ਲੋਕ ਸਭਾ ਚੋਣਾਂ 2019: ਭਾਜਪਾ ਲਈ ਹਾਲਾਤ 2014 ਵਰਗੇ ਨਹੀਂ

Edited By Shivani Attri,
Updated: 02 Mar, 2019 10:34 AM

ਜਲੰਧਰ (ਨਰੇਸ਼ ਕੁਮਾਰ)— 2014 ਦੀਆਂ ਲੋਕ ਸਭਾ ਚੋਣਾਂ ਦੌਰਾਨ ਨਰਿੰਦਰ ਮੋਦੀ ਦੀ ਹਨੇਰੀ ਕਾਰਨ ਇਹ ਸੀਟ ਭਾਜਪਾ ਦੇ ਖਾਤੇ 'ਚ ਚਲੀ ਗਈ ਸੀ ਅਤੇ ਪਾਰਟੀ ਦੇ ਉਮੀਦਵਾਰ ਵਿਜੇ ਸਾਂਪਲਾ ਇਸ ਸੀਟ ਤੋਂ ਚੋਣ ਜਿੱਤ ਕੇ ਮੰਤਰੀ ਬਣੇ ਪਰ ਇਸ ਵਾਰ ਉਨ੍ਹਾਂ ਦੀ ਰਾਹ ਇੰਨੀ ਆਸਾਨ ਨਜ਼ਰ ਨਹੀਂ ਆ ਰਹੀ। ਇਸ ਦੇ 3 ਕਾਰਨ ਹਨ : ਸਭ ਤੋਂ ਪਹਿਲਾ ਕਾਰਨ ਇਹ ਹੈ ਕਿ 1998 ਤੋਂ ਬਾਅਦ ਇਸ ਸੀਟ ਦੇ ਵੋਟਰ ਹਰ ਚੋਣ 'ਚ ਆਪਣਾ ਸੰਸਦ ਮੈਂਬਰ ਬਦਲ ਦਿੰਦੇ ਹਨ ਜਦਕਿ ਦੂਜਾ ਕਾਰਨ ਵਿਧਾਨ ਸਭਾ ਚੋਣਾਂ ਦੌਰਾਨ ਇਸ ਸੀਟ ਦੇ ਤਹਿਤ ਆਉਂਦੀਆਂ ਸੀਟਾਂ 'ਤੇ ਹੋਈ ਅਕਾਲੀ-ਭਾਜਪਾ ਗਠਜੋੜ ਦੀ ਹਾਲਤ ਚੰਗੀ ਨਹੀਂ ਹੈ। ਤੀਜਾ ਅਤੇ ਸਭ ਤੋਂ ਅਹਿਮ ਕਾਰਨ 2014 ਦੀਆਂ ਚੋਣਾਂ ਜਿਹੀ ਭਾਜਪਾ ਦੀ ਹਨੇਰੀ ਇਸ ਵਾਰ ਨਹੀਂ।
ਓਧਰ ਕਾਂਗਰਸ ਨੂੰ ਵੀ ਇਸ ਸੀਟ 'ਤੇ ਮਜ਼ਬੂਤ ਸਥਾਨਕ ਨੇਤਾ ਮੈਦਾਨ 'ਚ ਉਤਾਰਨਾ ਹੋਵੇਗਾ ਕਿਉਂਕਿ ਕਾਂਗਰਸ ਕਮਲ ਚੌਧਰੀ ਤੋਂ ਬਾਅਦ ਇਸ ਸੀਟ ਲਈ ਬਾਹਰੀ ਚਿਹਰਿਆਂ 'ਤੇ ਹੀ ਦਾਅ ਲਗਾਉਂਦੀ ਰਹੀ ਹੈ।
ਵਿਧਾਨ ਸਭਾ ਚੋਣਾਂ 'ਚ ਕਮਜ਼ੋਰ ਹੋਈ ਭਾਜਪਾ
ਵਿਧਾਨ ਸਭਾ ਚੋਣਾਂ ਦੌਰਾਨ ਭਾਜਪਾ ਦੀ ਸਥਿਤੀ ਇਸ ਸੀਟ 'ਤੇ ਕਮਜ਼ੋਰ ਹੋਈ ਹੈ। ਇਸ ਸੀਟ ਦੇ ਤਹਿਤ ਸ੍ਰੀ ਹਰਗੋਬਿੰਦਪੁਰ, ਭੁਲੱਥ, ਫਗਵਾੜਾ, ਮੁਕੇਰੀਆਂ, ਦਸੂਹਾ, ਉੜਮੁੜ, ਸ਼ਾਮਚੁਰਾਸੀ, ਹੁਸ਼ਿਆਰਪੁਰ ਅਤੇ ਚੱਬੇਵਾਲ ਦੀਆਂ ਵਿਧਾਨ ਸਭਾ ਸੀਟਾਂ ਆਉਂਦੀਆਂ ਹਨ। 2017 ਦੀਆਂ ਚੋਣਾਂ ਦੌਰਾਨ ਕਾਂਗਰਸ ਨੇ ਭੁਲੱਥ ਅਤੇ ਫਗਵਾੜਾ ਨੂੰ ਛੱਡ ਕੇ 7 ਸੀਟਾਂ 'ਤੇ ਬੜ੍ਹਤ ਬਣਾਈ ਹੈ। ਭਾਜਪਾ ਸਿਰਫ ਫਗਵਾੜਾ ਸੀਟ ਹੀ ਜਿੱਤ ਸਕੀ ਜਦਕਿ ਭੁਲੱਥ ਦੀ ਸੀਟ ਆਮ ਆਦਮੀ ਪਾਟੀ ਦੇ ਖਾਤੇ 'ਚ ਗਈ ਸੀ। ਲਿਹਾਜਾ ਇਸ ਸੀਟ 'ਤੇ ਆਉਣ ਵਾਲੀਆਂ 9 ਸੀਟਾਂ 'ਚੋਂ ਭਾਜਪਾ ਕੋਲ ਸਿਰਫ ਇਕ ਸੀਟ ਹੈ।

PunjabKesari
ਸਾਂਪਲਾ ਦੀ ਹਾਜ਼ਰੀ ਉਪਲੱਬਧ ਨਹੀਂ
ਇਸ ਸੀਟ ਤੋਂ ਸੰਸਦ ਮੈਂਬਰ ਵਿਜੇ ਸਾਂਪਲਾ ਕੇਂਦਰੀ ਮੰਤਰੀ ਹਨ ਲਿਹਾਜ਼ਾ ਉਨ੍ਹਾਂ ਦੇ ਉਪਰ ਸੰਸਦ ਦਾ ਹਾਜ਼ਰੀ ਰਜਿਸਟਰ ਸਾਈਨ ਕਰਨ ਦਾ ਅੜਿੱਕਾ ਨਹੀਂ ਹੈ। ਸੰਸਦ 'ਚ ਉਨ੍ਹਾਂ ਦੀ ਹਾਜ਼ਰੀ, ਬਹਿਸ 'ਚ ਹਿੱਸੇ ਅਤੇ ਪੁੱਛੇ ਗਏ ਸਵਾਲਾਂ ਦਾ ਬਿਓਰਾ ਉਪਲੱਬਧ ਨਹੀਂ। ਐੱਮ. ਪੀ. ਲੈਂਡ ਦੀ ਸਰਕਾਰੀ ਵੈੱਬਸਾਈਟ ਮੁਤਾਬਕ ਉਨ੍ਹਾਂ ਨੂੰ ਬਤੌਰ ਸੰਸਦ ਮੈਂਬਰ 22.50 ਕਰੋੜ ਦਾ ਫੰਡ ਜਾਰੀ ਹੋਇਆ, ਜੋ ਕਿ ਵਿਆਜ ਸਮੇਤ 23.28 ਕਰੋੜ ਬਣਿਆ, ਜਿਸ 'ਚੋਂ ਉਨ੍ਹਾਂ ਨੇ 17.91 ਕਰੋੜ ਖਰਚ ਕੀਤੇ ਜਦਕਿ 5.37 ਕਰੋੜ ਦਾ ਫੰਡ ਖਰਚ ਕਰਨਾ ਬਾਕੀ ਹੈ। ਬਤੌਰ ਸੰਸਦ ਮੈਂਬਰ ਉਨ੍ਹਾਂ ਨੇ ਆਦਮਪੁਰ ਦਾ ਏਅਰਪੋਰਟ ਸ਼ੁਰੂ ਕਰਵਾਉਣ ਦਾ ਦਾਅਵਾ ਕੀਤਾ ਹੈ।
ਸੋਮ ਪ੍ਰਕਾਸ਼ ਵੀ ਹੋ ਸਕਦੇ ਹਨ ਉਮੀਦਵਾਰ
ਇਸ ਸੀਟ 'ਤੇ ਮੌਜੂਦਾ ਸੰਸਦ ਮੈਂਬਰ ਵਿਜੇ ਸਾਂਪਲਾ ਦੇ ਇਲਾਵਾ ਫਗਵਾੜਾ ਤੋਂ ਵਿਧਾਇਕ ਸੋਮ ਪ੍ਰਕਾਸ਼ ਨੇ ਵੀ ਦਾਅਵੇਦਾਰੀ ਜਤਾਈ ਹੈ। ਸੋਮ ਪ੍ਰਕਾਸ਼ ਪਹਿਲਾਂ 2009 ਦੌਰਾਨ ਵੀ ਇਸ ਸੀਟ 'ਤੇ ਚੋਣ ਲੜ ਚੁੱਕੇ ਹਨ ਪਰ ਉਨ੍ਹਾਂ ਨੂੰ ਹਾਰ ਦਾ ਮੂੰਹ ਦੇਖਣਾ ਪਿਆ ਸੀ। ਉਨ੍ਹਾਂ ਨੂੰ ਸੂਬਾ ਭਾਜਪਾ ਦੇ ਪ੍ਰਧਾਨ ਸ਼ਵੇਤ ਮਲਿਕ ਦੇ ਇਲਾਵਾ ਕੇਂਦਰੀ ਮੰਤਰੀ ਅਰੁਣ ਜੇਤਲੀ ਦਾ ਵੀ ਸਮਰਥਨ ਹਾਸਲ ਹੈ। ਹਾਲਾਂਕਿ ਮੰਨਿਆ ਜਾ ਰਿਹਾ ਹੈ ਕਿ ਜੇ ਸਹਿਮਤੀ ਨਾ ਬਣ ਸਕੀ ਤਾਂ ਪਾਰਟੀ ਇਸ ਸੀਟ 'ਤੇ ਕਿਸੇ ਫਿਲਮੀ ਸਿਤਾਰੇ ਜਾਂ ਵੱਡੇ ਚਿਹਰੇ ਨੂੰ ਮੈਦਾਨ 'ਚ ਉਤਾਰ ਸਕਦੀ ਹੈ। ਹਾਲਾਂਕਿ ਇਕ ਚਰਚਾ ਇਹ ਵੀ ਸੀ ਕਿ ਪਾਰਟੀ ਅਕਾਲੀ ਦਲ ਨਾਲ ਜਲੰਧਰ ਸੀਟ ਦੀ ਅਦਲਾ-ਬਦਲੀ ਕਰੇਗੀ ਪਰ ਅਕਾਲੀ ਦਲ ਵੱਲੋਂ ਜਲੰਧਰ ਸੀਟ ਤੋਂ ਆਪਣਾ ਉਮੀਦਵਾਰ ਤੈਅ ਕਰ ਲਏ ਜਾਣ ਕਾਰਨ ਹੁਣ ਭਾਜਪਾ ਨੂੰ ਹੀ ਇਸ ਸੀਟ 'ਤੇ ਚੋਣ ਲੜਨੀ ਹੋਵੇਗੀ।
ਕਾਂਗਰਸ ਸਥਾਨਕ ਵਿਧਾਇਕ 'ਤੇ ਲਾ ਸਕਦੀ ਹੈ ਦਾਅ
ਕਾਂਗਰਸ ਨੇ ਪਿਛਲੀਆਂ ਚੋਣਾਂ ਦੌਰਾਨ ਮਹਿੰਦਰ ਸਿੰਘ ਕੇ. ਪੀ. ਨੂੰ ਮੈਦਾਨ 'ਚ ਉਤਾਰਿਆ ਸੀ ਪਰ ਉਹ ਇਹ ਚੋਣ ਹਾਰ ਗਏ। ਇਸ ਸੀਟ ਤੋਂ 2009 ਦੌਰਾਨ ਕਾਂਗਰਸ ਦੀ ਸੰਸਦ ਮੈਂਬਰ ਰਹੀ ਸੰਤੋਸ਼ ਚੌਧਰੀ ਦੇ ਨਾਲ-ਨਾਲ ਉਨ੍ਹਾਂ ਦੀ ਬੇਟੀ ਨਮਿਤਾ ਨੇ ਵੀ ਸੀਟ ਲਈ ਅਰਜ਼ੀ ਦਿੱਤੀ ਹੈ। ਇਨ੍ਹਾਂ ਦੇ ਇਲਾਵਾ ਸਾਬਕਾ ਮੰਤਰੀ ਸਰਵਣ ਸਿੰਘ ਫਿਲੌਰ, ਜੋਗਿੰਦਰ ਸਿੰਘ ਮਾਨ, ਬਲਬੀਰ ਰਾਣੀ ਸੋਢੀ, ਮਨਮੋਹਨ ਲਾਲ ਸੂਦ ਤੇ ਸ਼ਾਮਚੁਰਾਸੀ ਦੇ ਵਿਧਾਇਕ ਪਵਨ ਆਦੀਆ ਅਤੇ ਚੱਬੇਵਾਲ ਦੇ ਵਿਧਾਇਕ ਰਾਜ ਕੁਮਾਰ ਵੀ ਟਿਕਟ ਦੀ ਦੌੜ 'ਚ ਹਨ। ਮੰਨਿਆ ਜਾ ਰਿਹਾ ਹੈ ਕਿ ਕਾਂਗਰਸ ਇਸ ਵਾਰ ਸਥਾਨਕ ਵਿਧਾਇਕ 'ਤੇ ਦਾਅ ਲਾ ਸਕਦੀ ਹੈ ਕਿਉਂਕਿ 1999 ਤੋਂ ਬਾਅਦ ਕਾਂਗਰਸ ਇਸ ਸੀਟ 'ਤੇ ਕੋਈ ਮਜ਼ਬੂਤ ਸਥਾਨਕ ਉਮੀਦਵਾਰ ਨਹੀਂ ਦੇ ਸਕੀ ਹੈ।

PunjabKesari
'ਆਪ' ਨੇ ਰਵਜੋਤ ਸਿੰਘ ਨੂੰ ਮੈਦਾਨ 'ਚ ਉਤਾਰਿਆ
ਆਮ ਆਦਮੀ ਪਾਰਟੀ ਨੇ ਪਿਛਲੀ ਵਾਰ ਇਸ ਸੀਟ 'ਤੇ ਯਾਮਿਨੀ ਗੋਮਰ ਨੂੰ ਮੈਦਾਨ 'ਚ ਉਤਾਰਿਆ ਸੀ ਅਤੇ ਉਨ੍ਹਾਂ ਨੂੰ 213388 ਵੋਟਾਂ ਮਿਲੀਆਂ ਸਨ ਅਤੇ ਉਹ ਤੀਜੇ ਨੰਬਰ 'ਤੇ ਰਹੀ ਸੀ ਪਰ ਇਸ ਵਾਰ ਉਹ ਪਾਰਟੀ ਤੋਂ ਬਾਹਰ ਹੈ। ਪਾਰਟੀ ਨੇ ਸਥਾਨਕ ਨੇਤਾ ਅਤੇ ਦੋਆਬਾ ਜ਼ੋਨ ਦੇ ਇੰਚਾਰਜ ਡਾ. ਰਵਜੋਤ ਸਿੰਘ ਨੂੰ ਮੈਦਾਨ 'ਚ ਉਤਾਰਿਆ ਸੀ। ਰਵਜੋਤ ਪਿਛਲੀ ਵਾਰ ਸ਼ਾਮਚੁਰਾਸੀ ਤੋਂ ਵਿਧਾਨ ਸਭਾ ਦੀ ਚੋਣ ਲੜੇ ਸੀ ਅਤੇ ਉਨ੍ਹਾਂ ਨੇ ਕਾਂਗਰਸ ਨੂੰ ਸਖਤ ਟੱਕਰ ਦਿੱਤੀ ਸੀ। ਹਾਲਾਂਕਿ ਵਿਧਾਨ ਸਭਾ ਚੋਣਾਂ ਦੌਰਾਨ ਵੀ ਇਸ ਸੀਟ ਦੇ ਤਹਿਤ ਆਉਂਦੀਆਂ ਸੀਟਾਂ 'ਤੇ ਆਮ ਆਦਮੀ ਪਾਰਟੀ ਦੀ ਸਥਿਤੀ ਕਮਜ਼ੋਰ ਹੋਈ ਹੈ ਅਤੇ ਖਹਿਰਾ ਧੜੇ ਦੇ ਵੱਖ ਹੋਣ ਨਾਲ ਵੀ ਪਾਰਟੀ ਨੂੰ ਇਸ ਸੀਟ 'ਤੇ ਨੁਕਸਾਨ ਹੋ ਸਕਦਾ ਹੈ।

ਸਾਲ	ਜੇਤੂ	ਪਾਰਟੀ
1952	ਦੀਵਾਨ ਚੰਦ	ਕਾਂਗਰਸ
1957	ਬਲਦੇਵ ਸਿੰਘ	ਕਾਂਗਰਸ
1962	ਅਮਰਨਾਥ	ਕਾਂਗਰਸ
1967	ਆਰ. ਕਿਸ਼ਨ	ਕਾਂਗਰਸ
1971	ਦਰਬਾਰਾ ਸਿੰਘ	ਕਾਂਗਰਸ
1977	ਬਲਬੀਰ ਸਿੰਘ	ਬੀ.ਐੱਲ.ਡੀ.
1980	ਜ਼ੈਲ ਸਿੰਘ	ਕਾਂਗਰਸ
1985	ਕਮਲ ਚੌਧਰੀ	ਕਾਂਗਰਸ
1992	ਕਮਲ ਚੌਧਰੀ	ਕਾਂਗਰਸ
1996	ਕਾਂਸ਼ੀ ਰਾਮ	ਬਸਪਾ
1998	ਕਮਲ ਚੌਧਰੀ	ਭਾਜਪਾ
1999	ਚਰਨਜੀਤ ਸਿੰਘ ਚੰਨੀ	ਕਾਂਗਰਸ
2004	ਅਵਿਨਾਸ਼ ਰਾਏ ਖੰਨਾ	ਭਾਜਪਾ
2009	ਸੰਤੋਸ਼ ਚੌਧਰੀ	ਕਾਂਗਰਸ
2014	ਵਿਜੇ ਸਾਂਪਲਾ	ਭਾਜਪਾ