ਕੂਲਿਜ- ਟੈਸਟ ਮਾਹਿਰ ਚੇਤੇਸ਼ਵਰ ਪੁਜਾਰਾ, ਅਜਿੰਕਯ ਰਹਾਨੇ ਦੇ ਨਾਲ ਜਸਪ੍ਰੀਤ ਬੁਮਰਾਹ 2 ਮੈਚਾਂ ਦੀ ਲੜੀ ਤੋਂ ਪਹਿਲਾਂ ਵੈਸਟਇੰਡੀਜ਼ ਕ੍ਰਿਕਟ ਬੋਰਡ ਇਲੈਵਨ ਵਿਰੁੱਧ ਸ਼ਨੀਵਾਰ ਤੋਂ ਸ਼ੁਰੂ ਹੋਣ ਵਾਲੇ ਤਿੰਨ ਦਿਨਾ ਅਭਿਆਸ ਮੈਚ ਵਿਚ ਕ੍ਰੀਜ਼ 'ਤੇ ਕੁਝ ਬਿਹਤਰੀਨ ਪ੍ਰਦਰਸ਼ਨ ਦਿਖਾਉਣਾ ਚਾਹੇਗਾ।
ਕਪਤਾਨ ਵਿਰਾਟ ਕੋਹਲੀ ਨੂੰ ਤੀਜੇ ਵਨ ਡੇ ਦੌਰਾਨ ਅੰਗੂਠੇ ਵਿਚ ਸੱਟ ਲੱਗ ਗਈ ਸੀ, ਜਿਸ ਨਾਲ ਟੀਮ ਮੈਨੇਜਮੈਂਟ ਚੌਕਸੀ ਵਰਤੇਗੀ ਤੇ ਵਿਸ਼ਵ ਟੈਸਟ ਚੈਂਪੀਅਨਸ਼ਿਪ ਦੇ ਸ਼ੁਰੂਆਤੀ ਮੈਚ ਤੋਂ ਪਹਿਲਾਂ ਆਪਣੇ ਸਰਵਸ੍ਰੇਸ਼ਠ ਖਿਡਾਰੀਆਂ ਨੂੰ ਆਰਾਮ ਦੇ ਸਕਦੀ ਹੈ। ਕੋਹਲੀ ਸ਼ਾਨਦਾਰ ਫਾਰਮ ਵਿਚ ਹੈ ਤੇ ਉਸ ਨੇ ਸੀਮਤ ਓਵਰਾਂ ਦੀ ਲੜੀ ਵਿਚ ਟੀਮ ਦੀ ਬਿਹਤਰੀਨ ਅਗਵਾਈ ਕੀਤੀ। ਤਿੰਨੇ ਟੀ-20 ਵਿਚ 106 ਦੌੜਾਂ ਬਣਾਉਣ ਤੋਂ ਬਾਅਦ ਕੋਹਲੀ ਨੇ ਦੋ ਵਨ ਡੇ ਵਿਚ ਦੋ ਸੈਂਕੜਿਆਂ ਸਮੇਤ 234 ਦੌੜਾਂ ਬਣਾਈਆਂ, ਜਦਕਿ ਪਹਿਲਾ ਵਨ ਡੇ ਮੀਂਹ ਕਾਰਣ 13 ਓਵਰ ਸੁੱਟੇ ਜਾਣ ਤੋਂ ਬਾਅਦ ਰੱਦ ਹੋ ਗਿਆ ਸੀ।
ਟੀ-20 ਕੌਮਾਂਤਰੀ ਲੜੀ ਵਿਚ ਵੈਸਟਇੰਡੀਜ਼ ਨੂੰ 3-0 ਨਾਲ ਵਾਈਟ ਵਾਸ਼ ਕਰਨ ਤੋਂ ਬਾਅਦ ਭਾਰਤ ਨੇ ਜੇਤੂ ਲੈਅ ਜਾਰੀ ਰੱਖਦੇ ਹੋਏ 3 ਮੈਚਾਂ ਦੀ ਵਨ ਡੇ ਲੜੀ 2-0 ਨਾਲ ਜਿੱਤ ਲਈ। 22 ਅਗਸਤ ਤੋਂ ਸ਼ੁਰੂ ਹੋਣ ਵਾਲੀ ਟੈਸਟ ਲੜੀ ਵਿਚ ਜੇਕਰ ਟੀਮ ਜਿੱਤ ਜਾਂਦੀ ਹੈ ਤਾਂ ਅਜਿਹਾ ਪਹਿਲੀ ਵਾਰ ਹੋਵੇਗਾ, ਜਦੋਂ ਭਾਰਤ ਨੇ ਕੈਰੇਬੀਆਈ ਧਰਤੀ 'ਤੇ ਸਾਰੇ ਸਵਰੂਪਾਂ ਵਿਚ ਜਿੱਤ ਹਾਸਲ ਕੀਤੀ ਹੋਵੇ। ਲੰਬੇ ਸਵਰੂਪ ਵਿਚ ਭਾਰਤ ਦੇ ਮੁੱਖ ਬੱਲੇਬਾਜ਼ਾਂ ਵਿਚੋਂ ਇਕ ਪੁਜਾਰਾ 6 ਮਹੀਨਿਆਂ ਬਾਅਦ ਲਾਲ ਗੇਂਦ ਨਾਲ ਮੁਕਾਬਲੇਬਾਜ਼ੀ ਕ੍ਰਿਕਟ ਖੇਡੇਗਾ, ਉਹ ਆਖਰੀ ਵਾਰ ਛੇ ਮਹੀਨੇ ਪਹਿਲਾਂ ਸੌਰਾਸ਼ਟਰ ਲਈ ਰਣਜੀ ਟਰਾਫੀ ਫਾਈਨਲ ਵਿਚ ਖੇਡਿਆ ਸੀ। ਇਸ ਸਵਰੂਪ ਵਿਚ ਉਪ ਕਪਤਾਨ ਰਹਾਨੇ ਨੇ ਇੰਗਲਿਸ਼ ਕਾਊਂਟੀ ਲਈ 7 ਮੈਚਾਂ ਵਿਚ 23.61 ਦੀ ਔਸਤ ਨਾਲ ਸਿਰਫ 397 ਦੌੜਾਂ ਬਣਾਈਆਂ, ਜਿਸ ਵਿਚ ਇਕ ਸੈਂਕੜਾ ਤੇ ਇਕ ਅਰਧ ਸੈਂਕੜਾ ਸ਼ਾਮਲ ਸੀ। ਟੈਸਟ ਮੈਚਾਂ ਵਿਚ ਖਰਾਬ ਦੌਰ ਕਾਰਣ ਮੁੰਬਈ ਦੇ ਇਸ ਖਿਡਾਰੀ ਲਈ ਇਹ ਦੌਰਾ ਕਾਫੀ ਅਹਿਮ ਹੋਵੇਗਾ ਤੇ ਉਹ ਅਭਿਆਸ ਮੈਚ ਵਿਚ ਚੰਗੀ ਬੱਲੇਬਾਜ਼ੀ ਕਰਨਾ ਚਾਹੇਗਾ।
ਵਿਸ਼ਵ ਕੱਪ ਤਕ 6 ਮਹੀਨਿਆਂ ਤਕ ਲਗਾਤਾਰ ਖੇਡਣ ਵਾਲਾ ਬੁਮਰਾਹ ਹੁਣ ਤਰੋਤਾਜ਼ਾ ਹੋ ਗਿਆ ਹੈ ਤੇ ਇਕ ਮਹੀਨੇ ਦੀ ਲੰਬੀ ਬ੍ਰੇਕ ਤੋਂ ਬਾਅਦ ਉਹ ਅਭਿਆਸ ਮੈਚ ਵਿਚ ਲੈਅ ਵਾਪਸ ਹਾਸਲ ਕਰਨਾ ਚਾਹੇਗਾ। ਬੱਲੇਬਾਜ਼ੀ ਵਿਚ ਰੋਹਿਤ ਸ਼ਰਮਾ ਤੇ ਰਿਸ਼ਭ ਪੰਤ ਵੀ ਦੌੜਾਂ ਬਣਾਉਣ ਲਈ ਬੇਤਾਬ ਹੋਣਗੇ। ਰਿਸ਼ਭ ਲਈ ਇਹ ਬੇਤਾਬੀ ਜ਼ਿਆਦਾ ਹੋਵੇਗਾ ਕਿਉਂਕਿ ਰਿਧੀਮਾਨ ਸਾਹਾ ਏ ਕਲਾਸ ਮੈਚਾਂ ਵਿਚ ਦੋ ਸੈਂਕੜੇ ਲਾ ਚੁੱਕਾ ਹੈ ਤੇ ਇਸ ਵਿਚ ਕੋਈ ਸ਼ੱਕ ਨਹੀਂ ਹੈ ਕਿ ਉਹ ਬਿਹਤਰ ਵਿਕਟਕੀਪਰ ਹੈ।
ਮਯੰਕ ਅਗਰਵਾਲ ਦਾ ਟੈਸਟ ਵਿਚ ਪਾਰੀ ਦਾ ਆਗਾਜ਼ ਕਰਨਾ ਤੈਅ ਹੈ ਪਰ ਹਨੁਮਾ ਵਿਹਾਰੀ ਤੇ ਲੋਕੇਸ਼ ਰਾਹੁਲ ਵਿਚੋਂ ਚੁਣਿਆ ਜਾਵੇਗਾ ਕਿ ਕੌਣ ਇਸ ਸਵਰੂਪ ਵਿਚ ਬਿਹਤਰ ਹੋਵੇਗਾ। ਤੇਜ਼ ਗੇਂਦਬਾਜ਼ ਉਮੇਸ਼ ਯਾਦਵ ਤੇ ਇਸ਼ਾਂਤ ਸ਼ਰਮਾ ਵੀ ਟੀਮ ਮੈਨੇਜਮੈਂਟ ਨੂੰ ਅਭਿਆਸ ਮੈਚ ਵਿਚ ਆਪਣੇ ਪ੍ਰਦਰਸ਼ਨ ਨਾਲ ਖੁਸ਼ ਕਰਨਾ ਚਾਹੁਣਗੇ। ਭਾਰਤ ਦੇ ਸਪਿਨ ਵਿਭਾਗ ਦੀ ਜ਼ਿੰਮੇਵਾਰੀ ਆਫ ਸਪਿਨਰ ਰਵੀਚੰਦਰਨ ਅਸ਼ਵਿਨ ਤੇ ਖੱਬੇ ਹੱਥ ਦੇ ਸਪਿਨਰ ਰਵਿੰਦਰ ਜਡੇਜਾ ਵੱਲੋਂ ਕੀਤੇ ਜਾਣ ਦੀ ਉਮੀਦ ਹੈ।
ਭਾਰਤੀ ਟੀਮ ਇਸ ਤਰ੍ਹਾਂ ਹੈ
ਵਿਰਾਟ ਕੋਹਲੀ (ਕਪਤਾਨ), ਅਜਿੰਕਯ ਰਹਾਨੇ, ਮਯੰਕ ਅਗਰਵਾਲ, ਰਵੀਚੰਦਰਨ ਅਸ਼ਵਿਨ, ਜਸਪ੍ਰੀਤ ਬੁਮਰਾਹ, ਰਵਿੰਦਰ ਜਡੇਜਾ, ਕੁਲਦੀਪ ਯਾਦਵ, ਮੁਹੰਮਦ ਸ਼ੰਮੀ, ਰਿਸ਼ਭ ਪੰਤ, ਚੇਤੇਸ਼ਵਰ ਪੁਜਾਰਾ, ਲੋਕੇਸ਼ ਰਾਹੁਲ, ਰਿਧੀਮਾਨ ਸਾਹਾ, ਇਸ਼ਾਂਤ ਸ਼ਰਮਾ, ਰੋਹਿਤ ਸ਼ਰਮਾ, ਹਨੁਮਾ ਵਿਹਾਰੀ ਤੇ ਉਮੇਸ਼ ਯਾਦਵ।
ਗੌਰੀ ਨੇ ਜਿੱਤਿਆ ਡਬਲਯੂ. ਪੀ. ਜੀ. ਟੀ. ਦਾ ਪਹਿਲਾ ਖਿਤਾਬ
NEXT STORY