ਵਾਸ਼ਿੰਗਟਨ (ਭਾਸ਼ਾ)— ਅਮਰੀਕਾ ਦੇ ਮਿਸੌਰੀ ਸੂਬੇ ਦੀ ਇਕ ਝੀਲ ਵਿਚ ਸੈਲਾਨੀਆਂ ਨਾਲ ਭਰੀ ਕਿਸ਼ਤੀ ਡੁੱਬ ਜਾਣ ਕਾਰਨ 11 ਲੋਕਾਂ ਦੇ ਮਰਨ ਦੀ ਖਬਰ ਹੈ। ਸਥਾਨਕ ਸ਼ੇਰਿਫ ਨੇ ਇਹ ਜਾਣਕਾਰੀ ਦਿੱਤੀ। ਸਟੋਨ ਕਾਊਂਟੀ ਸ਼ੇਰਿਫ ਡਾਉਗ ਰੇਡਰ ਨੇ ਕਿਹਾ ਕਿ ਬ੍ਰਾਨਸਨ ਦੀ ਟੇਬਲ ਰੌਕ ਝੀਲ ਵਿਚ ਸੈਲਾਨੀਆਂ ਨਾਲ ਭਰੀ ਕਿਸ਼ਤੀ ਡੁੱਬ ਗਈ। ਇਸ ਹਾਦਸੇ ਦੇ ਸ਼ਿਕਾਰ 5 ਲੋਕ ਹਾਲੇ ਵੀ ਲਾਪਤਾ ਹਨ ਜਦਕਿ 7 ਹੋਰ ਨੂੰ ਹਸਪਤਾਲ ਵਿਚ ਭਰਤੀ ਕਰਵਾਇਆ ਗਿਆ ਹੈ। ਕੌਕਸ ਮੈਡੀਕਲ ਸੈਂਟਰ ਬ੍ਰਾਨਸਨ ਦੇ ਬੁਲਾਰੇ ਬ੍ਰੈਂਡੀ ਕਲਿੰਫਟਨ ਨੇ ਕਿਹਾ ਕਿ ਹਾਦਸੇ ਦੇ ਕੁਝ ਸਮੇਂ ਬਾਅਦ ਹੀ 4 ਬਾਲਗ ਅਤੇ 3 ਬੱਚੇ ਹਸਪਤਾਲ ਲਿਆਂਦੇ ਗਏ। ਉਨ੍ਹਾਂ ਨੇ ਕਿਹਾ ਕਿ ਇਨ੍ਹਾਂ ਵਿਚੋਂ 2 ਬਾਲਗਾਂ ਦੀ ਹਾਲਤ ਗੰਭੀਰ ਹੈ। ਜਦਕਿ ਬਾਕੀਆਂ ਨੂੰ ਮਾਮੂਲੀ ਸੱਟਾਂ ਲੱਗੀਆਂ ਹਨ।
ਰੇਡਰ ਨੇ ਕਿਹਾ ਕਿ ਤੂਫਾਨੀ ਮੌਸਮ ਕਾਰਨ ਇਹ ਕਿਸ਼ਤੀ ਡੁੱਬੀ। ਉਨ੍ਹਾਂ ਨੇ ਦੱਸਿਆ ਕਿ ਝੀਲ ਵਿਚ ਮੌਜੂਦ ਇਕ ਹੋਰ ਕਿਸ਼ਤੀ ਸੁਰੱਖਿਅਤ ਕਿਨਾਰੇ ਤੱਕ ਪਹੁੰਚ ਗਈ। ਮਿਸੌਰੀ ਦੇ ਸਪਰਿੰਗਫੀਲਡ ਵਿਚ ਕੌਮੀ ਮੌਸਮ ਵਿਭਾਗ ਦੇ ਮੌਸਮ ਵਿਗਿਆਨੀ ਸਟੀਵ ਲਿੰਡਨਬਰਗ ਨੇ ਕਿਹਾ ਕਿ ਏਜੰਸੀ ਨੇ ਬ੍ਰਾਨਸਨ ਇਲਾਕੇ ਵਿਚ ਵੀਰਵਾਰ ਸ਼ਾਮ ਨੂੰ ਭਿਆਨਕ ਤੂਫਾਨ ਦੀ ਚਿਤਾਵਨੀ ਦਿੱਤੀ ਸੀ। ਇਸ ਦੌਰਾਨ ਕਰੀਬ 95 ਕਿਲੋਮੀਟਰ ਪ੍ਰਤੀ ਘੰਟੇ ਦੀ ਗਤੀ ਨਾਲ ਹਵਾ ਚੱਲਣ ਦਾ ਅਨੁਮਾਨ ਜ਼ਾਹਰ ਕੀਤਾ ਗਿਆ ਸੀ। ਉਨ੍ਹਾਂ ਨੇ ਕਿਹਾ,''ਇਹ ਇਕ ਚਿਤਾਵਨੀ ਹੈ, ਜਿਸ ਵਿਚ ਲੋਕਾਂ ਨੂੰ ਸ਼ਰਣ ਲੈਣ ਲਈ ਕਿਹਾ ਗਿਆ ਹੈ।'' ਰੇਡਰ ਨੇ ਕਿਹਾ ਕਿ ਲਾਪਤਾ ਲੋਕਾਂ ਦੀ ਤਲਾਸ਼ ਲਈ ਗੋਤਾਖੋਰਾਂ ਦੀਆਂ ਕਈ ਟੀਮਾਂ ਲੱਗੀਆਂ ਹੋਈਆਂ ਹਨ।
ਪਾਕਿ-ਅਮਰੀਕੀ ਪਿਓ-ਪੁੱਤ ਨੂੰ ਗੈਰਕਾਨੂੰਨੀ ਸਾਮਾਨ ਬਰਾਮਦ ਕਰਨ 'ਤੇ ਜੇਲ
NEXT STORY 
