ਵਾਸ਼ਿੰਗਟਨ (ਇੰਟ.)- ਅਮਰੀਕਾ ਦੇ ਰਾਸ਼ਟਰਪਤੀ ਡੋਨਾਲਡ ਟਰੰਪ ਦੀ 2025 ਦੀ ਲਾਜ਼ਮੀ ਵਿੱਤੀ ਰਿਪੋਰਟ ’ਚ ਹੈਰਾਨ ਕਰਨ ਵਾਲੇ ਖੁਲਾਸੇ ਸਾਹਮਣੇ ਆਏ ਹਨ। ਲੱਗਭਗ 927 ਪੰਨਿਆਂ ਦੀ ਇਸ ਰਿਪੋਰਟ ਦੇ ਅਨੁਸਾਰ ਟਰੰਪ ਨੇ ਪਿਛਲੇ ਸਾਲ ਕ੍ਰਿਪਟੋਕਰੰਸੀ ਅਤੇ ਹੋਰ ਕਾਰੋਬਾਰੀ ਗਤੀਵਿਧੀਆਂ ਤੋਂ 1 ਅਰਬ ਡਾਲਰ (ਲੱਗਭਗ 8,500 ਕਰੋੜ ਰੁਪਏ) ਤੋਂ ਵੱਧ ਦੀ ਕਮਾਈ ਕੀਤੀ। ਰਿਪੋਰਟ ਸਾਹਮਣੇ ਆਉਣ ਤੋਂ ਬਾਅਦ ਅਮਰੀਕਾ ਵਿਚ ਹਿੱਤਾਂ ਦੇ ਟਕਰਾਅ ਅਤੇ ਸਿਆਸੀ ਨੈਤਿਕਤਾ ਨੂੰ ਲੈ ਕੇ ਬਹਿਸ ਤੇਜ਼ ਹੋ ਗਈ ਹੈ।
ਟਰੰਪ ਮੀਮ ਕਾਇਨ ਤੋਂ ਹੋਈ ਮੋਟੀ ਕਮਾਈ
ਰਿਪੋਰਟ ਅਨੁਸਾਰ ਟਰੰਪ ਨੂੰ ਉਨ੍ਹਾਂ ਦੇ ‘ਟਰੰਪ ਮੀਮ ਕਾਇਨ’ ਤੋਂ ਹੀ ਲੱਗਭਗ 63.5 ਕਰੋੜ ਡਾਲਰ (ਲੱਗਭਗ 5,400 ਕਰੋੜ ਰੁਪਏ) ਦੀ ਰਾਇਲਟੀ ਮਿਲੀ। ਇਹ ਕਾਇਨ ਉਨ੍ਹਾਂ ਨੇ ਰਾਸ਼ਟਰਪਤੀ ਅਹੁਦਾ ਸੰਭਾਲਣ ਤੋਂ ਕੁਝ ਦਿਨ ਪਹਿਲਾਂ ਲਾਂਚ ਕੀਤਾ ਸੀ। ਹਾਲਾਂਕਿ ਲਾਂਚ ਹੋਣ ਤੋਂ ਬਾਅਦ ਇਸ ਦੀ ਬਾਜ਼ਾਰੀ ਕੀਮਤ ਵਿਚ ਭਾਰੀ ਗਿਰਾਵਟ ਆਈ, ਪਰ ਸ਼ੁਰੂਆਤੀ ਨਿਵੇਸ਼ ਅਤੇ ਪ੍ਰਚਾਰ ਤੋਂ ਟਰੰਪ ਨੂੰ ਜ਼ਬਰਦਸਤ ਮੁਨਾਫ਼ਾ ਹੋਇਆ।
ਪੁੱਤਰਾਂ ਦੀ ਕੰਪਨੀ ਤੋਂ ਵੀ ਮਿਲਿਆ ਮੋਟਾ ਮੁਨਾਫ਼ਾ
ਟਰੰਪ ਨੇ ਆਪਣੇ ਪੁੱਤਰਾਂ ਵੱਲੋਂ ਸਥਾਪਿਤ ਕ੍ਰਿਪਟੋ ਕੰਪਨੀ ‘ਵਰਲਡ ਲਿਬਰਟੀ ਫਾਈਨੈਂਸ਼ੀਅਲ’ ਤੋਂ ਵੀ 50 ਕਰੋੜ ਡਾਲਰ (ਲੱਗਭਗ 4,250 ਕਰੋੜ ਰੁਪਏ) ਤੋਂ ਵੱਧ ਦੀ ਆਮਦਨ ਦਿਖਾਈ ਹੈ। ਇਸ ਕੰਪਨੀ ਵਿਚ ਟਰੰਪ ਪਰਿਵਾਰ ਤੋਂ ਇਲਾਵਾ ਉਨ੍ਹਾਂ ਦੇ ਵਿਸ਼ੇਸ਼ ਦੂਤ ਸਟੀਵ ਵਿਟਕਾਫ ਦੇ ਬੱਚਿਆਂ ਦੀ ਵੀ ਹਿੱਸੇਦਾਰੀ ਦੱਸੀ ਗਈ ਹੈ।
ਪਹਿਲਾਂ ਕ੍ਰਿਪਟੋ ਦੇ ਵਿਰੋਧੀ ਸਨ ਟਰੰਪ
ਦਿਲਚਸਪ ਗੱਲ ਇਹ ਹੈ ਕਿ ਟਰੰਪ ਕਦੇ ਕ੍ਰਿਪਟੋਕਰੰਸੀ ਦੇ ਕੱਟੜ ਆਲੋਚਕ ਰਹੇ ਹਨ। ਸਾਲ 2021 ਵਿਚ ਉਨ੍ਹਾਂ ਨੇ ਬਿਟਕਾਇਨ ਨੂੰ ‘ਧੋਖਾ’ ਅਤੇ ‘ਭਵਿੱਖ ਦਾ ਸੰਕਟ’ ਦੱਸਿਆ ਸੀ ਪਰ 2024 ਦੀ ਚੋਣ ਮੁਹਿੰਮ ਦੌਰਾਨ ਉਨ੍ਹਾਂ ਨੇ ਆਪਣਾ ਰੁਖ ਬਦਲਦਿਆਂ ਅਮਰੀਕਾ ਨੂੰ ‘ਕ੍ਰਿਪਟੋ ਕੈਪੀਟਲ ਆਫ਼ ਦਿ ਪਲੈਨਿਟ’ ਬਣਾਉਣ ਦਾ ਵਾਅਦਾ ਕੀਤਾ। ਰਾਸ਼ਟਰਪਤੀ ਬਣਨ ਤੋਂ ਬਾਅਦ ਉਨ੍ਹਾਂ ਡਿਜੀਟਲ ਐਸੇਟਸ ਦੇ ਵਿਕਾਸ ਨੂੰ ਸਮਰਥਨ ਦੇਣ ਵਾਲਾ ਹੁਕਮ ਵੀ ਜਾਰੀ ਕੀਤਾ।
ਮਾਹਰਾਂ ਨੇ ਨੈਤਿਕਤਾ ’ਤੇ ਚੁੱਕੇ ਸਵਾਲ
ਵ੍ਹਾਈਟ ਹਾਊਸ ਦੇ ਸਾਬਕਾ ਐਥਿਕਸ ਵਕੀਲ ਰਿਚਰਡ ਪੇਂਟਰ ਨੇ ਟਰੰਪ ਦੀ ਕਮਾਈ ਨੂੰ ਅਸਾਧਾਰਨ ਦੱਸਦੇ ਹੋਏ ਇਸ ਨੂੰ ਸਪੱਸ਼ਟ ਹਿੱਤਾਂ ਦਾ ਟਕਰਾਅ ਕਿਹਾ। ਉਨ੍ਹਾਂ ਦਾ ਕਹਿਣਾ ਹੈ ਕਿ ਕਿਸੇ ਮੌਜੂਦਾ ਰਾਸ਼ਟਰਪਤੀ ਦਾ ਆਪਣੇ ਕਾਰੋਬਾਰੀ ਹਿੱਤਾਂ ਤੋਂ ਇੰਨਾ ਵੱਡਾ ਫਾਇਦਾ ਉਠਾਉਣਾ ਬੇਮਿਸਾਲ ਹੈ। ਵੈਲਥ ਮੈਨੇਜਮੈਂਟ ਮਾਹਰ ਵਿਲ ਵਾਕਰ-ਅਰਨੌਟ ਨੇ ਕਿਹਾ ਕਿ ਸਾਬਕਾ ਰਾਸ਼ਟਰਪਤੀ ਜਿਮੀ ਕਾਰਟਰ ਅਤੇ ਜਾਰਜ ਬੁਸ਼ ਨੇ ਆਪਣੇ ਕਾਰੋਬਾਰਾਂ ਨੂੰ ਵੱਖ ਕਰ ਦਿੱਤਾ ਸੀ ਪਰ ਟਰੰਪ ਵੱਖਰੇ ਤਰੀਕੇ ਨਾਲ ਕੰਮ ਕਰ ਰਹੇ ਹਨ।
ਰੀਅਲ ਅਸਟੇਟ ਅਤੇ ਗੋਲਫ਼ ਕਲੱਬਾਂ ਤੋਂ ਵੀ ਕਰੋੜਾਂ ਦੀ ਆਮਦਨ
ਕ੍ਰਿਪਟੋ ਤੋਂ ਇਲਾਵਾ ਟਰੰਪ ਨੇ ਆਪਣੇ ਲਗਜ਼ਰੀ ਰਿਜ਼ਾਰਟ ਅਤੇ ਗੋਲਫ਼ ਕਲੱਬਾਂ ਤੋਂ ਵੀ ਮੋਟੀ ਕਮਾਈ ਕੀਤੀ। ਫਲੋਰਿਡਾ ਸਥਿਤ ‘ਮਾਰ-ਏ-ਲਾਗੋ’ ਕਲੱਬ ਤੋਂ ਉਨ੍ਹਾਂ ਨੂੰ ਲੱਗਭਗ 7.7 ਕਰੋੜ ਡਾਲਰ (ਕਰੀਬ 655 ਕਰੋੜ ਰੁਪਏ) ਅਤੇ ‘ਡੋਰਲ ਗੋਲਫ਼ ਕਲੱਬ’ ਤੋਂ 12.2 ਕਰੋੜ ਡਾਲਰ (ਲੱਗਭਗ 1,037 ਕਰੋੜ ਰੁਪਏ) ਦੀ ਆਮਦਨ ਹੋਈ। ਇਸ ਤੋਂ ਇਲਾਵਾ ਨਿਊ ਜਰਸੀ, ਫਲੋਰਿਡਾ ਅਤੇ ਸਕਾਟਲੈਂਡ ਸਥਿਤ ਗੋਲਫ਼ ਕਲੱਬਾਂ ਤੋਂ ਵੀ ਕਰੋੜਾਂ ਡਾਲਰ ਦੀ ਕਮਾਈ ਦਰਜ ਕੀਤੀ ਗਈ ਹੈ।
ਟਰੰਪ ਬ੍ਰਾਂਡਿਡ ਸਾਮਾਨ ਤੋਂ ਵੀ ਵਰ੍ਹਿਆ ਪੈਸਾ
ਵਿੱਤੀ ਰਿਪੋਰਟ ਵਿਚ ਇਹ ਵੀ ਸਾਹਮਣੇ ਆਇਆ ਹੈ ਕਿ ਟਰੰਪ ਨੇ ਆਪਣੇ ਨਾਂ ’ਤੇ ਵਿਕਣ ਵਾਲੀਆਂ ਘੜੀਆਂ, ਬਾਈਬਲ, ਪ੍ਰਫ਼ਿਊਮ, ਜੁੱਤੀਆਂ ਅਤੇ ਗਿਟਾਰ ਤੋਂ ਵੀ ਲੱਖਾਂ ਡਾਲਰ ਕਮਾਏ। ਸਿਰਫ਼ ਟਰੰਪ ਬ੍ਰਾਂਡਿਡ ਘੜੀਆਂ ਤੋਂ ਹੀ ਕਰੀਬ 47 ਲੱਖ ਡਾਲਰ (ਲੱਗਭਗ 40 ਕਰੋੜ ਰੁਪਏ) ਦੀ ਰਾਇਲਟੀ ਮਿਲੀ।
ਮੇਲਾਨੀਆ ਟਰੰਪ ਨੇ ਵੀ ਕਮਾਏ ਕਰੋੜਾਂ
ਫ਼ਸਟ ਲੇਡੀ ਮੇਲਾਨੀਆ ਟਰੰਪ ਨੇ ਵੀ ਆਪਣੀ ਡਾਕੂਮੈਂਟਰੀ ਅਤੇ ਐੱਨ.ਐੱਫ.ਟੀ. ਦੀ ਵਿਕਰੀ ਤੋਂ ਮੋਟੀ ਆਮਦਨ ਦਰਜ ਕੀਤੀ। ਰਿਪੋਰਟ ਦੇ ਅਨੁਸਾਰ, ਉਨ੍ਹਾਂ ਨੂੰ ਡਾਕੂਮੈਂਟਰੀ ਲਾਇਸੈਂਸ ਸਮਝੌਤੇ ਤੋਂ 1.07 ਕਰੋੜ ਡਾਲਰ (ਕਰੀਬ 91 ਕਰੋੜ ਰੁਪਏ) ਅਤੇ ਐੱਨ.ਐੱਫ.ਟੀ. ਵਿਕਰੀ ਤੋਂ 60 ਲੱਖ ਡਾਲਰ (ਲੱਗਭਗ 51 ਕਰੋੜ ਰੁਪਏ) ਪ੍ਰਾਪਤ ਹੋਏ।
ਟਰੰਪ ਦੀ ਕੁੱਲ ਜਾਇਦਾਦ ’ਚ ਤੇਜ਼ ਉਛਾਲ
ਫ਼ੋਰਬਸ ਮੈਗਜ਼ੀਨ ਦੇ ਅਨੁਸਾ, ਟਰੰਪ ਦੀ ਕੁੱਲ ਜਾਇਦਾਦ ਹੁਣ ਵੱਧ ਕੇ ਲੱਗਭਗ 6 ਅਰਬ ਡਾਲਰ (ਕਰੀਬ 51 ਹਜ਼ਾਰ ਕਰੋੜ ਰੁਪਏ) ਤੱਕ ਪਹੁੰਚ ਗਈ ਹੈ, ਜਦਕਿ ਬਲੂਮਬਰਗ ਇੰਡੈਕਸ ਇਸ ਨੂੰ 7.6 ਅਰਬ ਡਾਲਰ ਭਾਵ ਕਰੀਬ 64 ਹਜ਼ਾਰ ਕਰੋੜ ਰੁਪਏ ਦੱਸਦਾ ਹੈ। ਮਾਹਰਾਂ ਦਾ ਮੰਨਣਾ ਹੈ ਕਿ ਕ੍ਰਿਪਟੋ ਨਿਵੇਸ਼ ਅਤੇ ਡਿਜੀਟਲ ਕਾਰੋਬਾਰ ਨੇ ਟਰੰਪ ਦੀ ਜਾਇਦਾਦ ਵਿਚ ਸਭ ਤੋਂ ਵੱਡਾ ਵਾਧਾ ਕੀਤਾ ਹੈ।
ਵ੍ਹਾਈਟ ਹਾਊਸ ਨੇ ਦੋਸ਼ਾਂ ਨੂੰ ਕੀਤਾ ਖਾਰਜ
ਵ੍ਹਾਈਟ ਹਾਊਸ ਨੇ ਇਨ੍ਹਾਂ ਕਮਾਈਆਂ ਨੂੰ ਲੈ ਕੇ ਕਿਸੇ ਵੀ ਤਰ੍ਹਾਂ ਦੇ ਹਿੱਤਾਂ ਦੇ ਟਕਰਾਅ ਤੋਂ ਇਨਕਾਰ ਕੀਤਾ ਹੈ। ਡਿਪਟੀ ਪ੍ਰੈੱਸ ਸਕੱਤਰ ਐਨਾ ਕੇਲੀ ਨੇ ਕਿਹਾ ਕਿ ਰਾਸ਼ਟਰਪਤੀ ਟਰੰਪ ਨੇ ਅਮਰੀਕਾ ਨੂੰ “ਦੁਨੀਆ ਦੀ ਕ੍ਰਿਪਟੋ ਰਾਜਧਾਨੀ” ਬਣਾਉਣ ਦੀ ਦਿਸ਼ਾ ਵਿਚ ਕੰਮ ਕੀਤਾ ਹੈ। ਉਨ੍ਹਾਂ ਦਾ ਦਾਅਵਾ ਹੈ ਕਿ ਟਰੰਪ ਪਰਿਵਾਰ ਨੇ ਕਦੇ ਵੀ ਨਿੱਜੀ ਫਾਇਦੇ ਲਈ ਸਰਕਾਰੀ ਅਹੁਦੇ ਦੀ ਵਰਤੋਂ ਨਹੀਂ ਕੀਤੀ।
ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ
For Android:- https://play.google.com/store/apps/details?id=com.jagbani&hl=en
For IOS:- https://itunes.apple.com/in/app/id538323711?mt=8
ਨੋਟ- ਇਸ ਖ਼ਬਰ ਬਾਰੇ ਕੁਮੈਂਟ ਕਰ ਦਿਓ ਰਾਏ।
ਅਫ਼ਗਾਨਿਸਤਾਨ 'ਚ ਆਇਆ 5.3 ਤੀਬਰਤਾ ਵਾਲਾ ਭੂਚਾਲ, ਜੰਮੂ-ਕਸ਼ਮੀਰ 'ਚ ਵੀ ਮਹਿਸੂਸ ਕੀਤੇ ਗਏ ਝਟਕੇ
NEXT STORY 
