ਸਪੋਰਟਸ ਡੈਸਕ- ਕਪਤਾਨ ਪੈਟ ਕਮਿੰਸ ਦੀਆਂ 6 ਵਿਕਟਾਂ ਦੀ ਬਦੌਲਤ ਦੱਖਣੀ ਅਫਰੀਕਾ ਨੂੰ 138 ਦੌੜਾਂ ’ਤੇ ਢੇਰ ਕਰਨ ਤੋਂ ਬਾਅਦ ਆਸਟ੍ਰੇਲੀਆ ਨੇ ਆਈ.ਸੀ.ਸੀ. ਵਿਸ਼ਵ ਟੈਸਟ ਚੈਂਪੀਅਨਸ਼ਿਪ ਫਾਈਨਲ ਦੇ ਦੂਜੇ ਦਿਨ ਵੀਰਵਾਰ ਨੂੰ ਇੱਥੇ ਦੂਜੀ ਪਾਰੀ ਵਿੱਚ 8 ਵਿਕਟਾਂ ’ਤੇ 144 ਦੌੜਾਂ ਬਣਾ ਕੇ ਆਪਣੀ ਕੁੱਲ ਬੜ੍ਹਤ 218 ਦੌੜਾਂ ਤੱਕ ਪਹੁੰਚਾਈ।
ਆਸਟ੍ਰੇਲੀਆਈ ਕਪਤਾਨ ਪੈਟ ਕਮਿੰਸ (28 ਦੌੜਾਂ ’ਤੇ 6 ਵਿਕਟਾਂ) ਦੀ ਤੂਫਾਨੀ ਗੇਂਦਬਾਜ਼ੀ ਦੇ ਸਾਹਮਣੇ ਦੱਖਣੀ ਅਫਰੀਕਾ ਦੀ ਟੀਮ 57.1 ਓਵਰਾਂ ਵਿੱਚ ਸਿਰਫ 138 ਦੌੜਾਂ ’ਤੇ ਸਿਮਟ ਗਈ, ਜਿਸ ਨਾਲ ਪਹਿਲੀ ਪਾਰੀ ਵਿੱਚ 212 ਦੌੜਾਂ ਬਣਾਉਣ ਵਾਲੀ ਆਸਟ੍ਰੇਲੀਆ ਨੂੰ 74 ਦੌੜਾਂ ਦੀ ਬੜ੍ਹਤ ਮਿਲੀ। ਮਿਚੇਲ ਸਟਾਰਕ ਨੇ ਵੀ 41 ਦੌੜਾਂ ਦੇ ਕੇ 2 ਵਿਕਟਾਂ ਲੈ ਲਈਆਂ। ਡੇਵਿਡ ਬੇਡਿੰਗਹਮ ਨੇ 111 ਗੇਂਦਾਂ ਵਿੱਚ 6 ਚੌਕਿਆਂ ਦੀ ਮਦਦ ਨਾਲ 45 ਦੌੜਾਂ ਬਣਾਈਆਂ ਅਤੇ ਟੀਮ ਦਾ ਟਾਪ ਸਕੋਰਰ ਰਿਹਾ, ਜਦਕਿ ਕਪਤਾਨ ਤੇਂਬਾ ਬਾਵੁਮਾ ਨੇ 36 ਦੌੜਾਂ ਦੀ ਪਾਰੀ ਖੇਡੀ।
ਕਮਿੰਸ ਦੀ ਤੂਫਾਨੀ ਗੇਂਦਬਾਜ਼ੀ ਦਾ ਆਲਮ ਇਹ ਸੀ ਕਿ ਦੱਖਣੀ ਅਫਰੀਕਾ ਨੇ ਆਪਣੀਆਂ ਆਖਰੀ 5 ਵਿਕਟਾਂ ਸਿਰਫ 12 ਦੌੜਾਂ ਜੋੜ ਕੇ ਗੁਆ ਦਿੱਤੀਆਂ। ਆਸਟ੍ਰੇਲੀਆ ਨੇ ਦੂਜੀ ਪਾਰੀ ਵਿੱਚ ਲੁੰਗੀ ਐਨਗਿਡੀ (35 ਦੌੜਾਂ ’ਤੇ 3 ਵਿਕਟਾਂ) ਅਤੇ ਕੈਗਿਸੋ ਰਬਾਡਾ (44 ਦੌੜਾਂ ’ਤੇ 3 ਵਿਕਟਾਂ) ਦੀ ਧਾਰਦਾਰ ਗੇਂਦਬਾਜ਼ੀ ਦੇ ਸਾਹਮਣੇ 73 ਦੌੜਾਂ ’ਤੇ 7 ਵਿਕਟਾਂ ਗੁਆ ਦਿੱਤੀਆਂ ਸਨ, ਪਰ ਏਲੈਕਸ ਕੈਰੀ (43 ਦੌੜਾਂ, 50 ਗੇਂਦਾਂ, 5 ਚੌਕੇ) ਅਤੇ ਸਟਾਰਕ (ਨਾਟ ਆਊਟ 16) ਨੇ 8ਵੀਂ ਵਿਕਟ ਲਈ 61 ਦੌੜਾਂ ਦੀ ਸਾਂਝੇਦਾਰੀ ਕਰ ਕੇ ਟੀਮ ਦੀ ਕੁੱਲ ਬੜ੍ਹਤ ਨੂੰ 200 ਦੌੜਾਂ ਤੋਂ ਪਾਰ ਕਰਾਇਆ। ਦਿਨ ਦੀ ਖੇਡ ਖਤਮ ਹੋਣ ਤਕ ਨਾਥਨ ਲਿਓਨ 1 ਦੌੜ ਬਣਾ ਕੇ ਸਟਾਰਕ ਦਾ ਸਾਥ ਨਿਭਾ ਰਿਹਾ ਸੀ।
ਦੂਜੀ ਪਾਰੀ 'ਚ ਆਸਟ੍ਰੇਲੀਆ ਦੀ ਸ਼ੁਰੂਆਤ ਖਰਾਬ ਰਹੀ। ਸਲਾਮੀ ਬੱਲੇਬਾਜ਼ ਉਸਮਾਨ ਖਵਾਜ਼ਾ (06) ਨੂੰ ਰਬਾਡਾ ਨੇ ਵਿਕਟਕੀਪਰ ਕਾਈਲ ਵੇਰੇਨ ਦੇ ਹੱਥੋਂ ਕੈਚ ਕਰਾਇਆ, ਜਦਕਿ ਕੈਮਰਨ ਗ੍ਰੀਨ (00) ਨੇ ਇਸੇ ਤੇਜ਼ ਗੇਂਦਬਾਜ਼ ਦੀ ਗੇਂਦ ’ਤੇ ਵਿਯਾਨ ਮੁਲਡਰ ਨੂੰ ਕੈਚ ਥਮਾਇਆ। ਪਹਿਲੀ ਪਾਰੀ ਵਿੱਚ ਅਰਧ-ਸੈਂਕੜਾ ਜੜਨ ਵਾਲੇ ਇਕ ਹੋਰ ਬੱਲੇਬਾਜ਼ ਬਿਊ ਵੈਬਸਟਰ (09) ਨੇ ਐਨਗਿਡੀ ਨੂੰ ਚੌਕਾ ਮਾਰਿਆ ਪਰ ਅਗਲੀ ਗੇਂਦ ’ਤੇ ਐਲ.ਬੀ.ਡਬਲਯੂ. ਹੋ ਗਿਆ, ਜਿਸ ਨਾਲ ਆਸਟ੍ਰੇਲੀਆ ਦਾ ਸਕੋਰ 5 ਵਿਕਟਾਂ ’ਤੇ 64 ਦੌੜਾਂ ਹੋ ਗਿਆ।
ਇਹ ਵੀ ਪੜ੍ਹੋ- ਇਕ ਵਾਰ ਫ਼ਿਰ 'ਹੱਥ ਆਈ ਪਰ ਮੂੰਹ ਨਾ ਲੱਗੀ' ! 10 ਦਿਨਾਂ 'ਚ ਦੂਜਾ ਫਾਈਨਲ ਹਾਰ ਗਏ 'ਸਰਪੰਚ ਸਾਬ੍ਹ'
ਅਗਲੇ ਓਵਰ ਵਿੱਚ ਵਿਯਾਨ ਮੁਲਡਰ ਨੇ ਟ੍ਰੈਵਿਸ ਹੈੱਡ (09) ਨੂੰ ਬੋਲਡ ਕੀਤਾ, ਜਦਕਿ ਐਨਗਿਡੀ ਨੇ ਕਮਿੰਸ (06) ਦੀ ਵਿਕਟ ਕੱਢੀ। ਸਟਾਰਕ ਨੇ ਯਾਨਸਨ ਦੀ ਗੇਂਦ ’ਤੇ ਇਕ ਦੌੜ ਨਾਲ 34ਵੇਂ ਓਵਰ ਵਿੱਚ ਟੀਮ ਦੀਆਂ ਦੌੜਾਂ ਦਾ ਸੈਂਕੜਾ ਪੂਰਾ ਕੀਤਾ। ਰਬਾਡਾ ਨੇ ਕੈਰੀ ਨੂੰ ਐੱਲ.ਬੀ.ਡਬਲਯੂ. ਕਰਕੇ ਸਟਾਰਕ ਨਾਲ ਉਸ ਦੀ ਅਰਧ-ਸੈਂਕੜੇ ਵਾਲੀ ਸਾਂਝੇਦਾਰੀ ਨੂੰ ਤੋੜਿਆ।
ਇਸ ਤੋਂ ਪਹਿਲਾਂ ਦੱਖਣੀ ਅਫਰੀਕਾ ਨੇ ਆਸਮਾਨ ਵਿੱਚ ਛਾਏ ਬੱਦਲਾਂ ਵਿਚਾਲੇ ਸਵੇਰ ਦੇ ਸੈਸ਼ਨ ਵਿੱਚ 78 ਦੌੜਾਂ ਜੋੜੀਆਂ ਅਤੇ ਬਾਵੁਮਾ (36) ਦੇ ਰੂਪ ਵਿੱਚ ਇਕੋ-ਇਕ ਵਿਕਟ ਗੁਆ ਕੇ ਵਾਪਸੀ ਦੀ ਕੋਸ਼ਿਸ਼ ਕੀਤੀ। ਦੱਖਣੀ ਅਫਰੀਕਾ ਨੇ ਦਿਨ ਦੀ ਸ਼ੁਰੂਆਤ 4 ਵਿਕਟਾਂ ’ਤੇ 43 ਦੌੜਾਂ ਨਾਲ ਕੀਤੀ। ਬਾਵੁਮਾ ਨੇ ਸਟਾਰਕ ਅਤੇ ਹੇਜ਼ਲਵੁੱਡ ਨੂੰ ਚੌਕਾ ਮਾਰਨ ਤੋਂ ਬਾਅਦ ਕਮਿੰਸ ਦੀ ਗੇਂਦ ਨੂੰ ਦਰਸ਼ਕਾਂ ਵਿਚਾਲੇ ਪਹੁੰਚਾਇਆ ਪਰ ਫਿਰ ਆਸਟ੍ਰੇਲੀਆਈ ਕਪਤਾਨ ਦੀ ਗੇਂਦ ’ਤੇ ਕਵਰਜ਼ ਵਿੱਚ ਲਾਬੁਸ਼ੇਨ ਨੂੰ ਕੈਚ ਦੇ ਬੈਠਾ।
ਬੇਡਿੰਗਹਮ ਅਤੇ ਵੇਰੇਨ ਨੇ ਇਸ ਤੋਂ ਬਾਅਦ ਪਾਰੀ ਨੂੰ ਅੱਗੇ ਵਧਾਇਆ। ਵੇਰੇਨ ਨੇ ਬਿਊ ਵੈਬਸਟਰ ਦੀ ਗੇਂਦ ’ਤੇ ਇਕ ਦੌੜ ਨਾਲ 45ਵੇਂ ਓਵਰ ਵਿੱਚ ਟੀਮ ਦੀਆਂ ਦੌੜਾਂ ਦਾ ਸੈਂਕੜਾ ਪੂਰਾ ਕੀਤਾ। ਆਸਟ੍ਰੇਲੀਆਈ ਕਪਤਾਨ ਨੇ ਬੇਡਿੰਗਹਮ ਨੂੰ ਵਿਕਟਕੀਪਰ ਏਲੈਕਸ ਕੈਰੀ ਦੇ ਹੱਥੋਂ ਕੈਚ ਕਰਵਾ ਕੇ ਦੱਖਣੀ ਅਫਰੀਕਾ ਨੂੰ ਵੱਡਾ ਝਟਕਾ ਦਿੱਤਾ ਅਤੇ ਉਸ ਦਾ ਸਕੋਰ 8 ਵਿਕਟਾਂ ’ਤੇ 135 ਦੌੜਾਂ ਕਰ ਦਿੱਤਾ।
ਤਾਜ਼ਾ ਤੇ ਵੱਡੀਆਂ ਖ਼ਬਰਾਂ ਸਭ ਤੋਂ ਪਹਿਲਾਂ ਪੜ੍ਹਨ ਲਈ ਜੁਆਇਨ ਕਰੋ ‘ਜਗ ਬਾਣੀ’ ਦਾ ਵਟਸਐਪ ਚੈਨਲ
👇Join us on Whatsapp channel👇
https://whatsapp.com/channel/0029Va94hsaHAdNVur4L170e
ਮਾਂ ਨੂੰ ਆਇਆ ਹਾਰਟ ਅਟੈਕ ! ਭਾਰਤ-ਇੰਗਲੈਂਡ ਦੌਰਾ ਛੱਡ ਵਾਪਸ ਪਰਤੇ 'ਕੋਚ ਸਾਬ੍ਹ'
NEXT STORY 
