ਮਾਛੀਵਾੜਾ ਸਾਹਿਬ (ਟੱਕਰ) : ਪੰਜਾਬ ਦੀ ਜਵਾਨੀ ਨੂੰ ਨਸ਼ਿਆਂ ਤੋਂ ਬਾਹਰ ਕੱਢਣ ਲਈ ‘ਯੁੱਧ ਨਸ਼ਿਆਂ ਵਿਰੁੱਧ’ ਮੁਹਿੰਮ ਚਲਾ ਕੇ ਹਜ਼ਾਰਾਂ ਨਸ਼ਾ ਤਸਕਰਾਂ ਨੂੰ ਜੇਲ੍ਹਾਂ ਵਿਚ ਡੱਕਣ ਦਾ ਦਾਅਵਾ ਕੀਤਾ ਹੈ ਪਰ ਪੰਜਾਬ ਦੇ ਹਾਲਾਤ ਹੁਣ ਇਹ ਹਨ ਕਿ ਨੌਜਵਾਨ ਤਾਂ ਇੱਕ ਪਾਸੇ ਹੁਣ ਨਾਬਾਲਗ ਬੱਚੇ ਵੀ ਨਸ਼ਿਆਂ ਦੀ ਦਲਦਲ ਵਿਚ ਧਸਦੇ ਨਜ਼ਰ ਆ ਰਹੇ ਹਨ। ਅੱਜ ਮਾਛੀਵਾੜਾ ਸ਼ਹਿਰ ਵਿਚ ਇਕ ਅਜਿਹਾ ਮਾਮਲਾ ਸਾਹਮਣੇ ਆਇਆ ਜਦੋਂ ਇਕ 13 ਸਾਲਾਂ ਨਾਬਾਲਗ ਲੜਕਾ ਨੀਵਾਂ ਬਾਜ਼ਾਰ ਵਿਖੇ ਸਥਿਤ ਸ਼ਿਵ ਮੰਦਰ ’ਚ ਚੋਰੀ ਕਰਨ ਲਈ ਦਾਖਲ ਹੋਇਆ। ਇਹ ਲੜਕਾ ਚੁੰਬਕ ਤੇ ਤਾਰ ਦੀ ਕੁੰਡੀ ਬਣਾ ਕੇ ਗੋਲਕ ’ਚੋਂ ਪੈਸੇ ਚੋਰੀ ਕਰਨ ਲੱਗਾ ਤਾਂ ਅਚਾਨਕ ਨੇੜੇ ਹੀ ਦੁੱਧ ਦੀ ਡੇਅਰੀ ਚਲਾਉਂਦੇ ਸ਼ੈਂਕੀ ਸ਼ਰਮਾ ਅਤੇ ਹੋਰ ਦੁਕਾਨਦਾਰਾਂ ਵਲੋਂ ਚੋਰੀ ਕਰਦਿਆਂ ਇਸ ਨੂੰ ਰੰਗੇ ਹੱਥੀਂ ਕਾਬੂ ਕਰ ਲਿਆ। ਜਦੋਂ ਇਸ ਲੜਕੇ ਦੀ ਉਮਰ ਪੁੱਛੀ ਗਈ ਤਾਂ ਉਸਨੇ 13 ਸਾਲ ਦੱਸੀ ਜੋ ਕਿ ਪ੍ਰਵਾਸੀ ਮਜ਼ਦੂਰਾਂ ਦੀ ਬਸਤੀ ਦਾ ਰਹਿਣ ਵਾਲਾ ਹੈ।
ਨਾਬਾਲਗ ਲੜਕੇ ਦੀ ਤਲਾਸ਼ੀ ਦੌਰਾਨ ਉਸਦੀ ਜੇਬ ’ਚੋਂ ਜੋ ਬਰਾਮਦ ਹੋਇਆ ਤਾਂ ਉੱਥੇ ਖੜ੍ਹੇ ਦੁਕਾਨਦਾਰ ਹੈਰਾਨ ਹੋ ਗਏ ਕਿ ਉਸ ਕੋਲੋਂ ਟੀਕੇ, ਇਕ ਬਿਜਲੀ ਦੀ ਤਾਰ, ਸਿਗਰੇਟ ਦੀਆਂ ਡੱਬੀਆਂ, ਮਾਚਿਸਾਂ ਆਦਿ ਬਰਾਮਦ ਹੋਈਆਂ। ਇਸ ਨਾਬਾਲਗ ਲੜਕੇ ਨੇ ਦੁਕਾਨਦਾਰਾਂ ਨੂੰ ਦੱਸਿਆ ਕਿ ਉਹ ਨਸ਼ੇ ਕਰਨ ਦਾ ਆਦੀ ਹੈ ਜਿਸ ਦੀ ਪੂਰਤੀ ਲਈ ਉਹ ਚੋਰੀ ਕਰਨ ਲਈ ਆਇਆ ਸੀ। ਇਸ ਲੜਕੇ ਨੇ ਦੱਸਿਆ ਕਿ ਉਹ ਮੈਡੀਕਲ ਨਸ਼ਾ ਖਰੀਦਦਾ ਹੈ ਅਤੇ ਫਿਰ ਸਰਕਾਰੀ ਹਸਪਤਾਲ ਵਿਚ ਜਾ ਕੇ ਡਸਟਬੀਨਾਂ ਵਿਚ ਵਰਤੋਂ ਕੀਤੀਆਂ ਪੁਰਾਣੀਆਂ ਸਰਿੰਜਾਂ ਚੁੱਕ ਕੇ ਉਸਦੀ ਵਰਤੋਂ ਕਰ ਨਸ਼ਾ ਕਰਦਾ ਹੈ। ਬਾਂਹ ਵਿਚ ਟੀਕੇ ਲਗਾਉਣ ਲਈ ਉਸ ਨੂੰ ਕਈ ਵਾਰ ਨਾੜ੍ਹਾਂ ਵੀ ਨਹੀਂ ਲੱਭਦੀਆਂ ਜਿਸ ਲਈ ਉਸਨੇ ਬਿਜਲੀ ਦੀ ਤਾਰ ਰੱਖੀ ਹੋਈ ਹੈ ਜੋ ਬਾਂਹ ’ਤੇ ਬੰਨ੍ਹ ਕੇ ਨਾੜ ਲੱਭਦਾ ਹੈ ਅਤੇ ਫਿਰ ਉਸ ਵਿਚ ਮੈਡੀਕਲ ਨਸ਼ਾ ਸਰਿੰਜ ਵਿਚ ਘੋਲ ਕੇ ਟੀਕਾ ਲਗਾਉਂਦਾ ਹੈ। ਇੱਥੇ ਹੀ ਬੱਸ ਨਹੀਂ ਉਹ ਨਸ਼ੇ ਦੀ ਪੂਰਤੀ ਲਈ ਫਲੂਡ ਅਤੇ ਸਲੋਸ਼ਨ ਦੀ ਵਰਤੋਂ ਵੀ ਕਰਦਾ ਹੈ।
ਇਸ 13 ਸਾਲਾ ਨਾਬਾਲਗ ਬੱਚੇ ਨੂੰ ਨਸ਼ਿਆਂ ਦੀ ਦਲਦਲ ਵਿਚ ਧਸਿਆ ਦੇਖ ਕੇ ਲੋਕ ਚਿੰਤਤ ਦਿਖਾਈ ਦਿੱਤੇ ਕਿ ਸਾਡੇ ਪੰਜਾਬ ਦੀ ਆਉਣ ਵਾਲੀ ਪੀੜ੍ਹੀ ਪੜ੍ਹ ਲਿਖ ਕੇ ਦੇਸ਼ ਦੀ ਤਰੱਕੀ ਵਿਚ ਹਿੱਸਾ ਪਾਉਣ ਦੀ ਬਜਾਏ ਕਿਹੜੇ ਮਾੜੇ ਰਾਹਾਂ ’ਤੇ ਤੁਰ ਪਈ ਹੈ। ਨਸ਼ਿਆਂ ਦੀ ਪੂਰਤੀ ਲਈ ਨਾਬਾਲਗ ਬੱਚਾ ਚੋਰੀਆਂ ਦੇ ਨਾਲ-ਨਾਲ ਜ਼ੁਰਮ ਦੇ ਰਸਤੇ ਵੱਲ ਵੀ ਵਧੇਗਾ ਅਤੇ ਜੇਕਰ ਸਰਕਾਰਾਂ ਨੇ ਅਜਿਹੇ ਨਾਬਾਲਗ ਬੱਚਿਆਂ ਨੂੰ ਨਸ਼ਿਆਂ ਤੋਂ ਰੋਕਣ ਲਈ ਢੁੱਕਵੇਂ ਪ੍ਰਬੰਧ ਨਾ ਕੀਤੇ ਤਾਂ ਪੰਜਾਬ ਕਦੇ ਵੀ ਨਸ਼ਾ ਮੁਕਤ ਨਹੀਂ ਹੋ ਸਕਦਾ।
ਮਰੀਜ਼ਾਂ ਲਈ ਵਰਤੋਂ ਕੀਤੀਆਂ ਸੰਰਿਜ਼ਾਂ ਨਾਲ ਨਸ਼ਾ ਕਰਨਾ ਨਾਬਾਲਗ ਦੀ ਜਾਨ ਲਈ ਘਾਤਕ
ਨਸ਼ਾ ਜਿੱਥੇ ਨਾਬਾਲਗ ਲੜਕੇ ਲਈ ਨੁਕਸਾਨਦੇਹ ਹੈ ਉਸ ਤੋਂ ਜ਼ਿਆਦਾ ਮਰੀਜ਼ਾਂ ਲਈ ਵਰਤੋਂ ਕੀਤੀਆਂ ਸਰਿੰਜਾਂ ਨਾਲ ਨਸ਼ਾ ਕਰਨਾ ਇਸਦੀ ਜਾਨ ਲਈ ਬੇਹੱਦ ਘਾਤਕ ਹੈ। ਅਜਿਹੀ ਸਥਿਤੀ ਵਿਚ ਸਰਿੰਜ਼ ਵਰਤਣ ਵਾਲਾ ਇਹ ਨਾਬਾਲਗ ਲੜਕਾ ਐੱਚ.ਆਈ.ਵੀ. ਪੀੜ੍ਹਤ ਤੇ ਹੋਰ ਖਤਰਨਾਕ ਬਿਮਾਰੀਆਂ ਦਾ ਸ਼ਿਕਾਰ ਹੋ ਸਕਦਾ ਹੈ।
ਮੋਹਾਲੀ 'ਚ ਨੌਜਵਾਨ ਦੀ ਸ਼ੱਕੀ ਹਾਲਾਤ 'ਚ ਲਾਸ਼ ਬਰਾਮਦ, ਇਲਾਕੇ 'ਚ ਫੈਲੀ ਸਨਸਨੀ
NEXT STORY 
