ਸੁਲਤਾਨਪੁਰ ਲੋਧੀ (ਸੋਢੀ) : ਇੱਥੋਂ 6 ਕਿਲੋਮੀਟਰ ਦੂਰ ਪੈਂਦੇ ਇਤਿਹਾਸਕ ਪਿੰਡ ਡੱਲਾ 'ਚ 26 ਜੂਨ ਦੀ ਰਾਤ ਨੂੰ 15 ਸਾਲਾ ਨਾਬਾਲਗ ਕੁੜੀ ਅਮਨਜੋਤ ਕੌਰ ਦੀ ਭੇਦਭਰੇ ਢੰਗ ਨਾਲ ਹੋਈ ਮੌਤ ਦੇ ਮਾਮਲੇ ਚ ਸਨਸਨੀਖੇਜ ਖੁਲਾਸਾ ਹੋਇਆ ਹੈ। ਅਮਨਜੋਤ ਕੌਰ ਦੇ ਕਤਲ ਕੇਸ 'ਚ ਉਸਦੇ ਸਕੇ ਪਿਤਾ ਸਰੂਪ ਸਿੰਘ ਨਿਵਾਸੀ ਡੱਲਾ ਅਤੇ ਮਤਰੇਈ ਮਾਂ ਮਨਦੀਪ ਕੌਰ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ ਹੈ। ਜ਼ਿਲ੍ਹਾ ਕਪੂਰਥਲਾ ਦੇ ਪੁਲਸ ਮੁਖੀ ਸਤਿੰਦਰ ਸਿੰਘ ਅਤੇ ਸੁਲਤਾਨਪੁਰ ਲੋਧੀ ਦੇ ਡੀ. ਐੱਸ. ਪੀ. ਸਰਵਣ ਸਿੰਘ ਬੱਲ ਦੇ ਆਦੇਸ਼ਾਂ ਅਨੁਸਾਰ ਥਾਣਾ ਸੁਲਤਾਨਪੁਰ ਲੋਧੀ ਦੇ ਮੁਖੀ ਇੰਜੀਨੀਅਰ ਸਰਬਜੀਤ ਸਿੰਘ ਵਲੋਂ ਬਾਰੀਕੀ ਨਾਲ ਕੀਤੀ ਗਈ ਜਾਂਚ ਤੋਂ ਬਾਅਦ ਇਸ ਕਤਲ ਕੇਸ ਤੋਂ ਪਰਦਾ ਉਠਾਇਆ ਗਿਆ ਹੈ।
ਇਹ ਵੀ ਪੜ੍ਹੋ : ਅਕਾਲੀ ਨੇਤਾ ਤੇ ਉਸ ਦੀ ਪਤਨੀ ਵਲੋਂ ਖ਼ੁਦਕੁਸ਼ੀ ਕਰਨ ਤੋਂ ਬਾਅਦ ਪਿਤਾ ਦੀ ਵੀ ਮੌਤ
ਥਾਣਾ ਸੁਲਤਾਨਪੁਰ ਲੋਧੀ ਵਿਖੇ ਪ੍ਰੈਸ ਕਾਨਫਰੰਸ ਦੌਰਾਨ ਇੰਸਪੈਕਟਰ ਸਰਬਜੀਤ ਸਿੰਘ ਨੇ ਦੱਸਿਆ ਕਿ ਇਸ ਮਾਮਲੇ 'ਚ ਮ੍ਰਿਤਕ ਲੜਕੀ ਅਮਨਜੋਤ ਕੌਰ ਦੇ ਮਾਮੇ ਗੁਰਬਾਜ ਸਿੰਘ ਨਿਵਾਸੀ ਪਿੰਡ ਡੱਲਾ ਦੇ ਬਿਆਨਾਂ 'ਤੇ ਧਾਰਾ 302, 328, 203, 34 ਆਈ. ਪੀ. ਸੀ. ਅਧੀਨ ਲੜਕੀ ਦੇ ਪਿਤਾ ਸਰੂਪ ਸਿੰਘ, ਮਤਰੇਈ ਮਾਂ ਮਨਦੀਪ ਕੌਰ ਅਤੇ ਸਰੂਪ ਸਿੰਘ ਦੀ ਸਾਲੇਹਾਰ ਅਮਨਦੀਪ ਕੌਰ ਪਤਨੀ ਜਸਵਿੰਦਰ ਸਿੰਘ ਨਿਵਾਸੀ ਪਿੰਡ ਅਮਰਜੀਤ ਪੁਰ ਖ਼ਿਲਾਫ਼ ਕੇਸ ਦਰਜ ਕੀਤਾ ਗਿਆ ਹੈ ਅਤੇ ਪਤੀ-ਪਤਨੀ ਸਰੂਪ ਸਿੰਘ ਅਤੇ ਮਨਦੀਪ ਕੌਰ ਨੂੰ ਗ੍ਰਿਫ਼ਤਾਰ ਕਰ ਲਿਆ ਹੈ । ਉਨ੍ਹਾਂ ਦੱਸਿਆ ਕਿ ਉਕਤ ਦੋਹਾਂ ਨੂੰ ਅਦਾਲਤ 'ਚ ਪੇਸ਼ ਕਰਕੇ ਪੁਲਸ ਰਿਮਾਂਡ ਲਿਆ ਗਿਆ ਹੈ ਜਿਨ੍ਹਾਂ ਕੋਲੋ ਹੋਰ ਪੁੱਛਗਿੱਛ ਕੀਤੀ ਜਾਵੇਗੀ ਅਤੇ ਇਸ ਕਤਲ ਕੇਸ 'ਚ ਜੇਕਰ ਕੋਈ ਹੋਰ ਵੀ ਸ਼ਾਮਲ ਹੋਇਆ ਤਾਂ ਉਹ ਵੀ ਬਖ਼ਸ਼ਿਆ ਨਹੀਂ ਜਾਵੇਗਾ।
ਇਹ ਵੀ ਪੜ੍ਹੋ : ਪੰਜਾਬ 'ਚ ਪ੍ਰਵੇਸ਼ ਕਰਨ ਜਾਂ ਲੰਘਣ ਵਾਲੇ ਯਾਤਰੀ ਇਸ ਤਰ੍ਹਾਂ ਕਰ ਸਕਦੇ ਹਨ ਈ-ਰਜਿਸਟ੍ਰੇਸ਼ਨ
ਪਹਿਲਾਂ ਦਵਾਈ ਦਿੱਤੀ ਤੇ ਫਿਰ ਸਾਹ ਬੰਦ ਕਰਕੇ ਕੀਤੀ ਹੱਤਿਆ
ਇੰਸਪੈਕਟਰ ਸਰਬਜੀਤ ਸਿੰਘ ਨੇ ਦੱਸਿਆ ਕਿ ਇਸ ਮਾਮਲੇ ਸਬੰਧੀ ਪਹਿਲਾਂ ਕੁੜੀ ਦੇ ਪਿਤਾ ਸਰੂਪ ਸਿੰਘ ਨੇ ਪੁਲਸ ਨੂੰ ਦੱਸਿਆ ਸੀ ਕਿ ਉਸਦੀ ਕੁੜੀ ਦੀ ਮੌਤ ਕਰੰਟ ਲੱਗਣ ਨਾਲ ਹੋਈ ਹੈ। ਪੁਲਸ ਵਲੋਂ ਧਾਰਾ 174 ਦੀ ਕਾਰਵਾਈ ਕਰਦੇ ਹੋਏ ਅਮਨਜੋਤ ਕੌਰ ਦੀ ਲਾਸ਼ ਦਾ ਪੋਸਟ ਮਾਰਟਮ ਕਰਵਾਇਆ ਗਿਆ ਸੀ। ਉਸ ਉਪਰੰਤ ਮ੍ਰਿਤਕ ਕੁੜੀ ਦੇ ਮਾਮੇ ਗੁਰਬਾਜ ਸਿੰਘ ਜੋ ਕਿ ਸਰੂਪ ਸਿੰਘ ਦੇ ਨੇੜੇ ਹੀ ਪਿੰਡ ਡੱਲਾ 'ਚ ਰਹਿੰਦਾ ਹੈ, ਨੇ ਪੁਲਸ ਨੂੰ ਆਪਣੇ ਬਿਆਨ 'ਚ ਦੱਸਿਆ ਕਿ ਉਹ 26 ਜੂਨ ਦੀ ਰਾਤ ਨੂੰ ਘਰ ਦੇ ਮੁਹਰੇ ਦੀ ਲੰਘ ਰਿਹਾ ਸੀ ਤਾਂ ਉਸ ਦੀ ਭਾਣਜੀ ਦਾ ਕਤਲ ਕਰਦੇ ਉਸ ਨੇ ਖੁਦ ਸਰੂਪ ਸਿੰਘ ਤੇ ਉਸਦੀ ਦੂਜੀ ਪਤਨੀ ਨੂੰ ਦੇਖਿਆ ਸੀ। ਇੰਸਪੈਕਟਰ ਸਰਬਜੀਤ ਸਿੰਘ ਨੇ ਦੱਸਿਆ ਕਿ ਪੁਲਸ ਜਾਂਚ 'ਚ ਇਹ ਗੱਲ ਸਾਹਮਣੇ ਆਈ ਹੈ ਕਿ ਮ੍ਰਿਤਕ ਕੁੜੀ ਅਮਨਜੋਤ ਕੌਰ ਦੀ ਸਕੀ ਮਾਂ ਦੀ ਮੌਤ ਹੋ ਚੁੱਕੀ ਹੈ ਅਤੇ ਉਸਦੇ ਪਿਤਾ ਸਰੂਪ ਸਿੰਘ ਨੇ ਦੂਜਾ ਵਿਆਹ ਮਨਦੀਪ ਕੌਰ ਨਾਲ ਕਰਵਾ ਲਿਆ। ਜਿਸ ਕਾਰਨ ਸਾਜਿਸ਼ ਅਧੀਨ ਉਸਦੇ ਸਕੇ ਪਿਤਾ ਅਤੇ ਮਤਰੇਈ ਮਾਂ ਨੇ ਹੀ ਮਿਲ ਕੇ ਪਹਿਲਾਂ ਅਮਨਜੋਤ ਕੌਰ ਨੂੰ ਕੋਈ ਜ਼ਹਿਰੀਲੀ ਦਵਾਈ ਖੁਆਈ ਅਤੇ ਬਾਅਦ 'ਚ ਸਾਹ ਬੰਦ ਕਰਕੇ ਕਤਲ ਕਰ ਦਿੱਤਾ।
ਅਕਾਲੀ ਆਗੂ ਤੇ ਉਸ ਦੀ ਪਤਨੀ ਵਲੋਂ ਖ਼ੁਦਕੁਸ਼ੀ ਕਰਨ ਤੋਂ ਬਾਅਦ ਪਿਤਾ ਦੀ ਵੀ ਮੌਤ
NEXT STORY 
