ਇੰਟਰਨੈਸ਼ਨਲ ਡੈਸਕ- ਸ਼੍ਰੀਲੰਕਾ 'ਚ ਆਏ ਅਚਾਨਕ ਹੜ੍ਹ ਅਤੇ ਚੱਕਰਵਾਤ ‘ਡਿਟਵਾ’ ਨਾਲ ਪੈਦਾ ਹੋਈਆਂ ਗੰਭੀਰ ਸਥਿਤੀਆਂ ਵਿਚ ਫਸੇ ਲੋਕਾਂ ਲਈ ਭਾਰਤ ਨੇ ਤੁਰੰਤ ਮਦਦ ਦਾ ਹੱਥ ਵਧਾਇਆ ਹੈ। ਭਾਰਤੀ ਹਵਾਈ ਫ਼ੌਜ ਦਾ ਸੀ-130 ਜਹਾਜ਼ ਸ਼ੁੱਕਰਵਾਰ ਦੇਰ ਰਾਤ ਕੋਲੰਬੋ ਪਹੁੰਚਿਆ, ਜੋ ਆਪਣੇ ਨਾਲ ਜ਼ਰੂਰੀ ਖਾਦ ਸਮੱਗਰੀ ਅਤੇ ਸਫ਼ਾਈ ਸਬੰਧੀ ਰਾਹਤ ਸਾਮਾਨ ਲੈ ਕੇ ਆਇਆ ਸੀ। ਜਹਾਜ਼ ਦਾ ਕੋਲੰਬੋ ਦੇ ਬੰਡਾਰਨਾਇਕੇ ਅੰਤਰਰਾਸ਼ਟਰੀ ਹਵਾਈ ਅੱਡੇ ‘ਤੇ ਭਾਰਤੀ ਹਾਈ ਕਮਿਸ਼ਨ ਅਤੇ ਸ਼੍ਰੀਲੰਕਨ ਏਅਰ ਫੋਰਸ ਦੇ ਅਧਿਕਾਰੀਆਂ ਵੱਲੋਂ ਸਵਾਗਤ ਕੀਤਾ ਗਿਆ। ਭਾਰਤ ਨੇ ਸ਼ੁੱਕਰਵਾਰ ਨੂੰ ‘ਆਪਰੇਸ਼ਨ ਸਾਗਰ ਬੰਧੂ’ ਸ਼ੁਰੂ ਕੀਤਾ, ਜਿਸ ਦੇ ਤਹਿਤ ਪਹਿਲੀ ਰਾਹਤ ਖੇਪ ਭਾਰਤੀ ਜਲ ਸੈਨਾ ਦੇ ਜਹਾਜ਼ ਵਾਹਕ ਪੋਤ ਆਈਐੱਨਐੱਸ ਵਿਕਰਾਂਤ ਅਤੇ ਆਈਐੱਨਐੱਸ ਉਦਯਗਿਰੀ ਰਾਹੀਂ ਸ਼੍ਰੀਲੰਕਾ ਭੇਜੀ ਗਈ।
ਤਬਾਹੀ ਦਾ ਕਹਿਰ—69 ਮੌਤਾਂ, 34 ਲਾਪਤਾ
ਚੱਕਰਵਾਤ ‘ਡਿਟਵਾ’ ਕਾਰਨ ਸ਼੍ਰੀਲੰਕਾ 'ਚ ਭਾਰੀ ਬਾਰਿਸ਼, ਹੜ੍ਹ ਅਤੇ ਜ਼ਮੀਨ ਖਿਸਕਣ ਹੋਏ ਹਨ। ਸ਼ਨੀਵਾਰ ਸਵੇਰੇ ਤੱਕ 69 ਲੋਕਾਂ ਦੀ ਮੌਤ ਦੀ ਪੁਸ਼ਟੀ, 34 ਤੋਂ ਵੱਧ ਲਾਪਤਾ ਅਤੇ 2 ਲੱਖ ਤੋਂ ਵੱਧ ਲੋਕ ਪ੍ਰਭਾਵਿਤ (61,000 ਤੋਂ ਵੱਧ ਪਰਿਵਾਰ) ਹੋਏ ਹਨ। ਅਧਿਕਾਰੀਆਂ ਦੇ ਮੁਤਾਬਕ ਮੌਤਾਂ ਦਾ ਅੰਕੜਾ ਹੋਰ ਵੱਧ ਸਕਦਾ ਹੈ, ਕਿਉਂਕਿ ਕੇਂਡੀ ਜ਼ਿਲ੍ਹੇ 'ਚ ਇਕੱਲੇ 50 ਤੋਂ ਵੱਧ ਮੌਤਾਂ ਦੀਆਂ ਖਬਰਾਂ ਹਨ, ਜਿਨ੍ਹਾਂ ਦੀ ਅਧਿਕਾਰਕ ਪੁਸ਼ਟੀ ਬਾਕੀ ਹੈ।
ਕਈ ਜ਼ਿਲ੍ਹਿਆਂ 'ਚ ਭਾਰੀ ਤਬਾਹੀ
ਬੈਡੁੱਲਾ ਜ਼ਿਲ੍ਹਾ ਜ਼ਮੀਨ ਖਿਸਕਣ ਨਾਲ ਸਭ ਤੋਂ ਵੱਧ ਪ੍ਰਭਾਵਿਤ ਰਿਹਾ। 35 ਤੋਂ ਜ਼ਿਆਦਾ ਦੀ ਮੌਤ ਹੋ ਗਈ ਹੈ। ਚੱਕਰਵਾਤ 'ਡਿਟਵਾ' ਕਾਰਨ ਪਏ ਮੀਂਹ ਨਾਲ ਸਾਰੇ ਵੱਡੇ ਤਲਾਬਾਂ ਅਤੇ ਨਦੀਆਂ 'ਚ ਪਾਣੀ ਦੀ ਲੈਵਲ ਖਤਰਨਾਕ ਤਰੀਕੇ ਨਾਲ ਵਧ ਰਿਹਾ ਹੈ ਅਤੇ ਅਧਿਕਾਰੀਆਂ ਨੇ ਲੋਕਾਂ ਨੂੰ ਚਿਤਾਵਨੀ ਦਿੰਦੇ ਹੋਏ ਸੁਰੱਖਿਆ ਥਾਵਾਂ 'ਤੇ ਜਾਣ ਲਈ ਕਿਹਾ ਹੈ। ਮੌਸਮ ਬਿਊਰੋ ਨੇ ਕਿਹਾ ਕਿ 200 ਮਿਲੀਮੀਟਰ ਤੋਂ ਵੱਧ ਹੋਰ ਬਾਰਿਸ਼ ਦੀ ਸੰਭਾਵਨਾ ਹੈ, ਹਾਲਾਂਕਿ 'ਡਿਟਵਾ' ਸ਼ਨੀਵਾਰ ਦੇਰ ਰਾਤ ਤੱਕ ਦੇਸ਼ ਤੋਂ ਬਾਹਰ ਚਲਾ ਜਾਵੇਗਾ। ਸ਼੍ਰੀਲੰਕਾ ਦੇ ਕਰੀਬ 35 ਫੀਸਦੀ ਇਲਾਕਿਆਂ 'ਚ ਸ਼ੁੱਕਰਵਾਰ ਸਵੇਰ ਤੋਂ ਬਿਜਲੀ ਨਹੀਂ ਹੈ, ਜਿਸ ਨਾਲ ਸਰਕਾਰੀ ਬਿਜਲੀ ਕੰਪਨੀ ਸੀਲੋਨ ਇਲੈਕਟ੍ਰੀਸਿਟੀ ਬੋਰਡ ਦੇ ਕਰੀਬ 70 ਲੱਖ ਲੋਕ ਪ੍ਰਭਾਵਿਤ ਹੋਏ ਹਨ। ਲਗਾਤਾਰ ਬਾਰਿਸ਼ ਅਤੇ ਹੜ੍ਹ ਕਾਰਨ ਬਿਜਲੀ ਬਹਾਲ ਕਰਨ ਦੇ ਕੰਮ 'ਚ ਰੁਕਾਵਟ ਆ ਰਹੀ ਹੈ।
MP ; ਪੁਲਸ ਸਟੇਸ਼ਨ 'ਚ ਪੁਜਾਰੀ ਨੂੰ ਮਾਰੇ ਥੱਪੜ ! ਡੱਡੂਆਂ ਵਾਂਗ ਮਰਵਾਈਆਂ ਗਈਆਂ ਛਾਲਾਂ, ਵੀਡੀਓ ਵਾਇਰਲ
NEXT STORY 
