ਨਿਊਯਾਰਕ (ਇੰਟ.) : ਦੁਨੀਆ ਦੇ ਸਭ ਤੋਂ ਵੱਡੇ ਟੈਲੀਕਾਮ ਬਾਜ਼ਾਰਾਂ ਵਿਚ ਸ਼ਾਮਲ ਭਾਰਤ ਵਿਚ ਮੋਬਾਈਲ ਸੇਵਾ ਦਾ ਅਗਲਾ ਵੱਡਾ ਬਦਲਾਅ ਜ਼ਮੀਨ ’ਤੇ ਲੱਗੇ ਟਾਵਰਾਂ ਦੀ ਬਜਾਏ ਆਸਮਾਨ ਤੋਂ ਆ ਸਕਦਾ ਹੈ। ਐਲਨ ਮਸਕ ਦੀ ਕੰਪਨੀ ਸਟਾਰਲਿੰਕ ਸੈਟੇਲਾਈਟ ਰਾਹੀਂ ਸਿੱਧੇ ਮੋਬਾਈਲ ਫੋਨ ਤੱਕ ਨੈੱਟਵਰਕ ਪਹੁੰਚਾਉਣ ਦੀ ਦਿਸ਼ਾ ਵਿਚ ਅੱਗੇ ਵਧ ਰਹੀ ਹੈ। ਕੰਪਨੀ ਦੀ ਇਹ ਯੋਜਨਾ ਸਫ਼ਲ ਹੁੰਦੀ ਹੈ ਤਾਂ ਦੂਰ-ਦੁਰਾਡੇ ਅਤੇ ਪੇਂਡੂ ਇਲਾਕਿਆਂ ਵਿਚ ਮੋਬਾਈਲ ਕੁਨੈਕਟੀਵਿਟੀ ਦਾ ਤਰੀਕਾ ਬਦਲ ਸਕਦਾ ਹੈ। ਹਾਲਾਂਕਿ ਮੌਜੂਦਾ ਭਾਰਤੀ ਟੈਲੀਕਾਮ ਕੰਪਨੀਆਂ ਦੇ ਮਜ਼ਬੂਤ ਨੈੱਟਵਰਕ ਦੇ ਵਿਚਕਾਰ ਸਟਾਰਲਿੰਕ ਲਈ ਇਹ ਆਸਾਨ ਚੁਣੌਤੀ ਨਹੀਂ ਹੋਵੇਗੀ।
ਪੇਂਡੂ ਭਾਰਤ ਬਣਿਆ ਵੱਡਾ ਬਾਜ਼ਾਰ
ਭਾਰਤ ਵਿਚ ਪੇਂਡੂ ਇਲਾਕਿਆਂ ਦੇ ਮੋਬਾਈਲ ਖਪਤਕਾਰਾਂ ਦੀ ਗਿਣਤੀ ਲਗਾਤਾਰ ਵਧੀ ਹੈ। ਉਪਲੱਬਧ ਅੰਕੜਿਆਂ ਮੁਤਾਬਕ 2014-15 ਵਿਚ ਪੇਂਡੂ ਵਾਇਰਲੈੱਸ ਖਪਤਕਾਰਾਂ ਦੀ ਗਿਣਤੀ 41.93 ਕਰੋੜ ਸੀ, ਜੋ 2019-20 ਵਿਚ ਵਧ ਕੇ 52.15 ਕਰੋੜ ਅਤੇ 2024-25 ਵਿਚ 53.46 ਕਰੋੜ ਹੋ ਗਈ। ਕੁੱਲ ਵਾਇਰਲੈੱਸ ਖਪਤਕਾਰਾਂ ਆਧਾਰ ਵਿਚ ਪੇਂਡੂ ਖੇਤਰ ਦੀ ਹਿੱਸੇਦਾਰੀ ਕਰੀਬ 42 ਤੋਂ 45 ਫੀਸਦੀ ਦੇ ਵਿਚਕਾਰ ਹੈ। ਇਹੋ ਵੱਡਾ ਬਾਜ਼ਾਰ ਸੈਟੇਲਾਈਟ ਆਧਾਰਿਤ ਮੋਬਾਈਲ ਸੇਵਾ ਲਈ ਮਹੱਤਵਪੂਰਨ ਮੌਕਾ ਬਣ ਸਕਦਾ ਹੈ।
ਜੀਓ ਅਤੇ ਏਅਰਟੈੱਲ ਦਾ ਦਬਦਬਾ
ਭਾਰਤੀ ਮੋਬਾਈਲ ਬਾਜ਼ਾਰ ਵਿਚ ਫਿਲਹਾਲ ਰਿਲਾਇੰਸ ਜੀਓ ਅਤੇ ਭਾਰਤੀ ਏਅਰਟੈੱਲ ਦੀ ਮਜ਼ਬੂਤ ਮੌਜੂਦਗੀ ਹੈ। ਉਪਲੱਬਧ ਬਾਜ਼ਾਰ ਹਿੱਸੇਦਾਰੀ ਦੇ ਅੰਕੜਿਆਂ ਵਿਚ ਰਿਲਾਇੰਸ ਜੀਓ ਕਰੀਬ 39.51 ਫੀਸਦੀ ਨਾਲ ਸਭ ਤੋਂ ਵੱਡਾ ਹਿੱਸਾ ਰੱਖਦੀ ਹੈ। ਭਾਰਤੀ ਏਅਰਟੈੱਲ ਦੀ ਹਿੱਸੇਦਾਰੀ 36.40 ਫੀਸਦੀ, ਵੋਡਾਫੋਨ-ਆਈਡੀਆ ਦੀ 18.45 ਫੀਸਦੀ ਅਤੇ ਬੀ.ਐੱਸ.ਐੱਨ.ਐੱਲ. ਦੀ 5.64 ਫੀਸਦੀ ਦੱਸੀ ਗਈ ਹੈ। ਅਜਿਹੇ ਬਾਜ਼ਾਰ ਵਿਚ ਸਟਾਰਲਿੰਕ ਨੂੰ ਸਿਰਫ ਤਕਨਾਲੋਜੀ ਹੀ ਨਹੀਂ ਸਗੋਂ ਕੀਮਤ, ਨੈੱਟਵਰਕ ਸਮਰੱਥਾ ਅਤੇ ਰੈਗੂਲੇਟਰੀ ਮਨਜ਼ੂਰੀ ਦੀ ਪਰਖ ’ਤੇ ਵੀ ਖ਼ਰਾ ਉਤਰਨਾ ਹੋਵੇਗਾ।
ਟਾਵਰ ਦੀ ਜਗ੍ਹਾ ਸੈਟੇਲਾਈਟ ਦਾ ਨੈੱਟਵਰਕ
ਸਟਾਰਲਿੰਕ ਦੀ ਡਾਇਰੈਕਟ-ਟੂ-ਸੈੱਲ ਤਕਨਾਲੋਜੀ ਦਾ ਉਦੇਸ਼ ਸੈਟੇਲਾਈਟ ਰਾਹੀਂ ਸਿੱਧੇ ਮੋਬਾਈਲ ਫੋਨ ਨੂੰ ਕਨੈਕਟ ਕਰਨਾ ਹੈ। ਇਸ ਦਾ ਸਭ ਤੋਂ ਵੱਡਾ ਫਾਇਦਾ ਉਨ੍ਹਾਂ ਇਲਾਕਿਆਂ ਵਿਚ ਹੋ ਸਕਦਾ ਹੈ ਜਿੱਥੇ ਮੋਬਾਈਲ ਟਾਵਰ ਲਗਾਉਣਾ ਮੁਸ਼ਕਿਲ ਜਾਂ ਮਹਿੰਗਾ ਹੈ। ਪਹਾੜੀ, ਸਰਹੱਦੀ, ਸਮੁੰਦਰੀ ਅਤੇ ਬੇਹੱਦ ਦੂਰ-ਦੁਰਾਡੇ ਖੇਤਰਾਂ ਵਿਚ ਅਜਿਹੀ ਤਕਨਾਲੋਜੀ ਰਵਾਇਤੀ ਨੈੱਟਵਰਕ ਦਾ ਬਦਲ ਬਣ ਸਕਦੀ ਹੈ।
ਇਹ ਵੀ ਪੜ੍ਹੋ : ਅਮਰੀਕਾ 'ਚ ਵਿਆਹ ਦੇ 17 ਦਿਨਾਂ ਬਾਅਦ ਹੈਦਰਾਬਾਦ ਦੇ ਇੰਜੀਨੀਅਰ ਦੀ ਸ਼ੱਕੀ ਹਾਲਾਤਾਂ 'ਚ ਮੌਤ
ਮਸਕ ਦੀ ਰਾਹ ਆਸਾਨ ਨਹੀਂ
ਮਾਹਿਰਾਂ ਦੇ ਮੁਤਾਬਕ ਰਵਾਇਤੀ ਮੋਬਾਈਲ ਨੈੱਟਵਰਕ ਦੀ ਬਰਾਬਰੀ ਲਈ ਵੱਡੀ ਗਿਣਤੀ ਵਿਚ ਛੋਟੇ ਫੈਮਟੋਸੈੱਲ ਅਤੇ ਹੋਰ ਜ਼ਮੀਨੀ ਢਾਂਚੇ ਦੀ ਲੋੜ ਪੈ ਸਕਦੀ ਹੈ। ਸਟਾਰਲਿੰਕ ਕੋਲ ਸੈਂਕੜੇ ਡਾਇਰੈਕਟ-ਟੂ-ਸੈੱਲ ਸੈਟੇਲਾਈਟ ਅਤੇ ਹਜ਼ਾਰਾਂ ਗਰਾਊਂਡ ਸਟੇਸ਼ਨ ਹੋਣ ਦੇ ਬਾਵਜੂਦ ਵਿਆਪਕ ਮੋਬਾਈਲ ਨੈੱਟਵਰਕ ਵਰਗੀ ਸਮਰੱਥਾ ਹਾਸਲ ਕਰਨਾ ਵੱਖਰੀ ਚੁਣੌਤੀ ਹੈ।
ਟੈਲੀਕਾਮ ਕੰਪਨੀਆਂ ਲਈ ਕੀ ਬਦਲੇਗਾ?
ਜੇ ਸਟਾਰਲਿੰਕ ਸਿੱਧੇ ਮੋਬਾਈਲ ਫੋਨ ਨੂੰ ਸੈਟੇਲਾਈਟ ਨਾਲ ਜੋੜਨ ਵਿਚ ਸਫ਼ਲ ਰਹਿੰਦਾ ਹੈ ਤਾਂ ਟੈਲੀਕਾਮ ਕੰਪਨੀਆਂ ਲਈ ਮੁਕਾਬਲੇ ਦਾ ਨਵਾਂ ਮੋਰਚਾ ਖੁੱਲ੍ਹ ਸਕਦਾ ਹੈ। ਹਾਲਾਂਕਿ ਇਸ ਦਾ ਮਤਲਬ ਇਹ ਨਹੀਂ ਕਿ ਮੋਬਾਈਲ ਟਾਵਰ ਆਧਾਰਿਤ ਨੈੱਟਵਰਕ ਤੁਰੰਤ ਖ਼ਤਮ ਹੋ ਜਾਵੇਗਾ। ਸ਼ਹਿਰਾਂ ਅਤੇ ਸੰਘਣੀ ਆਬਾਦੀ ਵਾਲੇ ਖੇਤਰਾਂ ਵਿਚ ਰਵਾਇਤੀ ਨੈੱਟਵਰਕ ਦੀ ਸਮਰੱਥਾ ਅਤੇ ਲਾਗਤ ਦਾ ਮੁਕਾਬਲਾ ਕਰਨਾ ਸਟਾਰਲਿੰਕ ਲਈ ਵੱਡੀ ਪ੍ਰੀਖਿਆ ਹੋਵੇਗੀ। ਅਸਲੀ ਸਵਾਲ ਇਹੋ ਹੈ ਕਿ ਕੀ ਸੈਟੇਲਾਈਟ ਮੋਬਾਈਲ ਸੇਵਾ ਭਾਰਤ ਦੇ ਪਿੰਡਾਂ ਅਤੇ ਦੂਰ-ਦੁਰਾਡੇ ਖੇਤਰਾਂ ਦੀ ਲੋੜ ਪੂਰੀ ਕਰਦੇ ਹੋਏ ਮੌਜੂਦਾ ਟੈਲੀਕਾਮ ਢਾਂਚੇ ਨੂੰ ਚੁਣੌਤੀ ਦੇ ਸਕੇਗੀ?
ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ
For Android:- https://play.google.com/store/apps/details?id=com.jagbani&hl=en
For IOS:- https://itunes.apple.com/in/app/id538323711?mt=8
For Whatsapp:- https://whatsapp.com/channel/0029Va94hsaHAdNVur4L170e
8ਵੇਂ ਤਨਖਾਹ ਕਮਿਸ਼ਨ ਦੀਆਂ ਅਹਿਮ ਮੀਟਿੰਗਾਂ ਸ਼ੁਰੂ, ਜਾਣੋ ਤਨਖਾਹ ਤੇ ਪੈਨਸ਼ਨ ਨੂੰ ਲੈ ਕੇ ਕੀ ਹੋਵੇਗਾ ਬਦਲਾਅ
NEXT STORY 
