ਆਟੋ ਡੈਸਕ- ਭਾਰਤੀ ਆਟੋਮੋਬਾਈਲ ਬਾਜ਼ਾਰ ਵਿੱਚ ਦੇਸੀ ਕੰਪਨੀ ਮਹਿੰਦਰਾ ਐਂਡ ਮਹਿੰਦਰਾ ਨੇ ਨਵੇਂ ਵਿੱਤੀ ਸਾਲ 2027 ਦੀ ਸ਼ਾਨਦਾਰ ਸ਼ੁਰੂਆਤ ਕੀਤੀ ਹੈ। ਕੰਪਨੀ ਵੱਲੋਂ ਜਾਰੀ ਅੰਕੜਿਆਂ ਅਨੁਸਾਰ, ਅਪ੍ਰੈਲ 2026 ਦੇ ਮਹੀਨੇ ਵਿੱਚ ਗਾਹਕਾਂ ਨੇ ਮਹਿੰਦਰਾ ਦੀਆਂ ਗੱਡੀਆਂ 'ਤੇ ਭਰਪੂਰ ਭਰੋਸਾ ਜਤਾਇਆ ਹੈ, ਜਿਸ ਸਦਕਾ ਕੰਪਨੀ ਨੇ ਸਿਰਫ਼ 30 ਦਿਨਾਂ ਵਿੱਚ 56,331 SUV ਦੀ ਵਿਕਰੀ ਕਰਕੇ ਨਵਾਂ ਰਿਕਾਰਡ ਕਾਇਮ ਕੀਤਾ ਹੈ।
ਸੂਤਰਾਂ ਅਨੁਸਾਰ, ਕੰਪਨੀ ਨੇ ਅਪ੍ਰੈਲ ਮਹੀਨੇ ਦੌਰਾਨ ਕੁੱਲ 94,627 ਗੱਡੀਆਂ ਵੇਚੀਆਂ ਹਨ, ਜੋ ਕਿ ਪਿਛਲੇ ਸਾਲ ਦੇ ਮੁਕਾਬਲੇ ਲਗਭਗ 14 ਫੀਸਦੀ ਜ਼ਿਆਦਾ ਹੈ। ਜੇਕਰ ਐਕਸਪੋਰਟ (ਵਿਦੇਸ਼ਾਂ ਵਿੱਚ ਭੇਜੀਆਂ ਗੱਡੀਆਂ) ਨੂੰ ਵੀ ਜੋੜ ਲਿਆ ਜਾਵੇ ਤਾਂ SUV ਦੀ ਇਹ ਗਿਣਤੀ 57,833 ਤੱਕ ਪਹੁੰਚ ਜਾਂਦੀ ਹੈ।
ਮਹਿੰਦਰਾ ਦੀ ਇਸ ਸਫਲਤਾ ਦੇ ਪਿੱਛੇ ਉਸ ਦੇ ਦਮਦਾਰ ਅਤੇ ਫੀਚਰਜ਼ ਨਾਲ ਲੈਸ ਨਵੇਂ ਮਾਡਲ ਹਨ। ਬਾਜ਼ਾਰ ਵਿੱਚ ਖਾਸ ਤੌਰ 'ਤੇ Scorpio-N, Thar Roxx ਅਤੇ XUV700 ਵਰਗੀਆਂ ਗੱਡੀਆਂ ਦੀ ਮੰਗ ਸਭ ਤੋਂ ਜ਼ਿਆਦਾ ਦੇਖੀ ਜਾ ਰਹੀ ਹੈ। ਕੰਪਨੀ ਮੁਤਾਬਕ ਇਨ੍ਹਾਂ ਗੱਡੀਆਂ ਦੇ ਮਜ਼ਬੂਤ ਡਿਜ਼ਾਈਨ ਅਤੇ ਆਧੁਨਿਕ ਫੀਚਰਜ਼ ਗਾਹਕਾਂ ਨੂੰ ਆਪਣੇ ਵੱਲ ਆਕਰਸ਼ਿਤ ਕਰ ਰਹੇ ਹਨ।
ਸਿਰਫ਼ ਪਰਿਵਾਰਕ ਗੱਡੀਆਂ ਹੀ ਨਹੀਂ, ਸਗੋਂ ਸਾਮਾਨ ਢੋਣ ਵਾਲੀਆਂ ਕਮਰਸ਼ੀਅਲ ਗੱਡੀਆਂ ਦੇ ਖੇਤਰ ਵਿੱਚ ਵੀ ਮਹਿੰਦਰਾ ਨੇ ਮੱਲਾਂ ਮਾਰੀਆਂ ਹਨ। ਅਪ੍ਰੈਲ ਵਿੱਚ ਕੰਪਨੀ ਨੇ 23,427 ਕਮਰਸ਼ੀਅਲ ਗੱਡੀਆਂ ਵੇਚੀਆਂ ਹਨ। ਪਿੰਡਾਂ ਅਤੇ ਛੋਟੇ ਸ਼ਹਿਰਾਂ ਵਿੱਚ ਪਿਕਅੱਪ ਵਾਹਨਾਂ ਅਤੇ ਛੋਟੇ ਟਰੱਕਾਂ ਦੀ ਮੰਗ ਵਿੱਚ ਵੱਡਾ ਉਛਾਲ ਦੇਖਣ ਨੂੰ ਮਿਲਿਆ ਹੈ।
ਕੰਪਨੀ ਦੇ ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਆਉਣ ਵਾਲੇ ਵਿਆਹਾਂ ਅਤੇ ਤਿਉਹਾਰਾਂ ਦੇ ਸੀਜ਼ਨ ਕਾਰਨ ਮੰਗ ਹੋਰ ਵਧਣ ਦੀ ਉਮੀਦ ਹੈ। ਗਾਹਕਾਂ ਦੀ ਸਹੂਲਤ ਲਈ ਕੰਪਨੀ ਹੁਣ ਗੱਡੀਆਂ ਦੀ ਡਿਲੀਵਰੀ ਤੇਜ਼ ਕਰਨ ਅਤੇ ਵੇਟਿੰਗ ਟਾਈਮ ਨੂੰ ਘੱਟ ਕਰਨ 'ਤੇ ਵਿਸ਼ੇਸ਼ ਕੰਮ ਕਰ ਰਹੀ ਹੈ ਤਾਂ ਜੋ ਗਾਹਕਾਂ ਨੂੰ ਆਪਣੀ ਪਸੰਦੀਦਾ ਗੱਡੀ ਲਈ ਜ਼ਿਆਦਾ ਇੰਤਜ਼ਾਰ ਨਾ ਕਰਨਾ ਪਵੇ।
ਮਾਰੂਤੀ ਸੁਜ਼ੂਕੀ ਦੀ ਵਿਕਰੀ 'ਚ ਰਿਕਾਰਡ ਵਾਧਾ, 239,646 ਯੂਨਿਟਾਂ ਤੱਕ ਪਹੁੰਚ ਗਈ
NEXT STORY 
