ਲੁਧਿਆਣਾ (ਰਾਜ): ਮੋਤੀ ਨਗਰ ਇਲਾਕੇ ਵਿਚ ਝਪਟਮਾਰਾਂ ਦੇ ਹੌਸਲੇ ਇਸ ਕਦਰ ਵੱਧ ਗਏ ਹਨ ਕਿ ਉਹ ਹੁਣ ਔਰਤਾਂ ਨੂੰ ਲਹੂ-ਲੁਹਾਨ ਕਰਨ ਤੋਂ ਵੀ ਗੁਰੇਜ਼ ਨਹੀਂ ਕਰ ਰਹੇ। ਨਿਊ ਕੀਰਤੀ ਨਗਰ ਵਿਚ ਇਕ ਖ਼ੌਫ਼ਨਾਕ ਵਾਰਦਾਤ ਸਾਹਮਣੇ ਆਈ ਹੈ, ਜਿੱਥੇ ਮੋਬਾਈਲ ਖੋਹ ਕੇ ਭੱਜ ਰਹੇ ਬਾਈਕ ਸਵਾਰ ਲੁਟੇਰਿਆਂ ਨੇ ਇਕ ਔਰਤ ਨੂੰ ਕਰੀਬ 80 ਮੀਟਰ ਤੱਕ ਸੜਕ 'ਤੇ ਘੜੀਸਿਆ ਅਤੇ ਬਾਅਦ ਵਿਚ ਲੱਤ ਮਾਰ ਕੇ ਹੇਠਾਂ ਸੁੱਟ ਦਿੱਤਾ।
ਜਾਣਕਾਰੀ ਮੁਤਾਬਕ, ਪੀੜਤ ਸੁਸ਼ੀਲਾ ਦੁਪਹਿਰ ਵੇਲੇ ਆਪਣੇ ਕਿਰਾਏ ਦੇ ਘਰ ਦੇ ਬਾਹਰ ਬੈਠੀ ਹੋਈ ਸੀ। ਇਸੇ ਦੌਰਾਨ ਇਕ ਬਾਈਕ 'ਤੇ ਸਵਾਰ ਤਿੰਨ ਸ਼ਾਤਰ ਲੁਟੇਰੇ ਉੱਥੇ ਪਹੁੰਚੇ। ਯੋਜਨਾ ਦੇ ਤਹਿਤ ਦੋ ਲੁਟੇਰੇ ਬਾਈਕ ਲੈ ਕੇ ਕੁਝ ਦੂਰੀ 'ਤੇ ਖੜ੍ਹੇ ਹੋ ਗਏ, ਜਦਕਿ ਇਕ ਪੈਦਲ ਸੁਸ਼ੀਲਾ ਕੋਲ ਆਇਆ ਅਤੇ ਝਪਟਾ ਮਾਰ ਕੇ ਉਸ ਦਾ ਮੋਬਾਈਲ ਖੋਹ ਲਿਆ। ਮੋਬਾਈਲ ਖੋਹਣ ਤੋਂ ਬਾਅਦ ਮੁਲਜ਼ਮ ਭੱਜ ਕੇ ਆਪਣੇ ਸਾਥੀਆਂ ਦੀ ਬਾਈਕ 'ਤੇ ਬੈਠ ਗਿਆ।
ਸੁਸ਼ੀਲਾ ਨੇ ਹਾਰ ਨਹੀਂ ਮੰਨੀ ਅਤੇ ਲੁਟੇਰਿਆਂ ਦਾ ਪਿੱਛਾ ਕਰਦੇ ਹੋਏ ਬਾਈਕ 'ਤੇ ਸਵਾਰ ਇਕ ਮੁਲਜ਼ਮ ਨੂੰ ਫੜ ਲਿਆ। ਖ਼ੁਦ ਨੂੰ ਫਸਦਾ ਦੇਖ ਬਾਈਕ ਸਵਾਰ ਬਦਮਾਸ਼ਾਂ ਨੇ ਰਫ਼ਤਾਰ ਵਧਾ ਦਿੱਤੀ, ਜਿਸ ਨਾਲ ਸੁਸ਼ੀਲਾ ਬਾਈਕ ਦੇ ਨਾਲ ਹੀ ਸੜਕ 'ਤੇ ਘੜੀਸਦੀ ਚਲੀ ਗਈ। ਬੇਖੌਫ਼ ਲੁਟੇਰਿਆਂ ਨੇ ਉਸ ਨੂੰ ਰੋਕਣ ਦੀ ਬਜਾਏ ਕਰੀਬ 80 ਮੀਟਰ ਤੱਕ ਘੜੀਸਿਆ ਅਤੇ ਫਿਰ ਉਸ ਨੂੰ ਲੱਤ ਮਾਰ ਕੇ ਹੇਠਾਂ ਸੁੱਟ ਦਿੱਤਾ। ਇਸ ਹਮਲੇ ਵਿਚ ਸੁਸ਼ੀਲਾ ਦੇ ਪੈਰ ਅਤੇ ਸਰੀਰ 'ਤੇ ਗੰਭੀਰ ਸੱਟਾਂ ਆਈਆਂ ਹਨ।
ਪੂਰੀ ਵਾਰਦਾਤ ਉੱਥੇ ਲੱਗੇ ਸੀ.ਸੀ.ਟੀ.ਵੀ. ਕੈਮਰਿਆਂ ਵਿਚ ਕੈਦ ਹੋ ਗਈ ਹੈ, ਜਿਸ ਦੀ ਫੁਟੇਜ ਹੁਣ ਸੋਸ਼ਲ ਮੀਡੀਆ 'ਤੇ ਵਾਇਰਲ ਹੋ ਰਹੀ ਹੈ। ਘਟਨਾ ਤੋਂ ਬਾਅਦ ਇਕੱਠੇ ਹੋਏ ਇਲਾਕੇ ਦੇ ਲੋਕਾਂ ਨੇ ਪੁਲਸ ਪ੍ਰਸ਼ਾਸਨ ਦੇ ਖ਼ਿਲਾਫ਼ ਜੰਮ ਕੇ ਨਾਅਰੇਬਾਜ਼ੀ ਕੀਤੀ। ਸਥਾਨਕ ਨਿਵਾਸੀਆਂ ਦਾ ਦੋਸ਼ ਹੈ ਕਿ ਨਿਊ ਕੀਰਤੀ ਨਗਰ ਅਤੇ ਮੋਤੀ ਨਗਰ ਇਲਾਕੇ ਵਿਚ ਆਏ ਦਿਨ ਲੁੱਟ ਦੀਆਂ ਵਾਰਦਾਤਾਂ ਹੋ ਰਹੀਆਂ ਹਨ, ਪਰ ਪੁਲਸ ਹੱਥ 'ਤੇ ਹੱਥ ਧਰ ਕੇ ਬੈਠੀ ਹੈ। ਲੋਕਾਂ ਨੇ ਚੇਤਾਵਨੀ ਦਿੱਤੀ ਹੈ ਕਿ ਜੇਕਰ ਜਲਦੀ ਹੀ ਲੁਟੇਰਿਆਂ ਨੂੰ ਗ੍ਰਿਫ਼ਤਾਰ ਨਹੀਂ ਕੀਤਾ ਗਿਆ ਤਾਂ ਉਹ ਤਿੱਖਾ ਸੰਘਰਸ਼ ਕਰਨਗੇ। ਫਿਲਹਾਲ ਥਾਣਾ ਮੋਤੀ ਨਗਰ ਦੀ ਪੁਲਸ ਸੀ.ਸੀ.ਟੀ.ਵੀ. ਫੁਟੇਜ ਦੇ ਆਧਾਰ 'ਤੇ ਬਦਮਾਸ਼ਾਂ ਦੀ ਪਛਾਣ ਕਰਨ ਵਿਚ ਜੁਟੀ ਹੈ।
ਪਨੀਰ ਮਾਫ਼ੀਆ 'ਤੇ ਸ਼ਿਕੰਜਾ: ਕਈ ਡੇਅਰੀਆਂ 'ਤੇ ਛਾਪਾ, ਫੂਡ ਸੇਫ਼ਟੀ ਵਿਭਾਗ ਨੇ ਭਰੇ 10 ਸੈਂਪਲ
NEXT STORY 
