ਨੈਸ਼ਨਲ ਡੈਸਕ - ਕੇਰਲ ਦੇ ਚੋਟਾਨਿਕਾਰਾ ਦੇ ਪੈਲੇਸ ਸਕੁਏਅਰ ਦੇ ਇੱਕ ਘਰ ਵਿੱਚ ਇੱਕ ਮਨੁੱਖੀ ਖੋਪੜੀ ਅਤੇ ਹੱਡੀਆਂ ਮਿਲੀਆਂ ਹਨ। ਇਹ ਮਨੁੱਖੀ ਪਿੰਜਰ ਘਰ ਦੇ ਅੰਦਰ ਫਰਿੱਜ ਵਿੱਚ ਰੱਖੇ ਹੋਏ ਸਨ। ਸੂਚਨਾ ਮਿਲਣ ਦੇ ਬਾਅਦ ਮੌਕੇ 'ਤੇ ਪੁੱਜੀ ਪੁਲਸ ਨੇ ਇਨ੍ਹਾਂ ਹੱਡੀਆਂ ਨੂੰ ਕਬਜ਼ੇ 'ਚ ਲੈ ਕੇ ਮਾਮਲੇ ਦੀ ਜਾਂਚ ਸ਼ੁਰੂ ਕਰ ਦਿੱਤੀ ਹੈ। ਪੁਲਸ ਨੇ ਇਨ੍ਹਾਂ ਹੱਡੀਆਂ ਦੇ ਸੈਂਪਲ ਲੈ ਕੇ ਫੋਰੈਂਸਿਕ ਲੈਬ ਵਿੱਚ ਭੇਜ ਦਿੱਤੇ ਹਨ। ਅੰਦਾਜ਼ਾ ਲਗਾਇਆ ਜਾ ਰਿਹਾ ਹੈ ਕਿ ਇਸ ਵਿਅਕਤੀ ਦਾ ਕੁਝ ਸਾਲ ਪਹਿਲਾਂ ਕਤਲ ਹੋਇਆ ਹੋ ਸਕਦਾ ਹੈ। ਦੱਸਿਆ ਜਾ ਰਿਹਾ ਹੈ ਕਿ ਇਹ ਘਰ ਇਕ 74 ਸਾਲਾ ਡਾਕਟਰ ਦਾ ਹੈ ਅਤੇ ਉਹ ਕਰੀਬ 20 ਸਾਲਾਂ ਤੋਂ ਇਸ ਘਰ ਨੂੰ ਲਾਵਾਰਿਸ ਛੱਡ ਕੇ ਵਯਟਿੱਲਾ ਵਿਚ ਰਹਿ ਰਿਹਾ ਹੈ।
ਪੁਲਸ ਮੁਤਾਬਕ ਸਥਾਨਕ ਲੋਕਾਂ ਨੇ ਇਸ ਘਰ ਦੇ ਅੰਦਰ ਕੁਝ ਗੜਬੜ ਹੋਣ ਦੇ ਡਰੋਂ ਪੁਲਸ ਨੂੰ ਸ਼ਿਕਾਇਤ ਦਿੱਤੀ ਸੀ। ਇਸ ਸ਼ਿਕਾਇਤ 'ਤੇ ਪੁਲਸ ਨੇ ਮੌਕੇ 'ਤੇ ਪਹੁੰਚ ਕੇ ਘਰ ਦੀ ਜਾਂਚ ਕੀਤੀ। ਇਸ ਦੌਰਾਨ ਖੁਲਾਸਾ ਹੋਇਆ ਕਿ 14 ਏਕੜ ਜ਼ਮੀਨ ਵਿੱਚ ਬਣੇ ਇਸ ਘਰ ਵਿੱਚ ਬਿਜਲੀ ਦਾ ਕੁਨੈਕਸ਼ਨ ਨਹੀਂ ਹੈ। ਘਰ ਅੰਦਰੋਂ ਫਰਿੱਜ ਮਿਲਿਆ। ਇਸ ਫਰਿੱਜ ਵਿੱਚ ਵੀ ਕੋਈ ਕੰਪ੍ਰੈਸਰ ਨਹੀਂ ਲਗਾਇਆ ਗਿਆ ਸੀ। ਫਰੀਜ਼ਰ ਖੋਲ੍ਹਣ 'ਤੇ ਅੰਦਰ ਤਿੰਨ ਪੈਕਟਾਂ 'ਚ ਮਨੁੱਖੀ ਖੋਪੜੀ ਅਤੇ ਹੱਡੀਆਂ ਮਿਲੀਆਂ। ਪੁਲਸ ਨੂੰ ਸ਼ੱਕ ਹੈ ਕਿ ਇੱਥੇ ਕੋਈ ਕਾਲਾ ਜਾਦੂ ਜਾਂ ਕੋਈ ਹੋਰ ਗੈਰ-ਕਾਨੂੰਨੀ ਗਤੀਵਿਧੀ ਹੋ ਸਕਦੀ ਹੈ।
20 ਸਾਲ ਤੋਂ ਬੰਦ ਸੀ ਘਰ
ਇਸ ਗਤੀਵਿਧੀ ਦੌਰਾਨ ਕਤਲ ਦੀ ਘਟਨਾ ਵੀ ਵਾਪਰ ਸਕਦੀ ਹੈ। ਕਰੀਬ 20 ਸਾਲਾਂ ਤੋਂ ਇਹ ਘਰ ਬੰਦ ਹੋਣ ਕਾਰਨ ਆਸ-ਪਾਸ ਦੇ ਲੋਕਾਂ ਨੂੰ ਵੀ ਇਸ ਬਾਰੇ ਜ਼ਿਆਦਾ ਜਾਣਕਾਰੀ ਨਹੀਂ ਹੈ। ਪੁਲਸ ਮੁਤਾਬਕ ਫਿਲਹਾਲ ਇਸ ਘਰ ਦੇ ਮਾਲਕ 74 ਸਾਲਾ ਡਾਕਟਰ ਫਿਲਿਪ ਜੌਨ ਨੂੰ ਸੂਚਿਤ ਕੀਤਾ ਗਿਆ ਹੈ। ਉਸ ਨੇ ਦੱਸਿਆ ਕਿ ਉਸ ਦੇ ਬੱਚੇ ਵਿਦੇਸ਼ ਰਹਿੰਦੇ ਸਨ। ਹੁਣ ਪੁਲਸ ਉਸ ਤੋਂ ਇਸ ਘਰ ਅਤੇ ਇਸ ਘਰ ਵਿੱਚੋਂ ਮਿਲੀਆਂ ਹੱਡੀਆਂ ਦੇ ਸਬੰਧ ਵਿੱਚ ਪੁੱਛਗਿੱਛ ਕਰ ਰਹੀ ਹੈ। ਇਸ ਘਰ ਸਬੰਧੀ ਗੁਆਂਢੀ ਲੋਕਾਂ ਤੋਂ ਵੀ ਪੁੱਛਗਿੱਛ ਕੀਤੀ ਗਈ ਹੈ। ਪਤਾ ਲੱਗਾ ਹੈ ਕਿ ਮਕਾਨ ਮਾਲਕ ਦੇ ਨਾ ਆਉਣ ਕਾਰਨ ਇਸ ਘਰ ਵਿੱਚ ਸਮਾਜ ਵਿਰੋਧੀ ਅਨਸਰਾਂ ਦਾ ਜਮਾਵੜਾ ਲੱਗ ਗਿਆ ਸੀ।
ਪਿੰਜਰ ਦੀ ਪਛਾਣ ਕਰਨ ਵਿੱਚ ਲੱਗੀ ਪੁਲਸ
ਫਿਲਹਾਲ ਵਾਰਡ ਦੇ ਕੌਂਸਲਰ ਦੀ ਸ਼ਿਕਾਇਤ 'ਤੇ ਪੁਲਸ ਨੇ ਅਣਪਛਾਤੇ ਵਿਅਕਤੀ ਖਿਲਾਫ ਸਬੰਧਤ ਧਾਰਾਵਾਂ ਤਹਿਤ ਮਾਮਲਾ ਦਰਜ ਕਰ ਲਿਆ ਹੈ। ਹੁਣ ਪੁਲਸ ਇਸ ਪਿੰਜਰ ਦੀ ਪਛਾਣ ਕਰਨ ਦੀ ਕੋਸ਼ਿਸ਼ ਕਰ ਰਹੀ ਹੈ। ਮੁੱਢਲੀ ਜਾਂਚ ਤੋਂ ਬਾਅਦ ਪੁਲਿਸ ਨੇ ਦੱਸਿਆ ਕਿ ਕਤਲ ਦੀ ਇਹ ਘਟਨਾ ਕੁਝ ਸਾਲ ਪਹਿਲਾਂ ਦੀ ਹੋ ਸਕਦੀ ਹੈ। ਅਜਿਹੇ 'ਚ ਪਿਛਲੇ 8-10 ਸਾਲਾਂ 'ਚ ਸਾਹਮਣੇ ਆਏ ਲਾਪਤਾ ਮਾਮਲਿਆਂ ਦੀ ਵੀ ਜਾਂਚ ਕੀਤੀ ਜਾ ਰਹੀ ਹੈ। ਏਰਨਾਕੁਲਮ ਦਿਹਾਤੀ ਪੁਲਿਸ ਮੁਖੀ ਵੈਭਵ ਸਕਸੈਨਾ ਨੇ ਦੱਸਿਆ ਕਿ ਇਸ ਸਬੰਧੀ ਮਾਮਲਾ ਦਰਜ ਕਰ ਲਿਆ ਗਿਆ ਹੈ। ਇਸ ਸਬੰਧੀ ਕਈ ਤੱਥ ਸਾਹਮਣੇ ਆਏ ਹਨ ਪਰ ਇਨ੍ਹਾਂ ਦੀ ਪੁਸ਼ਟੀ ਲਈ ਫੋਰੈਂਸਿਕ ਰਿਪੋਰਟ ਦੀ ਉਡੀਕ ਹੈ। ਪੁਲਿਸ ਜਲਦੀ ਹੀ ਇਸ ਮਾਮਲੇ ਦਾ ਖੁਲਾਸਾ ਕਰੇਗੀ।
ਕੇਂਦਰੀ ਤੇ ਰਾਜ ਸੂਚਨਾ ਕਮਿਸ਼ਨਾਂ ’ਚ ਖਾਲੀ ਅਸਾਮੀਆਂ ਨੂੰ ਲੈ ਕੇ ਸੁਪਰੀਮ ਕੋਰਟ ਨਾਰਾਜ਼
NEXT STORY 
