ਨਵੀਂ ਦਿੱਲੀ : ਦੇਸ਼ ਭਰ ਦੇ ਰਾਸ਼ਟਰੀ ਰਾਜਮਾਰਗਾਂ 'ਤੇ ਸਫ਼ਰ ਕਰਨ ਵਾਲੇ ਵਾਹਨ ਚਾਲਕਾਂ ਲਈ ਅਹਿਮ ਖ਼ਬਰ ਹੈ। ਭਾਰਤੀ ਰਾਸ਼ਟਰੀ ਰਾਜਮਾਰਗ ਅਥਾਰਟੀ (NHAI) ਨੇ FASTag ਐਨੂਅਲ ਪਾਸ (ਸਾਲਾਨਾ ਪਾਸ) ਦੀਆਂ ਕੀਮਤਾਂ ਵਿੱਚ ਵਾਧਾ ਕਰਨ ਦਾ ਫੈਸਲਾ ਕੀਤਾ ਹੈ। ਇਹ ਨਵੀਆਂ ਦਰਾਂ 1 ਅਪ੍ਰੈਲ 2026 ਤੋਂ ਲਾਗੂ ਹੋਣਗੀਆਂ।
NHAI ਦੇ ਨਵੇਂ ਫੈਸਲੇ ਅਨੁਸਾਰ, FASTag ਐਨੂਅਲ ਪਾਸ ਦੀ ਕੀਮਤ 3,000 ਰੁਪਏ ਤੋਂ ਵਧਾ ਕੇ 3,075 ਰੁਪਏ ਕਰ ਦਿੱਤੀ ਗਈ ਹੈ। ਇਸਦਾ ਮਤਲਬ ਹੈ ਕਿ ਹੁਣ ਵਾਹਨ ਮਾਲਕਾਂ ਨੂੰ ਇਸ ਸਹੂਲਤ ਲਈ 75 ਰੁਪਏ ਵਾਧੂ ਖਰਚਣੇ ਪੈਣਗੇ। ਇਹ ਸੋਧੀਆਂ ਹੋਈਆਂ ਦਰਾਂ ਵਿੱਤੀ ਸਾਲ 2026-27 ਲਈ ਪ੍ਰਭਾਵੀ ਹੋਣਗੀਆਂ।
ਕਿਨ੍ਹਾਂ ਨੂੰ ਮਿਲੇਗਾ ਫਾਇਦਾ ਅਤੇ ਕੀ ਹਨ ਸ਼ਰਤਾਂ?
ਇਹ ਐਨੂਅਲ ਪਾਸ ਸਿਰਫ਼ ਨਾਨ-ਕਮਰਸ਼ੀਅਲ ਯਾਨੀ ਨਿੱਜੀ ਵਾਹਨਾਂ (ਕਾਰ, ਜੀਪ ਅਤੇ ਵੈਨ) ਲਈ ਉਪਲਬਧ ਹੈ। ਇਹ ਪਾਸ ਇੱਕ ਸਾਲ ਲਈ ਜਾਂ ਵੱਧ ਤੋਂ ਵੱਧ 200 ਟੋਲ ਕ੍ਰਾਸਿੰਗ ਤੱਕ ਮਾਨਤਾ ਰੱਖਦਾ ਹੈ। ਜੇਕਰ ਕੋਈ ਵਾਹਨ ਚਾਲਕ ਸਾਲ ਪੂਰਾ ਹੋਣ ਤੋਂ ਪਹਿਲਾਂ 200 ਵਾਰ ਟੋਲ ਪਾਰ ਕਰ ਲੈਂਦਾ ਹੈ, ਤਾਂ ਪਾਸ ਦੀ ਵੈਧਤਾ ਖਤਮ ਹੋ ਜਾਵੇਗੀ।
ਇਹ ਪਾਸ ਦੇਸ਼ ਦੇ ਲਗਭਗ 1,150 ਟੋਲ ਪਲਾਜ਼ਿਆਂ 'ਤੇ ਮਾਨਤਾ ਪ੍ਰਾਪਤ ਹੈ, ਜੋ ਨੈਸ਼ਨਲ ਹਾਈਵੇਅ ਅਤੇ ਐਕਸਪ੍ਰੈਸਵੇਅ ਨੈੱਟਵਰਕ ਦਾ ਹਿੱਸਾ ਹਨ। ਹਾਲਾਂਕਿ, ਇਹ ਰਾਜ ਸਰਕਾਰਾਂ ਜਾਂ ਸਥਾਨਕ ਨਿਕਾਯਾਂ ਦੇ ਟੋਲ ਪਲਾਜ਼ਿਆਂ 'ਤੇ ਲਾਗੂ ਨਹੀਂ ਹੁੰਦਾ।
ਕਿਉਂ ਵਧਾਈ ਗਈ ਫੀਸ?
ਸਰਕਾਰ ਹਰ ਸਾਲ ਨੈਸ਼ਨਲ ਹਾਈਵੇਅ ਫੀਸ ਨਿਯਮਾਂ ਦੇ ਤਹਿਤ ਇਹਨਾਂ ਦਰਾਂ ਦੀ ਸਮੀਖਿਆ ਕਰਦੀ ਹੈ ਤਾਂ ਜੋ ਟੋਲ ਪ੍ਰਣਾਲੀ ਅਤੇ ਹਾਈਵੇਅ ਦੇ ਬੁਨਿਆਦੀ ਢਾਂਚੇ ਦੇ ਰੱਖ-ਰਖਾਅ ਨੂੰ ਹੋਰ ਬਿਹਤਰ ਬਣਾਇਆ ਜਾ ਸਕੇ। ਅੰਕੜਿਆਂ ਅਨੁਸਾਰ, ਇਸ ਪਾਸ ਦੀ ਲੋਕਪ੍ਰਿਯਤਾ ਤੇਜ਼ੀ ਨਾਲ ਵਧ ਰਹੀ ਹੈ ਅਤੇ ਮੌਜੂਦਾ ਸਮੇਂ ਵਿੱਚ 50 ਲੱਖ ਤੋਂ ਵੱਧ ਵਾਹਨ ਮਾਲਕ ਇਸ ਸਹੂਲਤ ਦੀ ਵਰਤੋਂ ਕਰ ਰਹੇ ਹਨ।
ਵਾਹਨ ਮਾਲਕ ਇਸ ਪਾਸ ਨੂੰ ਬਹੁਤ ਆਸਾਨੀ ਨਾਲ ਆਨਲਾਈਨ ਖਰੀਦ ਸਕਦੇ ਹਨ। ਇਸ ਲਈ 'Rajmarg Yatra' ਐਪ ਜਾਂ NHAI ਦੀ ਅਧਿਕਾਰਤ ਵੈੱਬਸਾਈਟ ਦੀ ਵਰਤੋਂ ਕੀਤੀ ਜਾ ਸਕਦੀ ਹੈ। ਪੇਮੈਂਟ ਸਫਲ ਹੋਣ ਤੋਂ ਕੁਝ ਘੰਟਿਆਂ ਦੇ ਅੰਦਰ ਹੀ ਇਹ ਪਾਸ ਵਾਹਨ ਦੇ ਮੌਜੂਦਾ FASTag 'ਤੇ ਐਕਟਿਵ ਹੋ ਜਾਂਦਾ ਹੈ।
ਮਹਿੰਗਾਈ ਵਿਚਾਲੇ ਉਦਯੋਗ ਲਈ ਰਾਹਤ! ਗੈਸ ਦੀਆਂ ਕੀਮਤਾਂ 'ਚ ਵੱਡੀ ਗਿਰਾਵਟ, ਕੱਲ ਤੋਂ ਲਾਗੂ ਹੋਣਗੀਆਂ ਦਰਾਂ
NEXT STORY 
