ਨੈਸ਼ਨਲ ਡੈਸਕ- ਮੱਧ ਪੂਰਬ ਵਿੱਚ ਈਰਾਨ, ਅਮਰੀਕਾ ਅਤੇ ਇਜ਼ਰਾਈਲ ਵਿਚਾਲੇ ਜਾਰੀ ਜੰਗ ਕਾਰਨ ਦੁਨੀਆ ਭਰ ਵਿੱਚ ਪੈਟਰੋਲੀਅਮ ਉਤਪਾਦਾਂ ਦੀ ਸਪਲਾਈ ਨੂੰ ਲੈ ਕੇ ਚਿੰਤਾ ਬਣੀ ਹੋਈ ਹੈ। ਇਸੇ ਦਰਮਿਆਨ ਉੱਤਰ ਪ੍ਰਦੇਸ਼ ਦੇ ਝਾਂਸੀ ਤੋਂ ਰਸੋਈ ਗੈਸ ਸਿਲੰਡਰਾਂ ਨਾਲ ਭਰੇ ਇੱਕ ਟਰੱਕ ਦੇ ਚੋਰੀ ਹੋਣ ਦਾ ਸਨਸਨੀਖੇਜ਼ ਮਾਮਲਾ ਸਾਹਮਣੇ ਆਇਆ ਹੈ। ਟਰੱਕ ਵਿੱਚ ਕਰੀਬ 18 ਲੱਖ ਰੁਪਏ ਦੀ ਕੀਮਤ ਦੇ 524 ਐਲ.ਪੀ.ਜੀ. ਸਿਲੰਡਰ ਲੱਦੇ ਹੋਏ ਸਨ।
ਟਰੱਕ ਮਾਲਕ ਨੀਰਜ ਅਗਰਵਾਲ ਅਨੁਸਾਰ, ਉਨ੍ਹਾਂ ਦਾ ਟਰੱਕ (ਨੰਬਰ UP 93 BT 3341) ਝਾਂਸੀ ਦੇ ਕਰਾਰੀ ਸਥਿਤ ਭਾਰਤ ਪੈਟਰੋਲੀਅਮ ਕਾਰਪੋਰੇਸ਼ਨ ਦੇ ਪਲਾਂਟ ਨਾਲ ਜੁੜਿਆ ਹੋਇਆ ਹੈ। 2 ਮਾਰਚ ਨੂੰ ਪਲਾਂਟ ਤੋਂ 524 ਸਿਲੰਡਰ ਲੋਡ ਕਰਕੇ ਕਾਨਪੁਰ ਦੇਹਾਤ ਭੇਜੇ ਜਾਣੇ ਸਨ। ਹੋਲੀ ਦੇ ਤਿਉਹਾਰ ਕਾਰਨ ਡਰਾਈਵਰ ਰਾਜਕੁਮਾਰ ਟਰੱਕ ਨੂੰ ਪਲਾਂਟ ਦੇ ਬਾਹਰ ਖੜ੍ਹਾ ਕਰਕੇ ਆਪਣੇ ਘਰ ਚਲਾ ਗਿਆ ਸੀ।
6 ਮਾਰਚ ਨੂੰ ਸੂਚਨਾ ਮਿਲੀ ਕਿ ਟਰੱਕ ਝਾਂਸੀ ਦੇ ਬੜਾਗਾਓਂ ਖੇਤਰ ਵਿੱਚ ਪਾਰੀਛਾ ਦੇ ਕੋਲ ਹਾਈਵੇਅ ਕਿਨਾਰੇ ਖਾਲੀ ਖੜ੍ਹਾ ਹੈ। ਜਦੋਂ ਮਾਲਕ ਮੌਕੇ 'ਤੇ ਪਹੁੰਚਿਆ ਤਾਂ ਦੇਖਿਆ ਕਿ ਟਰੱਕ ਵਿੱਚੋਂ ਸਾਰੇ ਸਿਲੰਡਰ ਗਾਇਬ ਸਨ ਅਤੇ ਗੱਡੀ ਦਾ ਜੀ.ਪੀ.ਐੱਸ. (GPS) ਵੀ ਤੋੜਿਆ ਹੋਇਆ ਸੀ।
ਸੀਪਰੀ ਬਾਜ਼ਾਰ ਥਾਣੇ ਦੀ ਪੁਲਸ ਨੇ ਅਣਪਛਾਤੇ ਚੋਰਾਂ ਖਿਲਾਫ ਮਾਮਲਾ ਦਰਜ ਕਰ ਲਿਆ ਹੈ। ਥਾਣਾ ਇੰਚਾਰਜ ਜੈਪ੍ਰਕਾਸ਼ ਚੌਬੇ ਨੇ ਦੱਸਿਆ ਕਿ ਪੁਲਸ ਨੇ ਖਾਲੀ ਟਰੱਕ ਨੂੰ ਕਬਜ਼ੇ ਵਿੱਚ ਲੈ ਲਿਆ ਹੈ ਅਤੇ ਚੋਰੀ ਹੋਏ ਸਿਲੰਡਰਾਂ ਦੀ ਭਾਲ ਲਈ ਟੀਮਾਂ ਲਗਾਈਆਂ ਗਈਆਂ ਹਨ। ਪੁਲਸ ਵੱਲੋਂ ਆਸ-ਪਾਸ ਦੇ ਸੀ.ਸੀ.ਟੀ.ਵੀ. ਕੈਮਰਿਆਂ ਦੀ ਫੁਟੇਜ ਵੀ ਖੰਗਾਲੀ ਜਾ ਰਹੀ ਹੈ।
ਜ਼ਿਕਰਯੋਗ ਹੈ ਕਿ ਵਿਦੇਸ਼ਾਂ ਤੋਂ ਐਲ.ਪੀ.ਜੀ. ਦੀ ਘੱਟ ਸਪਲਾਈ ਕਾਰਨ ਕੇਂਦਰ ਸਰਕਾਰ ਨੇ ਇਸ ਦੀ ਵਪਾਰਕ ਵਰਤੋਂ 'ਤੇ ਕਈ ਪਾਬੰਦੀਆਂ ਲਗਾਈਆਂ ਹਨ। ਮਾਹਿਰਾਂ ਦਾ ਮੰਨਣਾ ਹੈ ਕਿ ਬਾਜ਼ਾਰ ਵਿੱਚ ਗੈਸ ਦੀ ਕਿੱਲਤ ਹੋਣ ਕਾਰਨ ਹੀ ਅਜਿਹੀਆਂ ਚੋਰੀ ਦੀਆਂ ਘਟਨਾਵਾਂ ਨੂੰ ਅੰਜਾਮ ਦਿੱਤਾ ਜਾ ਰਿਹਾ ਹੈ।
ਚੋਣਾਂ ਦੀ ਨਾਮਜ਼ਦਗੀ ਮੌਕੇ ਭੜਕ ਗਈ ਹਿੰਸਾ ! ਪੁਲਸ ਦੀ ਫਾਇਰਿੰਗ 'ਚ 2 ਲੋਕਾਂ ਦੀ ਗਈ ਜਾਨ
NEXT STORY 
