ਕੋਲੰਬੋ– ਨਿਊਜ਼ੀਲੈਂਡ ਦੀ ਟੀਮ ਅੱਜ ਕੋਲੰਬੋ 'ਚ ਟੀ-20 ਵਿਸ਼ਵ ਕੱਪ ਦੇ ਸੁਪਰ-8 ਪੜਾਅ ਦੇ ਗਰੁੱਪ-2 ਦੇ ਸ਼ੁਰੂਆਤੀ ਮੈਚ ’ਚ ਪਾਕਿਸਤਾਨ ਦਾ ਸਾਹਮਣਾ ਕਰੇਗੀ ਤਾਂ ਜਿੱਤ ਲਈ ਸਭ ਤੋਂ ਅਹਿਮ ਕਾਰਨ ਹੋਵੇਗਾ ਕਿ ਉਸ ਦਾ ਮਜ਼ਬੂਤ ਮੱਧਕ੍ਰਮ ਵਿਰੋਧੀ ਟੀਮ ਦੀ ਸਪਿੰਨ ਵਿਲੱਖਣਤਾ ਦਾ ਮਾਕੂਲ ਜਵਾਬ ਦੇ ਸਕੇ। ਨਿਊਜ਼ੀਲੈਂਡ ਦੇ ਬੱਲੇਬਾਜ਼ ਆਈ. ਸੀ. ਸੀ. ਦੇ ਇਸ ਵੱਡੇ ਟੂਰਨਾਮੈਂਟ ’ਚ ਅਜੇ ਤੱਕ ਚੋਟੀ ਪੱਧਰ ਦੀ ਖੇਡ ਨਹੀਂ ਦਿਖਾ ਸਕੇ ਹਨ ਜਿਸ ’ਚ ਸਿਰਫ ਸਲਾਮੀ ਬੱਲੇਬਾਜ਼ ਟਿਮ ਸੀਫਰਟ ਤੇ ਫਿਨ ਐਲੇਨ ਹੀ ਹਨ ਜਿਨ੍ਹਾਂ ਨੇ ਮਿਲ ਕੇ 3 ਅਰਧ ਸੈਂਕੜੇ ਲਾਏ ਹਨ ਪਰ ਮੱਧਕ੍ਰਮ ਦੇ ਬੱਲੇਬਾਜ਼ ਇਨ੍ਹਾਂ ਦੋਵਾਂ ਦਾ ਠੀਕ ਤਰ੍ਹਾਂ ਨਾਲ ਸਾਥ ਨਹੀਂ ਦੇ ਸਕੇ ਹਨ ।
ਗਲੇਨ ਫਿਲਿਪਸ, ਰਚਿਨ ਰਵਿੰਦਰਾ, ਮਾਰਕ ਚੈਪਮੈਨ ਤੇ ਡੈਰਿਲ ਮਿਸ਼ੇਲ ਵਰਗੇ ਬੱਲੇਬਾਜ਼ ਲਗਾਤਾਰ ਚੰਗਾ ਪ੍ਰਦਰਸ਼ਨ ਨਹੀਂ ਕਰ ਸਕੇ ਹਨ। ਫਿਲਿਪਸ ਤੇ ਰਵਿੰਦਰਾ ਨੇ ਹਾਲਾਂਕਿ ਇਕ-ਇਕ ਅਰਧ ਸੈਂਕੜਾ ਲਾਇਆ ਹੈ ਪਰ ਕੁੱਲ ਮਿਲਾ ਕੇ ਉਨ੍ਹਾਂ ਦਾ ਪ੍ਰਦਰਸ਼ਨ ਫਿੱਕਾ ਹੀ ਰਿਹਾ ਹੈ। 4 ਮੈਚਾਂ ’ਚ ਰਵਿੰਦਰਾ ਨੇ 72 ਦੌੜਾਂ ਬਣਾਈਆਂ ਹਨ ਪਰ ਇਨ੍ਹਾਂ ’ਚੋਂ 59 ਦੌੜਾਂ ਕੈਨੇਡਾ ਵਿਰੁੱਧ ਇਕ ਹੀ ਮੈਚ ’ਚ ਬਣੀਆਂ ਹਨ। ਨਿਊਜ਼ੀਲੈਂਡ ਇਸ ਟੂਰਨਾਮੈਂਟ ’ਚ ਪਹਿਲੀ ਵਾਰ ਕੋਲੰਬੋ ’ਚ ਖੇਡੇਗਾ ਜਿਸ ਨਾਲ ਇਹ ਹੋਰ ਮੁਸ਼ਕਿਲ ਹੋ ਸਕਦਾ ਹੈ। ਇਸ ਦੇ ਉਲਟ ਪਾਕਿਸਤਾਨ ਨੇ ਵਿਸ਼ਵ ਕੱਪ ਦੀ ਸ਼ੁਰੂਆਤ ਤੋਂ ਹੀ ਇੱਥੇ ਜਗ੍ਹਾ ਬਣਾਈ ਹੈ ਤੇ ਉਹ ਪਹਿਲਾਂ ਪ੍ਰੇਮਦਾਸਾ ’ਚ ਦੋ ਮੈਚ ਖੇਡ ਚੁੱਕਾ ਹੈ।
ਪਾਕਿਸਤਾਨ ਦੇ ਗੇਂਦਬਾਜ਼, ਖਾਸ ਤੌਰ ’ਤੇ ਸਪਿੰਨਰ ਇਸ ਹੌਲੀ ਪਿੱਚ ’ਤੇ ਅਸਰਦਾਰ ਹੋਣ ਲਈ ਲੈਂਥ ਤੇ ਰਫਤਾਰ ਜਾਣਦੇ ਹਨ, ਜਿੱਥੇ ਸ਼ਾਟ ਲਾਉਣ ਲਈ ਹਿੰਮਤ ਨਾਲੋਂ ਜ਼ਿਆਦਾ ਸਮਝਦਾਰੀ ਦੀ ਲੋੜ ਹੁੰਦੀ ਹੈ। ਇਸ ਲਈ ਐਲੇਨ ਤੇ ਸੀਫਰਟ ਦੀ ਪਾਵਰਪਲੇਅ ਦੀ ਧਮਾਕੇਦਾਰ ਬੱਲੇਬਾਜ਼ੀ ’ਚ ਨਿਊਜ਼ੀਲੈਂਡ ਦੇ ਮੱਧਕ੍ਰਮ ਦਾ ਸਾਥ ਚਾਹੀਦਾ ਹੈ ਤਾਂ ਕਿ ਉਹ ਆਪਣੀ ਟੀਮ ਨੂੰ ਲੱਗਭਗ 180 ਜਾਂ ਇਸ ਤੋਂ ਵੱਧ ਦੇ ਸਕੋਰ ਤੱਕ ਪਹੁੰਚਾ ਸਕਣ। ਪਾਕਿਸਤਾਨ ਦੇ ਸਪਿੰਨਰ ਉਸਮਾਨ ਤਾਰਿਕ, ਅਬਰਾਰ ਅਹਿਮਦ, ਸੈਮ ਅਯੂਬ, ਮੁਹੰਮਦ ਨਵਾਜ਼ ਤੇ ਸ਼ਾਦਾਬ ਖਾਨ ਉਸ ਨੂੰ ਬੜ੍ਹਤ ਦਿਵਾਉਂਦੇ ਹਨ ਪਰ ਬੱਲੇਬਾਜ਼ੀ ’ਚ ਉਨ੍ਹਾਂ ਦੀਆਂ ਵੀ ਆਪਣੀਆਂ ਚਿੰਤਾਵਾਂ ਹਨ।
ਟੂਰਨਾਮੈਂਟ ’ਚ ਪਾਕਿਸਤਾਨ ਲਈ ਸਭ ਤੋਂ ਵੱਧ ਦੌੜਾਂ ਬਣਾਉਣ ਵਿਚ ਸਾਹਿਬਜ਼ਾਦਾ ਫਰਹਾਨ (220) ਤੋਂ ਬਾਅਦ ਸ਼ਾਦਾਬ ਖਾਨ (88) ਦੂਜੇ ਨੰਬਰ ’ਤੇ ਹੈ। ਪਾਕਿਸਤਾਨ ਦੇ ਬੱਲੇਬਾਜ਼ਾਂ ਨੂੰ ਨਿਊਜ਼ੀਲੈਂਡ ਵਰਗੀ ਤਜਰਬੇਕਾਰ ਟੀਮ ਵਿਰੁੱਧ ਮਿਲ ਕੇ ਵੱਡਾ ਯੋਗਦਾਨ ਦੇਣਾ ਪਵੇਗਾ ਪਰ ਪਾਕਿਸਤਾਨ ਮੈਨੇਜਮੈਂਟ ਨੂੰ ਬਾਬਰ ਆਜ਼ਮ (4 ਮੈਚਾਂ ’ਚ 66 ਦੌੜਾਂ) ਤੋਂ ਜ਼ਿਆਦਾ ਚਿੰਤਾ ਕਿਸੇ ਹੋਰ ਗੱਲ ਦੀ ਨਹੀਂ ਹੈ ਕਿਉਂਕਿ ਇਹ ਸਾਬਕਾ ਕਪਤਾਨ ਟੀ-20 ਬੱਲੇਬਾਜ਼ਾਂ ਦੀਆਂ ਲੋੜਾਂ ਨੂੰ ਸਮਝਣ ’ਚ ਜੂਝ ਰਿਹਾ ਹੈ। ਜੇਕਰ ਬਾਬਰ ਇਕ ਵਾਰ ਹੋਰ ਲੜਖੜਾਉਂਦਾ ਹੈ ਤਾਂ ਪਾਕਿਸਤਾਨ ਮੈਨੇਜਮੈਂਟ ਫਖਰ ਜ਼ਮਾਂ ਵਰਗੇ ਕਿਸੇ ਹੋਰ ਖਿਡਾਰੀ ਨੂੰ ਲਾ ਸਕਦਾ ਹੈ ਜਿਹੜਾ ਗਰੁੱਪ ਪੜਾਅ ਦੇ ਮੈਚ ’ਚ ਬੈਂਚ ’ਤੇ ਹੀ ਬੈਠਾ ਰਿਹਾ ਹੋਵੇ।
ਟੀਮ ਖੱਬੇ ਹੱਥ ਦੇ ਤੇਜ਼ ਗੇਂਦਬਾਜ਼ ਸ਼ਾਹੀਨ ਸ਼ਾਹ ਅਫਰੀਦੀ ਨੂੰ ਸ਼ਾਮਲ ਕਰਨ ਬਾਰੇ ਵੀ ਸੋਚੇਗੀ ਜਿਸ ਨੂੰ ਨਾਮੀਬੀਆ ਵਿਰੁੱਧ ਜ਼ਰੂਰੀ ਮੈਚ ’ਚੋਂ ਬਾਹਰ ਕਰ ਦਿੱਤਾ ਗਿਆ ਸੀ। ਅਫਰੀਦੀ ਨੇ 2 ਮੈਚਾਂ ’ਚ 3 ਵਿਕਟਾਂ ਲਈਆਂ ਹਨ ਜੋ ਹੌਲੀ ਪਿੱਚ ’ਤੇ ‘ਵੈਰੀਏਸ਼ਨ’ ਇਸਤੇਮਾਲ ਕਰਨ ’ਚ ਉਸ ਦੀ ਅਸਫਲਤਾ ਦਾ ਸਬੂਤ ਹੈ। ਨਿਊਜ਼ੀਲੈਂਡ ਦੇ ਤੇਜ਼ ਗੇਂਦਬਾਜ਼ ਲਾਕੀ ਫਰਗਿਊਸਨ, ਮੈਟ ਹੈਨਰੀ, ਜੈਕਬ ਡਫੀ ਤੇ ਜੇਮਸ ਨੀਸ਼ਮ ਅਜੇ ਤੱਕ ਲੱਗਭਗ ਮਹਿੰਗੇ ਰਹੇ ਹਨ ਤੇ ਉਨ੍ਹਾਂ ਨੂੰ ਇੱਥੇ ਆਪਣੀ ਰਣਨੀਤੀ ’ਤੇ ਫਿਰ ਤੋਂ ਸੋਚਣਾ ਪਵੇਗਾ। ਉੱਥੇ ਹੀ, ਸਪਿੰਨਰ ਮਿਸ਼ੇਲ ਸੈਂਟਨਰ, ਈਸ਼ ਸੋਢੀ ਤੇ ਕੰਮਚਲਾਊ ਰਵਿੰਦਰ ਤੇ ਫਿਲਿਪਸ ’ਤੇ ਸਬੰਧਤ ਦਬਾਅ ਘੱਟ ਕਰਨਾ ਜ਼ਰੂਰੀ ਹੈ।
ਟੀਮਾਂ ਇਸ ਤਰ੍ਹਾਂ ਹਨ -
ਪਾਕਿਸਤਾਨ : ਸਲਮਾਨ ਅਲੀ ਆਗਾ (ਕਪਤਾਨ), ਅਬਰਾਰ ਅਹਿਮਦ, ਬਾਬਰ ਆਜ਼ਮ, ਫਹੀਮ ਅਸ਼ਰਫ, ਫਖਰ ਜ਼ਮਾਂ, ਖਵਾਜ਼ਾ ਨਫੇ, ਮੁਹੰਮਦ ਨਵਾਜ਼, ਮੁਹੰਮਦ ਸਲਮਾਨ ਮਿਰਜ਼ਾ, ਨਸੀਮ ਸ਼ਾਹ, ਸਾਹਿਬਜ਼ਾਦਾ ਫਰਹਾਨ, ਸੈਮ ਅਯੂਬ, ਸ਼ਾਹੀਨ ਸ਼ਾਹ ਅਫਰੀਦੀ, ਸ਼ਾਦਾਬ ਖਾਨ, ਉਸਮਾਨ ਖਾਨ, ਉਸਮਾਨ ਤਾਰਿਕ।
ਨਿਊਜ਼ੀਲੈਂਡ : ਮਿਸ਼ੇਲ ਸੈਂਟਨਰ (ਕਪਤਾਨ), ਫਿਨ ਐਲੇਨ, ਮਾਰਕ ਚੈਪਮੈਨ, ਡੇਵੋਨ ਕੋਨਵੇ, ਜੈਕਬ ਡਫੀ, ਲਾਕੀ ਫਰਗਿਊਸਨ, ਮੈਟ ਹੈਨਰੀ, ਕਾਈਲ ਜੈਮੀਸਨ, ਡੈਰਿਲ ਮਿਸ਼ੇਲ, ਜੇਮਸ ਨੀਸ਼ਮ, ਗਲੇਨ ਫਿਲਿਪਸ, ਰਚਿਨ ਰਵਿੰਦਰ, ਟਿਮ ਸੀਫਰਟ, ਈਸ਼ ਸੋਢੀ, ਕੋਲ ਮੈਕਕੌਨਚੀ।
T20 WC: 'ਜੋ ਬੋਲੇ ਸੋ ਨਿਹਾਲ' ਦੇ ਜੈਕਾਰੇ ਨਾਲ ਅਭਿਸ਼ੇਕ ਸ਼ਰਮਾ ਨੇ ਟੀਮ ਇੰਡੀਆ 'ਚ ਭਰਿਆ ਜੋਸ਼, ਵੀਡੀਓ ਵਾਇਰਲ
NEXT STORY 
