ਸ੍ਰੀ ਮੁਕਤਸਰ ਸਾਹਿਬ (ਪਵਨ ਤਨੇਜਾ, ਤਰਸੇਮ ਢੁੱਡੀ) : ਭਾਰਤੀ ਜਨਤਾ ਪਾਰਟੀ ਦੀ ਪੰਜਾਬ ਕਾਰਜਕਾਰਨੀ ਦੇ ਮੈਂਬਰ ਸੁਭਾਸ਼ ਭਟੇਜਾ ਨੇ ਮੰਗਲਵਾਰ ਨੂੰ ਜ਼ਹਿਰੀਲੀ ਦਵਾਈ ਖਾ ਕੇ ਆਤਮਹੱਤਿਆ ਕਰ ਲਈ। ਨਿਧੜਕ ਆਗੂ ਵਜੋਂ ਜਾਣੇ ਜਾਂਦੇ ਸੁਭਾਸ਼ ਭਟੇਜਾ ਦੀ ਖੁਦਕਸ਼ੀ ਤੋਂ ਬਾਅਦ ਸ਼ਹਿਰ ਵਿਚ ਸੋਗ ਦੀ ਲਹਿਰ ਦੌੜ ਗਈ। ਵਰਨਣਯੋਗ ਹੈ ਕਿ ਸੁਭਾਸ਼ ਭਟੇਜਾ 1992 ਤੋਂ 1999 ਤੱਕ ਭਾਜਪਾ ਦੇ ਜ਼ਿਲਾ ਪ੍ਰਧਾਨ ਰਹੇ ਅਤੇ 2008 ਤੋਂ 2011 ਤੱਕ ਪੰਜਾਬ ਭਾਜਪਾ ਦੇ ਸਕੱਤਰ ਰਹੇ ਹਨ। ਪੁਲਸ ਨੂੰ ਦਿੱਤੇ ਬਿਆਨਾਂ ਵਿਚ ਸੁਭਾਸ਼ ਭਟੇਜਾ ਦੇ ਬੇਟੇ ਨਿਤਿਨ ਭਟੇਜਾ ਨੇ ਦੱਸਿਆ ਕਿ ਖੁਦਕੁਸ਼ੀ ਕਰਨ ਤੋਂ ਪਹਿਲਾ ਜੋ ਆਤਮਹੱਤਿਆ ਨੋਟ ਜੋ ਕਿ ਸੁਭਾਸ਼ ਭਟੇਜਾ ਦੇ ਆਪਣੇ ਹੱਥ ਦਾ ਲਿਖਿਆ ਹੋਇਆ ਮਿਲਿਆ। ਜਿਸ ਵਿਚ ਲਿਖਿਆ ਕਿ ਉਹ ਇਕ ਇੰਡਸਟੀਰੀਅਲ ਟਰੇਨਿੰਗ ਇੰਸਟੀਚਿਊਟ ਚਲਾ ਰਿਹਾ ਹੈ ਅਤੇ ਇੰਸਟੀਚਿਊਟ ਵਿਚ ਕਾਲਜ ਦੀ ਅਧਿਆਪਕਾ ਸ਼ਮਿੰਦਰ ਕੌਰ ਜਿਸ ਨੇ ਕਿ ਕਾਲਜ ਦੀਆਂ ਫੀਸਾਂ ਵਿਚ ਗਬਨ ਕੀਤਾ ਸੀ ਨੂੰ ਕਾਲਜ ਵਿਚੋਂ ਹਟਾ ਦਿੱਤਾ ਗਿਆ ਸੀ ਪਰ ਇਸ ਅਧਿਆਪਕਾ ਨੇ ਆਪਣੇ ਪਤੀ ਰਪਿੰਦਰ ਸਿੰਘ ਅਤੇ ਸਹੁਰੇ ਜੰਗੀਰ ਸਿੰਘ ਨਾਲ ਗੱਲਬਾਤ ਕਰਕੇ ਉਸ ਤੇ 1 ਲੱਖ 92 ਹਜ਼ਾਰ ਰੁਪਏ ਤਨਖਾਹ ਨਾ ਦੇਣ ਅਤੇ ਮੁੰਡੇ ਦੀ ਨੌਕਰੀ ਲਈ ਪੈਸੇ ਦੀ ਠੱਗੀ ਮਾਰਨ ਦੇ ਦੋਸ਼ ਲਾਏ ਸਨ, ਜਿਸ ਤਹਿਤ ਉਸਨੂੰ ਅੱਜ ਸਥਾਨਕ ਦਾਣਾ ਮੰਡੀ ਸਥਿਤ ਐਂਟੀ ਫਰਾਂਡ ਵਿੰਗ ਵਿਖੇ ਪੇਸ਼ੀ ਲਈ ਬੁਲਾਇਆ ਗਿਆ ਸੀ।
ਇਸ ਤੋਂ ਇਲਾਵਾ ਰਵੀ ਭਟੇਜਾ ਉਸਦੇ 16 ਲੱਖ ਰੁਪਏ ਅਤੇ ਡਾਲੀ ਖੇੜਾ ਉਸਦੇ 15 ਲੱਖ ਰੁਪਏ ਵਾਪਿਸ ਨਹੀਂ ਸੀ ਕਰ ਰਿਹਾ, ਉਕਤ 5 ਲੋਕਾਂ ਕਰਕੇ ਉਹ ਪ੍ਰੇਸ਼ਾਨੀ ਵਿਚ ਚੱਲ ਰਿਹਾ ਹੈ ਅਤੇ ਇਸੇ ਪ੍ਰੇਸ਼ਾਨੀ ਕਾਰਨ ਉਹ ਆਤਮਹੱਤਿਆ ਕਰਨ ਲਈ ਮਜਬੂਰ ਹੈ। ਇਹ ਆਤਮਹੱਤਿਆ ਨੋਟ ਲਿਖਣ ਤੋਂ ਬਾਅਦ ਸੁਭਾਸ਼ ਭਟੇਜਾ ਨੇ ਘਰ ਵਿਚ ਹੀ ਸਲਫਾਸ ਦੀਆਂ ਗੋਲੀਆਂ ਖਾ ਕੇ ਆਤਮਹੱਤਿਆ ਕਰ ਲਈ, ਜਦ ਉਸਨੂੰ ਪਰਿਵਾਰਕ ਮੈਂਬਰ ਹਸਪਤਾਲ ਲਿਜਾ ਰਹੇ ਸਨ ਤਾ ਰਸਤੇ ਵਿਚ ਉਸਨੇ ਆਤਮਹੱਤਿਆ ਨੋਟ ਬਾਰੇ ਦੱਸਿਆ। ਹਸਪਤਾਲ ਵਿਚ ਕੁਝ ਸਮੇਂ ਬਾਅਦ ਹੀ ਸੁਭਾਸ਼ ਭਟੇਜਾ ਦੀ ਮੌਤ ਹੋ ਗਈ। ਪੁਲਸ ਨੇ ਆਤਮਹੱਤਿਆ ਨੋਟ ਦੇ ਆਧਾਰ ਤੇ ਸੁਭਾਸ਼ ਭਟੇਜਾ ਦੇ ਪੁੱਤਰ ਨਿਤਿਨ ਭਟੇਜਾ ਦੇ ਬਿਆਨਾਂ ਤਹਿਤ ਉਕਤ ਪੰਜਾਂ ਤੇ ਧਾਰਾ 306/34 ਆਈ.ਪੀ.ਸੀ. ਅਧੀਨ ਮਾਮਲਾ ਦਰਜ਼ ਕਰਕੇ ਅਗਲੇਰੀ ਕਾਰਵਾਈ ਸ਼ੁਰੂ ਕਰ ਦਿੱਤੀ ਹੈ।
ਕਿਸਾਨਾਂ ਦੀ ਖੁਦਕੁਸ਼ੀ ਦੇ ਮਾਮਲਿਆਂ 'ਚ ਆੜ੍ਹਤੀਆਂ 'ਤੇ ਬਿਨਾ ਵਜ੍ਹਾ ਧਾਰਾ 306 ਨਾ ਲਗਾਈ ਜਾਵੇ: ਵਿਜੇ ਕਾਲੜਾ
NEXT STORY 
