ਨਵੀਂ ਦਿੱਲੀ - ਦੇਸ਼ ’ਚ ਬਿਜਲੀ ਨਾਲ ਚੱਲਣ ਵਾਲੇ ਦੋਪਹੀਆ ਵਾਹਨਾਂ ਦੀ ਵਧਦੀ ਮੰਗ ਨੂੰ ਦੇਖਦਿਆਂ ਹੀਰੋ ਮੋਟੋਕਾਰਪ ਨੇ ਆਪਣੀ ਇਲੈਕਟ੍ਰਿਕ ਵਾਹਨ ਉਤਪਾਦਨ ਸਮਰੱਥਾ ਨੂੰ ਤੇਜ਼ੀ ਨਾਲ ਵਧਾਉਣ ਦੀ ਤਿਆਰੀ ਕਰ ਲਈ ਹੈ। ਕੰਪਨੀ ਦਾ ਟੀਚਾ ਮੌਜੂਦਾ ਕਰੀਬ 30,000 ਇਲੈਕਟ੍ਰਿਕ ਦੋਪਹੀਆ ਵਾਹਨਾਂ ਦੀ ਮਹੀਨਾਵਾਰ ਉਤਪਾਦਨ ਸਮਰੱਥਾ ਨੂੰ ਵਧਾ ਕੇ ਵਿੱਤੀ ਸਾਲ ਦੇ ਆਖਿਰ ਤੱਕ 45,000 ਯੂਨਿਟ ਪ੍ਰਤੀ ਮਹੀਨਾ ਕਰਨ ਦਾ ਹੈ। ਭਾਵ ਕੰਪਨੀ ਆਪਣੀ ਈ. ਵੀ. ਉਤਪਾਦਨ ਸਮਰੱਥਾ ਨੂੰ ਪਿਛਲੇ ਵਿੱਤੀ ਸਾਲ ਦੀ 15,000 ਯੂਨਿਟ ਪ੍ਰਤੀ ਮਹੀਨਾ ਸਮਰੱਥਾ ਦੇ ਮੁਕਾਬਲੇ ਕਰੀਬ 3 ਗੁਣਾ ਕਰਨ ਜਾ ਰਹੀ ਹੈ।
ਮੰਗ ਨੇ ਵਧਾਇਆ ਉਤਪਾਦਨ ਦਾ ਦਬਾਅ
ਹੀਰੋ ਮੋਟੋਕਾਰਪ ਦੇ ਮੁੱਖ ਕਾਰਜਕਾਰੀ ਅਧਿਕਾਰੀ ਹਰਸ਼ਵਰਧਨ ਚਿਤਾਲੇ ਮੁਤਾਬਕ ਅਗਸਤ ਦੇ ਪਹਿਲੇ ਹਫਤੇ ਤੱਕ ਕੰਪਨੀ ਦੀ ਉਤਪਾਦਨ ਸਮਰੱਥਾ ਵਧ ਕੇ ਕਰੀਬ 30,000 ਯੂਨਿਟ ਪ੍ਰਤੀ ਮਹੀਨਾ ਹੋ ਚੁੱਕੀ ਹੈ। ਉਨ੍ਹਾਂ ਕਿਹਾ ਕਿ ਕੰਪਨੀ ਵਿੱਤੀ ਸਾਲ ਖਤਮ ਹੋਣ ਤੋਂ ਪਹਿਲਾਂ ਇਸ ਨੂੰ 45,000 ਯੂਨਿਟ ਪ੍ਰਤੀ ਮਹੀਨਾ ਤੱਕ ਲੈ ਜਾਣ ਦੀ ਦਿਸ਼ਾ ’ਚ ਅੱਗੇ ਵਧ ਰਹੀ ਹੈ।
ਡੀਲਰਾਂ ਕੋਲ ਵੀ ਨਹੀਂ ਬਚ ਰਿਹਾ ਜ਼ਿਆਦਾ ਸਟਾਕ
ਈ. ਵੀ. ਦੀ ਮੰਗ ’ਚ ਤੇਜ਼ੀ ਦਾ ਅੰਦਾਜ਼ਾ ਇਸ ਗੱਲ ਤੋਂ ਲਾਇਆ ਜਾ ਸਕਦਾ ਹੈ ਕਿ ਕੰਪਨੀ ਦੇ ਡੀਲਰਸ਼ਿਪ ਨੈੱਟਵਰਕ ’ਚ ਵਾਧੂ ਸਟਾਕ ਲੱਗਭਗ ਨਾ ਦੇ ਬਰਾਬਰ ਹੈ। ਕੰਪਨੀ ਮੁਤਾਬਕ ਵੱਖ-ਵੱਖ ਖੇਤਰਾਂ ’ਚ ਡੀਲਰਾਂ ਕੋਲ ਸਿਰਫ 2 ਤੋਂ 3 ਦਿਨਾਂ ਦਾ ਸਟਾਕ ਮੌਜੂਦ ਹੈ। ਉਤਪਾਦਨ ਤੋਂ ਨਿਕਲਣ ਵਾਲੀਆਂ ਗੱਡੀਆਂ ਦੀ ਪ੍ਰਚੂਨ ਵਿਕਰੀ ਵੀ ਲੱਗਭਗ ਤੁਰੰਤ ਹੋ ਰਹੀ ਹੈ।
ਈ. ਵੀ. ਵਿਕਰੀ ’ਚ 151 ਫੀਸਦੀ ਦਾ ਉਛਾਲ
ਹੀਰੋ ਮੋਟੋਕਾਰਪ ਦੇ ਇਲੈਕਟ੍ਰਿਕ ਵਾਹਨ ਕਾਰੋਬਾਰ ਨੇ ਜੂਨ ਤਿਮਾਹੀ ’ਚ ਜ਼ਬਰਦਸਤ ਵਾਧਾ ਦਰਜ ਕੀਤਾ। ਕੰਪਨੀ ਦੀ ਈ. ਵੀ. ਵਿਕਰੀ ’ਚ ਸਾਲਾਨਾ ਆਧਾਰ ’ਤੇ 151 ਫੀਸਦੀ ਦਾ ਵਾਧਾ ਹੋਇਆ। ਇਲੈਕਟ੍ਰਿਕ ਵਾਹਨ ਕਾਰੋਬਾਰ ਤੋਂ ਕੰਪਨੀ ਦਾ ਮਾਲੀਆ ਕਰੀਬ 660 ਕਰੋੜ ਰੁਪਏ ਰਿਹਾ। ਉਤਪਾਦਨ ਸਮਰੱਥਾ ਵਧਣ ਨਾਲ ਕੰਪਨੀ ਨੂੰ ਉਮੀਦ ਹੈ ਕਿ ਕੁੱਲ ਮਾਲੀਏ ’ਚ ਈ. ਵੀ. ਕਾਰੋਬਾਰ ਦੀ ਹਿੱਸੇਦਾਰੀ ਵੀ ਵਧੇਗੀ।
ਪ੍ਰਚੂਨ ਮੰਗ ਮਜ਼ਬੂਤ, ਸਮਰੱਥਾ ਵਧਾਉਣਾ ਜ਼ਰੂਰੀ
ਕੰਪਨੀ ਅਨੁਸਾਰ ਇਲੈਕਟ੍ਰਿਕ ਦੋਪਹੀਆ ਵਾਹਨਾਂ ਦੀ ਪ੍ਰਚੂਨ ਮੰਗ ਮਜ਼ਬੂਤ ਬਣੀ ਹੋਈ ਹੈ। ਉਤਪਾਦਨ ਵਧਾਉਣ ਦਾ ਫੈਸਲਾ ਇਸੇ ਮੰਗ ਨੂੰ ਪੂਰਾ ਕਰਨ ਲਈ ਕੀਤਾ ਜਾ ਰਿਹਾ ਹੈ। ਕੰਪਨੀ ਦਾ ਮੰਨਣਾ ਹੈ ਕਿ ਵਾਧੂ ਸਮਰੱਥਾ ਸ਼ੁਰੂ ਹੋਣ ਤੋਂ ਬਾਅਦ ਵੀ ਵਾਹਨਾਂ ਨੂੰ ਬਾਜ਼ਾਰ ’ਚ ਵਿਕਣ ਲਈ ਜ਼ਿਆਦਾ ਸਮਾਂ ਨਹੀਂ ਲੱਗੇਗਾ।
ਦੋਪਹੀਆ ਬਾਜ਼ਾਰ ’ਚ ਵੀ ਤੇਜ਼ੀ ਦੀ ਉਮੀਦ
ਹੀਰੋ ਮੋਟੋਕਾਰਪ ਨੂੰ ਵਿੱਤੀ ਸਾਲ 2027 ’ਚ ਘਰੇਲੂ ਦੋਪਹੀਆ ਬਾਜ਼ਾਰ ਦੇ ਉੱਚ ਸਿੰਗਲ ਡਿਜਿਟ ਤੋਂ ਲੈ ਕੇ ਕਰੀਬ ਡਬਲ ਡਿਜਿਟ ਤੱਕ ਵਧਣ ਦੀ ਉਮੀਦ ਹੈ। ਅਜਿਹੇ ’ਚ ਕੰਪਨੀ ਇਲੈਕਟ੍ਰਿਕ ਦੇ ਨਾਲ-ਨਾਲ ਆਪਣੇ ਰਵਾਇਤੀ ਦੋਪਹੀਆ ਕਾਰੋਬਾਰ ’ਚ ਵੀ ਮੰਗ ਵਧਣ ਦੀ ਸੰਭਾਵਨਾ ਨੂੰ ਧਿਆਨ ’ਚ ਰੱਖ ਕੇ ਅੱਗੇ ਵਧ ਰਹੀ ਹੈ।
15 ਹਜ਼ਾਰ ਤੋਂ 45 ਹਜ਼ਾਰ ਯੂਨਿਟ ਪ੍ਰਤੀ ਮਹੀਨੇ ਦਾ ਸਫਰ
ਕੰਪਨੀ ਨੇ ਵਿੱਤੀ ਸਾਲ 2026 ’ਚ ਕਰੀਬ 15,000 ਯੂਨਿਟ ਪ੍ਰਤੀ ਮਹੀਨਾ ਦੀ ਈ. ਵੀ. ਉਤਪਾਦਨ ਸਮਰੱਥਾ ਨਾਲ ਸ਼ੁਰੂਆਤ ਕੀਤੀ ਸੀ। ਹੁਣ ਇਹ ਸਮਰੱਥਾ ਲੱਗਭਗ 30,000 ਯੂਨਿਟ ਪ੍ਰਤੀ ਮਹੀਨਾ ਤੱਕ ਪਹੁੰਚ ਚੁੱਕੀ ਹੈ। ਵਿੱਤੀ ਸਾਲ 2027 ਦੇ ਆਖਿਰ ਤੱਕ ਇਸ ਨੂੰ 45,000 ਯੂਨਿਟ ਪ੍ਰਤੀ ਮਹੀਨਾ ਕਰਨ ਦਾ ਟੀਚਾ ਰੱਖਿਆ ਗਿਆ ਹੈ। ਭਾਵ ਕੁਝ ਹੀ ਸਮੇਂ ’ਚ ਉਤਪਾਦਨ ਸਮਰੱਥਾ 3 ਗੁਣਾ ਕਰਨ ਦੀ ਤਿਆਰੀ ਹੈ।
ਛੋਟੇ ਦੁਕਾਨਦਾਰਾਂ ਲਈ UPI ਵਰਤਣ 'ਤੇ ਲੱਗੇਗੀ ਫੀਸ ! ਵਿਵਾਦ ਵਿਚਾਲੇ PCI ਨੇ ਦਿੱਤੀ ਸਫਾਈ
NEXT STORY 
