ਨਵੀਂ ਦਿੱਲੀ- ਇਨਕਮ ਟੈਕਸ ਨਾਲ ਜੁੜੇ ਕੁਝ ਨਿਯਮਾਂ 'ਚ 1 ਅਕਤੂਬਰ 2024 ਤੋਂ ਬਦਲਾਅ ਹੋ ਰਿਹਾ ਹੈ। ਇਸ ਸਾਲ ਜੁਲਾਈ ਵਿੱਚ ਪੇਸ਼ ਕੀਤੇ ਗਏ ਬਜਟ ਵਿੱਚ ਇਨ੍ਹਾਂ ਨਿਯਮਾਂ ਦਾ ਜ਼ਿਕਰ ਕੀਤਾ ਗਿਆ ਸੀ। ਜੋ ਤਬਦੀਲੀਆਂ ਹੋਣਗੀਆਂ ਉਨ੍ਹਾਂ ਵਿੱਚ ਆਧਾਰ ਕਾਰਡ, ਐੱਸ.ਟੀ.ਟੀ., ਟੀ.ਡੀ.ਐੱਸ ਦਰ ਆਦਿ ਸ਼ਾਮਲ ਹਨ। ਭਾਵੇਂ ਕੋਈ ਰੈਗੂਲਰ ਇਨਕਮ ਟੈਕਸ ਰਿਟਰਨ ਫਾਈਲ ਕਰਦਾ ਹੈ ਜਾਂ ਪਹਿਲੀ ਵਾਰ ਟੈਕਸ ਭਰਨ ਜਾ ਰਿਹਾ ਹੈ, ਹਰ ਕਿਸੇ ਨੂੰ ਇਨ੍ਹਾਂ ਨਿਯਮਾਂ ਵਿੱਚ ਬਦਲਾਅ ਬਾਰੇ ਪਤਾ ਹੋਣਾ ਚਾਹੀਦਾ ਹੈ। ਜੇਕਰ ਤੁਸੀਂ ਇਨ੍ਹਾਂ ਨਿਯਮਾਂ ਤੋਂ ਜਾਣੂ ਨਹੀਂ ਹੋ, ਤਾਂ ਤੁਸੀਂ ਕਈ ਸਮੱਸਿਆਵਾਂ ਵਿੱਚ ਫਸ ਸਕਦੇ ਹੋ।
ਅਕਤੂਬਰ ਤੋਂ ਲਾਗੂ ਹੋਣਗੇ ਇਹ ਨਿਯਮ
1. ਐੱਸ.ਟੀ.ਟੀ.
ਜੁਲਾਈ 2024 ਵਿੱਚ ਪੇਸ਼ ਕੀਤੇ ਗਏ ਬਜਟ ਵਿੱਚ, ਫਿਊਚਰਜ਼ ਐਂਡ ਆਪਸ਼ੰਸ (F&O) 'ਤੇ ਸਕਿਓਰਿਟੀਜ਼ ਟ੍ਰਾਂਜੈਕਸ਼ਨ ਟੈਕਸ (STT) ਨੂੰ ਵਧਾਉਣ ਦੀ ਗੱਲ ਕਹੀ ਗਈ ਸੀ। ਫਿਊਚਰਜ਼ 'ਤੇ STT 0.02 ਫੀਸਦੀ ਅਤੇ ਆਪਸ਼ੰਸ 'ਤੇ 0.1 ਫੀਸਦੀ ਵਧਾਇਆ ਗਿਆ ਹੈ। ਇਸ ਤੋਂ ਇਲਾਵਾ ਲਾਭਪਾਤਰੀਆਂ ਨੂੰ ਸ਼ੇਅਰ ਬਾਇਬੈਕ ਤੋਂ ਹੋਣ ਵਾਲੀ ਆਮਦਨ 'ਤੇ ਵੀ ਟੈਕਸ ਲੱਗੇਗਾ। ਇਹ ਸੋਧ ਪਾਸ ਹੋ ਗਿਆ ਹੈ ਅਤੇ 1 ਅਕਤੂਬਰ ਤੋਂ ਲਾਗੂ ਹੋਵੇਗਾ।
2. ਆਧਾਰ
ITR ਵਿੱਚ ਆਧਾਰ ਨੰਬਰ ਅਤੇ ਆਧਾਰ ਅਤੇ ਪੈਨ ਐਪਲੀਕੇਸ਼ਨਾਂ ਦੇ ਬਦਲੇ ਆਧਾਰ ਨਾਮਾਂਕਣ ID ਦਾ ਹਵਾਲਾ ਦੇਣ ਦੀ ਇਜਾਜ਼ਤ ਦੇਣ ਵਾਲੇ ਉਪਬੰਧ 1 ਅਕਤੂਬਰ ਤੋਂ ਲਾਗੂ ਨਹੀਂ ਹੋਣਗੇ। ਇਹ ਕਦਮ ਪੈਨ ਦੀ ਦੁਰਵਰਤੋਂ ਅਤੇ ਨਕਲ ਨੂੰ ਰੋਕਣ ਲਈ ਚੁੱਕਿਆ ਗਿਆ ਹੈ।
3. ਸ਼ੇਅਰਾਂ ਦੀ ਮੁੜ ਖਰੀਦ
1 ਅਕਤੂਬਰ ਤੋਂ ਸ਼ੇਅਰਾਂ ਦੀ ਮੁੜ ਖਰੀਦ (ਬਾਈ ਬੈਕ) 'ਤੇ ਡਿਵਿਡੈਂਡਸ ਦੀ ਤਰ੍ਹਾਂ ਹੀ ਸ਼ੇਅਰਹੋਲਡਰ ਲੈਵਲ ਦੇ ਟੈਕਸ ਲਾਗੂ ਹੋਣਗੇ। ਇਸ ਨਾਲ ਨਿਵੇਸ਼ਕਾਂ 'ਤੇ ਟੈਕਸ ਦਾ ਬੋਝ ਵਧੇਗਾ। ਇਸ ਤੋਂ ਇਲਾਵਾ ਕਿਸੇ ਵੀ ਪੂੰਜੀ ਲਾਭ ਜਾਂ ਘਾਟੇ ਦੀ ਗਣਨਾ ਕਰਦੇ ਸਮੇਂ ਇਨ੍ਹਾਂ ਸ਼ੇਅਰਾਂ ਦੇ ਸ਼ੇਅਰਧਾਰਕਾਂ ਦੀ ਪ੍ਰਾਪਤੀ ਲਾਗਤ ਨੂੰ ਵੀ ਧਿਆਨ 'ਚ ਰੱਖਿਆ ਜਾਵੇਗਾ।
4. ਫਲੋਟਿੰਗ ਰੇਟ ਬਾਂਡ ਟੀ.ਡੀ.ਐੱਸ.
ਬਜਟ 2024 ਵਿੱਚ ਇਹ ਘੋਸ਼ਣਾ ਕੀਤੀ ਗਈ ਸੀ ਕਿ 1 ਅਕਤੂਬਰ, 2024 ਤੋਂ ਫਲੋਟਿੰਗ ਰੇਟ ਬਾਂਡਾਂ ਸਮੇਤ, ਕੁਝ ਕੇਂਦਰੀ ਅਤੇ ਰਾਜ ਸਰਕਾਰ ਦੇ ਬਾਂਡਾਂ ਤੋਂ 10 ਫੀਸਦੀ ਦੀ ਦਰ ਨਾਲ ਟੀ.ਡੀ.ਐੱਸ. ਦੀ ਕਟੌਤੀ ਕੀਤੀ ਜਾਵੇਗੀ। ਜੇਕਰ ਪੂਰੇ ਸਾਲ ਵਿੱਚ ਮਾਲੀਆ 10 ਹਜ਼ਾਰ ਰੁਪਏ ਤੋਂ ਘੱਟ ਹੈ ਤਾਂ ਕੋਈ ਟੀ.ਡੀ.ਐੱਸ. ਨਹੀਂ ਕੱਟਿਆ ਜਾਵੇਗਾ।
5. ਟੀ.ਡੀ.ਐੱਸ. ਦਰਾਂ
ਧਾਰਾ 19ਡੀਏ, 194ਐੱਚ, 194-ਆਈ.ਬੀ. ਅਤੇ 194ਐੱਮ ਦੇ ਤਹਿਤ ਭੁਗਤਾਨ ਲਈ ਟੀ.ਡੀ.ਐੱਸ. ਦਰ 5 ਫੀਸਦੀ ਤੋਂ ਘਟਾ ਕੇ 2 ਫੀਸਦੀ ਕਰ ਦਿੱਤੀ ਗਈ। ਈ-ਕਾਮਰਸ ਆਪਰੇਟਰਾਂ ਲਈ ਟੀ.ਡੀ.ਐੱਸ. ਦਰ ਇਕ ਫੀਸਦੀ ਤੋਂ ਘਟਾ ਕੇ 0.1 ਫੀਸਦੀ ਕਰ ਦਿੱਤੀ ਗਈ ਹੈ। ਇਹ ਨਵੀਆਂ ਦਰਾਂ ਵੀ 1 ਅਕਤੂਬਰ ਤੋਂ ਲਾਗੂ ਹੋ ਜਾਣਗੀਆਂ।
Spice Jet ਦੇ ਕਰਮਚਾਰੀਆਂ ਨੂੰ ਮਿਲੀ ਵੱਡੀ ਰਾਹਤ, ਮਿਲੀ ਬਕਾਇਆ ਤਨਖਾਹ
NEXT STORY 
