿਸ਼ ਕੀਤੀ। ਇਥੋਂ ਤਕ ਉਨ੍ਹਾਂ ਨੇ ਆਪਣੇ ਆਪ ਨੂੰ ਸਰੀਰਕ ਤੌਰ ’ਤੇ ਮਜ਼ਬੂਤ ਕੀਤਾ ਅਤੇ ਟੀਮ ਦੇ ਸ਼ਕਤੀਸ਼ਾਲੀ ਡਰੈਗ-ਫਲਿੱਕਰ ਬਣ ਗਏ।
ਪੀ. ਆਰ. ਸ਼੍ਰੀਜੇਸ਼ :- ਭਾਰਤੀ ਟੀਮ ਦੇ ਗੋਲਕੀਪਰ ਸ਼੍ਰੀਜੇਸ਼ ਕੇਰਲਾ ਦੇ ਰਹਿਣ ਵਾਲੇ ਹਨ। ਉਨ੍ਹਾਂ ਨੇ ਸੀਨੀਅਰ ਟੀਮ ’ਚ ਸ਼ੁਰੂਆਤ ਸਾਲ 2004 ’ਚ ਕੀਤੀ ਸੀ। ਉਨ੍ਹਾਂ ਨੇ ਦੇਸ਼ ਲਈ ਤਿੰਨ ਓਲੰਪਿਕ, ਤਿੰਨ ਵਿਸ਼ਵ ਕੱਪ, ਤਿੰਨ ਏਸ਼ੀਅਨ ਖੇਡਾਂ ਅਤੇ ਦੋ ਰਾਸ਼ਟਰਮੰਡਲ ਖੇਡਾਂ ਖੇਡੀਆਂ ਹਨ। ਉਨ੍ਹਾਂ ਨੇ ਟੋਕੀਓ ਓਲੰਪਿਕਸ ’ਚ ਟੀਮ ਇੰਡੀਆ ਦੀ ਜਿੱਤ ’ਚ ਅਹਿਮ ਭੂਮਿਕਾ ਨਿਭਾਈ। ਉਨ੍ਹਾਂ ਵਿਰੋਧੀ ਟੀਮਾਂ ਦੇ ਹਮਲਿਆਂ ਨੂੰ ਸ਼ਾਨਦਾਰ ਢੰਗ ਨਾਲ ਨਕਾਰਾ ਕੀਤਾ।
ਰੁਪਿੰਦਰਪਾਲ ਸਿੰਘ :- ਇਨ੍ਹਾਂ ਦੇ ਪਰਿਵਾਰ ਦੇ ਬਹੁਤ ਸਾਰੇ ਲੋਕ ਹਾਕੀ ਨਾਲ ਜੁੜੇ ਹੋਏ ਹਨ। ਉਹ ਟੀਮ ਲਈ ਦੀਵਾਰ ਵਾਂਗ ਹਨ। ਉਹ ਟੋਕੀਓ ਓਲੰਪਿਕ ਟੀਮ ਦੇ ਸਭ ਤੋਂ ਤਜਰਬੇਕਾਰ ਖਿਡਾਰੀਆਂ ’ਚੋਂ ਇੱਕ ਹਨ। ਸਾਲ 2010 ’ਚ ਉਨ੍ਹਾਂ ਨੇ ਸੀਨੀਅਰ ਟੀਮ ’ਚ ਆਪਣੀ ਸ਼ੁਰੂਆਤ ਕੀਤੀ। ਇੱਕ ਸਮਾਂ ਸੀ ਜਦੋਂ ਰੁਪਿੰਦਰ ਪੈਸੇ ਬਚਾਉਣ ਲਈ ਸਿਰਫ ਇੱਕ ਵਾਰ ਖਾਣਾ ਖਾਂਦੇ ਸਨ। ਰੁਪਿੰਦਰ ਲਈ ਉਨ੍ਹਾਂ ਦੇ ਵੱਡੇ ਭਰਾ ਨੇ ਹਾਕੀ ਖੇਡਣੀ ਬੰਦ ਕਰ ਦਿੱਤੀ ਸੀ।
ਸੁਮਿਤ :- ਇਨ੍ਹਾਂ ਦੇ ਪਿਤਾ ਪ੍ਰਤਾਪ ਸਿੰਘ ਇੱਕ ਮਜ਼ਦੂਰ ਹਨ ਅਤੇ ਮਾਂ ਕ੍ਰਿਸ਼ਨਾ ਇੱਕ ਘਰੇਲੂ ਔਰਤ ਸਨ। ਉਨ੍ਹਾਂ ਦੀ ਮਾਂ ਦਾ ਦਿਹਾਂਤ ਹੋ ਗਿਆ ਹੈ। ਸੁਮਿਤ ਦਾ ਵੱਡਾ ਭਰਾ ਮੁਰਥਲ ਯੂਨੀਵਰਸਿਟੀ ’ਚ ਡੀ. ਸੀ. ਰੇਟ ’ਤੇ ਕੰਮ ਕਰ ਰਿਹਾ ਹੈ, ਜਦਕਿ ਦੂਜਾ ਭਰਾ ਸੁਮਿਤ ਨੂੰ ਜੁੱਤੀਆਂ ਦਾ ਲਾਲਚ ਦੇ ਕੇ ਹਾਕੀ ਅਕੈਡਮੀ ਲੈ ਗਿਆ ਅਤੇ ਇਥੋਂ ਸਟਾਰ ਖਿਡਾਰੀ ਦਾ ਹਾਕੀ ਖੇਡਣ ਦਾ ਸੁਫ਼ਨਾ ਸ਼ੁਰੂ ਹੋਇਆ। ਸੁਮਿਤ ਨੇ ਟੀਮ ਇੰਡੀਆ ’ਚ ਸਾਲ 2017 ’ਚ ਅਜ਼ਲਾਨ ਸ਼ਾਹ ਕੱਪ ਨਾਲ ਆਪਣੀ ਸ਼ੁਰੂਆਤ ਕੀਤੀ ਸੀ। ਉਹ ਟੀਮ ਦੇ ਮਿਡਫੀਲਡ ਦਾ ਅਹਿਮ ਹਿੱਸਾ ਹਨ।
ਵਿਵੇਕ ਸਾਗਰ :- ਇਨ੍ਹਾਂ ਨੇ ਹਾਕੀ ਖੇਡਣ ਦੇ ਆਪਣੇ ਸੁਫ਼ਨੇ ਲਈ ਬਹੁਤ ਦੁੱਖ ਝੱਲਿਆ ਹੈ। ਹੋਸ਼ੰਗਾਬਾਦ ਦੇ ਰਹਿਣ ਵਾਲੇ ਵਿਵੇਕ ਨੇ ਜੂਨੀਅਰ ਟੀਮ ’ਚ ਡੈਬਿਊ ਕਰਨ ਤੋਂ ਬਾਅਦ ਬਹੁਤ ਨਾਂ ਕਮਾਇਆ। ਇਸ ਤੋਂ ਬਾਅਦ ਸਾਲ 2015 ’ਚ ਅਭਿਆਸ ਦੌਰਾਨ ਉਨ੍ਹਾਂ ਦੀ ਧੌਣ ਦੀ ਹੱਡੀ ਟੁੱਟ ਗਈ ਸੀ। ਇਲਾਜ ਦੌਰਾਨ ਪਤਾ ਲੱਗਾ ਕਿ ਉਨ੍ਹਾਂ ਦੀਆਂ ਅੰਤੜੀਆਂ ’ਚ ਇੱਕ ਛੇਕ ਵੀ ਸੀ। 22 ਦਿਨ ਬਾਅਦ ਉਨ੍ਹਾਂ ਨੇ ਜ਼ਿੰਦਗੀ ਦੀ ਲੜਾਈ ਜਿੱਤ ਲਈ। ਇਸ ਤੋਂ ਬਾਅਦ ਉਹ ਜੂਨੀਅਰ ਵਿਸ਼ਵ ਕੱਪ ਲਈ ਟੀਮ ’ਚ ਚੁਣੇ ਗਏ।
ਮਨਦੀਪ ਸਿੰਘ :- ਭਾਰਤੀ ਟੀਮ ਦੇ ਨੌਜਵਾਨ ਖਿਡਾਰੀਆਂ ’ਚੋਂ ਇੱਕ ਹਨ ਮਨਦੀਪ ਸਿੰਘ। ਉਹ ਟੀਮ ’ਚ ਮਹੱਤਵਪੂਰਨ ਭੂਮਿਕਾ ਨਿਭਾਉਂਦੇ ਹਨ। ਹਾਲਾਂਕਿ ਇੱਕ ਸਮੇਂ ਉਹ ਕ੍ਰਿਕਟਰ ਬਣਨਾ ਚਾਹੁੰਦੇ ਸਨ। ਉਨ੍ਹਾਂ ਦੀ ਹਾਲਤ ਵਿਗੜਨ ਤੋਂ ਬਾਅਦ ਉਨ੍ਹਾਂ ਨੂੰ ਹਸਪਤਾਲ ’ਚ ਦਾਖਲ ਕਰਵਾਇਆ ਗਿਆ ਸੀ। ਹਾਲਾਂਕਿ ਮਨਦੀਪ ਨੇ ਸ਼ਾਨਦਾਰ ਵਾਪਸੀ ਕੀਤੀ ਅਤੇ ਟੀਮ ਨੂੰ ਤਮਗਾ ਦਿਵਾਉਣ ’ਚ ਅਹਿਮ ਭੂਮਿਕਾ ਨਿਭਾਈ।
ਮਨਪ੍ਰੀਤ ਸਿੰਘ :- ‘ਐੱਫ. ਆਈ. ਐੱਚ. ਪਲੇਅਰ ਆਫ਼ ਦਿ ਮੈਚ’ ਚੁਣੇ ਜਾਣ ਵਾਲੇ ਪਹਿਲੇ ਭਾਰਤੀ ਖਿਡਾਰੀ ਹਨ ਮਨਪ੍ਰੀਤ ਸਿੰਘ। ਉਨ੍ਹਾਂ ਨੇ ਦੇਸ਼ ਲਈ 200 ਤੋਂ ਵੱਧ ਮੈਚ ਖੇਡੇ ਹਨ। ਮਨਪ੍ਰੀਤ ਦੇ ਭਰਾਵਾਂ ਨੂੰ ਪੈਸੇ ਦੀ ਘਾਟ ਕਾਰਨ ਖੇਡ ਛੱਡਣੀ ਪਈ ਪਰ ਮਨਪ੍ਰੀਤ ਦੀ ਖੇਡ ਜਾਰੀ ਰਹੀ। ਕਪਤਾਨੀ ਦੇ ਨਾਲ ਉਨ੍ਹਾਂ ਨੇ ਮਿਡਫੀਲਡ ’ਚ ਵੀ ਸ਼ਾਨਦਾਰ ਪ੍ਰਦਰਸ਼ਨ ਕਰਨਾ ਜਾਰੀ ਰੱਖਿਆ। ਮਨਪ੍ਰੀਤ ਨੂੰ ਕੋਰੋਨਾ ਹੋ ਗਿਆ ਸੀ ਪਰ ਉਨ੍ਹਾਂ ਨੇ ਕੋਰੋਨਾ ਨੂੰ ਹਰਾ ਦਿੱਤਾ।
ਨੀਲਕਾਂਤ :- ਇਨ੍ਹਾਂ ਨੇ ਬਚਪਨ ’ਚ ਹੀ ਫ਼ੈਸਲਾ ਕਰ ਲਿਆ ਸੀ ਕਿ ਉਹ ਹਾਕੀ ਖੇਡਣਗੇ ਪਰ ਇਹ ਇੰਨਾ ਸੌਖਾ ਨਹੀਂ ਸੀ। 16 ਸਾਲ ਦੀ ਉਮਰ ’ਚ ਉਨ੍ਹਾਂ ਹਾਕੀ ਲਈ ਘਰ ਛੱਡ ਦਿੱਤਾ ਪਰ ਉਸੇ ਸਮੇਂ ਉਨ੍ਹਾਂ ਨੇ ਫੈਸਲਾ ਕੀਤਾ ਸੀ ਕਿ ਉਹ ਖਾਲੀ ਹੱਥ ਵਾਪਸ ਨਹੀਂ ਪਰਤਣਗੇ, ਚਾਹੇ ਕੁਝ ਵੀ ਹੋਵੇ। ਉਨ੍ਹਾਂ ਨੇ ਸਾਲ 2018 ’ਚ ਸੀਨੀਅਰ ਟੀਮ ’ਚ ਡੈਬਿਊ ਕੀਤਾ ਅਤੇ ਫਿਰ ਪਿੱਛੇ ਮੁੜ ਕੇ ਨਹੀਂ ਵੇਖਿਆ।
ਲਲਿਤ ਉਪਾਧਿਆਏ :- ਇਹ ਭਾਰਤੀ ਟੀਮ ਦੇ ਤਜਰਬੇਕਾਰ ਡਿਫੈਂਡਰ ਹਨ। ਹਾਲਾਂਕਿ ਉਨ੍ਹਾਂ ਨੂੰ ਆਪਣੇ ਕਰੀਅਰ ਦੀ ਸ਼ੁਰੂਆਤ ਤੋਂ ਪਹਿਲਾਂ ਹੀ ਬਹੁਤ ਮੁਸ਼ਕਿਲਾਂ ਦਾ ਸਾਹਮਣਾ ਕਰਨਾ ਪਿਆ ਸੀ। ਲਲਿਤ ਉਪਾਧਿਆਏ ’ਤੇ ਝੂਠੇ ਸਟਿੰਗ ਆਪ੍ਰੇਸ਼ਨ ’ਚ ਫੜੇ ਜਾਣ ਤੋਂ ਬਾਅਦ ਪਾਬੰਦੀ ਲਾਈ ਗਈ ਸੀ। ਕਿਸੇ ਸਮੇਂ ਉਨ੍ਹਾਂ ਨੇ ਇਸ ਖੇਡ ਨੂੰ ਸਦਾ ਲਈ ਛੱਡਣ ਦਾ ਮਨ ਬਣਾ ਲਿਆ ਸੀ। ਧਨਰਾਜ ਪਿੱਲੈ ਦੇ ਸਮਝਾਉਣ ’ਤੇ ਉਨ੍ਹਾਂ ਨੇ ਖੇਡਣਾ ਜਾਰੀ ਰੱਖਿਆ। ਉਨ੍ਹਾਂ ਨੇ 2014 ’ਚ ਸੀਨੀਅਰ ਟੀਮ ’ਚ ਆਪਣੀ ਸ਼ੁਰੂਆਤ ਕੀਤੀ ਸੀ।
ਦਿਲਪ੍ਰੀਤ ਸਿੰਘ :- ਆਪਣੇ ਹਾਕੀ ਕਰੀਅਰ ਦੀ ਸ਼ੁਰੂਆਤ ਦਿਲਪ੍ਰੀਤ ਨੇ ਅੰਡਰ-21 ਟੀਮ ਨਾਲ ਕੀਤੀ ਸੀ। ਇਸ ਤੋਂ ਬਾਅਦ ਸਾਲ 2018 'ਚ ਉਨ੍ਹਾਂ ਨੂੰ ਸੀਨੀਅਰ ਟੀਮ ’ਚ ਜਗ੍ਹਾ ਮਿਲੀ। ਜਦੋਂ ਉਨ੍ਹਾਂ ਨੂੰ 18 ਸਾਲ ਦੀ ਉਮਰ ’ਚ ਟੀਮ ਇੰਡੀਆ ਵਿੱਚ ਜਗ੍ਹਾ ਮਿਲੀ, ਤਾਂ ਉਨ੍ਹਾਂ ਨੂੰ ਬਹੁਤ ਮਾਣ ਹੋਇਆ। ਰਾਸ਼ਟਰਮੰਡਲ ਖੇਡਾਂ ’ਚ ਮਾਮੂਲੀ ਪ੍ਰਦਰਸ਼ਨ ਤੋਂ ਬਾਅਦ ਉਨ੍ਹਾਂ ਨੂੰ ਬਾਹਰ ਦਾ ਰਸਤਾ ਦਿਖਾਇਆ ਗਿਆ।
ਸੁਰਿੰਦਰ ਕੁਮਾਰ :- ਹਰਿਆਣਾ ਦੇ ਸੁਰਿੰਦਰ ਕੁਮਾਰ ਭਾਰਤੀ ਟੀਮ ਦੇ ਸਟਾਰ ਡਿਫੈਂਡਰ ਹਨ। ਉਨ੍ਹਾਂ ਨੇ ਸਾਲ 2013 ’ਚ ਟੀਮ ’ਚ ਆਪਣੀ ਸ਼ੁਰੂਆਤ ਕੀਤੀ। ਉਨ੍ਹਾਂ ਨੇ ਓਲੰਪਿਕ ਅਤੇ ਏਸ਼ੀਅਨ ਖੇਡਾਂ ’ਚ ਵੀ ਦੇਸ਼ ਦੀ ਨੁਮਾਇੰਦਗੀ ਕੀਤੀ ਹੈ। ਹਾਲਾਂਕਿ ਸੁਰਿੰਦਰ ਕਦੇ ਵੀ ਰਾਸ਼ਟਰਮੰਡਲ ਖੇਡਾਂ ਵਿੱਚ ਹਿੱਸਾ ਨਹੀਂ ਲੈ ਸਕਿਆ।
ਇਹ ਖ਼ਬਰ ਪੜ੍ਹੋ-ਵਿਰਾਟ ਇਕ ਵਾਰ ਫਿਰ ਹੋਏ ਐਂਡਰਸਨ ਦਾ ਸ਼ਿਕਾਰ, ਬਣਾਇਆ ਇਹ ਰਿਕਾਰਡ
ਸ਼ਮਸ਼ੇਰ ਸਿੰਘ :- ਉਹ ਭਾਰਤੀ ਟੀਮ ਦੇ ਫਾਰਵਰਡ ਖਿਡਾਰੀ ਹਨ। 1997 ’ਚ ਜਨਮੇ ਇਸ 23 ਸਾਲਾ ਖਿਡਾਰੀ ਨੇ ਸਾਲ 2019 ’ਚ ਭਾਰਤੀ ਟੀਮ ’ਚ ਡੈਬਿਊ ਕੀਤਾ ਸੀ। 11 ਸਾਲ ਦੀ ਉਮਰ ’ਚ ਉਹ ਜਲੰਧਰ ਆ ਗਏ, ਜਿੱਥੇ ਉਨ੍ਹਾਂ ਨੂੰ ਸੁਰਜੀਤ ਸਿੰਘ ਅਕੈਡਮੀ ’ਚ ਖੇਡਣ ਦਾ ਮੌਕਾ ਮਿਲਿਆ। ਉਨ੍ਹਾਂ ਨੇ ਉੱਥੇ ਛੇ ਸਾਲਾਂ ਲਈ ਸਿਖਲਾਈ ਲਈ। ਸ਼ਮਸ਼ੇਰ ਚਾਹੁੰਦਾ ਸੀ ਉਹ ਕਿਸੇ ਤਰ੍ਹਾਂ ਰਾਸ਼ਟਰੀ ਖੇਡ ਨੂੰ ਅਪਣਾਵੇ ਤਾਂ ਜੋ ਉਨ੍ਹਾਂ ਨੂੰ ਸਰਕਾਰੀ ਨੌਕਰੀ ਮਿਲ ਸਕੇ ਅਤੇ ਪਰਿਵਾਰ ਦੀ ਆਰਥਿਕ ਮਦਦ ਹੋ ਸਕੇ। ਉਨ੍ਹਾਂ ਨੇ 2019 ’ਚ ਓਲੰਪਿਕ ਟੈਸਟ ਈਵੈਂਟ ਨਾਲ ਟੀਮ ਇੰਡੀਆ ’ਚ ਡੈਬਿਊ ਕੀਤਾ ਅਤੇ ਟੋਕੀਓ ਦੀ ਟਿਕਟ ਲੈਣ ’ਚ ਸਹਾਇਤਾ ਕੀਤੀ।
ਬੀਰੇਂਦਰ ਲਾਕੜਾ :- ਉਹ ਭਾਰਤੀ ਟੀਮ ਨੂੰ ਕਾਂਸੀ ਤਮਗਾ ਦਿਵਾਉਣ ’ਚ ਮਹੱਤਵਪੂਰਨ ਸਾਬਤ ਹੋਏ। ਲਾਕੜਾ ਨੂੰ 2016 ’ਚ ਗੋਡੇ ’ਤੇ ਸੱਟ ਲੱਗੀ ਸੀ ਅਤੇ ਇਸ ਕਾਰਨ ਉਹ ਓਲੰਪਿਕ ਵਿੱਚ ਟੀਮ ਦਾ ਹਿੱਸਾ ਨਹੀਂ ਬਣ ਸਕੇ। ਸੱਟ ਕਾਰਨ ਅੱਠ ਮਹੀਨੇ ਬਾਹਰ ਰਹਿਣ ਤੋਂ ਬਾਅਦ ਲਾਕੜਾ ਦੀ ਟੀਮ ਵਿੱਚ ਵਾਪਸੀ ਹੋਈ। ਉਨ੍ਹਾਂ ਨੇ ਟੋਕੀਓ ਓਲੰਪਿਕਸ ’ਚ ਆਪਣੀ ਖੇਡ ਦੇ ਬਲ ’ਤੇ ਆਪਣੇ ਆਪ ਨੂੰ ਸਾਬਤ ਕੀਤਾ।
ਹਾਰਦਿਕ ਸਿੰਘ :- ਓਲੰਪਿਕ ’ਚ ਕਾਂਸੀ ਤਗਮਾ ਜਿੱਤਣ ਵਾਲੀ ਭਾਰਤੀ ਪੁਰਸ਼ ਹਾਕੀ ਟੀਮ ਦੇ ਮਿਡਫੀਲਡਰ ਹਾਰਦਿਕ ਸਿੰਘ ਨੇ ਭਾਰਤ ਲਈ ਖੇਡਣ ਦਾ ਆਪਣਾ ਸੁਫ਼ਨਾ ਲੱਗਭਗ ਤਿਆਗ ਦਿੱਤਾ ਸੀ ਅਤੇ ਡੱਚ ਲੀਗ ’ਚ ਕਲੱਬ ਕਰੀਅਰ ਬਣਾਉਣ ਦੀ ਯੋਜਨਾ ਬਣਾ ਰਹੇ ਸਨ ਪਰ ਉਨ੍ਹਾਂ ਦੇ ਰਿਸ਼ਤੇਦਾਰ ਸਾਬਕਾ ਡਰੈਗ-ਫਲਿੱਕਰ ਜੁਗਰਾਜ ਸਿੰਘ ਨੇ ਉਨ੍ਹਾਂ ਨੂੰ ਪ੍ਰੇਰਿਤ ਕੀਤਾ। ਹਾਰਦਿਕ ਨੇ ਕਿਹਾ ਕਿ ਉਹ ਇੱਕ ਅਜਿਹੇ ਪਰਿਵਾਰ ਤੋਂ ਆਇਆ ਹੈ, ਜਿਸ ਦੇ ਖੂਨ ’ਚ ਹਾਕੀ ਹੈ ਪਰ ਉੱਚ ਪੱਧਰ ’ਤੇ ਸੀਮਤ ਮੌਕਿਆਂ ਨੇ ਉਸ ਨੂੰ ਨਿਰਾਸ਼ ਕਰ ਦਿੱਤਾ ਸੀ। ਹਾਲਾਂਕਿ, ਉਸ ਨੇ ਓਲੰਪਿਕ ’ਚ ਇੱਕ ਸ਼ਾਨਦਾਰ ਖੇਡ ਦਿਖਾਈ ਅਤੇ ਵੱਡੀ ਸਫਲਤਾ ਪ੍ਰਾਪਤ ਕਰਨ ’ਚ ਸਫਲ ਰਿਹਾ।
ਅਮਿਤ ਰੋਹਿਦਾਸ :- ਭਾਰਤੀ ਹਾਕੀ ਟੀਮ ਦੇ ਅਹਿਮ ਖਿਡਾਰੀ ਹਨ ਅਮਿਤ। ਉਨ੍ਹਾਂ ਦੀ ਆਰਥਿਕ ਹਾਲਤ ਠੀਕ ਨਹੀਂ ਸੀ ਤੇ ਉਹ ਡੰਡਿਆਂ ਨੂੰ ਹਾਕੀ ਬਣਾ ਕੇ ਖੇਡਦੇ ਸਨ। ਉਨ੍ਹਾਂ ਦੇ ਪਿੰਡ ’ਚ ਵੀ ਹਾਕੀ ਦੇ ਮੈਚ ਹੋਇਆ ਕਰਦੇ ਸਨ। ਇਨ੍ਹਾਂ ਮੈਚਾਂ ’ਚ ਇਨਾਮ ਵਜੋਂ ਬੱਕਰੀ ਦਿੱਤੀ ਜਾਂਦੀ ਸੀ। ਅਮਿਤ ਨੇ ਸਦਾ ਇਹ ਮਹਿਸੂਸ ਕੀਤਾ ਕਿ ਹਾਕੀ ਸਿਰਫ ਉਸ ਦੇ ਵਰਗੇ ਲੋਕਾਂ ਲਈ ਇੱਕ ਖੇਡ ਨਹੀਂ ਹੈ ਬਲਕਿ ਇਹ ਆਰਥਿਕ ਸਥਿਤੀ ਨੂੰ ਬਦਲਣ ਦਾ ਇੱਕ ਜ਼ਰੀਆ ਵੀ ਹੈ। ਇਹ ਸੋਚ ਉਸ ਨੂੰ ਟੀਮ ਇੰਡੀਆ ’ਚ ਲੈ ਕੇ ਆਈ। ਉਨ੍ਹਾਂ ਸਭ ਤੋਂ ਪਹਿਲਾਂ ਅੰਡਰ-18 ਏਸ਼ੀਅਨ ਕੱਪ ’ਚ ਭਾਰਤ ਦੀ ਅਗਵਾਈ ਕੀਤੀ। ਆਪਣੇ ਸ਼ਾਨਦਾਰ ਪ੍ਰਦਰਸ਼ਨ ਦੀ ਬਦੌਲਤ ਉਨ੍ਹਾਂ ਇਸ ਟੂਰਨਾਮੈਂਟ ’ਚ 7 ਗੋਲ ਦਾਗੇ।
ਇਹ ਖ਼ਬਰ ਪੜ੍ਹੋ- Tokyo Olympics : ਸ਼ੁੱਕਰਵਾਰ ਦਾ ਸ਼ਡਿਊਲ ਆਇਆ ਸਾਹਮਣੇ, ਭਾਰਤੀ ਮਹਿਲਾ ਹਾਕੀ ਟੀਮ ਦਾ ਮੈਚ ਇੰਨੇ ਵਜੇ
ਗੁਰਜੰਟ ਸਿੰਘ :- ਪੰਜਾਬ ਦੇ ਗੁਰਜੰਟ ਸਿੰਘ ਲਈ ਇਹ ਯਾਤਰਾ ਆਸਾਨ ਨਹੀਂ ਰਹੀ। ਉਨ੍ਹਾਂ ਦੇ ਪਰਿਵਾਰ ਅਤੇ ਪਿੰਡ ਵਿੱਚ ਕਿਸੇ ਨੇ ਹਾਕੀ ਨਹੀਂ ਖੇਡੀ। ਉਨ੍ਹਾਂ ਨੇ ਆਪਣੇ ਚਚੇਰੇ ਭਰਾਵਾਂ ਨੂੰ ਦੇਖ ਕੇ ਹਾਕੀ ਖੇਡਣੀ ਸਿੱਖੀ ਅਤੇ ਫਿਰ ਜੂਨੀਅਰ ਟੀਮ ’ਚ ਜਗ੍ਹਾ ਬਣਾ ਲਈ ਅਤੇ ਵਿਸ਼ਵ ਚੈਂਪੀਅਨ ਬਣਨ ਵਾਲੀ ਸੀਨੀਅਰ ਟੀਮ ਤੱਕ ਪਹੁੰਚ ਗਏ। ਉਹ 2016 ਦੀ ਜੂਨੀਅਰ ਵਿਸ਼ਵ ਕੱਪ ਜੇਤੂ ਟੀਮ ਦਾ ਹਿੱਸਾ ਸਨ। ਭਾਰਤ ਦੇ ਸਾਬਕਾ ਕੋਚ ਹਰਿੰਦਰ ਸਿੰਘ ਦਾ ਮੰਨਣਾ ਹੈ ਕਿ ਗੁਰਜੰਟ ਟੀਮ ’ਚ ਸਾਕਾਰਾਤਮਕ ਮਾਹੌਲ ਬਣਾਈ ਰੱਖਦੇ ਹਨ, ਜੋ ਟੀਮ ਦੇ ਬਾਕੀ ਖਿਡਾਰੀਆਂ ਦੀ ਵੀ ਮਦਦ ਕਰਦੇ ਹਨ।
ਨੋਟ- ਇਸ ਖ਼ਬਰ ਸਬੰਧੀ ਕਮੈਂਟ ਕਰਕੇ ਦਿਓ ਆਪਣੀ ਰਾਏ।
ਪੰਜਾਬ ਨੇ ‘ਇੰਡੀਆ ਇੰਡੈਕਸ’ ਵਿਚ ਹਾਸਲ ਕੀਤਾ ਪਹਿਲਾ ਰੈਂਕ
NEXT STORY 
