ਨਵੀਂ ਦਿੱਲੀ- ਦੇਸ਼ ਦੀ ਸਭ ਤੋਂ ਵੱਡੀ ਦੋਪਹੀਆ ਵਾਹਨ ਨਿਰਮਾਤਾ ਕੰਪਨੀ ਹੀਰੋ ਮੋਟੋਕਾਰਪ ਨੇ ਵਿੱਤੀ ਸਾਲ 2026-27 ’ਚ ਦੋਹਰੇ ਅੰਕ ਦਾ ਵਾਧਾ ਦਰਜ ਕਰਨ ਦਾ ਭਰੋਸਾ ਜਤਾਇਆ ਹੈ। ਕੰਪਨੀ ਦਾ ਕਹਿਣਾ ਹੈ ਕਿ ਉਹ ਇਸ ਦੌਰਾਨ 12 ਤੋਂ ਵੱਧ ਨਵੇਂ ਉਤਪਾਦ ਬਾਜ਼ਾਰ ’ਚ ਉਤਾਰੇਗੀ ਅਤੇ ਇਲੈਕਟ੍ਰਿਕ ਸਕੂਟਰ ਕਾਰੋਬਾਰ ਨੂੰ ਤੇਜ਼ੀ ਨਾਲ ਵਧਾਏਗੀ।
ਕੰਪਨੀ ਦੇ ਮੁੱਖ ਕਾਰਜਕਾਰੀ ਅਧਿਕਾਰੀ (ਸੀ. ਈ. ਓ.) ਹਰਸ਼ਵਰਧਨ ਚਿਤਲੇ ਨੇ ਇੰਟਰਵਿਊ ’ਚ ਕਿਹਾ ਕਿ ਸਕੂਟਰ ਕਾਰੋਬਾਰ ਕੰਪਨੀ ਲਈ ਪ੍ਰਮੁੱਖ ਵਾਧੇ ਦੇ ਕੇਂਦਰ ਵਜੋਂ ਉੱਭਰ ਰਿਹਾ ਹੈ। ਉਨ੍ਹਾਂ ਨੇ ਉਮੀਦ ਜਤਾਈ ਕਿ ਸਾਲ 2030 ਤੱਕ ਕੰਪਨੀ ਦੀ ਕੁੱਲ ਸਕੂਟਰ ਵਿਕਰੀ ’ਚ ਇਲੈਕਟ੍ਰਿਕ ਸਕੂਟਰ ਦੀ ਹਿੱਸੇਦਾਰੀ 50 ਫੀਸਦੀ ਤੋਂ ਵੱਧ ਹੋ ਜਾਵੇਗੀ।
ਉਨ੍ਹਾਂ ਕਿਹਾ ਕਿ ਘੱਟ ਪ੍ਰਦੂਸ਼ਣ ਵਾਲੇ ਪਾਵਰਟ੍ਰੇਨ ਦੀ ਮੰਗ ਉਦਯੋਗ ’ਚ ਤੇਜ਼ੀ ਨਾਲ ਵਧ ਰਹੀ ਹੈ ਅਤੇ ਬਾਜ਼ਾਰ ’ਚ ਆਪਣੀ ਮੋਹਰੀ ਸਥਿਤੀ ਬਣਾਈ ਰੱਖਣ ਲਈ ਕੰਪਨੀ ਵੱਖ-ਵੱਖ ਬਦਲਾਂ ’ਤੇ ਕੰਮ ਕਰ ਰਹੀ ਹੈ। ਚਿਤਲੇ ਨੇ ਕਿਹਾ ਅਜੇ ਤੱਕ ਅਸੀਂ ਸਭ ਤੋਂ ਅੱਗੇ ਹਾਂ। ਅੱਗੇ ਵੀ ਮੋਹਰੀ ਬਣੇ ਰਹਿਣ ਦੀ ਉਮੀਦ ਕਰਦੇ ਹਾਂ। ਸਾਡਾ ਪੂਰਾ ਧਿਆਨ ਗਾਹਕਾਂ ਲਈ ਸੁਰੱਖਿਅਤ ਅਤੇ ਵਧੇਰੇ ਕੁਸ਼ਲ ਉਤਪਾਦ ਉਪਲੱਬਧ ਕਰਵਾਉਣ ’ਤੇ ਹੈ। ਸਾਡੇ ਉਤਪਾਦਾਂ ਅਤੇ ਡੀਲਰ ਨੈੱਟਵਰਕ ਨੂੰ ਲੈ ਕੇ ਸਾਨੂੰ ਪੂਰਾ ਭਰੋਸਾ ਹੈ।
ਉਨ੍ਹਾਂ ਨੇ ਮੰਨਿਆ ਕਿ ਭਾਰਤੀ ਦੋਪਹੀਆ ਬਾਜ਼ਾਰ ’ਚ ਮੁਕਾਬਲੇਬਾਜ਼ੀ ਕਾਫੀ ਤੇਜ਼ ਹੋ ਚੁੱਕੀ ਹੈ ਪਰ ਵਾਹਨ ਨਿਰਮਾਤਾਵਾਂ ਦੀ ਸੰਸਥਾ ਸਿਆਮ ਦੇ ਅੰਕੜਿਆਂ ਨੂੰ ਦੇਖੀਏ ਤਾਂ ਕੰਪਨੀ ਦੀ ਮੋਹਰੀ ਸਥਿਤੀ ਹੋਰ ਬਿਹਤਰ ਹੋਈ ਹੈ। ਪਿਛਲੇ 6-7 ਸਾਲਾਂ ’ਚ ਮੁਕਾਬਲੇਬਾਜ਼ਾਂ ਨਾਲ ਫਰਕ ਘਟ ਰਿਹਾ ਸੀ ਪਰ ਬੀਤੇ ਵਿੱਤੀ ਸਾਲ ’ਚ ਕੰਪਨੀ ਨੇ ਦੁਬਾਰਾ ਬੜ੍ਹਤ ਮਜ਼ਬੂਤ ਕੀਤੀ ਹੈ।
ਕੰਪਨੀ ਦਾ ਕਹਿਣਾ ਹੈ ਕਿ ਸਕੂਟਰ, ਇਲੈਕਟ੍ਰਿਕ ਵਾਹਨ, 125 ਸੀ. ਸੀ. ਤੋਂ ਉੱਪਰ ਦੀ ਮੋਟਰਸਾਈਕਲ ਅਤੇ ਪ੍ਰਵੇਸ਼ ਪੱਧਰ ਦੀ ਬਾਈਕ ’ਚ ਮਜ਼ਬੂਤ ਪ੍ਰਦਰਸ਼ਨ ਕਾਰਨ ਉਸ ਦੀ ਬਾਜ਼ਾਰ ਸਥਿਤੀ ਹੋਰ ਮਜ਼ਬੂਤ ਹੋਈ ਹੈ। ਸੋਸਾਇਟੀ ਆਫ ਇੰਡੀਅਨ ਆਟੋਮੋਬਾਈਲ ਮੈਨੂਫੈਕਚਰਰਜ਼ (ਸਿਆਮ) ਦੇ ਅੰਕੜਿਆਂ ਅਨੁਸਾਰ ਹੀਰੋ ਮੋਟੋਕਾਰਪ ਨੇ 2025-26 ’ਚ 54.93 ਲੱਖ ਮੋਟਰਸਾਈਕਲ ਅਤੇ 5.72 ਲੱਖ ਸਕੂਟਰ ਵੇਚੇ।
ਉੱਥੇ ਹੀ ਵਿਰੋਧੀ ਹੌਂਡਾ ਮੋਟਰਸਾਈਕਲ ਐਂਡ ਸਕੂਟਰ ਇੰਡੀਆ ਨੇ ਇਸੇ ਮਿਆਦ ’ਚ 25.89 ਲੱਖ ਮੋਟਰਸਾਈਕਲ ਅਤੇ 31.62 ਲੱਖ ਸਕੂਟਰ ਦੀ ਵਿਕਰੀ ਕੀਤੀ। ਚਾਲੂ ਵਿੱਤ ਸਾਲ ਦੇ ਅੰਦਾਜ਼ੇ ਬਾਰੇ ਚਿਤਲੇ ਨੇ ਕਿਹਾ ਕਿ ਬੀਤੇ ਵਿੱਤੀ ਸਾਲ ਦਾ ਦੋਹਰੇ ਅੰਕ ਦਾ ਵਾਧਾ ਇਸ ਸਾਲ ਵੀ ਜਾਰੀ ਰਹਿਣ ਦੀ ਉਮੀਦ ਹੈ।
ਇਲੈਕਟ੍ਰਿਕ ਵਾਹਨ ਅਤੇ ਸਕੂਟਰ ਕਾਰੋਬਾਰ ’ਚ ਮਜ਼ਬੂਤ ਮੰਗ ਪ੍ਰਮੁੱਖ ਕਾਰਨ ਹੋਣਗੇ। ਨਵੇਂ ਉਤਪਾਦਾਂ ਬਾਰੇ ਉਨ੍ਹਾਂ ਕਿਹਾ ਕਿ ਕੰਪਨੀ ਆਮ ਤੌਰ ’ਤੇ ਹਰ ਸਾਲ 10 ਤੋਂ 12 ਵੱਡੇ ਮਾਡਲ ਪੇਸ਼ ਕਰਦੀ ਹੈ ਅਤੇ ਇਸ ਵਾਰ ਅੰਕੜਾ ਇਸ ਤੋਂ ਵੀ ਵੱਧ ਹੋ ਸਕਦਾ ਹੈ।
ਬਕਰੀਦ ਦੇ ਮੌਕੇ 'ਤੇ ਕਿਸ ਦਿਨ ਹੈ ਸ਼ੇਅਰ ਬਾਜ਼ਾਰ 'ਚ ਛੁੱਟੀ, ਜਾਣੋ ਪੂਰਾ ਵੇਰਵਾ
NEXT STORY 
