ਬੇਸਲ (ਸਵਿਟਜ਼ਰਲੈਂਡ) : ਸਾਤਵਿਕਸਾਈਰਾਜ ਰੰਕੀਰੇਡੀ ਅਤੇ ਚਿਰਾਗ ਸ਼ੈੱਟੀ ਮੰਗਲਵਾਰ ਤੋਂ ਸ਼ੁਰੂ ਹੋਣ ਵਾਲੇ ਸਵਿਸ ਓਪਨ 2026 ਬੈਡਮਿੰਟਨ ਟੂਰਨਾਮੈਂਟ ਵਿੱਚ ਭਾਰਤੀ ਚੁਣੌਤੀ ਦੀ ਅਗਵਾਈ ਕਰਨਗੇ। ਪੁਰਸ਼ ਡਬਲਜ਼ ਰੈਂਕਿੰਗ ਵਿੱਚ ਚੌਥੇ ਨੰਬਰ 'ਤੇ ਕਾਬਜ਼ ਸਾਤਵਿਕ-ਚਿਰਾਗ ਦੀ ਜੋੜੀ ਨੂੰ ਬਰਮਿੰਘਮ ਵਿੱਚ ਪਹਿਲੇ ਦੌਰ ਵਿੱਚ ਮਲੇਸ਼ੀਆ ਦੀ ਜੋੜੀ ਹੱਥੋਂ ਹਾਰ ਦਾ ਸਾਹਮਣਾ ਕਰਨਾ ਪਿਆ ਸੀ, ਜਿਸ ਤੋਂ ਬਾਅਦ ਉਹ ਹੁਣ ਇੱਥੇ ਬਿਹਤਰ ਪ੍ਰਦਰਸ਼ਨ ਕਰਨ ਦੀ ਉਮੀਦ ਕਰਨਗੇ। ਜ਼ਿਕਰਯੋਗ ਹੈ ਕਿ ਇਸ ਜੋੜੀ ਨੇ ਸਾਲ 2023 ਵਿੱਚ ਇਹ ਟੂਰਨਾਮੈਂਟ ਜਿੱਤਿਆ ਸੀ।
ਸਿੰਧੂ ਅਤੇ ਲਕਸ਼ੈ ਸੇਨ ਦੀ ਗੈਰ-ਮੌਜੂਦਗੀ
ਭਾਰਤ ਦੀ ਦਿੱਗਜ ਖਿਡਾਰਨ ਅਤੇ ਸਾਬਕਾ ਚੈਂਪੀਅਨ ਪੀ.ਵੀ. ਸਿੰਧੂ ਇਸ ਸੁਪਰ 300 ਟੂਰਨਾਮੈਂਟ ਵਿੱਚ ਹਿੱਸਾ ਨਹੀਂ ਲੈ ਰਹੀ ਹੈ। ਸਿੰਧੂ ਦੀ ਗੈਰ-ਮੌਜੂਦਗੀ ਵਿੱਚ ਮਹਿਲਾ ਸਿੰਗਲਜ਼ ਵਿੱਚ ਭਾਰਤੀ ਟੀਮ ਦੀ ਅਗਵਾਈ ਕਰਨ ਦੀ ਜ਼ਿੰਮੇਵਾਰੀ ਮਾਲਵਿਕਾ ਬੰਸੋੜ ਅਤੇ ਉੱਨਤੀ ਹੁੱਡਾ 'ਤੇ ਹੋਵੇਗੀ। ਇਸ ਤੋਂ ਇਲਾਵਾ ਤਨਵੀ ਸ਼ਰਮਾ ਅਤੇ ਅਨਮੋਲ ਖਰਬ ਵੀ ਕੁਆਲੀਫਾਇਰ ਰਾਹੀਂ ਆਪਣਾ ਪ੍ਰਭਾਵ ਛੱਡਣ ਦੀ ਕੋਸ਼ਿਸ਼ ਕਰਨਗੀਆਂ। ਦੂਜੇ ਪਾਸੇ, ਆਲ ਇੰਗਲੈਂਡ ਓਪਨ ਦੇ ਫਾਈਨਲ ਤੱਕ ਦੇ ਮੁਸ਼ਕਲ ਸਫ਼ਰ ਤੋਂ ਬਾਅਦ ਲਕਸ਼ੈ ਸੇਨ ਨੇ ਵੀ ਇਸ ਟੂਰਨਾਮੈਂਟ ਤੋਂ ਦੂਰੀ ਬਣਾਈ ਹੈ।
ਬਾਕੀ ਵਰਗਾਂ ਵਿੱਚ ਭਾਰਤੀ ਦਾਅਵੇਦਾਰ
ਪੁਰਸ਼ ਸਿੰਗਲਜ਼ 'ਚ 2015 ਦੇ ਸਾਬਕਾ ਸਵਿਸ ਓਪਨ ਚੈਂਪੀਅਨ ਕਿਦਾਂਬੀ ਸ਼੍ਰੀਕਾਂਤ, ਐਚ.ਐਸ. ਪ੍ਰਣਯ, ਆਯੁਸ਼ ਸ਼ੈੱਟੀ ਅਤੇ ਕਿਰਨ ਜਾਰਜ ਆਪਣੀ ਕਿਸਮਤ ਅਜ਼ਮਾਉਣਗੇ। ਮਹਿਲਾ ਡਬਲਜ਼ 'ਚ ਤ੍ਰਿਸ਼ਾ ਜੌਲੀ ਅਤੇ ਗਾਇਤਰੀ ਗੋਪੀਚੰਦ ਦੀ ਜੋੜੀ ਸੈਂਟ ਜੈਕਬਸ਼ੇਲ ਵਿੱਚ ਮੁਕਾਬਲਾ ਕਰੇਗੀ। ਪੁਰਸ਼ ਡਬਲਜ਼ 'ਚ ਐਮ.ਆਰ. ਅਰਜੁਨ ਅਤੇ ਧਰੁਵ ਕਪਿਲਾ ਦੀ ਜੋੜੀ ਐਕਸ਼ਨ ਵਿੱਚ ਨਜ਼ਰ ਆਵੇਗੀ। ਮਿਕਸਡ ਡਬਲਜ਼ 'ਚ ਧਰੁਵ ਕਪਿਲਾ/ਤਨੀਸ਼ਾ ਕ੍ਰਾਸਟੋ ਅਤੇ ਰੋਹਨ ਕਪੂਰ/ਰੁਥਵਿਕਾ ਸ਼ਿਵਾਨੀ ਗੱਡੇ ਭਾਰਤ ਦੀ ਨੁਮਾਇੰਦਗੀ ਕਰਨਗੇ।
ਪਾਕਿਸਤਾਨ ਦੇ 10 ਖਿਡਾਰੀ 'ਲਾਪਤਾ'! ਦਿੱਗਜ ਕ੍ਰਿਕਟਰ ਨੇ PCB 'ਤੇ ਚੁੱਕੇ ਵੱਡੇ ਸਵਾਲ
NEXT STORY 
