ਗੈਜੇਟ ਡੈਸਕ - ਐਪਲ ਹਰ ਸਾਲ ਸਤੰਬਰ ਮਹੀਨੇ 'ਚ ਆਪਣੀ ਨਵੀਂ ਆਈਫੋਨ ਸੀਰੀਜ਼ ਲਾਂਚ ਕਰਦਾ ਹੈ। ਹਾਲਾਂਕਿ ਇਸ ਸਾਲ ਦੇ ਫਲੈਗਸ਼ਿਪ ਫੋਨਾਂ ਦੇ ਲਾਂਚ ਹੋਣ 'ਚ ਅਜੇ ਕੁਝ ਮਹੀਨੇ ਬਾਕੀ ਹਨ, ਪਰ ਹੁਣੇ ਤੋਂ ਹੀ iPhone 18 Pro ਅਤੇ iPhone 18 Pro Max ਬਾਰੇ ਵੱਡੇ ਖੁਲਾਸੇ ਹੋਣੇ ਸ਼ੁਰੂ ਹੋ ਗਏ ਹਨ। ਲੀਕ ਹੋਈ ਜਾਣਕਾਰੀ ਮੁਤਾਬਕ ਐਪਲ ਇਸ ਵਾਰ ਡਿਜ਼ਾਈਨ, ਕੈਮਰਾ ਅਤੇ ਪਰਫਾਰਮੈਂਸ 'ਚ ਕਈ ਵੱਡੇ ਬਦਲਾਅ ਕਰਨ ਦੀ ਤਿਆਰੀ ਕਰ ਰਿਹਾ ਹੈ।
ਸਰੋਤਾਂ ਅਨੁਸਾਰ, iPhone 18 Pro 'ਚ 6.3 ਇੰਚ ਅਤੇ Pro Max 'ਚ 6.9 ਇੰਚ ਦੀ ਡਿਸਪਲੇਅ ਮਿਲ ਸਕਦੀ ਹੈ। ਸਭ ਤੋਂ ਖਾਸ ਗੱਲ ਇਹ ਹੈ ਕਿ ਫੋਨ ਤੋਂ 'ਡਾਇਨਾਮਿਕ ਆਈਲੈਂਡ' ਪੂਰੀ ਤਰ੍ਹਾਂ ਹਟ ਸਕਦਾ ਹੈ ਜਾਂ ਬਹੁਤ ਛੋਟਾ ਹੋ ਸਕਦਾ ਹੈ। ਐਪਲ ਅੰਡਰ-ਡਿਸਪਲੇਅ ਫੇਸ ਆਈਡੀ ਤਕਨੀਕ ਦੀ ਟੈਸਟਿੰਗ ਕਰ ਰਿਹਾ ਹੈ, ਜਿਸ ਨਾਲ ਫੋਨ ਦੇ ਸਾਰੇ ਸੈਂਸਰ ਸਕ੍ਰੀਨ ਦੇ ਹੇਠਾਂ ਹੋਣਗੇ ਅਤੇ ਸੈਲਫੀ ਕੈਮਰੇ ਦਾ ਕੱਟਆਊਟ ਵੀ ਛੋਟਾ ਹੋ ਜਾਵੇਗਾ। ਇਸ ਤੋਂ ਇਲਾਵਾ, ਕੁਝ ਰਿਪੋਰਟਾਂ ਮੁਤਾਬਕ ਕੈਮਰਾ ਸੈੱਟਅੱਪ ਸੈਂਟਰ ਦੀ ਬਜਾਏ ਉੱਪਰ ਖੱਬੇ ਕੋਨੇ ਵੱਲ ਹੋ ਸਕਦਾ ਹੈ, ਜੋ ਇਸ ਨੂੰ ਮੌਜੂਦਾ ਆਈਫੋਨਾਂ ਨਾਲੋਂ ਬਿਲਕੁਲ ਵੱਖਰੀ ਲੁੱਕ ਦੇਵੇਗਾ।
ਫੋਟੋਗ੍ਰਾਫੀ ਦੇ ਸ਼ੌਕੀਨਾਂ ਲਈ iPhone 18 Pro 'ਚ ਵੇਰੀਏਬਲ ਅਪਰਚਰ ਸਿਸਟਮ ਦਿੱਤਾ ਜਾ ਸਕਦਾ ਹੈ। ਇਹ ਸਿਸਟਮ ਲੈਂਸ ਨੂੰ ਰੋਸ਼ਨੀ ਦੇ ਹਿਸਾਬ ਨਾਲ ਫਿਜ਼ੀਕਲ ਪੱਧਰ 'ਤੇ ਐਡਜਸਟ ਕਰਨ ਦੀ ਸਹੂਲਤ ਦੇਵੇਗਾ, ਜਿਸ ਨਾਲ ਘੱਟ ਰੋਸ਼ਨੀ 'ਚ ਸ਼ਾਨਦਾਰ ਫੋਟੋਆਂ ਖਿੱਚੀਆਂ ਜਾ ਸਕਣਗੀਆਂ। ਕੰਪਨੀ ਇਸ ਵਾਰ ਸੈਮਸੰਗ ਤੋਂ ਲਿਆ ਗਿਆ ਨਵਾਂ ਥ੍ਰੀ-ਲੇਅਰ ਸਟੈਕਡ ਇਮੇਜ ਸੈਂਸਰ ਵੀ ਵਰਤ ਸਕਦੀ ਹੈ, ਜੋ ਨੋਇਜ਼ ਨੂੰ ਘਟਾ ਕੇ ਬਿਹਤਰ ਡਾਇਨਾਮਿਕ ਰੇਂਜ ਪ੍ਰਦਾਨ ਕਰੇਗਾ।
ਨਵੀਂ ਸੀਰੀਜ਼ 'ਚ A20 Pro ਚਿੱਪ ਮਿਲਣ ਦੀ ਉਮੀਦ ਹੈ, ਜੋ TSMC ਦੇ ਆਧੁਨਿਕ 2nm ਪ੍ਰੋਸੈਸ ਉਤੇ ਤਿਆਰ ਕੀਤੀ ਜਾਵੇਗੀ। ਇਹ ਚਿੱਪ ਫੋਨ ਦੀ ਪਰਫਾਰਮੈਂਸ ਨੂੰ ਵਧਾਉਣ ਦੇ ਨਾਲ-ਨਾਲ ਬੈਟਰੀ ਦੀ ਖਪਤ ਨੂੰ ਵੀ ਘੱਟ ਕਰੇਗੀ। ਬੈਟਰੀ ਦੀ ਗੱਲ ਕਰੀਏ ਤਾਂ iPhone 18 Pro Max 'ਚ 5,100mAh ਦੀ ਵੱਡੀ ਬੈਟਰੀ ਦਿੱਤੀ ਜਾ ਸਕਦੀ ਹੈ, ਹਾਲਾਂਕਿ ਇਸ ਨਾਲ ਫੋਨ ਦਾ ਵਜ਼ਨ 240 ਗ੍ਰਾਮ ਤੋਂ ਜ਼ਿਆਦਾ ਹੋ ਸਕਦਾ ਹੈ।
ਕੀਮਤ ਬਾਰੇ ਅਜੇ ਕੋਈ ਅਧਿਕਾਰਤ ਖੁਲਾਸਾ ਨਹੀਂ ਹੋਇਆ ਹੈ, ਪਰ ਅੰਦਾਜ਼ਾ ਲਗਾਇਆ ਜਾ ਰਿਹਾ ਹੈ ਕਿ ਐਪਲ ਕੀਮਤਾਂ ਨੂੰ ਪੁਰਾਣੀ ਰੇਂਜ ਵਿੱਚ ਹੀ ਰੱਖਣ ਦੀ ਕੋਸ਼ਿਸ਼ ਕਰੇਗਾ। ਭਾਰਤ 'ਚ iPhone 17 Pro ਦੀ ਕੀਮਤ ਲਗਭਗ 1,34,900 ਰੁਪਏ ਅਤੇ Pro Max ਦੀ 1,49,900 ਰੁਪਏ ਰਹੀ ਹੈ, ਇਸ ਲਈ ਨਵੀਂ ਸੀਰੀਜ਼ ਵੀ ਇਸੇ ਦੇ ਆਲੇ-ਦੁਆਲੇ ਲਾਂਚ ਹੋ ਸਕਦੀ ਹੈ।
ਇਲੈਕਟ੍ਰਿਕ ਸਕੂਟਰਾਂ ਦੀ ਵਿਕਰੀ 'ਚ ਇਸ ਕੰਪਨੀ ਨੇ ਮਾਰੀ ਬਾਜ਼ੀ, ਓਲਾ ਪਛੜਿਆ
NEXT STORY 
