ਸਪੋਰਟਸ ਡੈਸਕ- ਭਾਰਤ ਤੇ ਇੰਗਲੈਂਡ ਦਰਮਿਆਨ 5 ਟੀ20 ਮੈਚਾਂ ਦੀ ਸੀਰੀਜ਼ ਦਾ ਪਹਿਲਾ ਮੈਚ ਅੱਜ ਇੰਗਲੈਂਡ ਦੇ ਚੈਸਟਰ-ਲੀ ਸਟ੍ਰੀਟ ਦੇ ਰਿਵਰਸਾਈਡ ਗਰਾਊਂਡ ਵਿਖੇ ਖੇਡਿਆ ਜਾਵੇਗਾ। ਵੈਭਵ ਸੂਰਯਵੰਸ਼ੀ ਦਾ ਚਿਰਾਂ ਤੋਂ ਉਡੀਕਿਆ ਜਾ ਰਿਹਾ ਡੈਬਿਊ ਅਤੇ ਮੁਸ਼ਕਿਲ ਵਿਕਟਾਂ ’ਤੇ ਬੱਲੇਬਾਜ਼ੀ ਦੀਆਂ ਕਮਜ਼ੋਰੀਆਂ ਇੰਗਲੈਂਡ ਖਿਲਾਫ 5 ਮੈਚਾਂ ਦੀ ਟੀ-20 ਕੌਮਾਂਤਰੀ ਲੜੀ ’ਚ ਭਾਰਤ ਲਈ ਚਰਚਾ ਦਾ ਮੁੱਖ ਵਿਸ਼ਾ ਰਹਿਣਗੇ। ਭਾਰਤ ਦੇ ਸਹਾਇਕ ਕੋਚ ਰਿਆਨ ਟੇਨ ਡੋਏਸ਼ੇ ਨੇ ਕਿਹਾ ਹੈ ਕਿ ਸੂਰਯਵੰਸ਼ੀ ਨੂੰ ਵੀ ਕਿਸੇ ਹੋਰ ਕ੍ਰਿਕਟਰ ਦੀ ਤਰ੍ਹਾਂ ਇਲੈਵਨ ’ਚ ਜਗ੍ਹਾ ਹਾਸਲ ਕਰਨ ਲਈ ‘ਪ੍ਰਕਿਰਿਆ ’ਚੋਂ ਲੰਘਣਾ ਪਵੇਗਾ ਅਤੇ ਸਹੀ ਸਮੇਂ ਦਾ ਇੰਤਜ਼ਾਰ ਕਰਨਾ ਪਵੇਗਾ’। ਨਾਲ ਹੀ ਉਸ ਨੇ ਇਹ ਕਹਿਣ ’ਚ ਕੋਈ ਝਿਜਕ ਨਹੀਂ ਦਿਖਾਈ ਕਿ 15 ਸਾਲ ਦਾ ਇਹ ਹਮਲਾਵਰ ਖਿਡਾਰੀ ਸਖਤ ਮਿਹਨਤ ਲਈ ਤਿਆਰ ਦਿਸਦਾ ਹੈ ਪਰ ਇਹ ਦੇਖਣਾ ਬਾਕੀ ਹੈ ਕਿ ਕੀ ਮੈਨੇਜਮੈਂਟ ਇਸ ਗੱਲ ’ਤੇ ਅੜਿੱਗ ਰਹੇਗੀ ਕਿ ਸੂਰਯਵੰਸ਼ੀ ਨੂੰ ਪ੍ਰਕਿਰਿਆ ਦੀ ਪਾਲਣ ਕਰਨੀ ਚਾਹੀਦਾ ਹੈ ਜਦਕਿ ਇਸ ਧਮਾਕੇਦਾਰ ਬੱਲੇਬਾਜ਼ ਨੂੰ ਟੀਮ ’ਚ ਸ਼ਾਮਲ ਕਰਨ ਦੀ ਮੰਗ ਤੇਜ਼ ਹੋ ਰਹੀ ਹੈ। ਡੋਏਸ਼ੇ ਨੇ ਮੰਨਿਆ ਕਿ ਪਿਛਲੇ ਹਫਤੇ ਆਇਰਲੈਂਡ ਹੱਥੋਂ ਮਿਲੀ 0-2 ਦੀ ਹਾਰ ਤੋਂ ਬਾਅਦ ਟੀਮ ’ਚ ਨਿਰਾਸ਼ਾ ਹੈ ਅਤੇ ਇਹ ਵੱਡੇ ਬਦਲਾਅ ਦਾ ਕਾਰਨ ਬਣ ਸਕਦੀ ਹੈ।
ਆਇਰਲੈਂਡ ਖਿਲਾਫ ਸੰਜੂ ਸੈਮਸਨ ਦੀ ਦੋਹਰੀ ਅਸਫਲਤਾ ਉਸ ਨੂੰ ਬਾਹਰ ਬਿਠਾਉਣ ਅਤੇ ਸੂਰਯਵੰਸ਼ੀ ਨੂੰ ਅਭਿਸ਼ੇਕ ਸ਼ਰਮਾ ਦੇ ਨਾਲ ਪਾਰੀ ਦਾ ਆਗਾਜ਼ ਕਰਨ ਦਾ ਮੌਕਾ ਦੇਣ ਦਾ ਕਾਰਨ ਹੋ ਸਕਦੀ ਹੈ। ਅਭਿਸ਼ੇਕ ਨੂੰ ਬੇਲਫਾਸਟ ’ਚ ਪਹਿਲੇ ਟੀ-20 ਕੌਮਾਂਤਰੀ ’ਚ 20 ਗੇਂਦਾਂ ’ਚ 49 ਦੌੜਾਂ ਦੀ ਪਾਰੀ ਦੇ ਕਾਰਨ ਫਿਰ ਮੌਕਾ ਮਿਲ ਸਕਦਾ ਹੈ। ਈਸ਼ਾਨ ਕਿਸ਼ਨ ਵੀ ਆਇਰਲੈਂਡ ਖਿਲਾਫ 2 ਮੈਚਾਂ ਦੀ ਲੜੀ ’ਚ ਕੋਈ ਖਾਸ ਕਮਾਲ ਨਹੀਂ ਦਿਖਾ ਸਕਿਆ ਅਤੇ 1 ਤੇ 12 ਦੌੜਾਂ ’ਤੇ ਆਊਟ ਹੋ ਗਿਆ। ਇਸ ਲਈ ਮੈਨੇਜਮੈਂਟ ਸੂਰਯਵੰਸ਼ੀ ਨੂੰ ਸ਼ਾਮਲ ਕਰਨ ਲਈ ਉਸ ਨੂੰ ਵੀ ਬਾਹਰ ਕਰ ਸਕਦੀ ਹੈ ਪਰ ਉਹ ਇਸ ਗੱਲ ’ਤੇ ਵਿਚਾਰ ਕਰਨਗੇ ਕਿ ਅਜਿਹੇ ਕਦਮ ਦਾ ਬਾਹਰ ਕੀਤੇ ਗਏ ਬੱਲੇਬਾਜ਼ ਦੇ ਮਨੋਬਲ ’ਤੇ ਕੀ ਅਸਰ ਪੈ ਸਕਦਾ ਹੈ। ਜੇਕਰ ਸੈਮਸਨ ਨੂੰ ਦੇਖੀਏ ਤਾਂ ਉਸ ਨੇ ਇਸ ਸਾਲ ਟੀ-20 ਵਿਸ਼ਵ ਕੱਪ ਦੇ ਆਖਰੀ ਪੜਾਅ ਦੇ ਮੁਕਾਬਲਿਆਂ ’ਚ ਸ਼ਾਨਦਾਰ ਪ੍ਰਦਰਸ਼ਨ ਕੀਤਾ ਸੀ ਅਤੇ ਆਈ. ਪੀ. ਐੱਲ. ’ਚ ਚੇਨਈ ਸੁਪਰ ਕਿੰਗਜ਼ ਲਈ 2 ਸੈਂਕੜੇ ਵੀ ਲਾਏ ਸਨ। ਹਾਲਾਂਕਿ ਚੋਣ ਕਮੇਟੀ ਦੇ ਪ੍ਰਧਾਨ ਅਜੀਤ ਅਗਰਕਰ ਅਤੇ ਮੁੱਖ ਕੋਚ ਗੌਤਮ ਗੰਭੀਰ ਦੀ ਅਗਵਾਈ ਵਾਲੀ ਟੀਮ ਮੈਨੇਜਮੈਂਟ ਸਖਤ ਫੈਸਲੇ ਲੈਣ ਤੋਂ ਪਿੱਛੇ ਨਹੀਂ ਹਟਦੀ ਅਤੇ ਜਿਨ੍ਹਾਂ ਨੂੰ ਸ਼ੱਕ ਹੈ ਉਹ ਸੂਰਯਕੁਮਾਰ ਯਾਦਵ ਦੀ ਉਦਾਹਰਨ ਦੇਖ ਸਕਦੇ ਹਨ। ਉਸ ਨੇ ਆਇਰਲੈਂਡ ਵਿਰੁੱਧ ਸੂਰਯਾਂਸ਼ ਸ਼ੈਡਗੇ ਤੇ ਪ੍ਰਿੰਸ ਯਾਦਵ ਨੂੰ ਡੈਬਿਊ ਦਾ ਮੌਕਾ ਦਿੱਤਾ ਜਿਸ ਨਾਲ ਸੂਰਯਵੰਸ਼ੀ ਨੂੰ ਕੌਮਾਂਤਰੀ ਡੈਬਿਊ ਲਈ ਇੰਤਜ਼ਾਰ ਕਰਨਾ ਪਿਆ। ਹਾਲਾਂਕਿ ਸਿਰਫ ਸੂਰਯਵੰਸ਼ੀ ਨੂੰ ਟੀਮ ’ਚ ਸ਼ਾਮਲ ਕਰਨ ਨਾਲ ਭਾਰਤ ਦੀ ਬੱਲੇਬਾਜ਼ੀ ਦੀਆਂ ਸਮੱਸਿਆਵਾਂ ਦਾ ਤੁਰੰਤ ਹੱਲ ਨਹੀਂ ਹੋ ਜਾਵੇਗਾ ਕਿਉਂਕਿ ਇਨ੍ਹਾਂ ਸਮੱਸਿਆਵਾਂ ਦੇ ਕਈ ਪਹਿਲੂ ਹਨ। ਤੇਜ਼ ਗੇਂਦਬਾਜ਼ਾਂ ਦੇ ਅਨੁਕੂਲ ਬੇਲਫਾਸਟ ਦੀ ਪਿੱਚ ’ਤੇ ਕੋਈ ਵੀ ਭਾਰਤੀ ਬੱਲੇਬਾਜ਼ ਸਹਿਜ ਨਹੀਂ ਦਿਸ ਰਿਹਾ ਸੀ। ਜਦੋਂ ਹਾਲਾਤ ਅਤੇ ਆਇਰਲੈਂਡ ਦੇ ਗੇਂਦਬਾਜ਼ਾਂ ਦੀ ਸਟੀਕ ਗੇਂਦਬਾਜ਼ੀ ਨੇ ਹਮਲਾਵਰ ਬੱਲੇਬਾਜ਼ੀ ਦੇ ਰਸਤੇ ਬੰਦ ਕਰ ਦਿੱਤੇ ਤਾਂ ਭਾਰਤੀ ਬੱਲੇਬਾਜ਼ਾਂ ਨੂੰ ਕਾਫੀ ਪ੍ਰੇਸ਼ਾਨੀ ਹੋਈ।
ਦੂਜੇ ਟੀ-20 ਕੌਮਾਂਤਰੀ ’ਚ ਤਿਲਕ ਵਰਮਾ ਨੇ ਸੰਭਲ ਕੇ ਖੇਡਦੇ ਹੋਏ ਅਰਧ ਸੈਂਕੜਾ ਲਾਇਆ ਪਰ 46 ਗੇਂਦਾਂ ਤੱਕ ਟਿਕੇ ਰਹਿਣ ਤੋਂ ਬਾਅਂਦ ਉਸ ਦਾ ਵੀ ਸਬਰ ਜਵਾਬ ਦੇ ਗਿਆ। ਆਇਰਲੈਂਡ ਦੇ ਹਾਸਲ ਕੀਤੇ ਜਾ ਸਕਣ ਵਾਲੇ 183 ਅਤੇ 155 ਦੇ ਟੀਚਿਆਂ ਵਿਰੁੱਧ ਭਾਰਤ ਦੇ ਹੋਰ ਬੱਲੇਬਾਜ਼ਾਂ ’ਚ ਵੀ ਬੇਸਬਰੀ ਸਾਫ ਨਜ਼ਰ ਆਈ। ਇਸ ਲਈ ਆਈ. ਪੀ. ਐੱਲ. ਦੀਆਂ ਸਪਾਟ ਪਿੱਚਾਂ ’ਤੇ ਬੱਲੇਬਾਜ਼ੀ ਕਰਨ ਦੇ ਤਰੀਕੇ ਤੋਂ ਵੱਖਰੀ ਸੋਚ ਦੀ ਲੋੜ ਸੀ ਪਰ ਅਜਿਹਾ ਦੇਖਣ ਨੂੰ ਨਹੀਂ ਮਿਲਿਆ। ਭਾਰਤੀ ਬੱਲੇਬਾਜ਼ਾਂ ਨੂੰ ਆਪਣੀ ਸੋਚ ਅਤੇ ਖੇਡਣ ਦੇ ਤਰੀਕੇ ’ਚ ਬਦਲਾਅ ਕਰਨਾ ਪਵੇਗਾ ਕਿਉਂਕਿ ਇੰਗਲੈਂਡ ’ਚ ਵੀ ਲੱਗਭਗ ਅਜਿਹੇ ਹੀ ਹਾਲਾਤ ਹੋਣਗੇ ਅਤੇ ਉੱਥੇ ਵੱਧ ਬਿਹਤਰ ਅਤੇ ਤਜ਼ਰੇਬਕਾਰ ਖਿਡਾਰੀਆਂ ਦਾ ਸਾਹਮਣਾ ਹੋਵੇਗਾ।
ਇੰਗਲੈਂਡ ਕੋਲ ਜੋਫਰਾ ਆਰਚਰ, ਜੋਸ਼ ਟੰਗ, ਸਾਕਿਬ ਮਹਿਮੂਦ ਅਤੇ ਸੋਨੀ ਬੇਕਰ ਵਰਗੇ ਬਹੁਤ ਤੇਜ਼ ਗਤੀ ਵਾਲੇ ਗੇਂਦਬਾਜ਼ ਹਨ ਅਤੇ ਆਦਿਲ ਰਸ਼ੀਦ ਤੇ ਰੇਹਾਨ ਅਹਿਮਦ ਵਰਗੇ ਚਲਾਕ ਸਪਿੰਨਰ ਵੀ ਹਨ। ਰਿਵਰਸਾਈਡ ਗਰਾਊਂਡ ’ਤੇ ਔਸਤ ਟੀ-20 ਕੌਮਾਂਤਰੀ ਸਕੋਰ 138 ਅਤੇ ਉੱਚਤਮ ਸਕੋਰ 195 ਹੈ ਜੋ ਇੱਥੇ ਖੇਡੇ ਗਏ ਪਿਛਲੇ 8 ਮੈਚਾਂ ’ਚ ਗੇਂਦਬਾਜ਼ਾਂ ਦੇ ਦਬਦਬੇ ਵੱਲ ਇਸ਼ਾਰਾ ਕਰਦਾ ਹੈ। ਇਸ ਲਈ ਜੇਕਰ ਬੱਲੇਬਾਜ਼ ਵਿਰੋਧੀ ਟੀਮ ਦੀ ਗੇਂਦਬਾਜ਼ੀ ਤੇ ਇੱਥੇ ਦੀਆਂ ਪਿੱਚਾਂ ਦੇ ਹਿਸਾਬ ਨਾਲ ਢਲਣ ’ਚ ਵੱਧ ਸਮਾਂ ਲੈਂਦੇ ਹਨ ਤਾਂ ਇੰਗਲੈਂਡ ਬਹੁਤ ਤੇਜ਼ੀ ਨਾਲ 5 ਮੈਚਾਂ ਦੀ ਸੀਰੀਜ਼ ਜਿੱਤ ਸਕਦਾ ਹੈ। ਭਾਰਤ ਦਾ ਨਵਾਂ ਟੀ-20 ਕੌਮਾਂਤਰੀ ਕਪਤਾਨ ਸ਼੍ਰੇਅਸ ਅਈਅਰ ਨਿਸ਼ਚਿਤ ਰੂਪ ਨਾਲ ਲਗਾਤਾਰ ਦੂਜੀ ਲੜੀ ਹਾਰਨਾ ਨਹੀਂ ਚਾਹੇਗਾ।
ਇੰਗਲੈਂਡ ਦੇ ਬੱਲੇਬਾਜ਼ੀ ਕ੍ਰਮ ’ਚ ਵੀ ਕਪਤਾਨ ਹੈਰੀ ਬਰੂਕ, ਜੋਸ ਬਟਲਰ, ਜੋਰਡਨ ਕਾਕਸ, ਜੈਕਬ ਬੈਥਲ, ਵਿਲ ਜੈਕਸ, ਫਿਲ ਸਾਲਟ ਅਤੇ ਟਾਮ ਬੈਂਟਨ ਵਰਗੇ ਦਮਦਾਰ ਖਿਡਾਰੀ ਹਨ। ਆਇਰਲੈਂਡ ਵਿਰੁੱਧ ਦੋਵਾਂ ਮੈਚਾਂ ’ਚ ਭਾਰਤੀ ਗੇਂਦਬਾਜ਼ਾਂ ਨੇ ਸ਼ੁਰੂਆਤੀ ਪਕੜ ਬਣਾਉਣ ਤੋਂ ਬਾਅਦ ਵਿਚਾਲੇ ਦੇ ਓਵਰਾਂ ’ਚ ਵਿਰੋਧੀ ਬੱਲੇਬਾਜ਼ਾਂ ਨੂੰ ਆਸਾਨੀ ਨਾਲ ਦੌੜਾਂ ਬਣਾਉਣ ਦਿੱਤੀਆਂ। ਜੇਕਰ ਅਜਿਹਾ ਹੀ ਦੁਬਾਰਾ ਹੋਇਆ ਤਾਂ ਇੰਗਲੈਂਡ ਦੇ ਬੱਲੇਬਾਜ਼ ਇਸ ਦਾ ਹੋਰ ਵੀ ਬੇਰਹਿਮੀ ਨਾਲ ਫਾਇਦਾ ਚੁੱਕਣਗੇ। ਇਸ ਸਬੰਧ ’ਚ ਭਾਰਤ ਨੂੰ ਆਪਣੇ ਗੇਂਦਬਾਜ਼ਾਂ, ਖਾਸ ਤੌਰ ’ਤੇ ਸਪਿੰਨਰਾਂ ਅਕਸ਼ਰ ਪਟੇਲ ਅਤੇ ਵਾਸ਼ਿੰਗਟਨ ਸੁੰਦਰ ਤੋਂ ਵੱਧ ਸੰਗਠਿਤ ਕੋਸ਼ਿਸ਼ ਦੀ ਲੋੜ ਹੋਵੇਗੀ ਜੋ ਅਜੇ ਤੱਕ ਜ਼ਿਆਦਾਤਰ ਬੇਅਸਰ ਰਹੇ ਹਨ।
ਟੀਮਾਂ ਇਸ ਤਰ੍ਹਾਂ ਹਨ
ਭਾਰਤ : ਸ਼੍ਰੇਅਸ ਅਈਅਰ (ਕਪਤਾਨ), ਤਿਲਕ ਵਰਮਾ, ਰਵੀ ਬਿਸ਼ਨੋਈ, ਅਭਿਸ਼ੇਕ ਸ਼ਰਮਾ, ਸੂਰਯਾਂਸ਼ ਸ਼ੈਡਗੇ, ਪ੍ਰਸਿੱਧ ਕ੍ਰਿਸ਼ਣਾ, ਸੰਜੂ ਸੈਮਸਨ, ਅਕਸ਼ਰ ਪਟੇਲ, ਹਰਸ਼ਿਤ ਰਾਣਾ, ਈਸ਼ਾਨ ਕਿਸ਼ਨ, ਵਾਸ਼ਿੰਗਟਨ ਸੁੰਦਰ, ਅਰਸ਼ਦੀਪ ਸਿੰਘ, ਸ਼ਿਵਮ ਦੂਬੇ, ਪ੍ਰਿੰਸ ਯਾਦਵ, ਵੈਭਵ ਸੂਰਯਵੰਸ਼ੀ।
ਇੰਗਲੈਂਡ : ਹੈਰੀ ਬਰੂਕ (ਕਪਤਾਨ), ਰੇਹਾਨ ਅਹਿਮਦ, ਜੋਫਰਾ ਆਰਚਰ, ਸੋਨੀ ਬੇਕਰ, ਟਾਮ ਬੈਂਟਨ, ਜੈਕਬ ਬੈਥਲ, ਜੋਸ ਬਟਲਰ, ਜੇਮਸ ਕੋਲਸ, ਜੌਰਡਨ ਕਾਕਸ, ਸੈਮ ਕਿਊਰੇਨ, ਲਿਆਮ ਡੌਸਨ, ਵਿਲ ਜੈਕਸ, ਸਾਕਿਬ ਮਹਿਮੂਦ, ਆਦਿਲ ਰਾਸ਼ਿਦ, ਫਿਲ ਸਾਲਟ, ਜੋਸ਼ ਟੰਗ ਅਤੇ ਲਿਊਕ ਵੁੱਡ।
ਪੰਡਯਾ ਨੇ ਬੈਂਗਲੁਰੂ ’ਚ ਰਹਿਣ ਦਾ ਕੀਤਾ ਫੈਸਲਾ, ਸੈਂਟਰ ਆਫ ਐਕਸੀਲੈਂਸ ਨੂੰ ਸਥਾਈ ਟ੍ਰੇਨਿੰਗ ਕੇਂਦਰ ਬਣਾਇਆ
NEXT STORY 
