ਚੰਡੀਗੜ੍ਹ- ਅੱਜ ਚੰਡੀਗੜ੍ਹ ਵਿਖੇ ਭਾਜਪਾ ਪ੍ਰਦੇਸ਼ ਦਫ਼ਤਰ ਵਿੱਚ ਆਯੋਜਿਤ ਪੱਤਰਕਾਰ ਮਿਲਣੀ ਨੂੰ ਸੰਬੋਧਨ ਕਰਦਿਆਂ ਭਾਜਪਾ ਦੇ ਰਾਸ਼ਟਰੀ ਮਹਾਮੰਤਰੀ ਤਰੁਣ ਚੁੱਘ ਨੇ ਆਮ ਆਦਮੀ ਪਾਰਟੀ ਸਰਕਾਰ ਉੱਤੇ ਤਿੱਖਾ ਹਮਲਾ ਕਰਦਿਆਂ ਕਿਹਾ ਕਿ ਸੂਬਾ ਸਰਕਾਰ ਨੇ ਪੰਜਾਬ ਨੂੰ ਭ੍ਰਿਸ਼ਟਾਚਾਰ, ਕ੍ਰਾਈਮ ਅਤੇ ਡਰੱਗ ਦੀ ਰਾਜਧਾਨੀ ਬਣਾ ਦਿੱਤਾ ਹੈ। ਉਨ੍ਹਾਂ ਕਿਹਾ ਕਿ ਜਿਹੜੀ ਪਾਰਟੀ 'ਕੱਟੜ ਇਮਾਨਦਾਰਾਂ ਦੀ ਪਾਰਟੀ' ਬਣਨ ਦਾ ਦਾਅਵਾ ਕਰਕੇ ਸੱਤਾ ਵਿੱਚ ਆਈ ਸੀ, ਉਹ ਅੱਜ ਕੱਟੜ ਬੇਈਮਾਨਾਂ ਦੀ ਪਾਰਟੀ ਬਣ ਚੁੱਕੀ ਹੈ। ਤਰੁਣ ਚੁੱਘ ਨੇ ਕਿਹਾ ਕਿ ਇਸ ਸਰਕਾਰ ਵਿੱਚ ਭ੍ਰਿਸ਼ਟਾਚਾਰ ਪੂਰੀ ਤਰ੍ਹਾਂ ਸੰਸਥਾਗਤ ਹੋ ਚੁੱਕਾ ਹੈ ਅਤੇ ਜਿਸ ਵਿਜਿਲੈਂਸ ਵਿਭਾਗ ਨੂੰ ਭ੍ਰਿਸ਼ਟਾਚਾਰ ਰੋਕਣ ਲਈ ਬਣਾਇਆ ਗਿਆ ਸੀ, ਉਹ ਖ਼ੁਦ ਭ੍ਰਿਸ਼ਟਾਚਾਰ ਦੀ ਦਲਦਲ ਵਿੱਚ ਫ਼ਸਿਆ ਹੋਇਆ ਹੈ।
ਖਨਨ ਘੁਟਾਲੇ ਉੱਤੇ ਬੋਲਦਿਆਂ ਤਰੁਣ ਚੁੱਘ ਨੇ ਕਿਹਾ ਕਿ ਅਰਵਿੰਦ ਕੇਜਰੀਵਾਲ ਖ਼ਾਸ ਤੌਰ 'ਤੇ ਚੰਡੀਗੜ੍ਹ ਆ ਕੇ 20,000 ਕਰੋੜ ਰੁਪਏ ਖਜ਼ਾਨੇ ਵਿੱਚ ਆਉਣ ਦਾ ਵਾਅਦਾ ਕਰ ਕੇ ਗਏ ਸਨ, ਪਰ ਰਿਕਾਰਡ ਕਢਾ ਲਓ — ਹਜ਼ਾਰ ਕਰੋੜ ਵੀ ਪੂਰੇ ਨਹੀਂ ਹੋਏ। ਉਨ੍ਹਾਂ ਕਿਹਾ ਕਿ ਲਗਭਗ 19,200 ਕਰੋੜ ਰੁਪਏ ਦੀ ਲੁੱਟ ਹੋ ਚੁੱਕੀ ਹੈ। ਸਤਲੁਜ ਬੰਨ੍ਹ ਦੀ ਤ੍ਰਾਸਦੀ ਉੱਤੇ ਤਰੁਣ ਚੁੱਘ ਨੇ ਸਪਸ਼ਟ ਕਿਹਾ ਕਿ ਇਹ ਕੋਈ ਕੁਦਰਤੀ ਆਫ਼ਤ ਨਹੀਂ, ਸਗੋਂ 'ਆਪ' ਕਾਰਕੁਨਾਂ ਦੇ ਨਾਜਾਇਜ਼ ਖਨਨ ਦੀ ਪੈਦਾਇਸ਼ ਮਨੁੱਖ-ਨਿਰਮਿਤ ਆਫ਼ਤ ਹੈ। ਪਿੰਡ ਵਾਸੀਆਂ ਨੇ ਅਪ੍ਰੈਲ 2025 ਤੋਂ ਹੀ ਅੰਦੋਲਨ ਅਤੇ FIR ਦੇ ਜ਼ਰੀਏ ਸਰਕਾਰ ਨੂੰ ਚੇਤਾਇਆ ਸੀ, ਪਰ ਭ੍ਰਿਸ਼ਟਾਚਾਰ ਦੀ ਹਵਸ ਏਨੀ ਵੱਡੀ ਸੀ ਕਿ ਪੰਜਾਬ ਦੇ 2100 ਪਿੰਡ ਡੁੱਬ ਗਏ।
ਤਰੁਣ ਚੁੱਘ ਨੇ ਕਿਹਾ ਕਿ 'ਆਪ' ਸ਼ਾਸਨ ਵਿੱਚ ਹਰ ਸਾਲ ਪੰਜਾਬ 'ਤੇ ਇੱਕ ਨਵਾਂ ਪ੍ਰਹਾਰ ਹੋਇਆ ਹੈ — ਪਹਿਲੇ ਸਾਲ ਗੈਂਗਸਟਰ, ਦੂਜੇ ਸਾਲ ਰੰਗਦਾਰੀ, ਤੀਜੇ ਸਾਲ ਲੁਟੇਰਾ ਗੈਂਗ ਅਤੇ ਹੁਣ ਚੌਥੇ ਸਾਲ ਸੰਸਥਾਗਤ ਭ੍ਰਿਸ਼ਟਾਚਾਰ ਅਤੇ ਟਾਰਚਰ ਸੈਂਟਰ। ਉਨ੍ਹਾਂ ਕਿਹਾ ਕਿ 'ਆਪ' ਦੇ MLA, ਮੰਤਰੀ ਅਤੇ ਪ੍ਰਧਾਨ ਖੁੱਲ੍ਹੇਆਮ ਟਾਰਚਰ ਸੈਂਟਰ ਚਲਾ ਰਹੇ ਹਨ। ਅੰਮ੍ਰਿਤਸਰ ਦੇ ਮਾਮਲੇ ਦਾ ਜ਼ਿਕਰ ਕਰਦਿਆਂ ਉਨ੍ਹਾਂ ਕਿਹਾ ਕਿ ਇੱਕ ਮੰਤਰੀ ਨੇ ਆਪਣੇ ਘਰ ਵਿੱਚ ਟਾਰਚਰ ਸੈਂਟਰ ਬਣਾ ਕੇ ਅਫ਼ਸਰਾਂ ਤੋਂ ਜ਼ਬਰਦਸਤੀ ਦਸਤਖ਼ਤ ਕਰਵਾਏ, ਸਟੈਂਪ ਪੇਪਰ 'ਤੇ ਸਾਈਨ ਲਏ ਅਤੇ ਟੈਂਡਰ ਆਪਣੇ ਬੰਦੇ ਨੂੰ ਦਿਵਾਇਆ — ਪਰ ਅੱਜ ਤੱਕ ਮੁੱਖ ਦੋਸ਼ੀ ਨਹੀਂ ਫ਼ੜਿਆ ਗਿਆ। ਤਰੁਣ ਚੁੱਘ ਨੇ ਨਵੇਂ ਉਗਰਾਹੀ ਤੰਤਰ 'ਤੇ ਵੀ ਚਾਨਣਾ ਪਾਉਂਦਿਆਂ ਦੱਸਿਆ ਕਿ ਅਫ਼ਸਰਾਂ ਤੋਂ BNRP (ਮਹੀਨੇਵਾਰ ਰਕਮ) ਜਮ੍ਹਾਂ ਕਰਵਾਈ ਜਾ ਰਹੀ ਹੈ।
ਤਰੁਣ ਚੁੱਘ ਨੇ ਕੈਬਨਿਟ ਮੰਤਰੀ ਸੰਜੀਵ ਅਰੋੜਾ ਖ਼ਿਲਾਫ਼ ED ਦੀ ਕਾਰਵਾਈ ਦਾ ਹਵਾਲਾ ਦਿੰਦਿਆਂ ਕਿਹਾ ਕਿ 100 ਕਰੋੜ ਰੁਪਏ ਦੀ ਮਨੀ ਲਾਂਡਰਿੰਗ ਦੇ ਪੱਕੇ ਦਸਤਾਵੇਜ਼ ED ਕੋਲ ਹਨ, ਫ਼ਿਰ ਵੀ ਪੰਜਾਬ ਸਰਕਾਰ ਦੋਸ਼ੀਆਂ ਨਾਲ ਖੜੀ ਹੋ ਕੇ ਪ੍ਰੈਸ ਕਰ ਰਹੀ ਹੈ। ਉਨ੍ਹਾਂ ਕਿਹਾ, "ਪੰਜਾਬ ਨੂੰ ਲੁੱਟਣ ਵਾਲਿਆਂ ਨੂੰ ਬਚਾਉਣਾ 'ਪੰਜਾਬ ਪ੍ਰਾਈਡ' ਨਹੀਂ ਹੈ, ਭਗਵੰਤ ਮਾਨ ਸਾਹਿਬ — ਸ਼ਰਮ ਆਉਣੀ ਚਾਹੀਦੀ ਹੈ।" ਨਸ਼ੇ ਦੀ ਭਿਆਨਕ ਸਥਿਤੀ 'ਤੇ ਤਰੁਣ ਚੁੱਘ ਨੇ ਕਿਹਾ ਕਿ AAP ਵਿਧਾਇਕ ਨੇ ਖ਼ੁਦ ਵਿਧਾਨ ਸਭਾ ਵਿੱਚ ਮੰਨਿਆ ਕਿ 'ਪੰਜਾਬ ਵਿੱਚ ਪੀਜ਼ਾ ਦੀ ਡਿਲੀਵਰੀ ਲੇਟ ਹੋ ਸਕਦੀ ਹੈ, ਨਸ਼ੇ ਦੀ ਨਹੀਂ।' ਪੰਜਾਬ ਪੁਲਿਸ ਦੀ ਗੱਡੀ ਚੋਂ ਚੂਰੀ ਵਿਕਣ ਦਾ ਮਾਮਲਾ ਬਹੁਤ ਸੰਵੇਦਨਸ਼ੀਲ ਹੈ, 'ਯੁੱਧ ਨਸ਼ਿਆਂ ਵਿਰੁੱਧ' ਅਤੇ 'ਰੰਗਲਾ ਪੰਜਾਬ' ਦੋਵੇਂ ਫ਼ੇਲ੍ਹ ਹੋ ਚੁੱਕੇ ਹਨ।
ਕਾਨੂੰਨ-ਵਿਵਸਥਾ ਦਾ ਪੂਰਾ ਡਿੱਗਣਾ — ਖਾਕੀ, ਖਾਦੀ ਤੇ ਬਾਬੂ ਤਿੰਨੋਂ 'ਤੇ AAP ਦਾ ਕਬਜ਼ਾ
ਤਰੁਣ ਚੁੱਘ ਨੇ ਕਿਹਾ ਕਿ ਪੰਜਾਬ ਵਿੱਚ ਅੱਜ ਸਰਪੰਚ ਦੇ ਕਤਲ, ਵਿਆਹਾਂ ਵਿੱਚ ਗੋਲੀਬਾਰੀ, ਦੁਕਾਨਦਾਰਾਂ ਦੇ ਕਤਲ ਅਤੇ ਹਰ ਵੱਡੇ ਡਾਕਟਰ, ਹਸਪਤਾਲ ਤੇ ਉਦਯੋਗਪਤੀ ਨੂੰ ਧਮਕੀ ਭਰੇ ਫ਼ੋਨ ਆਉਣਾ ਆਮ ਗੱਲ ਬਣ ਗਈ ਹੈ। ਉਨ੍ਹਾਂ ਕਿਹਾ ਕਿ ਖਾਕੀ, ਖਾਦੀ ਤੇ ਬਾਬੂ — ਤਿੰਨੋਂ ਨੂੰ ਆਮ ਆਦਮੀ ਪਾਰਟੀ ਕੰਟਰੋਲ ਕਰ ਰਹੀ ਹੈ ਤੇ ਤਿੰਨਾਂ ਤੋਂ ਲੁੱਟ ਕਰਵਾ ਰਹੀ ਹੈ। ਆਪਰੇਸ਼ਨ ਸਿੰਦੂਰ ਤੋਂ 24 ਘੰਟੇ ਪਹਿਲਾਂ ਅੰਮ੍ਰਿਤਸਰ ਕੈਂਟ ਤੇ ਜਲੰਧਰ BSF ਚੌਂਕ 'ਤੇ ਹਮਲੇ ਹੋਏ। ਪੁਲਸ ਸਟੇਸ਼ਨਾਂ 'ਤੇ ਰਾਕੇਟ ਲਾਂਚਰ, ਮੰਦਰ-ਗੁਰੂਦੁਆਰਿਆਂ 'ਤੇ ਗੋਲੀਬਾਰੀ, ਭਾਜਪਾ ਦਫ਼ਤਰਾਂ 'ਤੇ ਬੰਬ — ਸਰਕਾਰ ਕੋਲ ਕੋਈ ਜਵਾਬ ਨਹੀਂ ਹੈ। DGP ਕਹਿੰਦੇ ਹਨ ਪਾਕਿਸਤਾਨ ਲਿੰਕ ਹੈ, ਅਤੇ ਮੁੱਖ ਮੰਤਰੀ ਖੜੇ ਹੋ ਕੇ ਭਾਜਪਾ 'ਤੇ ਦੋਸ਼ ਲਾਉਂਦੇ ਹਨ। ਤਰੁਣ ਚੁੱਘ ਨੇ ਸਪਸ਼ਟ ਕੀਤਾ ਕਿ 7 ਦਿਨ ਦਾ ਸਮਾਂ ਦਿੱਤਾ ਗਿਆ ਸੀ, ਕੱਲ੍ਹ ਪੂਰਾ ਹੋ ਰਿਹਾ ਹੈ — ਸਬੂਤ ਨਾ ਦਿੱਤੇ ਗਏ ਤਾਂ ਕਾਨੂੰਨੀ ਕਾਰਵਾਈ ਕੀਤੀ ਜਾਵੇਗੀ।
ਅੰਤ ਵਿੱਚ ਤਰੁਣ ਚੁੱਘ ਨੇ ਕਿਹਾ ਕਿ ਭਗਵੰਤ ਮਾਨ ਸਾਹਿਬ, ਤੁਹਾਡੇ ਜਾਣ ਦੇ ਮਹੀਨੇ ਗਿਣਤੀ ਦੇ ਬਚੇ ਹਨ। ਪੂਰਾ ਪੰਜਾਬ ਕਹਿ ਰਿਹਾ ਹੈ — Bye Bye ਕੇਜਰੀਵਾਲ, Bye Bye ਭਗਵੰਤ ਮਾਨ, Bye Bye ਆਮ ਆਦਮੀ ਪਾਰਟੀ। 'ਗੱਦਾਰ' ਦੀ ਬਿਆਨਬਾਜ਼ੀ 'ਤੇ ਪਲਟਵਾਰ ਕਰਦਿਆਂ ਉਨ੍ਹਾਂ ਕਿਹਾ ਕਿ ਖ਼ੁਦ ਅਰਵਿੰਦ ਕੇਜਰੀਵਾਲ ਦੇ ਨਾਲ ਅੰਨਾ ਅੰਦੋਲਨ ਨਾਲ ਜੁੜੀ ਪੂਰੀ ਟੀਮ — ਕਿਰਨ ਬੇਦੀ, ਕੁਮਾਰ ਵਿਸ਼ਵਾਸ, ਆਸ਼ੁਤੋਸ਼, ਸ਼ਾਜ਼ੀਆ ਇਲਮੀ, ਸਵਾਤੀ ਮਾਲੀਵਾਲ, ਰਾਘਵ ਚੱਡਾ, ਘੁੱਗੀ ਜੀ ਤੇ ਗੁਰਦਾਸਪੁਰ ਦੇ ਪ੍ਰਦੇਸ਼ ਪ੍ਰਧਾਨ — ਸਾਰੇ ਪਾਰਟੀ ਛੱਡ ਗਏ ਹਨ। ਤਰੁਣ ਚੁੱਘ ਨੇ ਤਿੱਖੇ ਸ਼ਬਦਾਂ ਵਿੱਚ ਕਿਹਾ — "ਪੰਜਾਬ ਤਰਸਤ ਹੈ, ਤੇ ਭਗਵੰਤ ਮਾਨ ਆਕਾਵਾਂ ਦੀ ਆਉ-ਭਗਤ ਵਿੱਚ ਮਸਤ ਹਨ।" ਉਨ੍ਹਾਂ ਪੰਜਾਬ ਦੀ ਜਨਤਾ ਨੂੰ ਅਪੀਲ ਕੀਤੀ ਕਿ ਉਹ ਡਬਲ ਇੰਜਣ ਸਰਕਾਰ ਨੂੰ ਮੌਕਾ ਦੇਵੇ, ਜਿਸ ਤਰ੍ਹਾਂ ਭਾਜਪਾ ਨੇ ਬੀਮਾਰੂ ਰਾਜਾਂ ਨੂੰ ਵਿਕਾਸ ਦਾ ਇੰਜਣ ਬਣਾਇਆ, ਉਸੇ ਤਰ੍ਹਾਂ ਪੰਜਾਬ ਨੂੰ ਵੀ ਮੁੜ ਖ਼ੁਸ਼ਹਾਲ ਅਤੇ ਸੁਰੱਖਿਅਤ ਬਣਾਇਆ ਜਾਵੇਗਾ।
ਭਾਜਪਾ ਦੇ ਸੀਨੀਅਰ ਆਗੂ ਤਰੁਣ ਚੁੱਘ ਨੇ ਪੰਜਾਬ 'ਚ ਕਾਨੂੰਨ ਵਿਵਸਥਾ 'ਤੇ ਜਤਾਈ ਚਿੰਤਾ
NEXT STORY 
