ਕੋਲਕਾਤਾ : ਭਾਰਤ ਤੇ ਸ਼੍ਰੀਲੰਕਾ ਵਿਚਾਲੇ ਸ਼ਨੀਵਾਰ ਤੋਂ ਗਾਲੇ ’ਚ ਸ਼ੁਰੂ ਹੋਣ ਵਾਲੀ ਦੋ ਮੈਚਾਂ ਦੀ ਟੈਸਟ ਲੜੀ ਤੋਂ ਪਹਿਲਾਂ ਸ਼੍ਰੀਲੰਕਾ ਦੇ ਸਾਬਕਾ ਆਲਰਾਊਂਡਰ ਫਰਵੀਜ਼ ਮਹਰੂਫ ਨੇ ਨੌਜਵਾਨ ਤੇਜ਼ ਗੇਂਦਬਾਜ਼ ਗੁਰਨੂਰ ਬਰਾੜ ਨੂੰ ਭਾਰਤੀ ਟੀਮ ਦਾ ਸੰਭਾਵੀ ‘ਐਕਸ ਫੈਕਟਰ (ਤੁਰੁਪ ਦਾ ਇੱਕਾ)’ ਕਰਾਰ ਦਿੰਦੇ ਹੋਏ ਕਿਹਾ ਕਿ ਜਸਪ੍ਰੀਤ ਬੁਮਰਾਹ ਦੀ ਗੈਰ-ਮੌਜੂਦਗੀ ’ਚ 26 ਸਾਲ ਦੇ ਇਸ ਤੇਜ਼ ਗੇਂਦਬਾਜ਼ ਨੂੰ ਟੈਸਟ ਡੈਬਿਊ ਦਾ ਮੌਕਾ ਦਿੱਤਾ ਜਾਣਾ ਚਾਹੀਦਾ ਹੈ।
ਦੱਖਣੀ ਅਫਰੀਕਾ ਹੱਥੋਂ ਘਰੇਲੂ ਲੜੀ ਨੂੰ 0-2 ਨਾਲ ਗੁਆਉਣ ਤੋਂ ਬਾਅਦ ਭਾਰਤ ਡਬਲਯੂ.ਟੀ. ਸੀ. ਅੰਕ ਸੂਚੀ ’ਚ 5ਵੇਂ ਸਥਾਨ ’ਤੇ ਹੈ। ਟੀਮ ਸ਼੍ਰੀਲੰਕਾ ਵਿਰੁੱਧ ਇਸ ਅਹਿਮ ਲੜੀ ’ਚ ਜ਼ਖ਼ਮੀ ਬੁਮਰਾਹ ਤੋਂ ਬਿਨਾਂ ਉਤਰੇਗੀ। ਮੁਹੰਮਦ ਸਿਰਾਜ ਦੇ ਤੇਜ਼ ਹਮਲੇ ਦੀ ਅਗਵਾਈ ਕਰਨ ਦੀ ਉਮੀਦ ਹੈ, ਜਦਕਿ ਆਖਰੀ-11 ’ਚ ਪ੍ਰਸਿੱਧ ਕ੍ਰਿਸ਼ਣਾ ਦੀ ਜਗ੍ਹਾ ਗੁਰਨੂਰ ਬਰਾੜ ਨੂੰ ਮੌਕਾ ਮਿਲਣ ਦੀ ਚਰਚਾ ਵੀ ਤੇਜ਼ ਹੈ। ਮਹਰੂਫ ਨੇ ਕਿਹਾ ਕਿ ਪੁਰਾਣੀ ਗੇਂਦ ਨਾਲ ਰਿਵਰਸ ਸਵਿੰਗ ਕਰਵਾਉਣ ਦੀ ਬੁਮਰਾਹ ਦੀ ਸਮਰੱਥਾ ਭਾਰਤ ਲਈ ਸਭ ਤੋਂ ਵੱਡੀ ਕਮੀ ਸਾਬਤ ਹੋ ਸਕਦੀ ਹੈ।
ਉਸ ਨੇ ਕਿਹਾ, ‘‘ਬੁਮਰਾਹ ਜਿਸ ਤਰ੍ਹਾਂ ਪੁਰਾਣੀ ਗੇਂਦ ਨਾਲ ਰਿਵਰਸ ਸਵਿੰਗ ਕਰਵਾਉਂਦਾ ਹੈ, ਉਹ ਭਾਰਤ ਲਈ ਵੱਡਾ ਹਥਿਆਰ ਹੈ ਤੇ ਉਸ ਦੀ ਗੈਰ-ਮੌਜੂਦਗੀ ਯਕੀਨਨ ਮਹਿਸੂਸ ਹੋਵੇਗੀ। ਵਿਕਟਾਂ ਕੱਢਣ ਦੀ ਸਮਰੱਥਾ ’ਚ ਕਮੀ ਆ ਸਕਦੀ ਹੈ। ਮੁਹੰਮਦ ਸਿਰਾਜ ਬਹਿਤਰੀਨ ਗੇਂਦਬਾਜ਼ ਹੈ ਪਰ ਦੋਵਾਂ ਦੀ ਤੁਲਨਾ ਕਰੀਏ ਤਾਂ ਫਰਕ ਸਾਫ ਦਿਖਾਈ ਦਿੰਦਾ ਹੈ।’’ਮਹਰੂਫ ਨੇ ਕਿਹਾ ਕਿ ਲੰਬਾ ਕੱਦ, ਵਾਧੂ ਉਛਾਲ, ਤੇਜ਼ ਰਫਤਾਰ ਤੇ ਹਮਲਾਵਰ ਰਵੱਈਆ ਬਰਾੜ ਨੂੰ ਭਾਰਤ ਦਾ ‘ਐਕਸ ਫੈਕਟਰ’ ਬਣਾ ਸਕਦਾ ਹੈ।
ਉਸ ਨੇ ਕਿਹਾ, ‘‘ਮੈਨੂੰ ਗੁਰਨੂਰ ਬਰਾੜ ਬਹੁਤ ਪਸੰਦ ਹੈ। ਉਸ ਕੋਲ ਉਛਾਲ, ਗਤੀ ਤੇ ਜੁਝਾਰੂਪਨ ਹੈ। ਉਹ ਬੱਲੇਬਾਜ਼ਾਂ ਲਈ ਬਹੁਤ ਖਤਰਨਾਕ ਸਾਬਤ ਹੋ ਸਕਦਾ ਹੈ। ਅਭਿਆਸ ਮੈਚ ’ਚ ਉਸ ਨੇ ਟੈਸਟ ਟੀਮ ਦੇ ਕਈ ਬੱਲੇਬਾਜ਼ਾਂ ਨੂੰ ਅਸਹਿਜ ਕਰ ਦਿੱਤਾ ਸੀ ਤੇ ਕੁਝ ਦੇ ਸਰੀਰ ’ਤੇ ਗੇਂਦ ਵੀ ਲੱਗੀ ਸੀ।’’ ਮਹਰੂਫ ਨੇ ਅੱਗੇ ਕਿਹਾ, ‘‘ਮੈਂ ਜੇਕਰ ਭਾਰਤੀ ਟੀਮ ਮੈਨੇਜਮੈਂਟ ਦਾ ਹਿੱਸਾ ਹੁੰਦਾ ਤਾਂ ਯਕੀਨਨ ਬਰਾੜ ਨੂੰ ਮੌਕਾ ਦੇਣ ’ਤੇ ਵਿਚਾਰ ਕਰਦਾ। ਭਾਵੇਂ ਉਸ ਨੇ ਭਾਰਤ ਲਈ ਅਜੇ ਸਿਰਫ ਸੀਮਤ ਓਵਰਾਂ ਦੀ ਕ੍ਰਿਕਟ ਖੇਡੀ ਹੋਵੇ ਪਰ ਛੋਟੇ-ਛੋਟੇ ਸਪੈੱਲ ’ਚ ਉਹ ਬੱਲੇਬਾਜ਼ਾਂ ਦੀ ਲੈਅ ਤੋੜਨ ਤੇ ਮੈਚ ਦਾ ਰੁਖ਼ ਬਦਲਣ ਦੀ ਸਮਰੱਥਾ ਰੱਖਦਾ ਹੈ।’’
ਇਸ 26 ਸਾਲਾ ਗੇਂਦਬਾਜ਼ ਨੇ ਸੀਮਤ ਓਵਰ ਫਾਰਮੈੱਟ ’ਚ ਭਾਰਤ ਲਈ ਡੈਬਿਊ ਕਰ ਲਿਆ ਹੈ । ਮਹਰੂਫ ਦਾ ਮੰਨਣਾ ਹੈ ਕਿ ਭਾਰਤ ਨੂੰ ਸੰਨਿਆਸ ਲੈ ਚੁੱਕੇ ਰਵੀਚੰਦਰਨ ਅਸ਼ਵਿਨ ਤੇ ਜ਼ਖ਼ਮੀ ਵਾਸ਼ਿੰਗਟਨ ਸੁੰਦਰ ਦੀ ਕਮੀ ਵੀ ਮਹਿਸੂਸ ਹੋਵੇਗੀ। ਉਸ ਨੇ ਕਿਹਾ ਕਿ ਸ਼੍ਰੀਲੰਕਾ ਦੀਆਂ ਪਿੱਚਾਂ ’ਤੇ ਸਪਿੰਨਰਾਂ ਨੂੰ ਸਿਰਫ ਟਰਨ ਹੀ ਨਹੀਂ, ਸਗੋਂ ਵਾਧੂ ਉਛਾਲ ਵੀ ਮਿਲਦੀ ਹੈ। ਰਵਿੰਦਰ ਜਡੇਜਾ ਤੇ ਕੁਲਦੀਪ ਯਾਦਵ ਦੇ ਪਹਿਲੇ ਪਸੰਦੀਦਾ ਸਪਿੰਨਰ ਹੋਣ ਦੀ ਸੰਭਾਵਨਾ ਵਿਚਾਲੇ ਤੀਜੇ ਸਪਿੰਨਰ ਨੂੰ ਲੈ ਕੇ ਚਰਚਾ ਜਾਰੀ ਹੈ। ਭਾਰਤ ਕੋਲ ਖੱਬੇ ਹੱਥ ਦੇ ਸਪਿੰਨਰ ਮਾਨਵ ਸੁਥਾਰ ਤੇ ਆਫ ਸਪਿੰਨਰ ਸਾਰਾਂਸ਼ ਜੈਨ ਦੇ ਬਦਲ ਮੌਜੂਦ ਹਨ।
ਮਹਰੂਫ ਨੇ ਕਿਹਾ, ‘‘ਜੇਕਰ ਮੈਥੋਂ ਪੁੱਛਿਆ ਜਾਵੇ ਤਾਂ ਮੈਂ ਜਡੇਜਾ, ਕੁਲਦੀਪ ਤੇ ਮਾਨਵ ਸੁਥਾਰ ਨਾਲ ਉਤਰਨਾ ਪਸੰਦ ਕਰਾਂਗਾ। ਆਦਰਸ਼ ਸਥਿਤੀ ’ਚ ਆਫ ਸਪਿੰਨਰ ਵਿਲੱਖਣਤਾ ਦਿੰਦਾ ਹੈ ਪਰ ਗਾਲੇ ਦੀਆਂ ਸਥਿਤੀਆਂ ’ਚ ਸੁਥਾਰ ਦੀ ਵਾਧੂ ਉਛਾਲ ਹਾਸਲ ਕਰਨ ਦੀ ਸਮਰੱਥਾ ਵਧੇਰੇ ਉਪਯੋਗੀ ਸਾਬਤ ਹੋ ਸਕਦੀ ਹੈ।’’
ਉਸ ਨੇ ਕਿਹਾ ਕਿ ਭਾਰਤ ਦੋ ਤੇਜ਼ ਗੇਂਦਬਾਜ਼ਾਂ ਤੇ ਤਿੰਨ ਸਪਿੰਨਰਾਂ ਦੇ ਸੁਮੇਲ ਨਾਲ ਕਾਫੀ ਸੰਤੁਲਿਤ ਤੇ ਮੁਕਾਬਲੇਬਾਜ਼ ਗੇਂਦਬਾਜ਼ੀ ਹਮਲਾ ਉਤਾਰ ਸਕਦਾ ਹੈ। ਮਹਰੂਫ ਨੇ ਭਾਰਤੀ ਵਿਕਟਕੀਪਰ ਬੱਲੇਬਾਜ਼ ਰਿਸ਼ਭ ਪੰਤ ਨੂੰ ਸ਼੍ਰੀਲੰਕਾ ਲਈ ਸਭ ਤੋਂ ਵੱਡਾ ਖਤਰਾ ਦੱਸਿਆ। ਅਭਿਆਸ ਮੈਚ ’ਚ ਪੰਤ ਸਿਰਫ 2 ਤੇ 28 ਦੌੜਾਂ ਹੀ ਬਣਾ ਸਕਿਆ ਪਰ ਮਹਰੂਫ ਦਾ ਮੰਨਣਾ ਹੈ ਕਿ ਉਸ ਦੀ ਹਮਲਾਵਰ ਤੇ ਗੈਰ-ਰਵਾਇਤੀ ਬੱਲੇਬਾਜ਼ੀ ਕਿਸੇ ਵੀ ਸਮੇਂ ਮੈਚ ਦਾ ਰੁਖ਼ ਬਦਲ ਸਕਦੀ ਹੈ।
ਉਸ ਨੇ ਕਿਹਾ, ‘‘ਮੈਂ ਜੇਕਰ ਸ਼੍ਰੀਲੰਕਾ ਦੇ ਡਰੈਸਿੰਗ ਰੂਮ ’ਚ ਹੁੰਦਾ ਤਾਂ ਸਭ ਤੋਂ ਵੱਧ ਚਿੰਤਾ ਰਿਸ਼ਭ ਪੰਤ ਦੀ ਕਰਦਾ। ਉਹ 30 ਤੋਂ 45 ਮਿੰਟਾਂ ’ਚ ਇਕੱਲਾ ਮੈਚ ਬਦਲਣ ਦੀ ਸਮਰੱਥਾ ਰੱਖਦਾ ਹੈ। ਅਸੀਂ ਉਸ ਨੂੰ ਪਹਿਲਾਂ ਵੀ ਅਜਿਹਾ ਕਰਦੇ ਦੇਖਿਆ ਹੈ। ਉਸ ਨੂੰ ਸੁਭਾਵਿਕ ਖੇਡ ਖੇਡਣ ਦੀ ਪੂਰੀ ਆਜ਼ਾਦੀ ਹੈ ਤੇ ਇਹੋ ਉਸ ਨੂੰ ਬਹੁਤ ਖਤਰਨਾਕ ਬਣਾਉਂਦਾ ਹੈ।’’
ਦਿੱਗਜ ਫੁੱਟਬਾਲਰ ਰੋਨਾਲਡੋ ਨੇ ਕਰਵਾ ਲਿਆ ਵਿਆਹ ! ਪਾਰਟਨਰ ਮਾਡਲ ਨੂੰ ਬਣਾਇਆ ਜੀਵਨਸਾਥੀ
NEXT STORY 
