ਭਾਜਪਾ ਦੇ ਸਰਪ੍ਰਸਤ ਸੰਗਠਨ ਰਾਸ਼ਟਰੀ ਸਵੈਮ ਸੇਵਕ ਸੰਘ ਦੇ ਅੰਗਰੇਜ਼ੀ ਮੁੱਖ ਪੱਤਰ ‘ਆਰਗੇਨਾਈਜ਼ਰ’ ਨੇ ਆਪਣੇ ਇਕ ਲੇਖ ਵਿਚ ਹਾਲ ਹੀ ਵਿਚ ਰਾਸ਼ਟਰੀ ਰਾਜਧਾਨੀ ਦਿੱਲੀ ਦੀਆਂ ਚੋਣਾਂ ’ਚ ਪਾਰਟੀ ਦੀ ਲੱਕ ਤੋੜ ਹਾਰ ਦੇ ਕਾਰਣਾਂ ਦਾ ਵਿਸ਼ਲੇਸ਼ਣ ਕਰਦੇ ਹੋਏ ਜਿਥੇ ਸਥਾਨਕ ਲੀਡਰਸ਼ਿਪ ਨੂੰ ਅੱਗੇ ਵਧਾਉਣ ਦੀ ਲੋੜ ’ਤੇ ਜ਼ੋਰ ਦਿੱਤਾ ਹੈ, ਉਥੇ ਹੀ ਕੇਂਦਰੀ ਰੱਖਿਆ ਮੰਤਰੀ ਸ਼੍ਰੀ ਰਾਜਨਾਥ ਸਿੰਘ ਨੇ ਵੀ ਰਾਜਨੀਤੀ ’ਚ ਘਟ ਰਹੀ ਭਰੋਸੇਯੋਗਤਾ ’ਤੇ ਚਿੰਤਾ ਜ਼ਾਹਿਰ ਕਰਦਿਆਂ ਇਸ ਨੂੰ ਦੂਰ ਕਰਨ ਦੀ ਗੱਲ ਕਹੀ ਹੈ। ਵਰਣਨਯੋਗ ਹੈ ਕਿ ਦਿੱਲੀ ’ਚ 22 ਸਾਲਾਂ ਤੋਂ ਸੱਤਾ ਦਾ ਬਨਵਾਸ ਸਹਿਣ ਕਰ ਰਹੀ ਭਾਜਪਾ ਦੇ ਅਨੇਕ ਨੇਤਾਵਾਂ ਨੂੰ, ਜਿਨ੍ਹਾਂ ’ਚ ਕੇਂਦਰੀ ਮੰਤਰੀ ਵੀ ਸ਼ਾਮਲ ਰਹੇ ਹਨ, ਹਾਲ ਹੀ ’ਚ ਸੰਪੰਨ ਹੋਈਆਂ ਦਿੱਲੀ ਵਿਧਾਨ ਸਭਾ ਦੀਆਂ ਚੋਣਾਂ ’ਚ ਨਫਰਤ ਭਰੇ ਨਾਅਰੇ ਲਾਉਂਦੇ ਹੋਏ ਦੇਖਿਆ ਗਿਆ। ਭਾਜਪਾ ਨੇਤਾਵਾਂ ਵਲੋਂ ਇਸ ਦੌਰਾਨ ‘ਦੇਸ਼ਧ੍ਰੋਹੀਆਂ ਨੂੰ ਗੋਲੀ ਮਾਰੋ’ ਅਤੇ ਅਰਵਿੰਦ ਕੇਜਰੀਵਾਲ ਨੂੰ ‘ਅੱਤਵਾਦੀ’ ਕਹਿਣ ਵਰਗੇ ਨਾਅਰੇ ਲਾਉਣ ਦੇ ਬਾਵਜੂਦ ਦਿੱਲੀ ਵਿਚ ਭਾਜਪਾ ਨੂੰ ਅਣਕਿਆਸੀ ਅਤੇ ਲੱਕ ਤੋੜ ਹਾਰ ਸਹਿਣੀ ਪਈ। ਹਾਲਾਂਕਿ ਕੁਝ ਹੀ ਮਹੀਨੇ ਪਹਿਲਾਂ ਸੰਪੰਨ ਹੋਈਆਂ ਲੋਕ ਸਭਾ ਚੋਣਾਂ ’ਚ ਇਸ ਨੂੰ ਸ਼ਾਨਦਾਰ ਸਫਲਤਾ ਹਾਸਲ ਹੋਈ ਸੀ। ਬੇਸ਼ੱਕ ਇਨ੍ਹਾਂ ਚੋਣਾਂ ’ਚ ਪਾਰਟੀ ਪਿਛਲੀ ਵਾਰ ਦੀਆਂ ਤਿੰਨ ਸੀਟਾਂ ਦੇ ਅੰਕੜੇ ’ਚ ‘ਸੁਧਾਰ ਕਰ ਕੇ’ ਇਸ ਵਾਰ 8 ਦੇ ਅੰਕੜੇ ’ਤੇ ਪਹੁੰਚ ਗਈ ਪਰ ਇਸ ਨੂੰ ਬਿਲਕੁਲ ਸੰਤੋਸ਼ਜਨਕ ਨਹੀਂ ਕਿਹਾ ਜਾ ਸਕਦਾ। ਇਸੇ ਲਈ ਇਸ ਹਾਰ ਨੂੰ ਲੈ ਕੇ ਪਾਰਟੀ ਵਿਚ ਹੋ-ਹੱਲਾ ਮਚਿਆ ਹੋਇਆ ਹੈ ਅਤੇ ਸਾਬਕਾ ਕੇਂਦਰੀ ਮੰਤਰੀ ਯਸ਼ਵੰਤ ਸਿਨ੍ਹਾ ਨੇ ਤਾਂ ‘ਮੇਰੀ ਪੁਰਾਣੀ ਪਾਰਟੀ ਨੂੰ ਸ਼ਾਨਦਾਰ ਪ੍ਰਦਰਸ਼ਨ ’ਤੇ ਵਧਾਈ’ ਕਹਿ ਕੇ ਭਾਜਪਾ ਨੇਤਾਵਾਂ ਦੇ ਜ਼ਖਮਾਂ ’ਤੇ ਲੂਣ ਛਿੜਕ ਦਿੱਤਾ ਹੈ। ਦਿੱਲੀ ਵਿਧਾਨ ਸਭਾ ਚੋਣਾਂ ’ਚ ਭਾਜਪਾ ਅਤੇ ਕਾਂਗਰਸ ਦੀ ਹਾਰ ’ਤੇ ਟਿੱਪਣੀ ਕਰਦੇ ਹੋਏ ਅਸੀਂ 12 ਫਰਵਰੀ ਦੇ ਸੰਪਾਦਕੀ ‘ਕੇਜਰੀਵਾਲ ਤੀਸਰੀ ਵਾਰ ਬਣੇ ਮੁੱਖ ਮੰਤਰੀ, ਭਾਜਪਾ ਅਤੇ ਕਾਂਗਰਸ ਕਰਨ ਆਪਾ-ਪੜਚੋਲ’ ਵਿਚ ਲਿਖਿਆ ਸੀ ਕਿ ‘‘ਇਹ ਹਾਰ ਭਾਜਪਾ ਅਤੇ ਕਾਂਗਰਸ ਲਈ ਆਪਾ-ਪੜਚੋਲ ਕਰਨ ਦਾ ਇਕ ਮੌਕਾ ਹੈ। ਭਾਜਪਾ ਆਪਣੀਆਂ ਗਲਤੀਆਂ ਸੁਧਾਰੇ ਅਤੇ ਕਾਂਗਰਸ ਦੂਸਰੀਆਂ ਪਾਰਟੀਅਾਂ ਨਾਲ ਗੱਠਜੋੜ ਕਰ ਕੇ ਆਪਣੀ ਸਥਿਤੀ ਮਜ਼ਬੂਤ ਕਰੇ।’’ ਜਿਥੇ ਭਾਜਪਾ ਇਨ੍ਹਾਂ ਚੋਣਾਂ ’ਚ ਹਾਰ ਦੇ ਕਾਰਣਾਂ ਦੀ ਸਮੀਖਿਆ ਕਰਨ ’ਚ ਜੁਟ ਗਈ ਹੈ, ਉਥੇ ਹੀ ਭਾਜਪਾ ਦੇ ਸਰਪ੍ਰਸਤ ਸੰਗਠਨ ‘ਰਾਸ਼ਟਰੀ ਸਵੈਮ ਸੇਵਕ ਸੰਘ’ (ਆਰ. ਐੱਸ. ਐੱਸ.) ਦੇ ਅੰਗਰੇਜ਼ੀ ਮੁੱਖ ਪੱਤਰ ‘ਆਰਗੇਨਾਈਜ਼ਰ’ ਨੇ ਸੂਬਿਆਂ ਦੀਆਂ ਚੋਣਾਂ ਵਿਚ ਭਾਜਪਾ ਦੀਆਂ ਲਗਾਤਾਰ ਹਾਰਾਂ ਅਤੇ ਵਿਸ਼ੇਸ਼ ਤੌਰ ’ਤੇ ਦਿੱਲੀ ਦੀਆਂ ਚੋਣਾਂ ਦੇ ਸੰਦਰਭ ’ਚ ਪਾਰਟੀ ਨੂੰ ਚਿਤਾਵਨੀ ਦਿੰਦੇ ਹੋਏ ਲਿਖਿਆ ਹੈ ਕਿ : ਇਕ ਸੰਗਠਨ ਦੇ ਰੂਪ ਵਿਚ ਭਾਜਪਾ ਨੂੰ ਇਹ ਸਮਝਾਉਣ ਦੀ ਲੋੜ ਹੈ ਕਿ ਅਮਿਤ ਸ਼ਾਹ ਅਤੇ ਨਰਿੰਦਰ ਮੋਦੀ ਵਿਧਾਨ ਸਭਾ ਪੱਧਰ ਦੀਆਂ ਚੋਣਾਂ ਵਿਚ (ਪਾਰਟੀ ਦੀ) ਹਮੇਸ਼ਾ ਮਦਦ ਨਹੀਂ ਕਰ ਸਕਦੇ ਹਨ ਅਤੇ ਸਥਾਨਕ ਖਾਹਿਸ਼ਾਂ ਨੂੰ ਪੂਰਾ ਕਰਨ ਲਈ ਦਿੱਲੀ ਵਿਚ ਸੰਗਠਨ ਦੇ ਮੁੜ ਨਿਰਮਾਣ ਤੋਂ ਇਲਾਵਾ ਕੋਈ ਬਦਲ ਨਹੀਂ ਹੈ। ਇਸੇ ਤਰ੍ਹਾਂ ਰੱਖਿਆ ਮੰਤਰੀ ਰਾਜਨਾਥ ਸਿੰਘ ਨੇ (ਇਨ੍ਹਾਂ ਚੋਣਾਂ ਵਿਚ ਭਾਜਪਾ ਨੇਤਾਵਾਂ ਵਲੋਂ ਦਿੱਤੇ ਗਏ ਨਫਰਤ ਭਰੇ ਬਿਆਨਾਂ ਦੇ ਸੰਦਰਭ ਵਿਚ) ਦੇਸ਼ ਦੀ ਰਾਜਨੀਤੀ ਵਿਚ ਭਰੋਸੇਯੋਗਤਾ ਦਾ ਸੰਕਟ ਪੈਦਾ ਹੋਣ ਦੇ ਲਈ ਨੇਤਾਵਾਂ ਦੀ ਕਥਨੀ ਅਤੇ ਕਰਨੀ ਵਿਚ ਫਰਕ ਨੂੰ ਜ਼ਿੰਮੇਵਾਰ ਠਹਿਰਾਉਂਦੇ ਹੋਏ ਇਸ ’ਤੇ ਕਾਬੂ ਪਾਉਣ ਦੀ ਲੋੜ ’ਤੇ ਜ਼ੋਰ ਦਿੱਤਾ ਹੈ। ਉਨ੍ਹਾਂ ਕਿਹਾ ਕਿ ‘‘ਰਾਜਨੀਤੀ ਇਕ ਅਜਿਹੀ ਪ੍ਰਣਾਲੀ ਹੈ, ਜੋ ਸਮਾਜ ਨੂੰ ਸਹੀ ਰਸਤੇ ’ਤੇ ਲਿਜਾਂਦੀ ਹੈ ਪਰ ਮੌਜੂਦਾ ਸਮੇਂ ’ਚ ਇਸ ਦਾ ਮਹੱਤਵ ਅਤੇ ਅਰਥ ਗੁਆਚ ਗਿਆ ਹੈ ਅਤੇ ਲੋਕ ਇਸ ਨਾਲ ਨਫਰਤ ਕਰਨ ਲੱਗੇ ਹਨ। ਅਸੀਂ ਕਿਉਂ ਨਹੀਂ ਇਸ ਨੂੰ ਚੁਣੌਤੀ ਦੇ ਰੂਪ ਵਿਚ ਲੈ ਸਕਦੇ ਤਾਂ ਕਿ ਰਾਜਨੀਤੀ ਦੇ ਇਸ ਸੰਕਟ ਨੂੰ ਖਤਮ ਕੀਤਾ ਜਾ ਸਕੇ।’’ ‘‘ਭਾਰਤ ਨੇ ਵਿਸ਼ਵ ਨੂੰ ‘ਵਸੁਧੈਵ ਕੁਟੁੰਬਕਮ’ ਦਾ ਸੰਦੇਸ਼ ਦਿੱਤਾ ਹੈ ਅਤੇ ਇਹ ਸਾਡੀ ਸੰਸਕ੍ਰਿਤੀ ਦੀ ਤੁਲਨਾ ਰਹਿਤ ਵਿਸ਼ੇਸ਼ਤਾ ਹੈ, ਜਿਸ ਵਿਚ ਦੇਸ਼ ਦੀਆਂ ਸਰਹੱਦਾਂ ਤੋਂ ਦੂਰ ਰਹਿਣ ਵਾਲੇ ਲੋਕਾਂ ਸਮੇਤ ਸਭ ਨੂੰ ਇਕ ਮੰਨਿਆ ਜਾਂਦਾ ਹੈ ਪਰ ਸੌੜੀ ਸੋਚ ਵਾਲੇ ਇਸ ਬਾਰੇ ਸੋਚ ਵੀ ਨਹੀਂ ਸਕਦੇ।’’ ਇਸ ਸਮੇਂ ਹਾਲਤ ਇਹ ਹੈ ਕਿ ਪਿਛਲੇ ਦੋ ਸਾਲਾਂ ’ਚ ਭਾਜਪਾ 7 ਸੂਬਿਆਂ ਵਿਚ ਆਪਣੀ ਸੱਤਾ ਗੁਆ ਚੁੱਕੀ ਹੈ ਅਤੇ ਇਥੋਂ ਤਕ ਕਿ ਮਹਾਰਾਸ਼ਟਰ, ਜਿਥੇ ਸੰਘ ਦਾ ਮੁੱਖ ਦਫਤਰ ਸਥਿਤ ਹੈ, ਉੱਥੇ ਵੀ ਪਾਰਟੀ ਨੂੰ ਸੱਤਾ ਤੋਂ ਵਾਂਝਿਆਂ ਹੋਣਾ ਪਿਆ ਹੈ। ਸੱਤਾ ਦੇ ਨਸ਼ੇ ਵਿਚ ਚੂਰ ਅਤੇ ਖੁਦ ਨੂੰ ਅਜੇਤੂ ਸਮਝਣ ਵਾਲੇ ਪਾਰਟੀ ਦੇ ਉੱਚ ਨੇਤਾਵਾਂ ਦੇ ਹੰਕਾਰ ਅਤੇ ਹੇਠਲੇ ਕਾਡਰ ਦੇ ਵਰਕਰਾਂ ਵਿਚ ਪਾਈ ਜਾ ਰਹੀ ਨਿਰਾਸ਼ਾ ਅਤੇ ਪਾਰਟੀ ’ਚ ਸੰਵਾਦਹੀਣਤਾ ਦੀ ਸਥਿਤੀ ਨੇ ਇਸ ਨੂੰ ਹਾਰ ਵੱਲ ਧੱਕ ਦਿੱਤਾ ਹੈ। ਅਜਿਹੀ ਹਾਲਤ ਵਿਚ ਪਾਰਟੀ ਨੂੰ ‘ਆਰ. ਐੱਸ. ਐੱਸ.’ ਅਤੇ ਰਾਜਨਾਥ ਸਿੰਘ ਦੀਆਂ ‘ਚਿਤਾਵਨੀਆਂ’ ਅਤੇ ‘ਸਲਾਹ-ਮਸ਼ਵਰਿਆਂ’ ਦਾ ਨੋਟਿਸ ਲੈ ਕੇ ਇਨ੍ਹਾਂ ’ਤੇ ਅਮਲ ਕਰ ਕੇ ਦਿੱਲੀ ਹੀ ਨਹੀਂ ਸਗੋਂ ਸਾਰੇ ਸੂਬਿਅਾਂ ਵਿਚ ਇਕੋ ਜਿਹੀ ‘ਕਥਨੀ ਅਤੇ ਕਰਨੀ’ ਦੀ ਉਦਾਹਰਣ ਪੇਸ਼ ਕਰਨ ਲਈ ਸਿਰੜੀ ਸਥਾਨਕ ਲੀਡਰਸ਼ਿਪ ਤਿਆਰ ਕਰਨ ਦੀ ਲੋੜ ਹੈ।
-ਵਿਜੇ ਕੁਮਾਰ\\\
ਪੁਲਸ ਕਰਮਚਾਰੀਆਂ 'ਚ ਦਿਨੋ-ਦਿਨ ਵਧ ਰਹੀ 'ਅਨੁਸ਼ਾਸਨਹੀਣਤਾ ਅਤੇ ਮਨਮਰਜ਼ੀਆਂ'
NEXT STORY