ਰੂਪਨਗਰ, (ਕੈਲਾਸ਼)- ਸ਼ਹਿਰ ਦੇ ਵੱਖ-ਵੱਖ ਸਥਾਨਾਂ, ਬਾਜ਼ਾਰਾਂ ਅਤੇ ਮੁਹੱਲਿਆਂ 'ਚ ਕਥਿਤ ਤੌਰ 'ਤੇ ਮਾਨਸਿਕ ਰੋਗੀ ਦੁਆਰਾ ਹੁੜਦੰਗ ਮਚਾਉਣ, ਲੋਕਾਂ ਨੂੰ ਤੰਗ ਪ੍ਰੇਸ਼ਾਨ ਕਰਨ, ਮਹਿਲਾਵਾਂ ਨਾਲ ਗਲਤ ਵਿਵਹਾਰ ਅਤੇ ਤੋੜ-ਭੰਨ ਕਰਨ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਭਾਵੇਂ ਲੋਕਾਂ ਨੇ ਉਕਤ ਸਬੰਧੀ ਸੂਚਨਾ ਪੁਲਸ ਨੂੰ ਦਿੱਤੀ ਪਰ ਉਸ ਦੇ ਬਾਵਜੂਦ ਲੋਕਾਂ ਦਾ ਦੋਸ਼ ਹੈ ਕਿ ਪੁਲਸ ਨੇ ਪਹੁੰਚਣ 'ਚ ਪੌਣੇ ਤਿੰਨ ਘੰਟੇ ਲਾ ਦਿੱਤੇ। ਜਿਸ ਕਾਰਨ ਉਨ੍ਹਾਂ ਨੂੰ ਹੋਰ ਪ੍ਰੇਸ਼ਾਨੀਆਂ ਦਾ ਸਾਹਮਣਾ ਕਰਨਾ ਪਿਆ। ਇਸ ਸਬੰਧੀ ਜਾਣਕਾਰੀ ਦਿੰਦੇ ਹੋਏ ਸਮਾਜ ਸੇਵੀ ਗੁਰਵਿੰਦਰ ਸਿੰਘ ਜੱਗੀ ਅਤੇ ਫੂਲ ਚੱਕਰ ਦੇ ਦੁਕਾਨਦਾਰ ਸ਼ਸ਼ੀ ਜੈਨ, ਧੀਰਜ ਕੱਕੜ, ਰਾਜੂ ਦੁੱਗਲ, ਹੈਪੀ ਦੁੱਗਲ, ਅਨਿਲ ਜੈਨ, ਮੋਂਟੂ, ਰਾਜੀਵ, ਰਾਕੇਸ਼ ਵੋਹਰਾ, ਪਾਲ ਚੰਦ ਸ਼ਰਮਾ ਅਤੇ ਅੰਮ੍ਰਿਤਪਾਲ ਦੁੱਗਲ ਆਦਿ ਨੇ ਦੱਸਿਆ ਕਿ ਪਿਛਲੇ ਦੋ ਦਿਨਾਂ ਤੋਂ ਇਕ ਵਿਅਕਤੀ ਜੋ ਕਥਿਤ ਤੌਰ 'ਤੇ ਮਾਨਸਿਕ ਰੋਗੀ ਹੈ, ਲੋਕਾਂ ਨੂੰ ਪ੍ਰੇਸ਼ਾਨ ਕਰ ਰਿਹਾ ਸੀ। ਉਸ ਨੇ ਫੂਲ ਚੱਕਰ ਬਾਜ਼ਾਰ ਦੇ ਦੁਕਾਨਦਾਰਾਂ ਦੇ ਇਲਾਵਾ ਕਲਿਆਣ ਸਿਨੇਮਾ ਅਤੇ ਭਾਈ ਲਾਲੋ ਮਾਰਕੀਟ 'ਚ ਆਉਂਦੇ-ਜਾਂਦੇ ਵਿਅਕਤੀਆਂ ਨੂੰ ਬਿਨਾਂ ਵਜ੍ਹਾ ਕਦੇ ਲਾਠੀਆਂ ਅਤੇ ਕਦੇ ਰਾਡ ਆਦਿ ਨਾਲ ਕੁੱਟਣਾ ਸ਼ੁਰੂ ਕਰ ਦਿੱਤਾ। ਵਾਹਨਾਂ ਨੂੰ ਵੀ ਨੁਕਸਾਨ ਪਹੁੰਚਾਇਆ ਅਤੇ ਦੁਕਾਨਦਾਰਾਂ ਨੂੰ ਵੀ ਬੁਰੀ ਤਰ੍ਹਾਂ ਪ੍ਰੇਸ਼ਾਨ ਕੀਤਾ। ਜੱਗੀ ਨੇ ਦੱਸਿਆ ਕਿ ਉਨ੍ਹਾਂ ਸਬੰਧਤ ਵਿਅਕਤੀ ਦੇ ਮਾਪਿਆਂ ਨੂੰ ਵੀ ਇਸ ਦੀ ਸੂਚਨਾ ਦਿੱਤੀ ਪਰ ਉਹ ਵੀ ਉਸ ਨੂੰ ਕਾਬੂ ਕਰਨ 'ਚ ਅਸਫਲ ਰਹੇ। ਬੀਤੇ ਦਿਨੀਂ ਉਸ ਨੇ ਇਕ ਬਜ਼ੁਰਗ ਮਹਿਲਾ ਜੋ ਮੰਦਰ ਨੂੰ ਜਾ ਰਹੀ ਸੀ ਕਿ ਉਸ ਦੀ ਧੋਣ 'ਤੇ ਚਾਕੂ ਰੱਖ ਕੇ ਉਸ ਦੇ ਰੁਪਏ ਖੋਹ ਲਏ। ਲੋਕਾਂ ਨੂੰ ਤੰਗ ਪ੍ਰੇਸ਼ਾਨ ਕਰਨ ਦੇ ਮਾਮਲੇ ਨੂੰ ਲੈ ਕੇ ਪੁਲਸ ਨੇ ਪਹਿਲਾਂ ਵੀ ਉਸ ਖਿਲਾਫ ਕਾਰਵਾਈ ਕੀਤੀ। ਉਸ ਦੇ ਬਾਵਜੂਦ ਵੀ ਨਾ ਤਾਂ ਉਸ 'ਚ ਕੋਈ ਸੁਧਾਰ ਆਇਆ ਅਤੇ ਨਾ ਉਸ ਦੇ ਮਾਪਿਆਂ ਨੇ ਇਸ ਦਾ ਇਲਾਜ ਕਰਵਾਉਣਾ ਠੀਕ ਸਮਝਿਆ।
ਕਰੀਬ ਪੌਣੇ ਤਿੰਨ ਘੰਟੇ ਬਾਅਦ ਪੁੱਜੀ ਪੁਲਸ
ਉਕਤ ਮਾਮਲੇ ਦੀ ਗੰਭੀਰਤਾ ਨੂੰ ਦੇਖਦੇ ਹੋਏ ਗੁਰਵਿੰਦਰ ਸਿੰਘ ਜੱਗੀ ਨੇ ਥਾਣਾ ਸਿਟੀ ਦੇ ਐੱਸ.ਐੱਚ.ਓ. ਨੂੰ ਦੁਪਹਿਰ 2 ਵਜੇ ਫੋਨ ਕੀਤਾ ਪਰ ਜਦੋਂ ਸਾਢੇ ਤਿੰਨ ਵਜੇ ਤਕ ਕੋਈ ਪੁਲਸ ਕਰਮਚਾਰੀ ਨਹੀਂ ਪੁੱਜਾ ਤਾਂ ਉਨ੍ਹਾਂ ਡੀ.ਐੱਸ.ਪੀ. ਨੂੰ ਸੂਚਿਤ ਕੀਤਾ ਪਰ ਪੌਣੇ ਤਿੰਨ ਘੰਟੇ ਤੱਕ ਪੁਲਸ ਮੁਲਾਜ਼ਮ ਮੌਕੇ 'ਤੇ ਨਾ ਪੁੱਜੇ। ਇਸ ਦੇ ਬਾਅਦ ਉਨ੍ਹਾਂ ਦੁਬਾਰਾ ਡੀ.ਐੱਸ.ਪੀ. ਨੂੰ ਮਾਮਲੇ ਦੀ ਗੰਭੀਰਤਾ ਦੱਸੀ ਕਿ ਉਕਤ ਵਿਅਕਤੀ ਕੋਈ ਵੀ ਵੱਡਾ ਨੁਕਸਾਨ ਕਰ ਸਕਦਾ ਹੈ। ਜਿਸ ਤੋਂ ਬਾਅਦ ਸ਼ਾਮ 5 ਵਜੇ ਦੇ ਕਰੀਬ ਪੁਲਸ ਮੁਲਾਜ਼ਮ ਉੱਥੇ ਪਹੁੰਚੇ ਅਤੇ ਮਾਨਸਿਕ ਰੋਗੀ ਨੂੰ ਕਾਬੂ ਕੀਤਾ। ਪੁਲਸ ਪ੍ਰਸ਼ਾਸਨ ਦੀ ਉਕਤ ਕਾਰਵਾਈ ਅਤੇ ਦੇਰੀ ਨਾਲ ਪਹੁੰਚਣ ਨੂੰ ਲੈ ਕੇ ਦੁਕਾਨਦਾਰਾਂ ਨੇ ਭਾਰੀ ਰੋਸ ਜਤਾਇਆ।
ਕੀ ਕਹਿੰਦੇ ਨੇ ਥਾਣਾ ਮੁਖੀ
ਇਸ ਸਬੰਧ 'ਚ ਜਦੋਂ ਐੱਸ.ਐੱਚ.ਓ. ਸਿਟੀ ਮਹੇਸ਼ ਸੈਣੀ ਨਾਲ ਗੱਲ ਕੀਤੀ ਗਈ ਤਾਂ ਉਨ੍ਹਾਂ ਦੱਸਿਆ ਕਿ ਜਦੋਂ 2 ਵਜੇ ਉਨ੍ਹਾਂ ਨੂੰ ਉਕਤ ਸੂਚਨਾ ਮਿਲੀ ਤਾਂ ਉਨ੍ਹਾਂ ਤੁਰੰਤ ਪੁਲਸ ਕਰਮੀਆਂ ਨੂੰ ਸਬੰਧਤ ਮਾਨਸਿਕ ਰੋਗੀ ਨੂੰ ਕਾਬੂ ਕਰਨ ਲਈ ਭੇਜ ਦਿੱਤਾ ਸੀ ਪਰ ਉਨ੍ਹਾਂ ਨੂੰ ਉਕਤ ਰੋਗੀ ਨਹੀਂ ਮਿਲਿਆ। ਜਿਸ ਦੇ ਬਾਅਦ ਪੁਲਸ ਕਰਮੀ ਵਾਪਸ ਮੁੜ ਆਏ। ਇਸ ਦੇ ਬਾਅਦ ਡੀ.ਐੱਸ.ਪੀ. ਸਾਹਿਬ ਨੂੰ ਦੁਕਾਨਦਾਰਾਂ ਨੇ ਜੋ ਸੂਚਨਾ ਦਿੱਤੀ ਸੀ, ਡੀ.ਐੱਸ.ਪੀ. ਸਾਹਿਬ ਦੇ ਹੁਕਮਾਂ 'ਤੇ ਦੁਬਾਰਾ ਪੁਲਸ ਨੂੰ ਭੇਜਿਆ, ਫਿਰ ਵੀ ਉਕਤ ਮਾਨਸਿਕ ਰੋਗੀ ਦਾ ਕੋਈ ਪਤਾ ਨਹੀਂ ਲੱਗਾ ਪਰ ਤੀਸਰੀ ਵਾਰ ਪੁਲਸ ਮੁਲਾਜ਼ਮਾਂ ਨੂੰ ਮੌਕੇ 'ਤੇ ਭੇਜਿਆ ਗਿਆ ਅਤੇ ਸਬੰਧਤ ਵਿਅਕਤੀ ਨੂੰ ਕਾਬੂ ਕਰ ਲਿਆ ਗਿਆ। ਸਿਟੀ ਥਾਣਾ ਮੁਖੀ ਨੇ ਕਿਹਾ ਕਿ ਮਾਮਲੇ ਦੀ ਜਾਂਚ ਕੀਤੀ ਜਾਵੇਗੀ ਅਤੇ ਛਾਣਬੀਣ ਦੇ ਬਾਅਦ ਹੀ ਅਗਲੀ ਕਾਰਵਾਈ ਅਮਲ 'ਚ ਲਿਆਂਦੀ ਜਾਵੇਗੀ। ਇਸ ਦੇ ਨਾਲ ਹੀ ਉਨ੍ਹਾਂ ਭਰੋਸਾ ਦਿੱਤਾ ਕਿ ਪੁਲਸ ਲੋਕਾਂ ਦੀ ਸੁਰੱਖਿਆ ਲਈ ਹੈ ਪਰ ਸਹੀ ਸੂਚਨਾ ਨਾ ਮਿਲਣ ਕਾਰਨ ਪੁਲਸ ਖਾਲੀ ਹੱਥ ਵਾਪਸ ਆਉਂਦੀ ਰਹੀ।
ਮੱਖੂ 'ਚ ਭੂਤਰੇ ਬਾਂਦਰ ਦੀ ਦਹਿਸ਼ਤ, ਕਈਆਂ ਨੂੰ ਵੱਢਿਆ
NEXT STORY 
