ਸਪੋਰਟਸ ਡੈਸਕ- ਮਹਿਲਾ ਪ੍ਰੀਮੀਅਰ ਲੀਗ (WPL) 2025 ਦਾ ਪਹਿਲਾ ਮੈਚ 14 ਫਰਵਰੀ (ਸ਼ੁੱਕਰਵਾਰ) ਨੂੰ ਰਾਇਲ ਚੈਲੇਂਜਰਜ਼ ਬੰਗਲੌਰ (RCB) ਅਤੇ ਗੁਜਰਾਤ ਜਾਇੰਟਸ (GG) ਵਿਚਕਾਰ ਖੇਡਿਆ ਗਿਆ। ਵਡੋਦਰਾ ਦੇ ਕੋਟੰਬੀ ਸਟੇਡੀਅਮ ਵਿੱਚ ਖੇਡੇ ਗਏ ਇਸ ਮੈਚ ਵਿੱਚ ਆਰਸੀਬੀ ਨੇ ਗੁਜਰਾਤ ਜਾਇੰਟਸ ਨੂੰ ਛੇ ਵਿਕਟਾਂ ਨਾਲ ਹਰਾਇਆ।
ਆਰਸੀਬੀ ਨੂੰ ਜਿੱਤਣ ਲਈ 202 ਦੌੜਾਂ ਦਾ ਟੀਚਾ ਮਿਲਿਆ, ਜਿਸ ਨੂੰ ਉਸਨੇ 9 ਗੇਂਦਾਂ ਬਾਕੀ ਰਹਿੰਦਿਆਂ ਹਾਸਲ ਕਰ ਲਿਆ। WPL ਦੇ ਇਤਿਹਾਸ ਵਿੱਚ ਪਹਿਲੀ ਵਾਰ ਕਿਸੇ ਟੀਮ ਨੇ 200 ਤੋਂ ਵੱਧ ਦੇ ਟੀਚੇ ਦਾ ਸਫਲਤਾਪੂਰਵਕ ਪਿੱਛਾ ਕੀਤਾ ਹੈ।
ਰਿਚਾ-ਪੈਰੀ ਨੇ RCB ਲਈ ਖੇਡੀ ਤੂਫਾਨੀ ਪਾਰੀ
ਵਿਕਟਕੀਪਰ-ਬੱਲੇਬਾਜ਼ ਰਿਚਾ ਘੋਸ਼ ਨੇ ਰਾਇਲ ਚੈਲੇਂਜਰਜ਼ ਬੰਗਲੌਰ ਦੀ ਜਿੱਤ ਵਿੱਚ ਮਹੱਤਵਪੂਰਨ ਭੂਮਿਕਾ ਨਿਭਾਈ। ਰਿਚਾ ਨੇ 27 ਗੇਂਦਾਂ 'ਤੇ ਅਜੇਤੂ 64 ਦੌੜਾਂ ਬਣਾਈਆਂ, ਜਿਸ ਵਿੱਚ ਚਾਰ ਛੱਕੇ ਅਤੇ ਸੱਤ ਚੌਕੇ ਸ਼ਾਮਲ ਸਨ। ਇਸ ਦੇ ਨਾਲ ਹੀ ਐਲਿਸਾ ਪੈਰੀ ਨੇ 34 ਗੇਂਦਾਂ 'ਤੇ 57 ਦੌੜਾਂ ਦੀ ਪਾਰੀ ਖੇਡੀ। ਪੈਰੀ ਨੇ ਆਪਣੀ ਪਾਰੀ ਵਿੱਚ ਚਾਰ ਚੌਕੇ ਅਤੇ ਦੋ ਛੱਕੇ ਲਗਾਏ। ਕਨਿਕਾ ਆਹੂਜਾ 30 ਦੌੜਾਂ ਬਣਾ ਕੇ ਨਾਬਾਦ ਰਹੀ।
ਕਨਿਕਾ ਆਹੂਜਾ ਨੇ ਆਪਣੀ ਪਾਰੀ ਵਿੱਚ ਚਾਰ ਚੌਕੇ ਲਗਾਏ। ਕਨਿਕਾ ਅਤੇ ਰਿਚਾ ਘੋਸ਼ ਨੇ ਮਿਲ ਕੇ ਪੰਜਵੀਂ ਵਿਕਟ ਲਈ ਅਜੇਤੂ 93 ਦੌੜਾਂ ਜੋੜੀਆਂ। ਇਸ ਤੋਂ ਪਹਿਲਾਂ, ਐਲਿਸਾ ਪੈਰੀ ਅਤੇ ਰਾਘਵੀ ਬਿਸ਼ਟ ਵਿਚਕਾਰ ਤੀਜੀ ਵਿਕਟ ਲਈ 86 ਦੌੜਾਂ ਦੀ ਬਹੁਤ ਉਪਯੋਗੀ ਸਾਂਝੇਦਾਰੀ ਹੋਈ। ਰਾਘਵੀ ਨੇ 27 ਗੇਂਦਾਂ ਵਿੱਚ ਤਿੰਨ ਚੌਕਿਆਂ ਦੀ ਮਦਦ ਨਾਲ 25 ਦੌੜਾਂ ਦੀ ਪਾਰੀ ਖੇਡੀ।
ਗੁਜਰਾਤ ਜਾਇੰਟਸ ਲਈ ਐਸ਼ਲੇ ਗਾਰਡਨਰ ਨੇ ਦੋ ਵਿਕਟਾਂ ਲਈਆਂ। ਜਦੋਂ ਕਿ ਡਿਐਂਡਰਾ ਡੌਟਿਨ ਅਤੇ ਸਯਾਲੀ ਸਤਘਰੇ ਨੂੰ ਇੱਕ-ਇੱਕ ਸਫਲਤਾ ਮਿਲੀ।
ਗਾਰਡਨਰ ਨੇ ਜੜਿਆ ਤੂਫਾਨੀ ਅਰਧ ਸੈਂਕੜਾ
ਇਸ ਤੋਂ ਪਹਿਲਾਂ, ਟਾਸ ਹਾਰ ਕੇ ਪਹਿਲਾਂ ਬੱਲੇਬਾਜ਼ੀ ਕਰਦਿਆਂ ਗੁਜਰਾਤ ਜਾਇੰਟਸ ਨੇ ਨਿਰਧਾਰਤ 20 ਓਵਰਾਂ ਵਿੱਚ ਪੰਜ ਵਿਕਟਾਂ ਦੇ ਨੁਕਸਾਨ 'ਤੇ 201 ਦੌੜਾਂ ਬਣਾਈਆਂ। ਗੁਜਰਾਤ ਦੀ ਕਪਤਾਨ ਐਸ਼ਲੇ ਗਾਰਡਨਰ ਨੇ ਸਿਰਫ਼ 37 ਗੇਂਦਾਂ ਵਿੱਚ 79 ਦੌੜਾਂ ਦੀ ਅਜੇਤੂ ਪਾਰੀ ਖੇਡੀ, ਜਿਸ ਵਿੱਚ ਅੱਠ ਛੱਕੇ ਅਤੇ ਤਿੰਨ ਚੌਕੇ ਸ਼ਾਮਲ ਸਨ।
ਗਾਰਡਨਰ ਇੱਕ WPL ਮੈਚ ਵਿੱਚ 8 ਛੱਕੇ ਮਾਰਨ ਵਾਲੀ ਦੂਜੀ ਬੱਲੇਬਾਜ਼ ਹੈ। ਇਸ ਤੋਂ ਪਹਿਲਾਂ 2023 ਵਿੱਚ ਆਰਸੀਬੀ ਦੀ ਸੋਫੀ ਡੇਵਾਈਨ ਨੇ ਗੁਜਰਾਤ ਵਿਰੁੱਧ ਇਹ ਕਾਰਨਾਮਾ ਕੀਤਾ ਸੀ।
ਗੁਜਰਾਤ ਜਾਇੰਟਸ ਲਈ ਸਲਾਮੀ ਬੱਲੇਬਾਜ਼ ਬੇਥ ਮੂਨੀ ਨੇ ਵੀ ਸ਼ਾਨਦਾਰ 56 ਦੌੜਾਂ ਬਣਾਈਆਂ। ਮੂਨੀ ਨੇ 42 ਗੇਂਦਾਂ ਦਾ ਸਾਹਮਣਾ ਕੀਤਾ ਅਤੇ 8 ਚੌਕੇ ਲਗਾਏ। ਡਿਐਂਡਰਾ ਡੌਟਿਨ ਨੇ 13 ਗੇਂਦਾਂ ਵਿੱਚ ਤਿੰਨ ਚੌਕੇ ਅਤੇ ਇੱਕ ਛੱਕੇ ਦੀ ਮਦਦ ਨਾਲ 25 ਦੌੜਾਂ ਦਾ ਯੋਗਦਾਨ ਪਾਇਆ।
ਆਰਸੀਬੀ ਵੱਲੋਂ ਰੇਣੂਕਾ ਸਿੰਘ ਨੇ ਸਭ ਤੋਂ ਵੱਧ ਦੋ ਵਿਕਟਾਂ ਲਈਆਂ। ਜਦੋਂ ਕਿ ਕਨਿਕਾ ਆਹੂਜਾ, ਜਾਰਜੀਆ ਵੇਅਰਹੈਮ ਅਤੇ ਪ੍ਰੇਮਾ ਰਾਵਤ ਨੂੰ ਇੱਕ-ਇੱਕ ਸਫਲਤਾ ਮਿਲੀ।
Champions Trophy 2025 ਲਈ ICC ਨੇ ਖੋਲ੍ਹਿਆ ਖਜ਼ਾਨਾ, ਜੇਤੂ ਟੀਮ ਨੂੰ ਮਿਲੇਗੀ ਬੰਪਰ ਇਨਾਮੀ ਰਾਸ਼ੀ
NEXT STORY 
