ਨਵੀਂ ਦਿੱਲੀ— ਸਰਕਾਰ ਨੂੰ ਇਸ ਵਾਰ ਮੋਟੇ ਅਨਾਜ ਤੋਂ ਲੈ ਕੇ ਦਾਲਾਂ ਦਾ ਉਤਪਾਦਨ ਸ਼ਾਨਦਾਰ ਰਹਿਣ ਦਾ ਅੰਦਾਜ਼ਾ ਹੈ, ਜਿਸ ਨਾਲ ਮਹਿੰਗਾਈ ਕੰਟਰੋਲ 'ਚ ਰਹਿਣ ਤੇ ਦਾਲ ਸਸਤੀ ਹੋਣ ਦੀ ਸੰਭਾਵਨਾ ਹੈ।
ਮੌਜੂਦਾ ਮਾਨਸੂਨ ਸੀਜ਼ਨ ਦੌਰਾਨ ਹੜ੍ਹਾਂ ਕਾਰਨ ਹੋਏ ਨੁਕਸਾਨ ਦੇ ਬਾਵਜੂਦ ਸਾਲ 2019 ਦੇ ਸਾਉਣੀ ਸੀਜ਼ਨ 'ਚ ਅਨਾਜ ਉਤਪਾਦਨ 14.8 ਕਰੋੜ ਟਨ ਰਹਿ ਸਕਦਾ ਹੈ, ਜੋ ਪਿਛਲੇ ਸੀਜ਼ਨ 'ਚ 14.2 ਕਰੋੜ ਟਨ ਦੇ ਅਨੁਮਾਨਿਤ ਉਤਪਾਦਨ ਨਾਲੋਂ ਲਗਭਗ 4.4 ਫੀਸਦੀ ਵੱਧ ਹੈ।ਖੇਤੀਬਾੜੀ ਮੰਤਰਾਲਾ ਵੱਲੋਂ ਜਾਰੀ ਅੰਕੜਿਆਂ ਮੁਤਾਬਕ, ਸਾਉਣੀ ਸੀਜ਼ਨ 'ਚ ਮੋਟੇ ਅਨਾਜ, ਦਾਲਾਂ ਤੇ ਤੇਲ ਬੀਜਾਂ ਦੇ ਉਤਪਾਦਨ 'ਚ ਕਾਫੀ ਵਾਧਾ ਹੋਣ ਦਾ ਅੰਦਾਜ਼ਾ ਹੈ, ਜਦੋਂ ਕਿ ਚਾਵਲ ਉਤਪਾਦਨ ਵੱਧ ਜਾਂ ਘੱਟ ਰਹਿਣ ਦੀ ਸੰਭਾਵਨਾ ਹੈ।
ਮੋਟੇ ਅਨਾਜ ਦਾ ਉਤਪਾਦਨ 3.6 ਕਰੋੜ ਟਨ ਰਹਿਣ ਦੀ ਸੰਭਾਵਨਾ ਹੈ, ਜੋ ਪਹਿਲਾਂ 3.1 ਕਰੋੜ ਟਨ ਰਹਿਣ ਦਾ ਅੰਦਾਜ਼ਾ ਸੀ। ਉੱਥੇ ਹੀ, ਦਾਲਾਂ ਦਾ ਉਤਪਾਦਨ 100 ਲੱਖ ਟਨ ਤੋਂ ਵੱਧ ਪਹੁੰਚਣ ਦਾ ਅੰਦਾਜ਼ਾ ਹੈ, ਜੋ ਪਿਛਲੇ ਸਾਲ ਦੇ ਅਨੁਮਾਨਿਤ ਅੰਦਾਜ਼ੇ 85.9 ਲੱਖ ਟਨ ਨਾਲੋਂ ਕਿਤੇ ਵੱਧ ਹੈ। ਉੱਥੇ ਹੀ, 2019 ਦੇ ਸਾਉਣੀ ਸੀਜ਼ਨ 'ਚ ਤੇਲ ਬੀਜ਼ਾਂ ਦਾ ਉਤਪਾਦਨ 20 ਫੀਸਦੀ ਵੱਧ ਕੇ 258.4 ਲੱਖ ਟਨ 'ਤੇ ਪਹੁੰਚ ਸਕਦਾ ਹੈ। ਇਸ ਸਾਉਣੀ ਸੀਜ਼ਨ 'ਚ ਚਾਵਲ ਉਤਪਾਦਨ 10.2 ਕਰੋੜ ਟਨ ਰਹਿਣ ਦਾ ਅੰਦਾਜ਼ਾ ਹੈ, ਜੋ ਪਿਛਲੇ ਸਾਲ ਦੇ ਅੰਦਾਜ਼ਨ ਉਤਪਾਦਨ ਦੇ ਲਗਭਗ ਬਰਾਬਰ ਹੀ ਹੈ। ਉੱਥੇ ਹੀ, ਸਰਕਾਰ ਦਾ ਅੰਦਾਜ਼ਾ ਹੈ ਕਿ ਸਾਉਣੀ ਤੇ ਹਾੜ੍ਹੀ ਨੂੰ ਮਿਲਾ ਕੇ ਪੂਰੇ ਸਾਲ 'ਚ ਅਨਾਜ ਉਤਪਾਦਨ 29.11 ਕਰੋੜ ਟਨ ਰਹਿ ਸਕਦਾ ਹੈ, ਜੋ ਪਹਿਲੇ ਅਨੁਮਾਨ 28.5 ਕਰੋੜ ਟਨ ਤੋਂ ਤਕਰੀਬਨ 2.2 ਫੀਸਦੀ ਵੱਧ ਹੈ। ਸਰਕਾਰ ਨੂੰ ਉਮੀਦ ਹੈ ਕਿ ਮਾਨਸੂਨ ਦੀ ਚੰਗੀ ਬਾਰਸ਼ ਨਾਲ ਇਸ ਵਾਰ ਸਾਉਣੀ-ਹਾੜ੍ਹੀ ਫਸਲਾਂ ਦਾ ਉਤਪਾਦਨ ਕਾਫੀ ਬਿਹਤਰ ਰਹਿਣ ਵਾਲਾ ਹੈ।
'ਮੰਗੋਲੀਆ 'ਚ ਭਾਰਤ ਦੀ ਸਹਾਇਤਾ ਨਾਲ ਤੇਲ ਸੋਧ ਕਾਰਖਾਨਾ 2022 ਦੇ ਆਖਿਰ ਤੱਕ ਹੋਵੇਗਾ ਤਿਆਰ'
NEXT STORY 
