ਮੁੰਬਈ : ਹੁਣ ਤੱਕ ਉਮੀਦਾਂ ਅਨੁਸਾਰ ਪ੍ਰਦਰਸ਼ਨ ਨਾ ਕਰ ਸਕਣ ਵਾਲੀ ਸਾਬਕਾ ਚੈਂਪੀਅਨ ਮੁੰਬਈ ਇੰਡੀਅਨਜ਼ ਤੇ ਚੇਨਈ ਸੁਪਰ ਕਿੰਗਜ਼ (ਸੀ. ਐੱਸ. ਕੇ.) ਦੀ ਟੀਮ ਵੀਰਵਾਰ ਨੂੰ ਇੱਥੇ ਜਦੋਂ ਇੰਡੀਅਨ ਪ੍ਰੀਮੀਅਰ ਲੀਗ (ਆਈ. ਪੀ. ਐੱਲ.) ’ਚ ਆਹਮੋ-ਸਾਹਮਣੇ ਹੋਣਗੀਆਂ ਤਾਂ ਉਹ ਆਪਣੇ ਸਾਬਕਾ ਕਪਤਾਨਾਂ ਰੋਹਿਤ ਸ਼ਰਮਾ ਤੇ ਮਹਿੰਦਰ ਸਿੰਘ ਧੋਨੀ ਦੀ ਸੰਭਾਵਿਤ ਵਾਪਸੀ ’ਤੇ ਨਜ਼ਰਾਂ ਰੱਖ ਕੇ ਆਪਣੀ ਖੇਡ ’ਚ ਨਿਰੰਤਰਤਾ ਬਣਾਈ ਰੱਖਣ ਦੀ ਕੋਸ਼ਿਸ਼ ਕਰਨਗੀਆਂ।
ਰੋਹਿਤ (ਹੈਮਸਟ੍ਰਿੰਗ) ਤੇ ਧੋਨੀ (ਪਿੰਡਲੀ ’ਚ ਖਿਚਾਅ) ਵਾਪਸੀ ਦੀ ਰਾਹ ’ਤੇ ਹਨ ਪਰ ਇਹ ਦੇਖਣਾ ਬਾਕੀ ਹੈ ਕਿ ਕੀ ਇਨ੍ਹਾਂ ’ਚੋਂ ਕੋਈ ਵੀ ਇਸ ਮਹੱਤਵਪੂਰਨ ਮੁਕਾਬਲੇ ਲਈ ਵਾਨਖੇੜੇ ਸਟੇਡੀਅਮ ’ਚ ਮੈਦਾਨ ’ਤੇ ਉਤਰੇਗਾ। ਰੋਹਿਤ ਨੇ ਮੰਗਲਵਾਰ ਨੂੰ ਬਦਲਵੇਂ ਅਭਿਆਸ ਸੈਸ਼ਨ ’ਚ ਹਿੱਸਾ ਨਹੀਂ ਲਿਆ ਪਰ ਵਰਤਮਾਨ ਟੂਰਨਾਮੈਂਟ ’ਚ ਅਜੇ ਤੱਕ ਇਕ ਵੀ ਮੈਚ ਨਾ ਖੇਡਣ ਵਾਲੇ ਧੋਨੀ ਨੇ ਜੰਮ ਕੇ ਅਭਿਆਸ ਕੀਤਾ। ਇਸ ਨਾਲ ਉਸ ਦੀ ਇੰਪੈਕਟ ਪਲੇਅਰ ਦੇ ਰੂਪ ’ਚ ਵਾਪਸੀ ਦੀ ਸੰਭਾਵਨਾ ਬਣ ਗਈ ਹੈ। ਇਨ੍ਹਾਂ ਦੋਵੇਂ ਧਾਕੜ ਖਿਡਾਰੀਆਂ ਦੀ ਵਾਪਸੀ ਇਸ ਲਈ ਵੀ ਮਹੱਤਵਪੂਰਨ ਮੰਨੀ ਜਾ ਰਹੀ ਹੈ ਕਿ ਹੁਣ ਤੱਕ 5-5 ਖਿਤਾਬ ਜਿੱਤਣ ਵਾਲੀਆਂ ਇਹ ਦੋਵੇਂ ਟੀਮਾਂ ਕਈ ਸਮੱਸਿਆਵਾਂ ਨਾਲ ਜੂਝ ਰਹੀਆਂ ਹਨ।
ਸੀ. ਐੱਸ. ਕੇ. ਨੇ ਹਰੇਕ ਟੀਮ ਦੀ ਤਰ੍ਹਾਂ ਟੂਰਨਾਮੈਂਟ ਦੀ ਸ਼ੁਰੂਆਤ ਫਾਰਮ ਤੇ ਸਹੀ ਸੁਮੇਲ ਦੀ ਭਾਲ ’ਚ ਕੀਤੀ ਪਰ ਜਿਵੇਂ ਹੀ ਉਹ ਲੈਅ ’ਚ ਆਉਣ ਲੱਗੇ, ਉਸ ਦਾ ਨੌਜਵਾਨ ਬੱਲੇਬਾਜ਼ ਆਯੂਸ਼ ਮਹਾਤ੍ਰੇ ਹੈਮਸਟ੍ਰਿੰਗ ’ਚ ਖਿਚਾਅ ਦੇ ਕਾਰਨ ਟੂਰਨਾਮੈਂਟ ਤੋਂ ਬਾਹਰ ਹੋ ਗਿਆ ਜਿਹੜਾ ਸੀ. ਐੱਸ. ਕੇ. ਲਈ ਵੱਡਾ ਝਟਕਾ ਹੈ। ਇਸ ਨਾਲ ਸੀ. ਐੱਸ. ਕੇ. ਨੂੰ ਬੱਲੇਬਾਜ਼ੀ ’ਚ ਨਵੇਂ ਸਿਰੇ ਤੋਂ ਰਣਨੀਤੀ ਬਣਾਉਣੀ ਪੈ ਰਹੀ ਹੈ। ਗੁਜਰਾਤ ਦੇ ਵਿਕਟਕੀਪਰ-ਬੱਲੇਬਾਜ਼ ਉਰਵਿਲ ਪਟੇਲ ਨੂੰ ਮਹਾਤ੍ਰੇ ਦੀ ਜਗ੍ਹਾ ਟੀਮ ’ਚ ਸ਼ਾਮਲ ਕੀਤਾ ਜਾ ਸਕਦਾ ਹੈ। ਸਨਰਾਈਜ਼ਰਜ਼ ਹੈਦਰਾਬਾਦ ਦੇ ਹੱਥੋਂ ਮਿਲੀ ਹਾਰ ਤੋਂ ਬਾਅਦ ਸੀ. ਐੱਸ. ਕੇ. ਆਪਣੇ ਸਾਰੇ ਬੱਲੇਬਾਜ਼ਾਂ ਤੋਂ ਚੰਗਾ ਪ੍ਰਦਰਸ਼ਨ ਕਰਨ ਦੀ ਉਮੀਦ ਕਰੇਗੀ। ਪਿਛਲੇ ਮੈਚ ’ਚ ਉਸ ਦੇ ਮੱਧਕ੍ਰਮ ਦੇ ਬੱਲੇਬਾਜ਼ ਚੰਗਾ ਪ੍ਰਦਰਸ਼ਨ ਨਹੀਂ ਕਰ ਪਾਏ ਸਨ। ਸਰਫਰਾਜ਼ ਖਾਨ ਨੇ ਹੁਣ ਤੱਕ 147 ਦੌੜਾਂ ਬਣਾਈਆਂ ਹਨ ਪਰ ਉਹ ਅਜੇ ਤੱਕ ਚੰਗੀ ਸ਼ੁਰੂਆਤ ਨੂੰ ਵੱਡੀ ਪਾਰੀ ’ਚ ਨਹੀਂ ਬਦਲ ਸਕਿਅਾ ਹੈ, ਵਿਸ਼ੇਸ਼ ਕਰਕੇ ਤਦ ਜਦੋਂ ਕਪਤਾਨ ਰਿਤੂਰਾਜ ਗਾਇਕਵਾੜ ਨੇ ਸਿਰਫ 82 ਦੌੜਾਂ ਬਣਾ ਕੇ ਨਿਰਾਸ਼ਾਜਨਕ ਪ੍ਰਦਰਸ਼ਨ ਕੀਤਾ ਹੈ। ਇਸੇ ਤਰ੍ਹਾਂ ਸੰਜੂ ਸੈਮਸਨ (192 ਦੌੜਾਂ) ’ਤੇ ਵੀ ਕਾਫੀ ਕੁਝ ਨਿਰਭਰ ਕਰੇਗਾ। ਉਸ ਨੇ ਇਸੇ ਮੈਦਾਨ ’ਤੇ ਟੀ-20 ਵਿਸ਼ਵ ਕੱਪ ਦੇ ਸੈਮੀਫਾਈਨਲ ’ਚ ਸ਼ਾਨਦਾਰ ਪ੍ਰਦਰਸ਼ਨ ਕੀਤਾ ਸੀ। ਸੀ. ਐੱਸ. ਕੇ. ਲਗਾਤਾਰ ਦੋ ਮੈਚਾਂ ’ਚ ਹਾਰ ਦੇ ਸਿਲਸਿਲੇ ਨੂੰ ਤੋੜਨ ਲਈ ਬੇਤਾਬ ਹੋਵੇਗੀ। ਉਹ ਮੁੰਬਈ ਵਿਰੁੱਧ ਹਾਲ ਹੀ ਦੇ ਆਪਣੇ ਰਿਕਾਰਡ ਤੋਂ ਪ੍ਰੇਰਣਾ ਲੈਣ ਦੀ ਕੋਸ਼ਿਸ਼ ਕਰੇਗੀ। ਉਸ ਨੇ ਇਨ੍ਹਾਂ ਦੋਵੇਂ ਟੀਮਾਂ ਵਿਚਾਲੇ ਪਿਛਲੇ 5 ਮੁਕਾਬਲਿਆਂ ’ਚੋਂ 4 ’ਚ ਜਿੱਤ ਹਾਸਲ ਕੀਤੀ ਹੈ। ਦੋਵੇਂ ਟੀਮਾਂ ਦੇ ਅਜੇ 4-4 ਅੰਕ ਹਨ। ਮੁੰਬਈ ਬਿਹਤਰ ਨੈੱਟ ਰਨ ਰੇਟ ਦੇ ਕਾਰਨ ਸੀ. ਐੱਸ. ਕੇ. ਤੋਂ ਅੱਗੇ ਹੈ।
ਅਹਿਮਦਾਬਾਦ ’ਚ ਤਿਲਕ ਵਰਮਾ ਦੇ ਸ਼ਾਨਦਾਰ ਪ੍ਰਦਰਸ਼ਨ ਨੇ ਮੁੰਬਈ ਇੰਡੀਅਨਜ਼ ਨੂੰ ਲਗਾਤਾਰ 4 ਮੈਚਾਂ ਦੀ ਹਾਰ ਦਾ ਸਿਲਸਿਲਾ ਤੋੜਨ ’ਚ ਮਦਦ ਕੀਤੀ ਪਰ ਉਸ ਦੇ ਲਈ ਅਜੇ ਵੀ ਰਾਹ ਆਸਾਨ ਨਹੀਂ ਹੈ। ਮੁੰਬਈ ਲਈ ਸਭ ਤੋਂ ਵੱਡੀ ਚਿੰਤਾ ਭਾਰਤ ਦੇ ਟੀ-20 ਕਪਤਾਨ ਸੂਰਯਕੁਮਾਰ ਯਾਦਵ ਤੇ ਇਸ ਫ੍ਰੈਂਚਾਈਜ਼ੀ ਟੀਮ ਦੇ ਕਪਤਾਨ ਹਾਰਦਿਕ ਪੰਡਯਾ ਦੀ ਫਾਰਮ ਨੂੰ ਲੈ ਕੇ ਬਣੀ ਹੋਈ ਹੈ। ਸੂਰਯਕੁਮਾਰ ਅਜੇ ਤੱਕ ਸਿਰਫ ਇਕ ਅਰਧ ਸੈਂਕੜਾ ਹੀ ਬਣਾ ਸਕਿਆ ਹੈ ਜਦਕਿ ਹਾਰਦਿਕ ਲੋੜ ਪੈਣ ’ਤੇ ਪਾਰੀ ਨੂੰ ਸੰਭਾਲਣ ਜਾਂ ਆਖਿਰ ’ਚ ਤਾਬੜਤੋੜ ਬੱਲੇਬਾਜ਼ੀ ਕਰਨ ’ਚ ਅਸਫਲ ਰਿਹਾ ਹੈ। ਟੀਮ ਨੇ ਨਮਨ ਧੀਰ ’ਤੇ ਭਰੋਸਾ ਜਤਾਇਆ ਹੈ ਤੇ ਉਹ ਹੁਣ ਤੱਕ ਇਸ ’ਤੇ ਖਰਾ ਉਤਰਿਆ ਹੈ। ਜਸਪ੍ਰੀਤ ਬੁਮਰਾਹ ਆਖਿਰਕਾਰ ਪਿਛਲੇ ਮੈਚ ’ਚ ਵਿਕਟ ਲੈਣ ’ਚ ਸਫਲ ਰਿਹਾ ਜਦਕਿ ਅਸ਼ਵਨੀ ਕੁਮਾਰ ਦੀਆਂ 4 ਵਿਕਟਾਂ ਨੇ ਟੀਮ ਦੀਆਂ ਚਿੰਤਾਵਾਂ ਨੂੰ ਘੱਟ ਕੀਤਾ ਕਿਉਂਕਿ ਟ੍ਰੈਂਟ ਬੋਲਟ, ਦੀਪਕ ਚਾਹਰ ਤੇ ਹਾਰਦਿਕ ’ਚੋਂ ਕੋਈ ਵੀ ਸ਼ੁਰੂ ’ਚ ਲਗਾਤਾਰ ਸਫਲਤਾ ਨਹੀਂ ਦਿਵਾ ਸਕਿਅਾ ਸੀ। ਮੁੰਬਈ ਇੰਡੀਅਨਜ਼ ਦਾ ਇੰਗਲੈਂਡ ਦਾ ਆਲਰਾਊਂਡਰ ਵਿਲ ਜੈਕਸ ਟੀਮ ’ਚ ਸ਼ਾਮਲ ਹੋ ਗਿਆ ਹੈ ਤੇ ਉਸ ਦੀ ਵਾਪਸੀ ਨਾਲ ਟੀਮ ਨੂੰ ਮਜ਼ਬੂਤੀ ਮਿਲੇਗੀ।
ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ
For Android:- https://play.google.com/store/apps/details?id=com.jagbani&hl=en
For IOS:- https://itunes.apple.com/in/app/id538323711?mt=8
Whatsapp Channel: https://whatsapp.com/channel/0029Va94hsaHAdNVur4L170e
119 'ਤੇ ਢੇਰ ਹੋਈ ਲਖਨਊ ਦੀ ਟੀਮ, ਰਾਜਸਥਾਨ ਰਾਇਲਜ਼ ਨੇ 40 ਦੌੜਾਂ ਦਿੱਤੀ ਕਰਾਰੀ ਮਾਤ
NEXT STORY 
