ਧਰਮਸ਼ਾਲਾ (ਭਾਸ਼ਾ) : ਪਿਛਲੇ 4 ਮੈਚਾਂ ’ਚ ਹਾਰ ਤੋਂ ਨਿਰਾਸ਼ ਪੰਜਾਬ ਕਿੰਗਜ਼ ਨੂੰ ਜੇਕਰ ਇੰਡੀਅਨ ਪ੍ਰੀਮੀਅਰ ਲੀਗ (ਆਈ. ਪੀ. ਐੱਲ.) ’ਚ ਆਪਣੀ ਮੁਹਿੰਮ ਵਾਪਸ ਪੱਟੜੀ ’ਤੇ ਲਿਆਉਣੀ ਹੈ ਤਾਂ ਮੁੰਬਈ ਇੰਡੀਅਨਜ਼ ਵਿਰੁੱਧ ਵੀਰਵਾਰ ਨੂੰ ਇੱਥੇ ਹੋਣ ਵਾਲੇ ਮੈਚ ’ਚ ਉਸ ਨੂੰ ਆਪਣੀ ਗੇਂਦਬਾਜ਼ੀ ਤੇ ਫੀਲਡਿੰਗ ’ਚ ਜਲਦ ਤੋਂ ਜਲਦ ਸੁਧਾਰ ਕਰਨਾ ਹੋਵੇਗਾ।
ਟੂਰਨਾਮੈਂਟ ਦੇ ਸ਼ੁਰੂਆਤੀ ਪੜਾਅ ’ਚ ਸ਼ਾਨਦਾਰ ਪ੍ਰਦਰਸ਼ਨ ਕਰਨ ਵਾਲੀ ਪੰਜਾਬ ਕਿੰਗਜ਼ ਦੀ ਟੀਮ ਲਗਾਤਾਰ 4 ਮੈਚ ਹਾਰ ਚੁੱਕੀ ਹੈ ਤੇ ਪਲੇਅ ਆਫ ’ਚ ਜਗ੍ਹਾ ਬਣਾਉਣ ਲਈ ਸੰਘਰਸ਼ ਕਰ ਰਹੀ ਹੈ। ਉਸ ਦੀ ਟੀਮ ਨੂੰ ਜੇਕਰ ਟਾਪ-4 ’ਚ ਜਗ੍ਹਾ ਪੱਕੀ ਕਰਨੀ ਹੈ ਤਾਂ ਉਸ ਨੂੰ ਆਪਣੇ ਬਾਕੀ ਬਚੇ ਮੈਚਾਂ ’ਚੋਂ ਘੱਟੋ-ਘੱਟ ਦੋ ਮੈਚ ਜਿੱਤਣੇ ਪੈਣਗੇ। ਪੰਜਾਬ ਕੁਝ ਸਮਾਂ ਪਹਿਲਾਂ ਤੱਕ ਟੂਰਨਾਮੈਂਟ ’ਚ ਇਕਲੌਤੀ ਅਜੇਤੂ ਟੀਮ ਸੀ ਪਰ ਇਸ ਫਾਰਮੈੱਟ ਤੇ ਆਈ. ਪੀ. ਐੱਲ. ਦਾ ਸੁਭਾਅ ਹੀ ਅਜਿਹਾ ਹੈ ਕਿ ਕਿਸਮਤ ਬਹੁਤ ਜਲਦੀ ਕਿਸੇ ਵੀ ਪਾਸੇ ਪਲਟ ਸਕਦੀ ਹੈ।
ਜਿਵੇਂ ਕਿ ਕਪਤਾਨ ਸ਼੍ਰੇਅਸ ਅਈਅਰ ਨੇ ਦਿੱਲੀ ਕੈਪੀਟਲਸ ਤੋਂ ਮਿਲੀ ਹਾਰ ਤੋਂ ਬਾਅਦ ਕਿਹਾ ਸੀ ਕਿ ਪੰਜਾਬ ਕਿੰਗਜ਼ ਦੀ ਇਸ ਮੁਸ਼ਕਿਲ ਸਥਿਤੀ ਲਈ ਉਹ ਖੁਦ ਹੀ ਜ਼ਿੰਮੇਵਾਰ ਹਨ। ਟੂਰਨਾਮੈਂਟ ਦੇ ਪਹਿਲੇ ਹਿੱਸੇ ’ਚ ਬੱਲੇਬਾਜ਼ਾਂ ਦੇ ਸ਼ਾਨਦਾਰ ਪ੍ਰਦਰਸ਼ਨ ਨਾਲ ਗੇਂਦਬਾਜ਼ੀ ਵਿਭਾਗ ਦੀਆਂ ਕਮਜ਼ੋਰੀਆਂ ਸਾਹਮਣੇ ਨਹੀਂ ਆਈਆਂ ਪਰ ਹੁਣ ਉਸ ਦੇ ਲਈ ਇਹ ਚਿੰਤਾ ਦਾ ਵਿਸ਼ਾ ਬਣ ਗਿਆ ਹੈ। ਦਿੱਲੀ ਵਿਰੁੱਧ ਮੈਚ ’ਚ ਅਈਅਰ ਤੇ ਉਸ ਦੀ ਟੀਮ ਜਿੱਤ ਦੇ ਕਰੀਬ ਪਹੁੰਚ ਗਈ ਸੀ ਪਰ ਆਖਰੀ 5 ਓਵਰਾਂ ’ਚ ਤੇਜ਼ ਗੇਂਦਬਾਜ਼ਾਂ ਨੇ ਆਪਣੀ ਲੈਂਥ ਸਹੀ ਨਹੀਂ ਰੱਖੀ।
ਅਰਸ਼ਦੀਪ ਸਿੰਘ ਦੀ ਅਗਵਾਈ ਵਾਲੇ ਤੇਜ਼ ਗੇਂਦਬਾਜ਼ੀ ਹਮਲੇ ਦੀ ਇਕਾਨਮੀ ਰੇਟ 10 ਟੀਮਾਂ ’ਚ ਸਭ ਤੋਂ ਖਰਾਬ ਹੈ। ਆਈ. ਪੀ. ਐੱਲ. ਦੇ ਪਹਿਲੇ ਹਾਫ ’ਚ ਜੇਵੀਅਰ ਬਾਰਟਲੈੱਟ ਤੇ ਅਰਸ਼ਦੀਪ ਨੇ ਨਵੀਂ ਗੇਂਦ ਨਾਲ ਚੰਗਾ ਸੁਮੇਲ ਪ੍ਰਦਾਨ ਕੀਤਾ ਪਰ ਲਾਕੀ ਫਰਗਿਊਸਨ ਦੀ ਵਾਪਸੀ ਤੋਂ ਬਾਅਦ ਇਸ ’ਚ ਅਸਥਿਰਤਾ ਦੇਖਣ ਨੂੰ ਮਿਲੀ ਹੈ। ਪੰਜਾਬ ਨੇ ਪਿਛਲੇ ਮੈਚ ’ਚ ਖੱਬੇ ਹੱਥ ਦੇ ਤਿੰਨ ਤੇਜ਼ ਗੇਂਦਬਾਜ਼ਾਂ ਨੂੰ ਮੈਦਾਨ ’ਤੇ ਉਤਾਰਿਆ, ਜਿਨ੍ਹਾਂ ’ਚ ਬੇਨ ਡਵਾਰਸ਼ੂਈਅਸ ਵੀ ਸ਼ਾਮਲ ਸੀ, ਜਿਹੜਾ ਕਾਫੀ ਮਹਿੰਗਾ ਸਾਬਤ ਹੋਇਆ। ਅਰਸ਼ਦੀਪ ਨੇ ਜਿਨ੍ਹਾਂ 11 ਮੈਚਾਂ ’ਚ ਹਿੱਸਾ ਲਿਆ ਹੈ, ਉਨ੍ਹਾਂ ’ਚੋਂ ਜ਼ਿਆਦਾਤਰ ’ਚ ਉਸ ਨੇ ਪ੍ਰਤੀ ਓਵਰ 10 ਤੋਂ ਵੱਧ ਦੌੜਾਂ ਦਿੱਤੀਆਂ ਹਨ।
ਜੇਕਰ ਪੰਜਾਬ ਦੀ ਬੱਲੇਬਾਜ਼ੀ ਦੀ ਗੱਲ ਕਰੀਏ ਤਾਂ ਪ੍ਰਭਸਿਮਰਨ ਸਿੰਘ ਨੂੰ ਦੌੜਾਂ ਬਣਾਉਣੀਆਂ ਪੈਣਗੀਆਂ ਤਾਂ ਜੋ ਉਹ ਚੋਟੀਕ੍ਰਮ ’ਚ ਪ੍ਰਿਆਂਸ਼ ਆਰੀਆ ਦਾ ਸਾਥ ਦੇ ਸਕੇ। ਪੰਜਾਬ ਦੀ ਫੀਲਡਿੰਗ ਵੀ ਪਿਛਲੇ ਕੁਝ ਮੈਚ ’ਚ ਚੰਗੀ ਨਹੀਂ ਰਹੀ ਤੇ ਉਸ ਦੇ ਖਿਡਾਰੀਅਾਂ ਨੇ ਕਈ ਕੈਚ ਛੱਡੇ ਜਿਸ ਨਾਲ ਟੀਮ ਨੂੰ ਨੁਕਸਾਨ ਹੋਇਆ। ਪੰਜਾਬ ਦਾ ਸਾਹਮਣਾ ਹੁਣ ਮੁੰਬਈ ਇੰਡੀਅਨਜ਼ ਨਾਲ ਹੈ ਜਿਸ ਨੇ ਅਜੇ ਤੱਕ ਨਿਰਾਸ਼ਾਜਨਕ ਪ੍ਰਦਰਸ਼ਨ ਕੀਤਾ ਹੈ ਪਰ ਪੰਜਾਬ ਨੂੰ ਉਸ ਨੂੰ ਕਿਸੇ ਵੀ ਤਰ੍ਹਾਂ ਨਾਲ ਹਲਕੇ ’ਚ ਲੈਣ ਦੀ ਕੋਸ਼ਿਸ਼ ਨਹੀਂ ਕਰਨੀ ਚਾਹੀਦੀ ਕਿਉਂਕਿ ਉਹ ਉਸ ਦੇ ਸਮੀਕਰਨ ਵਿਗਾੜਨ ’ਚ ਸਮਰੱਥ ਹੈ।
ਮੁੰਬਈ ਦਾ ਕਪਤਾਨ ਹਾਰਦਿਕ ਪੰਡਯਾ ਜ਼ਖ਼ਮੀ ਹੋਣ ਕਾਰਨ ਪਿਛਲੇ ਦੋ ਮੈਚਾਂ ’ਚ ਨਹੀਂ ਖੇਡ ਸਕਿਆ ਸੀ ਤੇ ਇਹ ਦੇਖਣਾ ਬਾਕੀ ਹੈ ਕਿ ਉਹ ਪੂਰੀ ਤਰ੍ਹਾਂ ਨਾਲ ਫਿੱਟ ਹੋ ਗਿਆ ਹੈ ਜਾਂ ਨਹੀਂ। ਪਿਛਲੇ ਕੁਝ ਸਮੇਂ ਤੋਂ ਦੌੜਾਂ ਬਣਾਉਣ ਲਈ ਜੂਝ ਰਿਹਾ ਸੂਰਯਕੁਮਾਰ ਯਾਦਵ ਬਾਕੀ ਬਚੇ ਤਿੰਨ ਮੈਚਾਂ ਦਾ ਭਰਪੂਰ ਫਾਇਦਾ ਚੁੱਕਣ ਦੀ ਕੋਸ਼ਿਸ਼ ਕਰੇਗਾ। ਰਿਆਨ ਰਿਕੇਲਟਨ ਤੇ ਰੋਹਿਤ ਸ਼ਰਮਾ ਤੋਂ ਵੀ ਪਾਵਰਪਲੇਅ ’ਚ ਤੂਫਾਨੀ ਸ਼ੁਰੂਆਤ ਦੀ ਉਮੀਦ ਕੀਤੀ ਜਾਵੇਗੀ।
ਇਹ ਵੀ ਪੜ੍ਹੋ- ਜੰਗ ਵਿਚਾਲੇ ਇਰਾਨ ਦਾ ਅਨੋਖਾ ਕਦਮ ! ਅਮਰੀਕੀ ਨਾਗਰਿਕਾਂ ਦੇ ਨਾਂ ਲਿਖੀ 'ਚਿੱਠੀ'
ਤਾਜ਼ਾ ਤੇ ਵੱਡੀਆਂ ਖ਼ਬਰਾਂ ਸਭ ਤੋਂ ਪਹਿਲਾਂ ਪੜ੍ਹਨ ਲਈ ਜੁਆਇਨ ਕਰੋ ‘ਜਗ ਬਾਣੀ’ ਦਾ ਵਟਸਐਪ ਚੈਨਲ
👇Join us on Whatsapp channel👇
https://whatsapp.com/channel/0029Va94hsaHAdNVur4L170e
'ਕਿੰਗ' ਕੋਹਲੀ ਦਾ ਵਿਰਾਟ ਧਮਾਕਾ: T-20 'ਚ 14 ਹਜ਼ਾਰੀ ਬਣ ਕੇ ਰਚਿਆ ਨਵਾਂ ਵਿਸ਼ਵ ਰਿਕਾਰਡ
NEXT STORY 
