ਲੁਧਿਆਣਾ (ਤਰੁਣ): 14 ਸਾਲ ਦੀ ਲੜਕੀ ਨੂੰ ਵਰਗਲਾ ਕੇ ਭਜਾ ਲੈ ਜਾਣ ਸਮੇਤ ਜਿਣਸੀ ਸ਼ੋਸ਼ਣ ਕਰਨ ਦਾ ਇਕ ਮਾਮਲਾ ਸਾਹਮਣੇ ਆਇਆ ਹੈ। ਥਾਣਾ ਡਵੀਜ਼ਨ ਨੰਬਰ 5 ਦੀ ਪੁਲਸ ਨੇ ਸਖ਼ਤ ਕਾਰਵਾਈ ਕਰਦੇ ਹੋਏ 22 ਸਾਲਾ ਮੁਲਜ਼ਮ ਕਾਸ਼ੀਰਾਮ ਖਿਲਾਫ ਵੱਖ-ਵੱਖ ਅਪਰਾਧਿਕ ਧਾਰਾਵਾਂ ਸਮੇਤ ਪੋਕਸੋ ਐਕਟ ਦੇ ਅਧੀਨ ਕੇਸ ਦਰਜ ਕੀਤਾ ਹੈ।
ਲੜਕੀ ਦੀ ਮਾਂ ਨੇ ਦੱਸਿਆ ਕਿ ਉਹ ਆਪਣੇ ਪਤੀ ਅਤੇ 3 ਬੱਚਿਆਂ ਦੇ ਨਾਲ ਬੱਸ ਸਟੈਂਡ ਦੇ ਨੇੜੇ ਰਹਿੰਦੀ ਹੈ। 3 ਬੱਚਿਆਂ ਵਿਚ 14 ਸਾਲਾ ਬੇਟੀ ਸਭ ਤੋਂ ਛੋਟੀ ਹੈ। ਉਹ ਘਰ ਦੇ ਨੇੜੇ ਇਕ ਟੈਂਟ ਹਾਊਸ ਵਿਚ ਸਾਫ-ਸਫਾਈ ਦਾ ਕੰਮ ਕਰਦੀ ਹੈ। ਪਿਛਲੇ ਦਿਨੀਂ ਉਸ ਦੀ ਤਬੀਅਤ ਠੀਕ ਨਹੀਂ ਸੀ। ਉਸ ਦੀ ਬੇਟੀ ਨੇ ਕਿਹਾ ਕਿ ਉਹ ਟੈਂਟ ਹਾਊਸ ਵਿਚ ਜਾ ਕੇ ਸਾਫ-ਸਫਾਈ ਕਰ ਦੇਵੇਗੀ। ਜਿਸ ਤੋਂ ਬਾਅਦ ਉਹ ਸਾਫ-ਸਫਾਈ ਕਰਨ ਲਈ ਚਲੀ ਗਈ ਪਰ ਦੇਰ ਸ਼ਾਮ ਤਕ ਉਸ ਦੀ ਬੇਟੀ ਵਾਪਸ ਨਹੀਂ ਪਰਤੀ ਤਾਂ ਉਸ ਨੇ ਟੈਂਟ ਹਾਊਸ ਦੇ ਮਾਲਕ ਨਾਲ ਮੋਬਾਈਲ 'ਤੇ ਗੱਲ ਕੀਤੀ ਤਾਂ ਪਤਾ ਲੱਗਾ ਕਿ ਉਸ ਦੀ ਬੇਟੀ ਸਾਫ-ਸਫਾਈ ਕਰਕੇ ਦੁਪਹਿਰ ਨੂੰ ਹੀ ਜਾ ਚੁੱਕੀ ਹੈ। ਜਿਸ ਤੋਂ ਬਾਅਦ ਉਸ ਨੇ ਆਪਣੇ ਪਤੀ ਅਤੇ ਦਿਓਰ ਨੂੰ ਬੇਟੀ ਬਾਰੇ ਦੱਸਿਆ। ਪਰਿਵਾਰ ਨੇ ਮਿਲ ਕੇ ਬੇਟੀ ਦੀ ਹਰ ਜਗ੍ਹਾ ਤਲਾਸ਼ ਕੀਤੀ ਤਾਂ ਪਤਾ ਲੱਗਾ ਕਿ ਉਨ੍ਹਾਂ ਦੇ ਹੀ ਗੁਆਂਢ ਵਿਚ ਰਹਿਣ ਵਾਲਾ 22 ਸਾਲਾ ਕਾਸ਼ੀ ਰਾਮ (ਨਿਵਾਸੀ ਪਿੰਡ ਬੰਦਾ ਜ਼ਿਲ੍ਹਾ ਛਤਰਪੁਰ, ਮੱਧ ਪ੍ਰਦੇਸ਼) ਉਸ ਦੀ ਨਾਬਾਲਗ ਬੇਟੀ ਨੂੰ ਵਰਗਲਾ ਕੇ ਭਜਾ ਕੇ ਲੈ ਗਿਆ ਹੈ। ਛਾਨਬੀਨ ਕਰਨ 'ਤੇ ਪਤਾ ਲੱਗਾ ਕਿ ਉਕਤ ਮੁਲਜ਼ਮ ਉਸ ਦੀ ਬੇਟੀ ਦਾ ਜਿਣਸੀ ਸ਼ੋਸ਼ਣ ਵੀ ਕਰ ਚੁੱਕਾ ਹੈ, ਜਿਸ ਤੋਂ ਬਾਅਦ ਉਨ੍ਹਾਂ ਨੇ ਇਲਾਕਾ ਪੁਲਸ ਨੂੰ ਸ਼ਿਕਾਇਤ ਦਿੱਤੀ।
ਜਾਂਚ ਅਧਿਕਾਰੀ ਪਰਮਜੀਤ ਸਿੰਘ ਨੇ ਦੱਸਿਆ ਕਿ ਮੁਲਜ਼ਮ ਕਾਸ਼ੀਰਾਮ 3-4 ਮਹੀਨੇ ਪਹਿਲਾਂ ਪੀੜਤਾ ਦੇ ਘਰ ਦੇ ਨੇੜੇ ਕਿਰਾਏਦਾਰ ਸੀ। ਜਿੱਥੇ ਦੋਹਾਂ ਦੀ ਜਾਣ-ਪਛਾਣ ਹੋਈ। ਜਿਸ ਤੋਂ ਬਾਅਦ ਕਾਸ਼ੀਰਾਮ ਨੇ ਆਪਣੇ ਗੰਦੇ ਮਨਸੂਬਿਆਂ ਨੂੰ ਅੰਜਾਮ ਦਿੱਤਾ ਹੈ। ਫਿਲਹਾਲ ਪੁਲਸ ਨੇ ਹੋਰ ਅਪਰਾਧਿਕ ਧਾਰਾਵਾਂ ਦੇ ਤਹਿਤ ਪੋਕਸੋ ਐਕਟ ਦੇ ਅਧੀਨ ਮੁਲਜ਼ਮ ਕਾਸ਼ੀਰਾਮ ਖਿਲਾਫ ਕੇਸ ਦਰਜ ਕਰ ਲਿਆ ਹੈ। ਮੁਲਜ਼ਮ ਦੀ ਭਾਲ ਵਿਚ ਪੁਲਸ ਛਾਪੇਮਾਰੀ ਕਰ ਰਹੀ ਹੈ।
ਰਿਸ਼ਵਤ ਲੈਂਦਾ ਸਿਕਿਓਰਿਟੀ ਗਾਰਡ ਰੰਗੇ ਹੱਥੀਂ ਕਾਬੂ
NEXT STORY 
