ਲਾਹੌਰ: ਪਾਕਿਸਤਾਨ ਦੇ ਪੰਜਾਬ ਸੂਬੇ 'ਚ ਚਨਾਬ ਦਰਿਆ ਦੇ ਨੇੜਲੇ ਇਲਾਕਿਆਂ ਲਈ ਹੜ੍ਹ ਦੀ ਚਿਤਾਵਨੀ ਜਾਰੀ ਕੀਤੀ ਗਈ ਹੈ। ਇਹ ਅਲਰਟ ਭਾਰਤ ਵੱਲੋਂ ਜੰਮੂ-ਕਸ਼ਮੀਰ ਦੇ ਰਿਆਸੀ ਜ਼ਿਲ੍ਹੇ 'ਚ ਸਥਿਤ ਸਲਾਲ ਡੈਮ ਦੇ ਸਪਿਲਵੇਅ ਗੇਟ ਖੋਲ੍ਹੇ ਜਾਣ ਦੀਆਂ ਰਿਪੋਰਟਾਂ ਤੋਂ ਬਾਅਦ ਜਾਰੀ ਕੀਤਾ ਗਿਆ ਹੈ।
21 ਤੋਂ 30 ਮਈ ਤੱਕ ਖ਼ਤਰਾ
ਪੰਜਾਬ ਐਮਰਜੈਂਸੀ ਸਰਵਿਸਿਜ਼ ਵਿਭਾਗ ਦੇ ਸਕੱਤਰ ਰਿਜ਼ਵਾਨ ਨਸੀਰ ਅਨੁਸਾਰ, ਭਾਰਤੀ ਪਾਸੇ ਤੋਂ ਪਾਣੀ ਦੀ ਆਮਦ ਵਧਣ ਕਾਰਨ 21 ਤੋਂ 30 ਮਈ ਦੇ ਵਿਚਕਾਰ ਹੜ੍ਹ ਵਰਗੀ ਸਥਿਤੀ ਪੈਦਾ ਹੋ ਸਕਦੀ ਹੈ। ਸਿਆਲਕੋਟ ਦੀ ਡਿਪਟੀ ਕਮਿਸ਼ਨਰ ਸਬਾ ਅਸਗਰ ਅਲੀ ਨੇ ਦੱਸਿਆ ਕਿ ਭਾਰਤ ਵੱਲੋਂ ਡੈਮ ਦੀ ਸਫਾਈ (Desilting) ਲਈ ਪਾਣੀ ਛੱਡੇ ਜਾਣ ਕਾਰਨ ਚਨਾਬ ਦਰਿਆ 'ਚ ਪਾਣੀ ਦਾ ਪੱਧਰ 2 ਤੋਂ 3 ਮੀਟਰ ਤੱਕ ਵਧ ਸਕਦਾ ਹੈ।
ਪ੍ਰਸ਼ਾਸਨ ਵੱਲੋਂ ਸਖ਼ਤ ਕਦਮ
ਸਿਆਲਕੋਟ ਦੇ ਮਰਾਲਾ ਹੈੱਡਵਰਕਸ ਤੇ ਖਾਸ ਕਰ ਕੇ ਬਜਵਤ ਵਰਗੇ ਨੇੜਲੇ ਇਲਾਕਿਆਂ 'ਚ ਹਾਈ ਅਲਰਟ ਜਾਰੀ ਕਰ ਦਿੱਤਾ ਗਿਆ ਹੈ। ਪ੍ਰਸ਼ਾਸਨ ਨੇ ਹੇਠ ਲਿਖੇ ਨਿਰਦੇਸ਼ ਜਾਰੀ ਕੀਤੇ ਹਨ:
ਦਰਿਆ ਦੀ 24 ਘੰਟੇ ਨਿਗਰਾਨੀ ਲਈ ਜ਼ਿਲ੍ਹਾ ਐਮਰਜੈਂਸੀ ਕੰਟਰੋਲ ਰੂਮ ਸਰਗਰਮ ਕਰ ਦਿੱਤੇ ਗਏ ਹਨ।
ਲੋਕਾਂ ਦੀ ਦਰਿਆ ਦੇ ਕੰਢੇ ਜਾਣ 'ਤੇ ਪਾਬੰਦੀ ਲਗਾ ਦਿੱਤੀ ਗਈ ਹੈ।
ਲੋਕਾਂ ਨੂੰ ਆਪਣੇ ਪਸ਼ੂ ਦਰਿਆ ਦੇ ਅੰਦਰ ਨਾ ਲਿਜਾਣ ਦੀ ਹਦਾਇਤ ਕੀਤੀ ਗਈ ਹੈ।
ਕਿਉਂ ਖੋਲ੍ਹੇ ਗਏ ਡੈਮ ਦੇ ਗੇਟ?
ਸਰੋਤਾਂ ਅਨੁਸਾਰ, 690 ਮੈਗਾਵਾਟ ਦਾ ਸਲਾਲ ਪਾਵਰ ਪ੍ਰੋਜੈਕਟ ਚਨਾਬ ਦਰਿਆ 'ਤੇ ਬਣਿਆ ਹੋਇਆ ਹੈ। ਭਾਰੀ ਮਾਨਸੂਨ ਅਤੇ ਭੂਗੋਲਿਕ ਕਾਰਨਾਂ ਕਰ ਕੇ ਇਸ ਡੈਮ ਦੇ ਭੰਡਾਰ 'ਚ ਭਾਰੀ ਮਾਤਰਾ 'ਚ ਗਾਰ (Silt) ਜਮ੍ਹਾ ਹੋ ਗਈ ਸੀ, ਜਿਸ ਕਾਰਨ ਇਸ ਦੀ ਸਟੋਰੇਜ ਸਮਰੱਥਾ 96 ਫੀਸਦੀ ਤੱਕ ਘਟ ਗਈ ਸੀ। ਇਸੇ ਕਾਰਨ ਐੱਨ.ਐੱਚ.ਪੀ.ਸੀ. (NHPC) ਵੱਲੋਂ ਡੈਮ ਦੀ ਕਾਰਜਕੁਸ਼ਲਤਾ ਨੂੰ ਬਰਕਰਾਰ ਰੱਖਣ ਲਈ ਸਿਲਟ ਮੈਨੇਜਮੈਂਟ ਪਲਾਨ ਤਹਿਤ ਇਹ ਪਾਣੀ ਛੱਡਿਆ ਗਿਆ ਹੈ। ਇਹ ਘਟਨਾਕ੍ਰਮ ਅਜਿਹੇ ਸਮੇਂ ਵਾਪਰ ਰਿਹਾ ਹੈ ਜਦੋਂ ਸਿੰਧ ਜਲ ਸਮਝੌਤੇ (Indus Water Treaty) ਨੂੰ ਲੈ ਕੇ ਦੋਵਾਂ ਦੇਸ਼ਾਂ ਵਿਚਾਲੇ ਤਣਾਅ ਵਾਲੀ ਸਥਿਤੀ ਬਣੀ ਹੋਈ ਹੈ।
ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ
For Android:- https://play.google.com/store/apps/details?id=com.jagbani&hl=en
For IOS:- https://itunes.apple.com/in/app/id538323711?mt=8
For Whatsapp:- https://whatsapp.com/channel/0029Va94hsaHAdNVur4L170e
ਮੰਦਭਾਗੀ ਖ਼ਬਰ : ਐਵਰੈਸਟ ਦੇ ਸਿਖਰ ਤੋਂ ਉਤਰਦੇ ਸਮੇਂ ਦੋ ਭਾਰਤੀ ਪਰਬਤਾਰੋਹੀਆਂ ਦੀ ਮੌਤ
NEXT STORY 
