ਜਲੰਧਰ (ਵਿਸ਼ੇਸ਼) : ਪੰਜਾਬ ’ਚ ਝੋਨੇ ਦੀ ਖ਼ਰੀਦ ਦੇ ਮਾਮਲੇ ’ਚ ਬਹੁ-ਕਰੋੜੀ ਘਪਲਾ ਹੋਣ ਦਾ ਖਦਸ਼ਾ ਜ਼ਾਹਿਰ ਕੀਤਾ ਜਾ ਰਿਹਾ ਹੈ, ਜਿਸ ਤੋਂ ਬਾਅਦ ਇਸ ਮਾਮਲੇ ’ਚ ਪੰਜਾਬ ਦੀ ਮੌਜੂਦਾ ਆਮ ਆਦਮੀ ਸਰਕਾਰ ਘਿਰਦੀ ਨਜ਼ਰ ਆ ਰਹੀ ਹੈ। ਦਰਅਸਲ ਪੰਜਾਬ ’ਚ ਝੋਨੇ ਦੀ ਖ਼ਰੀਦ ਨੂੰ ਲੈ ਕੇ ਵੱਡੇ ਘਪਲੇ ਦੇ ਦੋਸ਼ ਸਾਹਮਣੇ ਆਏ ਹਨ, ਜਿਸ ਤੋਂ ਬਾਅਦ ਕੇਂਦਰ ਸਰਕਾਰ ਨੇ ਸੂਬਾ ਸਰਕਾਰ ਨੂੰ ਪੂਰੇ ਮਾਮਲੇ ਦੀ ਜਾਂਚ ਕਰ ਕੇ ਰਿਪੋਰਟ ਦੇਣ ਲਈ ਕਿਹਾ ਹੈ। ਦੋਸ਼ ਹੈ ਕਿ 2025-26 ਸੀਜ਼ਨ ਦੌਰਾਨ ਸੂਬੇ ਦੀਆਂ ਮੰਡੀਆਂ ’ਚ ਫਰਜ਼ੀ ਖ਼ਰੀਦ ਦੇ ਜ਼ਰੀਏ ਕਰੀਬ 6,000 ਕਰੋੜ ਰੁਪਏ ਤੋਂ 10,000 ਕਰੋੜ ਰੁਪਏ ਤੱਕ ਦੀ ਵੱਡੀ ‘ਖੇਡ’ ਹੋਈ।
ਸ਼ਿਕਾਇਤ ਤੋਂ ਬਾਅਦ ਹੋਇਆ ਪਰਦਾਫਾਸ਼
ਇਹ ਘਪਲਾ ਉਸ ਸਮੇਂ ਸਾਹਮਣੇ ਆਇਆ ਹੈ, ਜਦੋਂ ਇਸ ਦੀ ਇਕ ਸ਼ਿਕਾਇਤ ਕੇਂਦਰ ਦੇ ਕੋਲ ਪਹੁੰਚੀ ਹੈ। ਮਾਮਲੇ ਦੀ ਸ਼ਿਕਾਇਤ ਸੰਗਰੂਰ ਦੇ ਇਕ ਕਮੀਸ਼ਨ ਏਜੰਟ-ਕਮ-ਰਾਈਸ ਮਿੱਲ ਮਾਲਕ ਵੱਲੋਂ ਕੀਤੀ ਗਈ ਦੱਸੀ ਜਾ ਰਹੀ ਹੈ। ਦੋਸ਼ਾਂ ਮੁਤਾਬਕ ਮੰਡੀਆਂ ’ਚ ਕਮੀਸ਼ਨ ਏਜੰਟਾਂ ਨੇ ਕਿਸਾਨਾਂ ਦੇ ਨਾਂ ’ਤੇ ਫਰਜ਼ੀ ‘ਜੇ’ ਫਾਰਮ ਜਾਰੀ ਕੀਤੇ। ਇਨ੍ਹਾਂ ਫਰਜ਼ੀ ਦਸਤਾਵੇਜ਼ਾਂ ਦੇ ਆਧਾਰ ’ਤੇ ਭੁਗਤਾਨ ਕਿਸਾਨਾਂ ਦੇ ਖ਼ਾਤਿਆਂ ’ਚ ਦਿਖਾਇਆ ਗਿਆ ਪਰ ਅਸਲ ’ਚ ਪੈਸਾ ਕਿਸਾਨਾਂ, ਏਜੰਟਾਂ, ਰਾਈਸ ਮਿੱਲਰਾਂ ਅਤੇ ਖ਼ਰੀਦ ਏਜੰਸੀਆਂ ਨਾਲ ਜੁੜੇ ਕੁੱਝ ਕਰਮਚਾਰੀਆਂ ਦੇ ਵਿਚਾਲੇ ਵੰਡ ਲਿਆ ਗਿਆ। ਸ਼ਿਕਾਇਤ ’ਚ ਇਹ ਵੀ ਕਿਹਾ ਗਿਆ ਹੈ ਕਿ ਬਾਅਦ ’ਚ ਸਸਤਾ ਝੋਨਾ ਦੂਜੇ ਸੂਬਿਆਂ ਤੋਂ ਲਿਆਂਦਾ ਗਿਆ, ਜੋ ਘੱਟੋ-ਘੱਟ ਸਮਰਥਨ ਮੁੱਲ ਤੋਂ ਲਗਭਗ 600 ਰੁਪਏ ਪ੍ਰਤੀ ਕੁਇੰਟਲ ਘੱਟ ਦਰ ’ਤੇ ਖ਼ਰੀਦਿਆ ਗਿਆ ਸੀ। ਇਸ ਨੂੰ ਪੰਜਾਬ ’ਚ ਐੱਮ. ਐੱਸ. ਪੀ. ’ਤੇ ਖ਼ਰੀਦਿਆ ਗਿਆ ਵਿਖਾ ਕੇ ਪੂਰਾ ਭੁਗਤਾਨ ਉਠਾ ਲਿਆ ਗਿਆ।
ਇਹ ਵੀ ਪੜ੍ਹੋ : ਕਹਿਰ ਓ ਰੱਬਾ! ਪਲਾਂ 'ਚ ਹੀ ਉੱਜੜੀਆਂ ਖ਼ੁਸ਼ੀਆਂ, ਭਿਆਨਕ ਹਾਦਸੇ ਦੌਰਾਨ 2 ਸਕੇ ਭਰਾਵਾਂ ਦੀ ਮੌਤ
ਸ਼ਿਕਾਇਤ ’ਚ ਜਾਂਚ ਦੇ ਨਾਂ ’ਤੇ ਕਾਗਜ਼ੀ ਸਟਾਕ ਦਿਖਾਉਣ ਦਾ ਜ਼ਿਕਰ
ਇਹ ਵੀ ਪਤਾ ਲੱਗਾ ਹੈ ਕਿ ਕਥਿਤ ਤੌਰ ’ਤੇ ਪ੍ਰਕਿਰਿਆ ਅਜਿਹੀ ਚੱਲੀ ਕਿ ਏਜੰਟ ਨੇ ਗੇਟ ਪਾਸ ਜਾਰੀ ਕਰ ਕੇ ਝੋਨੇ ਨੂੰ ਰਾਈਸ ਮਿੱਲ ’ਚ ਟਰਾਂਸਫਰ ਵਿਖਾਇਆ। ਮਿੱਲਰ ਨੇ ਬਿਨਾਂ ਝੋਨਾ ਪ੍ਰਾਪਤ ਕੀਤੇ ਹੀ ਕਾਗਜ਼ਾਂ ’ਚ ਉਸ ਦੀ ਰਸੀਦ ਦਰਜ ਕਰ ਦਿੱਤੀ ਅਤੇ ਬਦਲੇ ’ਚ ਪੈਸੇ ਲੈ ਲਏ। ਸ਼ਿਕਾਇਤ ਅਨੁਸਾਰ ਏਜੰਟ ਨੂੰ 45 ਰੁਪਏ ਪ੍ਰਤੀ ਕੁਇੰਟਲ ਕਮੀਸ਼ਨ ਅਤੇ 55 ਰੁਪਏ ਪ੍ਰਤੀ ਕੁਇੰਟਲ ਮੰਡੀ ਖ਼ਰਚ ਮਿਲਿਆ। ਖ਼ਰੀਦ ਏਜੰਸੀ ਦੇ ਸਟਾਫ਼ ਅਤੇ ਮੰਡੀ ਬੋਰਡ ਕਰਮਚਾਰੀਆਂ ਨੂੰ ਵੀ ਪ੍ਰਤੀ ਕੁਇੰਟਲ ਵੱਖ-ਵੱਖ ਰਕਮ ਮਿਲਣ ਦਾ ਦੋਸ਼ ਹੈ। ਇੰਨਾ ਹੀ ਨਹੀਂ, ਕੁੱਝ ਮਿੱਲਰਾਂ ਅਤੇ ਏਜੰਟਾਂ ’ਤੇ ਯੂ. ਪੀ. ਅਤੇ ਬਿਹਾਰ ਤੋਂ ਝੋਨਾ ਲਿਆ ਕੇ ਸਟਾਕ ਦੀ ਕਮੀ ਪੂਰੀ ਕਰਨ ਅਤੇ ਟੈਕਸ ਤੇ ਲੇਵੀ ਤੋਂ ਬਚਣ ਦੇ ਵੀ ਦੋਸ਼ ਲੱਗੇ ਹਨ। ਪੰਜਾਬ ’ਚ ਵੈਸੇ ਝੋਨੇ ’ਤੇ ਐੱਮ. ਐੱਸ. ਪੀ. 2369 ਰੁਪਏ ਪ੍ਰਤੀ ਕੁਇੰਟਲ ਹੈ, ਜਦੋਂ ਕਿ ਇਸ ਮਾਮਲੇ ’ਚ ਜੋ ਹੁਣ ਤੱਕ ਦੀ ਜਾਣਕਾਰੀ ਸਾਹਮਣੇ ਆਈ ਹੈ ਉਸ ’ਚ ਦੂਜੇ ਸੂਬੇ ਤੋਂ ਲਗਭਗ 1700 ਰੁਪਏ ਪ੍ਰਤੀ ਕੁਇੰਟਲ ਦੀ ਦਰ ’ਤੇ ਖ਼ਰੀਦਿਆ ਗਿਆ। ਖ਼ਰੀਦ ਪ੍ਰਕਿਰਿਆ ਪੂਰੀ ਹੋਣ ਤੋਂ ਬਾਅਦ ਏਜੰਸੀਆਂ ਅਤੇ ਐੱਫ. ਸੀ. ਆਈ. ਦੇ ਫੀਲਡ ਸਟਾਫ਼ ਨੇ ਮੌਕੇ ਦੀ ਜਾਂਚ ਦੇ ਨਾਂ ’ਤੇ ਕਾਗਜ਼ੀ ਸਟਾਕ ਵਿਖਾਇਆ, ਜਦੋਂ ਕਿ ਅਸਲ ’ਚ ਗੋਦਾਮਾਂ ’ਚ ਝੋਨਾ ਮੌਜੂਦ ਨਹੀਂ ਸੀ। ਸ਼ਿਕਾਇਤ ’ਚ ਕਿਹਾ ਗਿਆ ਹੈ ਕਿ ਇਸ ਦੇ ਲਈ ਹਰ ਰਾਈਸ ਮਿੱਲ ਤੋਂ 10,000 ਤੋਂ 30,000 ਰੁਪਏ ਤੱਕ ਵਸੂਲੇ ਗਏ। ਇਕ ਉਦਾਹਰਣ ਦਿੰਦੇ ਹੋਏ ਦੱਸਿਆ ਗਿਆ ਕਿ 290 ਕੁਇੰਟਲ ਦੀ ਇਕ ਫਰਜ਼ੀ ਖ਼ੇਪ ਨਾਲ ਹੀ ਰਾਈਸ ਮਿੱਲਰ ਨੂੰ ਲਗਭਗ 4 ਲੱਖ ਰੁਪਏ ਦਾ ਫ਼ਾਇਦਾ ਹੋ ਜਾਂਦਾ ਹੈ। ਪੂਰੇ ਸੀਜ਼ਨ ’ਚ ਲੱਖਾਂ ਟਨ ਝੋਨੇ ਦੀ ਖ਼ਰੀਦ ਨੂੰ ਵੇਖਦੇ ਹੋਏ ਘਪਲੇ ਦੀ ਰਕਮ ਬਹੁਤ ਵੱਡੀ ਹੋ ਸਕਦੀ ਹੈ।
ਇਹ ਵੀ ਪੜ੍ਹੋ : PROMOTION ਲਈ ਲਾਜ਼ਮੀ ਹੋਇਆ ਇਹ ਟੈਸਟ, ਸਿੱਖਿਆ ਵਿਭਾਗ ਨੇ ਜਾਰੀ ਕੀਤੇ ਨਵੇਂ ਹੁਕਮ
ਕੇਂਦਰ ਨੇ 13 ਫਰਵਰੀ ਤੱਕ ਰਿਪੋਰਟ ਦੇਣ ਲਈ ਕਿਹਾ
ਪਤਾ ਲੱਗਾ ਹੈ ਕਿ ਇਸ ਸਬੰਧ ’ਚ ਇਕ ਸ਼ਿਕਾਇਤ ਪ੍ਰਧਾਨ ਮੰਤਰੀ ਦੇ ਨਾਲ-ਨਾਲ ਕੇਂਦਰੀ ਵਿੱਤ ਮੰਤਰੀ, ਖੇਤੀਬਾੜੀ ਮੰਤਰੀ ਅਤੇ ਹੋਰ ਉੱਚ ਅਧਿਕਾਰੀਆਂ ਨੂੰ ਭੇਜੀ ਗਈ ਸੀ। ਇਸ ਤੋਂ ਬਾਅਦ ਕੇਂਦਰ ਦੇ ਮਾਲ ਵਿਭਾਗ, ਵਿੱਤ ਮੰਤਰਾਲਾ ਵੱਲੋਂ ਪੰਜਾਬ ਦੇ ਮੁੱਖ ਸਕੱਤਰ ਨੂੰ ਹੁਕਮ ਭੇਜੇ ਗਏ ਹਨ। ਸੂਬੇ ਦੇ ਖ਼ੁਰਾਕ, ਸਿਵਲ ਸਪਲਾਈ ਅਤੇ ਖ਼ਪਤਕਾਰ ਮਾਮਲਿਆਂ ਬਾਰੇ ਵਿਭਾਗ ਨੇ ਸਾਰੇ ਜ਼ਿਲ੍ਹਿਆਂ ਦੇ ਡੀ. ਐੱਫ. ਐੱਸ. ਸੀ. ਨੂੰ ਅਲਾਟਮੈਂਟ ਕਮੇਟੀਆਂ ਦੀ ਬੈਠਕ ਬੁਲਾ ਕੇ ਜਾਂਚ ਕਰਨ ਅਤੇ 13 ਫਰਵਰੀ ਤੱਕ ਰਿਪੋਰਟ ਭੇਜਣ ਲਈ ਕਿਹਾ ਹੈ। ਉੱਥੇ ਹੀ ਵਿਭਾਗ ਦੇ ਅਧਿਕਾਰੀ ਨੇ ਨਾਮ ਨਾ ਛਾਪਣ ਦੀ ਸ਼ਰਤ ’ਤੇ ਕਿਹਾ ਕਿ ਸ਼ਿਕਾਇਤ ਹੁਣ ਤੱਕ ਪ੍ਰਮਾਣਿਤ ਨਹੀਂ ਹੈ ਅਤੇ ਵਿਭਾਗ ਦੀ ਸਖ਼ਤ ਵਿਵਸਥਾ ਕਾਰਨ ਵੱਡੇ ਪੱਧਰ ’ਤੇ ਫਰਜ਼ੀ ਖ਼ਰੀਦ ਦੀ ਸੰਭਾਵਨਾ ਘੱਟ ਹੈ। ਫਿਰ ਵੀ ਸਾਰੀ ਖ਼ਰੀਦ ਦੀ ਜਾਂਚ ਕਰ ਕੇ ਵਿਸਥਾਰਤ ਰਿਪੋਰਟ ਕੇਂਦਰ ਨੂੰ ਭੇਜੀ ਜਾਵੇਗੀ।
ਇਸ ਲਈ ਖੜ੍ਹੇ ਹੋ ਰਹੇ ਸਵਾਲ
ਦੇਸ਼ ਦੇ ਕਈ ਹਿੱਸਿਆਂ ’ਚ ਇਸ ਵਾਰ ਭਾਰੀ ਮੀਂਹ ਪਿਆ, ਜਿਸ ਦਾ ਅਸਰ ਪੰਜਾਬ ’ਤੇ ਵੀ ਪਿਆ। ਪੰਜਾਬ ਦੇ ਬਹੁਤ ਸਾਰੇ ਇਲਾਕੇ ਪਾਣੀ ’ਚ ਡੁੱਬ ਗਏ, ਜਿਸ ਕਾਰਨ ਪੰਜਾਬ ’ਚ ਖੇਤਾਂ ’ਚ ਲੱਗੇ ਝੋਨੇ ਦੀ ਫ਼ਸਲ ਤਬਾਹ ਹੋਈ। ਕਈ ਥਾਵਾਂ ’ਤੇ ਪਾਣੀ ਜਮ੍ਹਾਂ ਰਿਹਾ, ਜਦੋਂ ਕਿ ਕਈ ਇਲਾਕਿਆਂ ’ਚ ਰੇਤ ਭਰ ਗਈ। ਇਸ ਕਾਰਨ ਪੰਜਾਬ ’ਚ ਝੋਨੇ ਦੀ ਫ਼ਸਲ ਘੱਟ ਹੋਈ ਪਰ ਸਰਕਾਰੀ ਕਿਤਾਬਾਂ ’ਚ ਝੋਨੇ ਦੀ ਫ਼ਸਲ ਦੀ ਆਮਦ ਜਿਸ ਤਰ੍ਹਾਂ ਨਾਲ ਵਿਖਾਈ ਗਈ, ਉਸ ਨਾਲ ਕਈ ਸਵਾਲ ਖੜ੍ਹੇ ਹੋ ਰਹੇ ਹਨ। ਸ਼ਿਕਾਇਤ ’ਚ ਵੀ ਇਸ ਗੱਲ ਦਾ ਜ਼ਿਕਰ ਹੈ ਕਿ ਪਿਛਲੇ ਸਾਲ ਹੜ੍ਹ ਅਤੇ ਵੱਧ ਨਮੀ ਕਾਰਨ ਪੈਦਾਵਾਰ ’ਤੇ ਅਸਰ ਪਿਆ ਸੀ, ਜਿਸ ਦਾ ਫ਼ਾਇਦਾ ਉਠਾ ਕੇ ਇਸ ਤਰ੍ਹਾਂ ਦੇ ਘਪਲਿਆਂ ਨੂੰ ਅੰਜਾਮ ਦਿੱਤਾ ਗਿਆ। ਹੁਣ ਵੇਖਣਾ ਹੋਵੇਗਾ ਕਿ ਜਾਂਚ ’ਚ ਕਿੰਨੀ ਸੱਚਾਈ ਸਾਹਮਣੇ ਆਉਂਦੀ ਹੈ।
ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ
For Android:- https://play.google.com/store/apps/details?id=com.jagbani&hl=en
For IOS:- https://itunes.apple.com/in/app/id538323711?mt=8
ਗੋਲਡਨ ਬਡਸ ਸਕੂਲ ਵਲੋਂ ਖ਼ੂਨਦਾਨ ਕੈਂਪ ਲਗਾਉਣ ਸਬੰਧੀ ਜ਼ਰੂਰੀ ਮੀਟਿੰਗ
NEXT STORY 
