ਢਾਕਾ (ਆਈਏਐਨਐਸ): ਬੰਗਲਾਦੇਸ਼ ਦੀ ਰਾਜਧਾਨੀ ਢਾਕਾ ਸਮੇਤ ਕਈ ਹਿੱਸਿਆਂ ਵਿੱਚ ਸੀ.ਐਨ.ਜੀ. ਅਤੇ ਰਸੋਈ ਗੈਸ ਦੀ ਭਾਰੀ ਕਿੱਲਤ ਕਾਰਨ ਆਮ ਜਨਜੀਵਨ ਬੁਰੀ ਤਰ੍ਹਾਂ ਪ੍ਰਭਾਵਿਤ ਹੋ ਰਿਹਾ ਹੈ। ਗੈਸ ਦੀ ਸਪਲਾਈ ਨਾ ਹੋਣ ਕਾਰਨ ਸੜਕਾਂ ਤੋਂ ਜਨਤਕ ਟਰਾਂਸਪੋਰਟ ਗਾਇਬ ਹੈ, ਜਿਸ ਕਾਰਨ ਆਮ ਲੋਕਾਂ, ਖਾਸ ਕਰਕੇ ਵਿਦਿਆਰਥੀਆਂ ਅਤੇ ਮਰੀਜ਼ਾਂ ਨੂੰ ਆਪਣੀ ਮੰਜ਼ਿਲ 'ਤੇ ਪਹੁੰਚਣ ਲਈ ਭਾਰੀ ਮੁਸ਼ਕਲਾਂ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ।
ਗੈਸ ਸਟੇਸ਼ਨਾਂ 'ਤੇ ਵਾਹਨ ਚਾਲਕਾਂ ਨੂੰ ਗੈਸ ਲੈਣ ਲਈ ਸਾਰੀ-ਸਾਰੀ ਰਾਤ ਜਾਂ ਕਈ ਵਾਰ ਅਗਲੇ ਦਿਨ ਤੱਕ ਲੰਬੀਆਂ ਕਤਾਰਾਂ ਵਿੱਚ ਖੜ੍ਹਨਾ ਪੈ ਰਿਹਾ ਹੈ। ਇਸ ਸੰਕਟ ਕਾਰਨ ਟਰਾਂਸਪੋਰਟ ਮਾਲਕਾਂ ਨੇ ਆਪਣੇ ਅੱਧੇ ਤੋਂ ਵੱਧ ਵਾਹਨ ਸੜਕਾਂ ਤੋਂ ਹਟਾ ਲਏ ਹਨ। ਸੜਕਾਂ 'ਤੇ ਚੱਲ ਰਹੇ ਕੁਝ ਆਟੋ-ਰਿਕਸ਼ਾ ਚਾਲਕਾਂ ਵੱਲੋਂ ਮਨਮਾਨੇ ਕਿਰਾਏ ਵਸੂਲੇ ਜਾ ਰਹੇ ਹਨ, ਜੋ ਕਿ ਆਮ ਨਾਲੋਂ ਦੁੱਗਣੇ ਤੋਂ ਤਿੱਗਣੇ ਤੱਕ ਹੋ ਗਏ ਹਨ।
ਗੈਸ ਦੀ ਕਮੀ ਦਾ ਅਸਰ ਸਿਰਫ਼ ਟਰਾਂਸਪੋਰਟ ਤੱਕ ਹੀ ਸੀਮਤ ਨਹੀਂ ਹੈ, ਬਲਕਿ ਘਰਾਂ ਦੀਆਂ ਰਸੋਈਆਂ ਵਿੱਚ ਵੀ ਗੈਸ ਦਾ ਪ੍ਰੈਸ਼ਰ ਨਾ ਦੇ ਬਰਾਬਰ ਰਹਿ ਗਿਆ ਹੈ। ਢਾਕਾ ਦੇ ਮੀਰਪੁਰ, ਬਾਡਾ, ਕਲਾਬਾਗਨ ਅਤੇ ਮੁਹੰਮਦਪੁਰ ਵਰਗੇ ਇਲਾਕਿਆਂ ਵਿੱਚ ਲੋਕਾਂ ਦੇ ਚੁੱਲ੍ਹੇ ਕਈ ਦਿਨਾਂ ਤੋਂ ਠੰਢੇ ਪਏ ਹਨ। ਘੱਟ ਆਮਦਨ ਵਾਲੇ ਪਰਿਵਾਰ ਹੁਣ ਲੱਕੜਾਂ ਬਾਲ ਕੇ ਮਿੱਟੀ ਦੇ ਚੁੱਲ੍ਹਿਆਂ 'ਤੇ ਖਾਣਾ ਬਣਾਉਣ ਲਈ ਮਜਬੂਰ ਹਨ, ਜਦਕਿ ਸਮਰੱਥ ਲੋਕ ਮਹਿੰਗੇ ਐਲ.ਪੀ.ਜੀ. ਸਿਲੰਡਰਾਂ ਜਾਂ ਬਿਜਲੀ ਦੇ ਕੁੱਕਰਾਂ ਦੀ ਵਰਤੋਂ ਕਰ ਰਹੇ ਹਨ, ਜਿਸ ਨਾਲ ਉਨ੍ਹਾਂ ਦਾ ਘਰੇਲੂ ਖਰਚਾ ਕਾਫੀ ਵੱਧ ਗਿਆ ਹੈ।
ਜਾਣਕਾਰੀ ਅਨੁਸਾਰ, ਇਹ ਸੰਕਟ 21 ਜੁਲਾਈ ਨੂੰ ਕਾਕਸ ਬਾਜ਼ਾਰ ਵਿੱਚ ਇੱਕ ਫਲੋਟਿੰਗ ਸਟੋਰੇਜ ਅਤੇ ਰੀਗੈਸੀਫਿਕੇਸ਼ਨ ਯੂਨਿਟ (FSRU) ਵਿੱਚ ਲੱਗੀ ਅੱਗ ਕਾਰਨ ਪੈਦਾ ਹੋਇਆ ਹੈ, ਜਿਸ ਨਾਲ ਪਲਾਂਟ ਦਾ ਇੱਕ ਬਾਇਲਰ ਖਰਾਬ ਹੋ ਗਿਆ ਅਤੇ ਕੰਮ ਰੁਕ ਗਿਆ। ਇਸ ਕਾਰਨ ਦੇਸ਼ ਦੀ ਗੈਸ ਸਪਲਾਈ 2,700 ਮਿਲੀਅਨ ਘਣ ਫੁੱਟ ਤੋਂ ਘਟ ਕੇ 2,150 ਮਿਲੀਅਨ ਘਣ ਫੁੱਟ ਰਹਿ ਗਈ ਹੈ, ਜਦਕਿ ਰੋਜ਼ਾਨਾ ਦੀ ਮੰਗ ਲਗਭਗ 3,800 ਮਿਲੀਅਨ ਘਣ ਫੁੱਟ ਹੈ। ਸਪਲਾਈ ਵਿੱਚ ਆਈ ਇਸ ਵੱਡੀ ਗਿਰਾਵਟ ਨੇ ਪੂਰੇ ਦੇਸ਼ ਦੇ ਪ੍ਰਬੰਧ ਨੂੰ ਹਿਲਾ ਕੇ ਰੱਖ ਦਿੱਤਾ ਹੈ।
ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ
For Android:- https://play.google.com/store/apps/details?id=com.jagbani&hl=en
For IOS:- https://itunes.apple.com/in/app/id538323711?mt=8
ਨੋਟ- ਇਸ ਖ਼ਬਰ ਬਾਰੇ ਕੁਮੈਂਟ ਕਰ ਦਿਓ ਰਾਏ।
ਅਮਰੀਕਾ: ਇਡਾਹੋ ਫਾਸਟ-ਫੂਡ ਰੈਸਟੋਰੈਂਟ ਗੋਲੀਬਾਰੀ ਦੇ ਸ਼ੱਕੀ ਨੇ ਖ਼ੁਦ ਨੂੰ ਮਾਰੀ ਸੀ ਗੋਲੀ
NEXT STORY 
