ਨਵੀਂ ਦਿੱਲੀ— ਸ਼੍ਰੀਨਗਰ ਦਾ ਸਫਰ ਕਰਨ ਵਾਲੇ ਹਵਾਈ ਮੁਸਾਫਰਾਂ ਲਈ ਵੱਡੀ ਰਾਹਤ ਦੀ ਖਬਰ ਹੈ। ਸਰਕਾਰੀ ਜਹਾਜ਼ ਕੰਪਨੀ ਏਅਰ ਇੰਡੀਆ ਨੇ ਆਪਣੇ ਕਿਰਾਇਆਂ 'ਤੇ ਇਕ ਲਿਮਟ ਲਗਾ ਦਿੱਤੀ ਹੈ। ਹੁਣ ਸ਼੍ਰੀਨਗਰ ਜਾਣ ਵਾਲੀ ਤੇ ਉੱਥੋਂ ਆਉਣ ਵਾਲੀ ਕਿਸੇ ਵੀ ਸਰਕਾਰੀ ਫਲਾਈਟ ਦਾ ਕਿਰਾਇਆ 15 ਅਗਸਤ 2019 ਤਕ 9,500 ਰੁਪਏ ਤੋਂ ਉੱਪਰ ਨਹੀਂ ਜਾਵੇਗਾ। ਇਸ ਦੀ ਜਾਣਕਾਰੀ ਏਅਰ ਇੰਡੀਆ ਦੇ ਬੁਲਾਰੇ ਧਨੰਜੈ ਕੁਮਾਰ ਨੇ ਦਿੱਤੀ। ਉਨ੍ਹਾਂ ਕਿਹਾ ਕਿ ਮੌਜੂਦਾ ਹਾਲਾਤ ਨੂੰ ਦੇਖਦੇ ਹੋਏ ਸਰਕਾਰੀ ਜਹਾਜ਼ ਕੰਪਨੀ ਨੇ ਇਹ ਫੈਸਲਾ ਕੀਤਾ ਹੈ।ਉੱਥੇ ਹੀ, ਕੰਪਨੀ ਨੇ ਸ਼੍ਰੀਨਗਰ ਤੋਂ ਦਿੱਲੀ ਲਈ ਟਿਕਟ 6,715 ਰੁਪਏ ਅਤੇ ਦਿੱਲੀ ਤੋਂ ਸ਼੍ਰੀਨਗਰ ਲਈ ਕਿਰਾਇਆ ਘਟਾ ਕੇ 6,899 ਰੁਪਏ ਕਰ ਦਿੱਤਾ ਹੈ।
ਜ਼ਿਕਰਯੋਗ ਹੈ ਕਿ ਅਮਰਨਾਥ ਯਾਤਰੀਆਂ ਤੇ ਟੂਰਿਸਟਾਂ ਨੂੰ ਜਲਦ ਤੋਂ ਜਲਦ ਕਸ਼ਮੀਰ ਛੱਡਣ ਦੇ ਸਰਕਾਰੀ ਹੁਕਮਾਂ ਮਗਰੋਂ ਸ਼੍ਰੀਨਗਰ ਤੋਂ ਫਲਾਈਟਸ ਦੇ ਕਿਰਾਇਆਂ 'ਚ ਭਾਰੀ ਉਛਾਲ ਆ ਗਿਆ ਸੀ। ਸ਼੍ਰੀਨਗਰ ਤੋਂ ਜੰਮੂ, ਦਿੱਲੀ ਜਾਂ ਦੂਜੇ ਸਥਾਨਾਂ ਲਈ ਸਭ ਫਲਾਈਟਸ ਦੀਆਂ ਟਿਕਟਾਂ ਬੁੱਕ ਹੋਣ ਅਤੇ ਕੁਝ ਹੀ ਸੀਟਾਂ ਬਚਣ ਕਾਰਨ ਹਵਾਈ ਮੁਸਾਫਰਾਂ ਨੂੰ ਵੱਡੀ ਕੀਮਤ ਚੁਕਾਣੀ ਪੈ ਰਹੀ ਸੀ। ਇਸ 'ਤੇ ਸ਼ਹਿਰੀ ਹਵਾਬਾਜ਼ੀ ਮੰਤਰਾਲਾ ਨੇ ਸਖਤੀ ਅਪਣਾਈ ਹੈ। ਸਰਕਾਰ ਨੇ ਜਹਾਜ਼ ਕੰਪਨੀਆਂ ਨੂੰ ਵਧਦੇ ਕਿਰਾਏ 'ਤੇ ਜਲਦ ਤੋਂ ਜਲਦ ਲਗਾਮ ਲਾਉਣ ਲਈ ਕਿਹਾ ਹੈ।
ਸ਼ਨੀਵਾਰ 6,216 ਹਵਾਈ ਮੁਸਾਫਰਾਂ ਨੇ ਸ਼ੀਨਗਰ ਤੋਂ ਉਡਾਣ ਭਰੀ ਸੀ, ਜਿਨ੍ਹਾਂ 'ਚੋਂ 387 ਯਾਤਰੀਆਂ ਨੂੰ ਹਵਾਈ ਫੌਜ ਦੇ ਚਾਰ ਜਹਾਜ਼ਾਂ ਜ਼ਰੀਏ ਜੰਮੂ, ਪਠਾਨਕੋਟ ਤੇ ਹਿੰਡਨ ਉਤਰਾਇਆ ਗਿਆ ਸੀ। ਅੱਤਵਾਦੀ ਹਮਲਿਆਂ ਦੀ ਖੁਫੀਆ ਜਾਣਕਾਰੀ ਦੇ ਮੱਦੇਨਜ਼ਰ ਸੂਬਾ ਪ੍ਰਸ਼ਾਸਨ ਨੇ ਸਾਰੇ ਟੂਰਿਸਟਾਂ ਤੇ ਸ਼ਰਧਾਲੂਆਂ ਨੂੰ ਜਲਦ ਤੋਂ ਜਲਦ ਕਸ਼ਮੀਰ ਘਾਟੀ ਤੋਂ ਬਾਹਰ ਜਾਣ ਦੀ ਸਲਾਹ ਦਿੱਤੀ ਹੈ। ਇਸ ਕਾਰਨ ਹਵਾਈ ਅੱਡੇ 'ਤੇ ਭਾਰੀ ਗਿਣਤੀ 'ਚ ਯਾਤਰੀਆਂ ਦੀ ਭੀੜ ਉਮੜ ਰਹੀ ਹੈ ਅਤੇ ਹਵਾਈ ਟਿਕਟਾਂ ਦੀ ਕੀਮਤ ਅਸਮਾਨ ਛੂ ਰਹੀ ਹੈ। ਇਸ ਵਿਚਕਾਰ ਸਰਕਾਰੀ ਜਹਾਜ਼ ਕੰਪਨੀ ਵੱਲੋਂ ਆਪਣੀਆਂ ਫਲਾਈਟਸ ਦੇ ਕਿਰਾਇਆਂ ਦੀ ਲਿਮਟ 9,500 ਰੁਪਏ ਤਕ ਨਿਰਧਾਰਤ ਕਰਨ ਨਾਲ ਸ਼੍ਰੀਨਗਰ ਹਵਾਈ ਅੱਡੇ ਤੋਂ ਉਡਾਣ ਭਰਨ ਵਾਲੇ ਹਵਾਈ ਮੁਸਾਫਰਾਂ ਨੂੰ ਵੱਡੀ ਰਾਹਤ ਮਿਲੇਗੀ।
ਭਾਰਤੀ ਸੈਨਾ ਦੀ ਜਵਾਬੀ ਕਾਰਵਾਈ, ਕੇਰਨ ਸੈਕਟਰ 'ਚ ਪਾਕਿ ਦੇ 7 ਕਮਾਂਡੋ ਢੇਰ
NEXT STORY